1. ¿Xí raquiin gonyno par labúu guilaano ló xtzú Jehová?

 ÓRNI la Biblia rasetlaa de xtzú Jehová, radudyni diitz órni Jehová guinitló xienemig né órni salaabu xcudxbu. Ló dzú ni see Jehová buny castigar tipnés gudx (Is. 13:1, 6; Ezeq. 13:5; Sof. 1:8). «Xtzú Jehová» ni mápa mer guidxin salóni né Babilonia la Grande né saloxni ló Armagedón. Par labúu guilaano dzúcu non tzoʼno puext desde nigoreʼ. Scú láani, Jesús goniʼ que «guirá ór non tzoʼno puext» órni guidxin «gran tribulación», modcu bidudybu diitz que raquiin tzoʼno puext (Luc. 12:40; Mat. 24:21).

2. ¿Xigony nigolú rasac guisuidyno Primera a Tesalonicenses?

² Ló Primera a Tesalonicenses, apóstol Pablo biquiimbu xidal comparaciones par gacnéni cristianos tzoʼyibu puext órni guidxin xtzú Jehová. Pablo gon que cayatz xiroʼ tiemp par ñony castigar Dios buñ (2 Tes. 2:1-3). Per goniʼbu que ñonyibu pensary que xtzú Jehová nadxinni ló stoib dzúcu. Lóono láaca non guisobno consejcu. Ganno de xi láani goniʼbu de 1) ximod guidxin xtzú Jehová, 2) chú layibu diti salaa né 3) xi raquiin gonyno par tzoʼno puext.

3. ¿Xí radudy diitz que xtzú Jehová sadxinni xomod toib buñ gobáan? (Láaca bibiʼ retrat ni sieed).

³ «Xomod radxin toib buñ gobáan gueʼel» (1 Tes. 5:2). Ndeʼ nac primer comparación ni bisetlaa Pablo ni gac órni guidxin xtzú Jehová. Buñ gobáan rac naguelyibu par cuanyibu, né rabanyibu gueʼel, órni diti noʼ chú cabés layibu. Scúca xtzú Jehová sadxinni tiptisi. Né buñ sadziguiaʼ portín diti cabésyibu láani, sigory cristianos ni rasuidy xinésni sadziguiaʼno ximod gacni. Per lóono diti sanitlóno, buñ mal ngú ni sanitló.

4. ¿Ximod sadxin xtzú Jehová xomod xoʼob toib buñgonaʼ ni ma gaal xiin?

 ⁴ «Xomod órni ma bidxin xoʼob toib buñgonaʼ ni ma gaal xiin» (1 Tes. 5:3). Toib buñgonaʼ ni cabés gál xpadaʼ diti nanbu pu ór guioʼob lainybu. Per nanbu que sadxin dzú sal xpadaʼbu, né órni ral toib badaʼ tisintiempsi rálbu né nacni toib galrrioʼob rodann né diti noʼ chú labúu guicaa loni. Scúca, ná diti nanno xipa dzú né ór, órni saló xtzú Jehová, nandxichno que sadxinni. Nanno que tisintiempsi sanitlóbu buñ mal, né diti salaayibu.

5. ¿Xí radudy diitz que gran tribulación nacni xomod órni cayoní?

⁵ Xomod órni cayoní. Ló ni rion comparación ni bisetlaa Pablo, goniʼbu stoib de buñ gobáan ni rabann gueʼel per nigoreʼ moda bitzaʼbu ladni. Rolooyni rony compararbu xtzú Jehová xomod órni cayoní (1 Tes. 5:4). Órni buñ gobáan cabann rialadxbu xi ór ni cayonybu láani. Sigory diti radudyibu cuent ma cayoní, né galnaní ñony que stipnés buñ nabiʼ xi láani cayonyibu. Moda scúca sac órni guidxin gran tribulación. Buñ ni rony nadxiʼin gueʼel xomod buñ gobáan, né buñ ni ragoʼ guic gony cós mal sadxin midid sareʼni xilat. Lóono diti nacno suusi layibu, raslooyno que noʼno puext órni guidxin xtzú Jehová. ¿Ximod? Cueʼno tiplad nitisi cós ni diti rioladx Jehová né gonyno rutirigaʼlni lóono gonyno xinésni, né saano ló galnigolú (Efes. 5:8-12). Pablo raquiin xchop comparación ro rasetlabu xi clas buñ diti salaa ló xtzú rodann Jehová.

6. ¿Xí radudy diitz que casi guirá buñ natiasy? (1 Tesalonicenses 5:6, 7).

⁶ «Guirá ni raisy» (bíil 1 Tesalonicenses 5:6, 7). Pablo goniʼ que buñ  ni diti salaa ló xtzú Jehová nacyibu buñ ni natiasy. Órni toib buñ natiasy diti radudybu cuent xi noʼ roloo ro naxbu nili radudybu cuent ximod radudy ór. Diti nanbu xitcal né ranit xcalrriembu. Scú rac ló sentido espiritual: casi guirá buñ natiasy (Rom. 11:8). Diti radudybu cuent ma nabanyno «ló dzú ni ma guidubylagaʼ» né que gran tribulación ma noʼni gaxtiguié. Órni rac galnadx ló guidopynac Gudxlio, noʼ ni raxal bisaló né rioladxyibu ganyibu xi láani gony Gobierno xtuny Dios. Per xidalyibu radxin midid rareʼgan, né raisyibu stoib. Né dada noʼ buñ ni rony crer ló día de juicio, per ronyibu pensary que dzúcu cayaclani (2 Ped. 3:3, 4). Per lóono nanno que conforma cadudy dzú nigolú rasac diti gaisyno.

7. ¿Xigony tipnés buñ ni guinitló nacyibu xomod buñ ni casoch?

⁷ «Guirá ni rasoch».  Apóstol Pablo buny compararbu buñ ni guinitló xomod buñ ni casoch. Buñ ni casoch moda ranit xcalrrien, né diti nanbu xipa mod gonybu toib cós. Scú láani, buñ mal diti rasobyibu ni cayaiby Dios layibu né cós ni ronyibu rinéni layibu par guinitlóyibu. Per apóstol Pablo radudy consej a cristianos que coʼyibu xcalrrienyibu né naniʼ tzoʼ xpensaryibu (1 Tes. 5:6). Toib biblista goniʼ que órni buñ diti casoch radudyni diitz que nacbu buñ nadaʼa, né diti cuensósi rony né guirá ni coʼno guicno gonyno labúu gonyno láani xinésni. Per ¿xigony raquiin gacno buñdzuu? Portín diti nagan tzoʼ buñ lad tipnés partid o lad stipnés cós. Láaca conforma cabigax buñ ló xtzú Jehová sioʼ más ni sakíil buñ par tzoʼ lad partid. Per diti noʼ xi portín tzoʼno ló galrrasaʼ xi láani guicapyno layibu portín espíritu xtuny Dios sacnéni lóono ganno xi láani gonyno né sacnéni lóono gonyno xinésni (Luc. 12:11, 12).

8. Mod ná 1 Tesalonicenses 5:8, ¿xí láani raquiin gonyno par tzoʼno naní né coʼno xcalrrienno? (Láaca bibiʼ retrat).

⁸ «Gapno coraza […] né casco». Pablo bitzak lóono xomod soldad ni noʼ naniʼ né nap armadura (bíil 1 Tesalonicenses 5:8). Órni rac guerr toib soldad non tzoʼ puext. Ngúca raquiin gonyno. Raslooyno que noʼno puext par xtzú Jehová pal rapno coraza de fe né galnadxiʼ, né casco de esperanza. Guirá cualidades reʼ nigolú racnéni.

9. ¿Ximod fe rap lóono?

⁹ Mod gon coraza xcalnabany soldad, fe né galnadxiʼ rapni xcalnabanyno ni nac simbólico. Guirá cualidades reʼ racnéni lóono gonyno xchiin Jehová, né guicanalno Jesús. Né xcalrracné fe nandxichno que Jehová radudy xcalnasác guirá buñ ni rayopy láabu né guidopy xcalnabany (Heb. 11:6). Láaca fe rachiinni lóono, dipa guisianno Jesús ni nac Líder xtunyno, ná racalóno xidal clas galnagan. Par labúu gac nadip fe xtunyno né guicalóno prueby, guibiʼno xi láani buny herman par dipa bisianyibu Jehová, ná cualóyibu persecución né godudyibu ló galsii. Né par diti guisobladxno gapno cós ni rasac labúu guisuʼno tipnés ejemplos de herman ni rioʼ conforme né ni nap né ragoʼyibu Gobierno xtuny Dios primer lagary. b

10. ¿Ximod racné lóono galnadxiʼ ni napno Dios né galnadxiʼ ni napno buñ?

¹⁰ Par diti gaisyno né coʼno xcalrrienno  láaca raquiin gapno galnadxiʼ (Mat. 22:37-39). Por ejemplo, galnadxiʼ ni napno Dios racnéni lóono guinino xtiitzbu (2 Tim. 1:7, 8). Nadxiʼno buñ ni diti rony crer ni ronyno crer, por ngú ronyno rutirigaʼlni lóono par gaibyno láabu diitz sacró ni sieed de Dios né ronyno láani por teléfono o raxelno guiich lóoyibu. Per rabésno que toibtica dzú guitzaʼyibu mod nacyibu, né gonyibu xinésni (Ezeq. 18:27, 28).

11. ¿Ximod racné xcalnadxiʼ herman lóono? (1 Tesalonicenses 5:11).

¹¹ Láaca ronladxno xhermanno, né raslooyno láani órni rony animarno saʼno (bíil 1 Tesalonicenses 5:11). Soldad ni riee guerr toibsi racnéyibu saʼyibu. Per órni noʼyibu ló toib guerr labúu cueʼ heridyibu xcompañeryibu; diti nompa sonyibu láani. Né scúca diti nompa sonyno mal xhermanno né diti sonyno mal xhermanno ná bunyibu mal lóono (1 Tes. 5:13, 15). Stoib mod ni raslooyno que ronladxno xhermanno, láani ngú gapno respet ni rasanir lainy congregación (1 Tes. 5:12). Gonyno pensary ló congregación de Tesalónica. Órni Pablo bicaʼ guiich reʼ, congregación yása guisaʼ tobiz. Sigory ancianos diti nan ximod gonyibu xchiinyibu né nachéyibu, per non ñap buñ respet layibu. Conforma cabigax gran tribulación, desde nigoreʼ caquiinno xcalrracné ancianos ni noʼ lainy congregación, sigory ma diti labúu saninéno herman ni noʼ central mundial né sucursal, né ma diti labúu guisanésyibu lóono. Por ngú desde nigoreʼ non gandxiʼno né gapno respet ancianos ni noʼ lainy congregación, gac nitisi gac raquiin coʼno xcalrrienno, né diti guibiʼno pu cachéyibu. Xalagary ngú Jehová caquiimbu Cristo par guisanésbu ancianos ni noʼ lainy congregación.

12. ¿Ximod ran esperanza xpensaryno?

¹² Xomodca rap casco guic soldad, esperanza de salvación ranni xpensaryno. Órni ronyno pensary ló esperanza ni napno, radudyno cuent que guirá ni  radudy gudxliogoxreʼ diti noʼ pu raquiinni (Filip. 3:8). Esperanza reʼ láaca rasialdóni xcalnabanyno. Ngú ni gosaclóo Wallace né Laurinda, ni noʼ África. Ló tzón xomalsi, toibticayibu goity bixios né stoibcu goity xinaʼ. Né ma diti labúu goyeeyibu xcudxyibu par niguenyibu xfamilyibu xtol galguitz COVID-19. Láabu nábu: «Esperanza ni guiáscu gueʼet nigolú racnéni naʼ. Dipa rooni pensary ximod bibanyibu último dzú ni ma gaitybu, xalagary ngú roni pensary ximod sabanyibu primer dzú ló Gudxlio copy. Esperanza reʼ racnéni naʼ par tzoʼya sacró. Nga racné naʼ par diti tzoʼya nabann.

13. ¿Xí labúu gonyno par guidudy Jehová espíritu santo xtuny lóono?

¹³ «Diti guisioʼyto xquii espíritu» (1 Tes. 5:19). Pablo buny comparar espíritu santo xomod toib guii ni cayalguii nislainyno. Né xcalrracné espíritu reʼ rioʼ gan xcalnabanyno né raniiny lóono gonyno cós tzaay né radudyni fuers lóono par gonyno xchiin Jehová nadip (Rom. 12: 11). ¿Xí labúu gonyno par guidudy Jehová espíritu santo xtuny lóono? Guinabno láani láabu, guisuidyno la Biblia né modcu sioʼno toibsi né congregación. Pal ronyno guirá ndeʼ sapno «fruto xtuny espíritu» (Gál. 5:22, 23).

14. ¿Xí láani diti non gonyno pal nainy lóono gapno espíritu xtuny Dios? (Láaca bibiʼ retrat ni sieed).

¹⁴ Jehová radudy espíritu xtuny lóono per raquiin gapno cuidad. Diti nainy lóono gonyno xi xcós ni guisioʼoy guii de espíritu. Par guidudy Jehová espíritu xtuny lóono, mod ni ronyno né xpensaryno non tzoʼni nayaa. Pal radudyno lagary que tzoʼ pensary mal lainy bichoguicno né radudyno lagary gony mandaryni lóono sasnitno espíritu xtuny Jehová (1 Tes. 4:7, 8). ¿Xí más raquiin gonyno? Pablo goniʼ: «Diti guibixladxto profecías» (1 Tes. 5:20). Ló versículo reʼ, diitz «profecías» radudyni diitz mensaj ni radudy Dios né xcalrracné espíritu xtunybu. Ladni noʼ mensaj ni ritlaa de xtzú Jehová, né ni ma noʼni gaxtiguié. Lóono diti  ronyno pensary que xtzú Jehová nigolú cayaclani o que diti sabiʼno Armagedón. Xalagary ngú ronyno pensary ló xtzú Jehová guirási ór. Por ngú nigolú rasac par lóono guirá ni ronyno né guislooyno que rony adorarno Dios guirá dzú (2 Ped. 3:11, 12).

15. ¿Xí non gonyno par diti tzoʼ ni guiscú lóono? (1 Tesalonicenses 5:21).

¹⁵ Mápa mer guirá ni nac xienemig Dios saniʼ «¡Paz né seguridad!» (1 Tes. 5:3). Guirá lad sioʼ mensaj ni sieed de demony, ni sascú casi guiránac buñ (Apoc. 16:13, 14). ¿Né lóono gaʼ? ¿Sadudyno lagary guiscú buñ lóono la? Pal rasobno consej reʼ la, yaca: «Colgantzay pal nigolú guirá cós» (bíil 1 Tesalonicenses 5:21). Diitz griego ni rac traducir colgantzay, radudyni diitz órni toib buñ ranbu pal toib guip ni napbu nigolúpa nacni or. Modcuca raquiin gonyno: raquiin gantzayno pal ni racadiagno né ni rolno nigolúpani. Por ngú nigolú gosac que buñ tesalonicenses ñony láani, per nigolú rasac gonyno láani laʼga cabigax gran tribulación. Xalagary gonyno crer nitisi cós ni raniʼ buñ, raquiin guiquiinno xpensaryno par guibiʼno pal ni cayolno o ni racadiagno radzakni né ni ná la Biblia né ni ná xcudx Jehová, modcu ni toib mensaj xtuny demony diti sascúni lóono (Prov. 14:15; 1 Tim. 4:1).

16. ¿Xí esperanza sacróyen napno, né xí raquiin gonyno nigoreʼ?

¹⁶ Nanno que xpiin Jehová xomod toib grupo salaa ló gran tribulación, per diti nanno xi sasaclono tigaagano guixí (Sant. 4:14). Ná pal nabanyno tudyno ló gran tribulación o gaityno nír, pal gacno fiel Jehová sadudy galnabany tipzó lóono. Cristianos ungidos sioʼyibu né Cristo lainy guibá, né stipnés xilieen sabanyibu ló toib Gudxlio móz. Coʼno guicno ló esperanza sacróyen reʼ né non tzoʼno puext órni guidxin xtzú Jehová.