La Biblia diti rasetlaa xigony, per rasetlani tipnés cós xigony gocni scú.

Órni toib ángel góoch María que sac xiimbu, noʼbu gudx Nazaret, toib lagary de Galilea (Luc. 1:26-31; 2:4). Después ni bireʼyibu Egipto, bibiguetyibu Nazaret. Jesús goniʼsbu lainy gudxcu, por ngú labúu guinino que goniʼsbu lainy gudx Nazaret (Mat. 2:19-23). Por ngú órni rasetlano de Nazaret, rasetnaladxno guionca biinreʼ: José, María né Jesús.

Per ni nanno la, gudx Judá, María maca rimbu láani. ¿Ximod nanno láani? Portín gopbu xfamilbu gudx Judá. Cu golés Elisabet ni góc tzeʼel sacerdote Zacarías ni bidxin góc xinaʼ Juan ni Ragonis (Luc. 1: 5, 9, 13, 36). María goyguenbu Elisabet né biaʼanbu cu midid tzón beʼo, né después bibiguetbu Nazaret (Luc. 1:39, 40, 56).

Órcu buñchiin buny mandary ñac registrar buñ. Né par labúu nasobdiitz José, bireʼbu de Nazaret né seebu Belén, ro góc «gudx David» né ro goniʼ profecías ro ñal Mesías (Luc. 2:3, 4; 1 Sam. 17:15; 20:6; Miq. 5:2). Cu goʼol Jesús, José diti golésbu ninébu María nimaca gudx Nazaret. Biaʼanyibu gudx Belén, ni noʼ gaxtiguié de Jerusalén, ni riaʼan midid 9 kilómetros. Né ngú gocné layibu, portín ma labúu ñeeyibu templo ni goyoʼ lainy gudx Jerusalén par nadudyibu galrrascad ni gonab ley (Lev. 12:2, 6-8; Luc. 2:22-24).

Láaca gonyno pensary ni góoch ángel a María, góchbu María que xiimbu nacaʼ trono né ñac rey. ¿Bidziguiaʼ María né José que xiinyibu ñal lainy gudx David la? (Luc. 1:32, 33; 2:11, 17). Sigory bunyibu pensary que más galán ñaʼanyibu Belén par nabésyibu nadudy Jehová más instrucciones layibu.

Rolooyni biaʼanyibu más tiemp Belén ná diti nanno balac tiemp ma sanéyibu, órni tipnés astrólogos goyguen layibu. Jesús ma diti nacbu toib badaʼ né xfamilbu ma bidzel toib yoʼ ro golésyibu (Mat. 2:11). Por ngú xalagary nabiguetyibu Nazaret, rolooyni golésyibu cu xidzúyen.

Per Herodes «buny mandarybu ñaity guirá mbioxien de chop íz ni rabés lainy gudx Belén» (Mat. 2:16). Toib ángel gochbu José xi riesga noʼyibu, órcu seeyibu gudx Egipto né Jesús, né biaʼanyibu cu dada dzú goity Herodes. Después José goyné xfamil niis Nazaret. ¿Xigony diti bibiguetyibu Belén? Portín toib xiingaʼn Herodes ni nigolú mal cayony mandary gudx Judea, ni góc laa Arquelao. Toib ángel gochbu José xi riesga noʼyibu por ngú seeyibu Nazaret, cu diti ñoʼ xi ñac Jesús. Modcu nasniʼsbu Jesús mod ná Dios (Mat. 2:19-22; 13:55; Luc. 2:39, 52).

Ralooypani goity José antes ni ñaity Jesús né nadudybu oportunida buñ par ñee guibá. Pal nacni scú la, José guiás par guibany ló Gudxlio, né xidal buñ simbuyibu José né sanyibu xigony biaʼanyibu más tiemp gudx Belén después ni gool Jesús.