1, 2. ¿Ximod radzak mod bibany Lot né mod nabanyno ló naareʼ?

 ÓRNI rabiʼno guirá ni cayac ló gudxliogoxreʼ, rasacno xomod Lot, toib buñguieeu tzaay ni bibany ló dzú ni see. «Goyogoluʼ ló galrrasaʼ por guirá cós yohx ni buny buñ mal», gonbu que Bixiosno ni noʼ guibá rianladxbu que buñ gony scú (2 Ped. 2:7, 8). Lot gondxiʼbu né gopbu xiroʼ respet Jehová, láaca bianladxbu mod yox xtuny buñ ni bigoo láabu. Láaca rasacno xomod Lot. Nabanyno ló toib Gudxlio ro noʼ buñ ni diti tampa nap respet ni ná Dios noʼ buñ nili napyibu respet ni ná Dios. Pal nadxiʼno Dios né rasuidyno guidzuibyno láabu, labúu gac nayaano ló sentido moral (Prov. 14:2).

² Par labúu guirebuʼ gonyno láani, ló libro xtuny Proverbios Jehová rony animar né rachiin lóono gonyno láani. Guirá consej ni sieed ló la Biblia labúu gacnéni lóono ni nacno cristianos, buñguieeu, buñgonaʼ, mbioxhlas né buñgol.

3. ¿Xí razón ritlaa ló Proverbios 17:3 par gapno xcalnabanyno? (Láaca bibiʼ dibuj).

³ Nigolú rasac gapno xcalnabanyno portín Jehová rimbutzaay mod nacni. ¿Xí radudyni diitz? Que Jehová rabiʼtzaybu ni noʼ lainy xcalnabanyno ni diti labúu rabiʼ buñ. Nantzaybu ni noʼ niis lainyno (bíil Proverbios 17:3). Órni Jehová rabiʼ que ragoʼtzayno xconsejbu, nadxiʼbu lóono. Toib galnabany ni nap sabiduría ni radudy vida, diti noʼ galrrascú nili ni rony mandary Buñdzab né guirá ni noʼ ló gudxliogoxreʼ (Juan 4:14; 1 Juan 5:18, 19). Laʼga más rabigaxno Jehová galnadxiʼ né respet ni rasacno por láabu sácni más xiroʼ. Diti nainy lóono gonyno xitcal ni gonynaa xcalnabany Bixiosno Jehová, dada sianladxno  guichéno nislóbu. Ló toib tentación, guinabdiitzno ndeʼ: «¿Ximod nompa goni gonynaaya xcalnabany toib ni ronladx naʼ né ni ma buny xiroʼ cós por naʼ?» (1 Juan 4:9, 10).

4. ¿Xí láani buny toib hermana por ni bidzuibybu Jehová?

⁴ Toib hermana de Croacia ni laa Marta b mersi ñonybu galyoxh. Láabu nábu: «Diti buni pensary sacró. Né gosac nagaana nabeʼya cós yox reʼ lainy bichoguica. Per ni bidzubi Jehová gocné naʼ». ¿Ximod? Marta goniʼ que né xcalrracné galdzuiby reʼ, bunybu pensary ximod narecaabu pal diti ñonybu xinésni. Ló toib tentación, lóono láaca labúu gonyno scúca. Guisetnaladxno que labúu coʼ nabanno xcalnabany Jehová né ma diti labúu gonyno xchiimbu (Gén. 6:5, 6).

5. ¿Xí rasuidylo né ni gosaclóo Leo?

⁵ Toib buñ ni radzuiby a Jehová diti ronybu pensary que diti noʼ xi sacbu pal radzakbu buñ mal, xomod gosaclóo Leo, ni rabés gudx Congo. Tap íz de goló goyonisbu, gosalóbu bidzakbu buñ mal. Bunybu pensary que, laʼga láabu diti cayonybu cós mal, diti cachébu nisló Jehová. Per diti gocla, ximigbu bikíil láabu, né gosalóbu gosochbu né biabbu ló galyoxh. Órcu Leo bunybu pensary ló guirá ni bisuidy bixiosbu né xinaʼbu láabu, ni góc Testigos, né ximod nakit goyoʼbu dzúcu. Goyoʼ xcalrriembu né xcalrracné ancianos bibiguetbu lainy xcudx Jehová. Leo ma nacbu toib anciano né precursor especial né nakit noʼbu.

6. ¿De xí chop buñgonaʼ simbólicas guisuidyno ló artículo reʼ?

⁶ Nigoreʼ guisuidyno capítulo gaʼ de Proverbios ni labúu gacné guiráno, buñguieeu  né buñgonaʼ. Ló capítulo reʼ ritlaa de chop buñgonaʼ simbólicas. Toib rony representar sabiduría né stoibcu ni diti noʼ xcalrrien. c Laʼga guisuidyno párrafos ni sieed, guisetnaladxno que ló xcudxliogox Buñdzab nogoluʼ galyoxh né pornografía (Efes. 4:19). Por ngú diti guiañ guisuidyno guidzuibyno Jehová né non galsitno de cós mal (Prov. 16:6) Chop buñgonaʼ ni guisetlano raninéyibu buñgaʼl, «ni diti noʼ xcalrrien». Nacni suusi naruʼyibu guirá buñreʼ par ñeeyibu lidxbu né ñoʼyibu galrro (Prov. 9:1, 5, 6, 13, 16, 17). Per gadzéga mod rarecaayibu né tigaaga buñgonaʼ reʼ. ¿Ximod? Guisuidyno láani.

7. Mod ná Proverbios 9:13-18, ¿ximod rarecaa buñ ni riee ronoʼ «buñgonaʼ ni ranit xcalrrien»? (Bibiʼ ni ná retrat).

⁷ Salóno guinino de buñgonaʼ ni diti ragoʼ xcalrrien (bíil Proverbios 9:13-18). Diti ratoy lóo né raniʼ: «¡Guirá ni nac buñgaʼl, guieed reʼ! Modcu raruʼbu buñgaʼl par tzoʼbu né láabu tiprat. ¿Né ximod rarecaa guirá ni riee né láabu? «Diti nanyibu pal cu noʼ guirá ni ma goity». Diti laʼra ndeʼ casetlaa Proverbios de toib buñgonaʼ de clas reʼ. Ló capítulos ni ma godudy rasetlani xi riesga noʼ de toib «buñgonaʼ ni casarel» né de toib «buñgonaʼ yox». Raibyni lóono: «Lidxbu rinéni buñ ló galgoity» (Prov. 2:11-19). Proverbios 5:3-10 láaca raibyni lóono que raquiin gapno cuidad de stoib «buñgonaʼ ni casarel». Rasetlani de láabu: «Ñeʼbu rieeni ló galgoity».

8. ¿Xí non gony guirá ni guicadiag «buñgonaʼ ni diti ragoʼ xcalrrien»?

⁸ Guirá ni racadiag «buñgonaʼ ni diti ragoʼ xcalrrien» non ganyibu xi láani gonyibu: pal tzeeyibu né buñgonaʼ reʼ o yaca. ¿Pu ór labúu nasaclono ngú? Por ejemplo, pal rioʼ tentación gonyno cós yox o pal tiptisi rareʼ retrat ni nac pornografía. ¿Xí gonyno órcu?

9, 10. ¿Xigony diti non gonyno galyoxh?

⁹ Noʼ razón par diti gonyno cós yox. Mod ná libro xtuny Proverbios, «buñgonaʼ ni diti ragoʼ xcalrrien» ná: «Nís ni rabann buñ nanaxni» Ló la Biblia raslooyni relaciones sexuales ni rac lainy galtzeʼel xomod nís ni rasiab galnaguelio (Prov. 5:15-18). Buñguieeu né buñgonaʼ ni ma buny galtzeʼel labúu gatnéyibu saʼyibu. Per «nís ni rabann buñ» gadzé mod nacni. Sigory radudyni diitz relaciones sexuales, ni diti noʼ de acuerdo né xiley Dios. Casi guirá ór,  buñ ni rony galyoxh ronyibu láani nagachca, xomod rony toib buñ gobáan órni rabann. Nís reʼ «ni rabann buñ» labúu gacni nanax par guirá buñ ni rony pensary que cacachlanyibu cós mal ni cayonyibu. Per cascúyibu láacayibu. Jehová rabiʼ guiráni, né diti noʼ chú labúu guiscuʼ láabu. Diti noʼ cós ni más nalaa que guisnityibu cós tzaay mod radzakbu Jehová; dipa nanaxni (1 Cor. 6:9, 10). Né diti ngúsi láani.

¹⁰ Buñ ni rony pórsi galyoxh labúu guitoybu, né dada labúu gonyibu pensary que ma diti noʼ pu rasacyibu, né labúu gac xiinyibu ná diti nainy layibu. Dada labúu gapyibu galnagan lainy xfamilyibu. Ni más sacró né ni más galán láani ngú diti guisaguel buñ xtiitz «buñgonaʼ ni diti ragoʼ xcalrrien». Xidal buñ ni riab ló galyoxh diti nosi raityibu ló sentido espiritual, láaca ranás galguitz layibu ni riné layibu ló galgoity (Prov. 7:23, 26). Versículo 18 de capítulo 9 radubylagaʼni né diitzreʼ: «Guirá ni biruʼyibu noʼyibu guetdii lainy Baʼ». Xidal buñ racacuent de clas invitación reʼ (Prov. 9:13-18).

11. ¿Xigony nigolú mal guibiʼ buñ pornografía?

¹¹ Pornografía nacni toib tramp ni noʼ guirá lagary. Tipnés buñ rony pensary que diti mal guibiʼ buñ láani, per diti nigolúni. Buñ ni rabiʼ pornografía ma diti labúu rasian láani, ronybu mal láacabu né ma diti napbu respet láacabu. Retrat de galyoxh diti labúu rabeʼ buñ láani ló xpensary, rasac nagan buñ guialadx láani. Láaca, pornografía diti ragaityni pensary mal ni nap buñ, rabany loni más (Col. 3:5; Sant. 1:14, 15). Né xidal buñ ni rabiʼ pornografía riabyibu ló galyoxh.

12. Pal tiptisi rarecaa toib retrat ni labúu guiscuany ló xpensaryno cós yox, ¿xí non gonyno?

¹² ¿Xí raquiin gony toib cristiano pal ló ro caquiimbu toib teléfono, toib tableta rareʼ toib retrat ni nap pornografía? Órcuca guisiambu de guibiʼbu láani. Ni labúu gacné lóono gonyno modreʼ láani ngú, guisetnaladxno que par lóono nigolú rasac mod radzakno Jehová. Láaca, noʼ retrat que casi guirá ór diti nacni pornografía per labúu guiscuanyni ló xpensaryno cós yox. Diti nainy lóono guibiʼno de clas retrat reʼ. ¿Xigony? Portín nili nainy lóono gonyno pensary gonyno galyoxh lainy xcalnabanyno (Mat. 5:28, 29). Toib anciano de Tailandia ni laa David ná: «Naʼ ranabdiitz naʼca: ¿Sioladx Jehová que naʼ guibiʼya de clas retrat reʼ ná rolooyni diti sitnéni pornografía la? Ni roni pensary modreʼ racnéni naʼ goni xinésni».

13. ¿Xí láani sacné lóono par gonyno xinésni?

¹³ Pal diti nainy guisioʼobno xcalnabany Jehová, diti sasacnaganno gonyno xinésni. Por ngú, Proverbios 9:10 ná que «sabiduría rasalóni órni radzuibyno Jehová». Diitzreʼ nayadit rarexani ro rasaló capítulo 9 de Proverbios, ro ritlaa de toib buñgonaʼ simbólica ni rony representar «sabiduría ni nigolú».

14. ¿Xí stoib invitación radzelno ló Proverbios 9:1-6?

¹⁴ (Bíil Proverbios 9:1-6). Reʼ radzelno toib invitación ni sieed de Jehová, ni Bisaʼ lóono né ro ralainy sabiduría (Prov. 2:6; Rom. 16:27). Libro de Proverbios rasetlani de toib yoʼ xiroʼ ni nap gatz pilary. Ndeʼ racné lóono gonyno pensary mod nac Jehová, toib Dios ni racacuent guiránac buñ ni raniiny gony ni nábu.

15. ¿Xí invitación rony Dios lóono?

¹⁵ Jehová radudy ni nap né radudybu lóono xidal cós tzaay. Riendxichni  ló buñgonaʼ ni ritlaa ló capítulo 9 de Proverbios ni rony representar «sabiduría ni nigolú». Láabu ma puextca bisiambu guiráni. Ma bunytzaaybu beʼel, vino né láaca ma bisagaʼbu mexh (Prov. 9:2, primer nota). Láaca, mod ná versículos 4 né 5, «sabiduría ni nigolú» raibyni ni diti noʼ xcalrrien: «Coltaʼ guáto xpáaya». ¿Xigony non guicacuentno invitación de buñgonaʼ reʼ? Portín Jehová raniiny guilaa xiimbu né guidudybu sabiduría. Diti nainy láabu que galyoxh cu guisuidy lóono nili guisac maláyno. Por ngú, «láabu ragoʼtzaybu sabiduría práctica par guirá ni rony xinésni» (Prov. 2:7). Pal radzuibyno Jehová, saniiny lóono gonyno xchiimbu né guisobno ni nábu. Pal ronyno ndeʼ sioʼ nakitno (Sant. 1:25).

16. ¿Xí láani buny Alain, né ximod birecaabu por ni radzuibybu Jehová?

¹⁶ Guibiʼno toib ejemplo ni raslooy que pal radzuibyno Jehová racnéni lóono gonyno xinésni. Alain nac toib anciano de congregación ni nac mextra lainy toib yolayscuel. Láabu nábu: «Xidal xcompañera ni ronynéya dxiin ronyibu pensary que películas ro rarecaa pornografía raquiinni par guisuidy mbiox de sexo». Per Alain nanbu que pal buñ rony pensary modcu nacni toib galrrascú. Raniʼbu ni bunybu: «Radzubi Jehová, por ngú diti gosaguela nabiʼya películas cu. Né láaca goodxi stipnés xcompañera xigony diti gosaguela». Modcu bisobbu consej reʼ de «sabiduría ni nigolú»: «coltzé ló xinés entendimiento» (Prov. 9:6). Tipnés xcompañerbu ni ronynébu dxiin nigolú bidziguiaʼyibu né gosalóyibu bisuidyibu la Biblia né goyeeyibu reunión.

17, 18. ¿Xí láani ma nap ni racacuent invitación de «sabiduría ni nigolú», né xí guicaʼyibu ló dzú ni sietra?

¹⁷ Né xcalrracné chop buñgonaʼ simbólicas reʼ, Jehová raslooy xi raquiin gonyno par labúu guibanyno nakit. Buñ ni racacuent invitación de buñgonaʼ yox raniiny layibu guisacyibu sacró gonyibu galyoxh. Nosi rioʼyibu galrrasaʼ ni cayonyibu, diti ronyibu pensary ximod guirecayibu después. Buñ de clas reʼ «noʼyibu guetdii lainy Baʼ» (Prov. 9:13, 17, 18).

¹⁸ Per ¡más galán rarecaa buñ ni racacuent «sabiduría ni nigolú»! Rabanyibu nakit portín napyibu xiroʼ galrro espiritual ni goctzay sacró, de xidal clas galrro ni naníx né ni racné (Is. 65:13). Jehová raquiimbu Isaías par guisetlaa ndeʼ: «Colguicadiagtzay naʼ né sooto galrro ni nac galán, sooto ni naníx» (Is. 55:1, 2). Scú láani, casuidyno gonladxno cós ni ronladx Jehová né  guianladxno cós ni rianladxbu (Sal. 97:10). Nacno xomod ni ritlaa ló capítulo 9 de Proverbios, ni racaa rudx «ló toib lagary nasoʼ ni noʼ lainy gudx». Xomodca layibu, ranino: «¡Guirá ni nac buñgaʼl, guieed reʼ!». Tanli lóono né xomod ni racacuent invitación reʼ racnégoluʼni lóono ló naareʼ. Per diti ngúsi. Láaca sacnéni lóono ló dzú ni sietra. Pal rapno entendimiento, labúu sabanyno tipzó (Prov. 9:3, 4, 6).

19. Mod ná Eclesiastés 12:13, 14, ¿xí láani non gonyno? (Láaca bibiʼ cuadriyen ni laa, « Galrracné par guidzuiby buñ Dios»).

¹⁹ (Bíil Eclesiastés 12:13, 14). Rabésno ló dzú ni ma guidubylagaʼ, ro nogoluʼ cós mal. Per lóono nainy lóono guidzuibyno Jehová. Modcu sapno xcalnabanyno, né sacno buñ nayaa ló sentido moral né sioʼno gaxca Jehová. Ronladxno Jehová né rapno respet láabu, por ngú nainy lóono guiruʼno a guirá ni nainy guiyopy «sabiduría ni nigolú» né guisobyibu ni náni.