1, 2. Mod ná Salmo 25:14, ¿xí non gonyno par guidzaktzayno Jehová?

 XPENSARYLO, ¿xí cualidad non gap buñ par tzoʼ ximigdxin? Sigory labúu guicapylo que órni buñ ma nap ximigdxin non gonladxyibu né gacnéyibu saʼyibu. Sigory, ló guirá cualidad reʼ diti noʼ galdzuiby. Per xomod ná texto temático, guirá ni ná guidzak Jehová sacró non guidzuibyibu Jehová (bíil Salmo 25:14).

² Ná pal sanéno xiroʼ íz o goxeʼsi íz lainy xcudx Jehová, non guidzuibyno láabu, ¿xí radudy diitz guidzuibyno Dios? ¿Xí sacné lóono par gapno galdzuiby tzaay? Né ¿xí láani rasuidyno guidzuibyno Dios mod buny toib mayordomo ni góc laa, Abdías, né sumo sacerdote Jehoiadá né rey Jehoás?

3. ¿Ximod ralaa galdzuiby lóono?

³ Wal radzuibyno, pal ronyno pensary que noʼ ni guisaclono. De clas galdzuiby reʼ diti mal gap buñ láani portín racnéni lóono ganno xi láani gonyno. Guibiʼno tipnés ejemplos. Ni radzuibyno guiabno sonyni que diti sabigaxno ro toib balioo. Pal radzuibyno guisaclono nitisi cós sachiinni lóono galsitno ronoʼ riesga. Né pal radzuibyno guisnitno toib ximigdxinno sonyni que gapno cuidad guinino o gonyno cós ni labúu gonynaa láabu.

4. ¿Xí raniiny Buñdzab guisacno por Jehová?

⁴ Buñdzab raniiny láabu guidzuiby buñ Jehová. Racladxbu gonyno crer ni góoch Elifaz a Job: que Jehová  nacbu toib Dios ni radxiguet mal ni ronyno láabu, né radzuitzgolúbu né dipa noʼbu nakit né lóono (Job 4:18, 19). Ni racladxbu ngú que diti gonyno xitcal né que ma diti gonyno xchiin Jehová. Par diti guiabno ló tramp, gonyno por guidzuibyno Dios, ni nac toib cualidad ni labúu gacné lóono.

5. ¿Xí radudy diitz guidzuibyno Dios?

⁵ Buñ ni radzuiby o nap respet Dios nadxiʼ láabu né diti nainy láabu gonybu nitisi cós ni labúu galsit láabu de Jehová. Toib galán ejemplo ni bidzuiby Dios láabu ngú Jesús (Heb. 5:7). Ni gosacbu por Jehová diti gocni toib galdzuiby mal (Is. 11:2, 3). Xalagary ngú, binladxgoluʼbu Bixiosbu né guidopy xcalnabanybu né goniiny nasobbu (Juan 14:21, 31). Lóono láaca scúca, rapno respet Jehová né ronyno xchiimbu portín nacbu toib Dios de galnadxiʼ, napbu sabiduría, ronybu xinésni, né napbu galnadip. Nanno que ronladxgoluʼbu lóono, né guirá ni ronyno. Pal diti rasobno láabu, labúu sioʼ nabambu, per pal rasobno láabu, sioʼ nakitbu (Sal. 78:41; Prov. 27:11).

6. ¿Xí láani gony buñ par guidzuiby Dios? (Salmo 34:11).

⁶ Galdzuiby ni nap buñ Jehová diti nacni toib cualidad ni ralné buñ; non gony buñ dxiin loguiaʼni par labúu gap buñ láani (bíil Salmo 34:11). Toib mod ni labúu gony buñ láani la, guibiʼ buñ guirá ni ma goyaʼ. Órni buñ rabiʼ sabiduría xtuny Jehová ló guirá ni goyaʼ, xcalnadipbu né ni ronladxgoluʼbu lóono, galnadxiʼ né respet ni rasacno por láabu rac nadipni (Rom. 1:20). Toib hermana ni laa Adrienne goniʼ: «Órni rabiʼya ló guirá ni bisaʼ Jehová né rabiʼya mod naní xcalrriembu, radziguiaʼya láabu né radudi cuent que más nanbu xi láani más galán par naʼ». Después ni bunybu pensary ló guirá ndeʼ, goniʼbu: «Dipa godudy ló xpensari ñoni nitisi cós ni ñony que ñalsita de Jehová, ni bidudy galnabany naʼ». ¿Labúu nabeʼlo tiemp xomal reʼ par ñonylo pensary ló toibtica cós ni bisaʼ Dios la? Ngú sacné looy par gaplo respet né gonladxlo Jehová más (Sal. 111:2, 3).

7. ¿Ximod racné oración lóono guidzuibyno Jehová?

⁷ Stoib cós ni sacné lóono guidzuibyno Jehová láani ngú guiaʼno gonyno oración guirá ór. Laʼga más raninéno Dios xtunyno sadudyno cuent que nigolúpa noʼbu. Guirá ór ni ranabno fuers láabu par gony guantaryno toib prueby, ronyno pensary ló galnadip ni napbu. Órni radudyno guixquix láabu por ni bixelbu Xiimbu goity por lóono, rasetnaladxno balaati nadxiʼbu lóono. Né órni ranabno guisanésbu lóono par guicalóno toib galnagan, diti rialadxno que naniʼ xcalrriembu. Guirá oración ni ronyno racnéni lóono gapno más respet láabu né más ragoʼno guicno dipa gonyno xitcal ni labúu coʼ riesga mod radzakno Jehová.

8. ¿Xí non gonyno par dipa guiañ guidzuibyno Jehová?

⁸ Par diti guiañ guidzuibyno Jehová, non golno la Biblia par guisuidyno de ejemplos tzaay né mal ni sieed ló la Biblia. Guibiʼno tzón ejemplos reʼ. Primer, salóno guinino de chop xpiin Jehová ni goyoʼ ló dzú ni see: Abdías, ni goyoʼ xcuent lidx rey Acab, né sumo sacerdote Jehoiadá. Después guisuidyno de rey Jehoás de Judá, ni bidzak Jehová  sacró, per después birecaabu mal portín golsitbu de Jehová.

9. ¿Ximod gocnéni Abdías ni bidzuibybu Dios? (1 Reyes 18:3, 12).

⁹ Primerdiguieʼ buelt ni rasetlaa la Biblia a Abdías b ná: «Abdías bidzuibygoluʼbu Jehová» (bíil 1 Reyes 18:3, 12). ¿Ximod gocné cualidad reʼ láabu? Gocnéni láabu par gócbu buñtzay né ñap buñ confianz láabu. Por ngú bisiané rey toib dxiin láabu (bidzak láani né ni ná Nehemías 7:2). Né por ni bidzuibybu Dios gocnéni láabu gopbu toib balory rodann, toib cualidad ni biquiimbu. ¿Xigony? Portín bibanybu dzú ni buny mandary toib rey mal ni góc laa Acab ni buny «más cós mal nisló Jehová que guirá ni goyoʼ antes que láabu» (1 Rey. 16:30). Tzeʼel Acab góc Jezabel, ni buny adorar Baal né nigolú bianladxbu Jehová, né dada goniiny láabu nanitlóbu adoración nayaa ni goyoʼ gudx Israel. Dada bigaitybu xidal profetas xtuny Dios (1 Rey. 18:4). ¡Dzúcu nigolú nagan gocni par ñen buñ Jehová!

10. ¿Ximod bislooy Abdías que gopbu toib balory rodann?

¹⁰ ¿Ximod bislooy Abdías toib balory rodann? Órni Jezabel cuanal profetas xtuny Jehová par nagaitybu, Abdías bicachlanbu 100 biinreʼ lainy bileʼ «ló grupos de 50» né xcuentbu goyoʼ nadudybu «páa né nís» biinreʼ (1 Rey. 18:13, 14). Pal Jezabel ñan ni bunybu, nagaity láabu. Abdías susica lóono diti goniiny ñaitybu. Per galnadxiʼ ni gosacbu por Jehová né por xpiimbu gocni más xiroʼ que galnadxiʼ ni gopbu láacabu.

11. ¿Ximod rasuʼ xidal xpiin Jehová mod buny Abdías? (Láaca bibiʼ retrat).

¹¹ Ló naareʼ, xidal xpiin Jehová rabésyibu lagary ro diti napyibu permís guiniʼyibu xtiitz Dios. Rapyibu respet buñchiin, per xomodca Abdías, xhermanno nosi Jehová rony adoraryibu portín nosi Jehová non guicaʼ láani (Mat. 22:21). Raslooyibu que radzuibyibu Dios órni rasobyibu nosi Jehová xalagary guisobyibu  buñgudxlio (Hech. 5:29). Por ngú raniʼrayibu diitz sacró né nagachca radopyibu (Mat. 10:16, 28). Láaca xcuentyibu rioʼ que xhermanyibu gap galrro espiritual ni caquiinyibu. Ganno ejemplo xtuny Henri, ni rabés lainy toib gudx de África ro xhermanno diti gopyibu permís naniʼyibu xtiitz Dios. Par ló dzúcu, Henri puextca goyoʼbu par goynébu publicaciones ni rareʼ ló la Biblia. Láabu bicaʼbu: «Naʼ la radzubi. Nandxichi que ni gocné naʼ ñapa balory, láani ngú xiroʼ respet ni rasaca por Jehová». Looy láaca labúu gaplo balory xomod Henri pal rasuidylo guidzuibylo Dios.

12. ¿Ximod bislooy Jehoiadá né tzeʼel que dipa bisianyibu Jehová?

¹² Sumo sacerdote Jehoiadá bidzuibybu Jehová, né ngú bichiin láabu dipa nasiambu Jehová né gocnébu stipnés buñ ñen Jehová. Órni Atalía, xiindzap Jezabel, cuaʼbu trono xtuny Judá nagachca, Jehoiadá bislooybu que nigolú bidzuibybu Dios. Nigolú bidzuiby buñ a Atalía. Gócbu toib buñgonaʼ mal né goniiny láabu ñapbu galnadip né par labúu ñony mandarybu bigaitybu guirá ni labúu ñac rey, ¡xiaccabu! (2 Crón. 22:10, 11). Per né xcalrracné Jehosabeat tzeʼel Jehoiadá, bilaa toibticayibu, toib nidxiyen ni góc laa Jehoás. Láabu né tzeelbu bicachlanyibu nidxiyen reʼ né gonyibu nidxiyen reʼ. Modreʼ labúu bilaayibu xfamil David ni labúu ñac rey. Jehoiadá dipa bisiambu Jehová né diti bidzuibybu Atalía (Prov. 29:25).

13. ¿Ximod bislooy Jehoiadá stoib que dipa bisiambu Jehová?

¹³ Órni Jehoás gop gatz íz, Jehoiadá bislooybu que dipa bisiambu Jehová stoib. Goloʼbu guicbu ñonybu toib cós. Pal narebuʼ ni goloʼbu guicbu Jehoás nadxin ñac rey, toib xfamilnadx David. Per pal diti labúu narebuʼni Jehoiadá labúu ñaity. Né xcalnasác Jehová, birebuʼ ni bunybu. Né xcalrracné jefes né guirá levitas, Jehoiadá golúbu Jehoás par ñac rey né buny mandarybu ñaity Atalía (2 Crón. 23:1-5, 11, 12, 15; 24:1). De ngú, «bunybu toib acuerdo né Jehová, né rey, né buñgudx; ro bidudyibu xtiitzyibu diti guiañ gacyibu xcudx Jehová» (2 Rey. 11:17). «Láaca goloʼbu ni gon ro guirá puert ni goyoʼ lidx Jehová, par diti ñoʼ ni toib buñ ni diti nayaa» (2 Crón. 23:19).

14. ¿Ximod bisanadx buñ Jehoiadá por ni bunyxiroʼbu Jehová?

¹⁴ Jehová goniʼ: «Sapa respet ni rap respet naʼ», né scá bunybu láani né Jehoiadá (1 Sam. 2:30). Por ejemplo, Jehová bunybu que guirá cós tzaay ni buny sumo sacerdote reʼ nacáni ló la Biblia par labúu ñacnéni lóono ló naareʼ (Rom. 15:4). Né órni goity Jehoiadá, bisanadx buñ láabu: «Bicachyibu Jehoiadá lainy Xcudx David toibsi né guirá reyes, portín bunybu cós tzaay né Dios, né lidx Dios lainy gudx Israel» (2 Crón. 24:15, 16).

15. ¿Xí rasuidyno de historia xtuny Jehoiadá? (Láaca bibiʼ retrat).

¹⁵ Historia xtuny Jehoiadá racnéni guiráno guidzuibyno Dios. Ancianos labúu guisuʼyibu ejemplo xtuny Jehoiadá par guibiʼyibu xipa caquiin xilieen xtuny Dios (Hech. 20:28). Herman golien labúu guisuidyibu que pal radzuibyibu né diti rasianyibu Jehová, labúu naquiin Jehová layibu guirá ór par labúu  ñonyibu xchiin Jehová; diti rabeʼ Jehová layibu tiplad. Mbioxhlas labúu guibiʼyibu ximod godabioo Jehová a Jehoiadá né non cobioyibu né respet buñgolien, né máspa la, ni ma sané xidal íz cayony xchiin Jehová (Prov. 16:31). Né por último, guiráno noʼ ni labúu guisuidyno de guirá jefes né levitas: non gacnéno guisobno né diti guisianno ni rasanir ladno (Heb. 13:17).

16. ¿Ximod bislooy Jehoás que gócbu débil ló sentido espiritual?

¹⁶ Órni rey Jehoás góc mbioxhlas bunybu rutigoygaʼlni láabu par bunybu ni ná Jehová né xcalrracné Jehoiadá (2 Rey. 12:2). Per después ni goity Jehoiadá, Jehoás bicadiag príncipes apóstatas. Por ngú tanli láabu né buñgudx «bienyibu yac nadop né stipnés dioxh dioxh falz» (2 Crón. 24:4, 17, 18). Ná ngú nigolú bisioʼobni Jehová, bixelbu «profetas par nabiguetyibu ronoʼ Jehová». Per «diti goloʼyibu cuent». Nili goloʼyibu cuent Zacarías xiingaʼn Jehoiadá, ni góc profeta né sacerdote, né láaca gócbu xprim Jehoás. Xfamil Zacarías gocnéyibu a Jehoás per ná scú Jehoás bigaity láabu. ¡Diti bidudybu guixquix! (2 Crón. 22:11; 24:19-22).

17. ¿Xí gosaclóo Jehoás?

¹⁷ Jehoás ma diti bidzuibybu Dios, por ngú birecaabu mal, xomod goniʼ Jehová: «Ni rabixladx naʼ, buñ sabixladx layibu» (1 Sam. 2:30). Después, ejército sirio ni  diti gop xidal buñguieeu buny gan «xidal soldad» xtuny Jehoás, né bireʼ heridbu. Órni sirios siee, xpiinca Jehoás bigaity láabu portín bigaitybu Zacarías. Nigolú mal gócbu por ngú nili bicach buñ láabu «ro bigach guirá reyes» (2 Crón. 24:23-25; bibiʼ ni ná nota de estudio «xiingaʼn Baraquías», ni sieed ló Mateo 23:35).

18. Mod ná Jeremías 17:7, 8, ¿xí láani non gonyno par diti gonyno mod buny Jehoás?

¹⁸ ¿Xí láani rasuidyno de historia xtuny Jehoás? Gócbu xomod toib yac ni diti goyoʼ lóo guetdii, né par labúu nasagaʼbu, biquiimbu xcalrracné stoib buñ ni ñacné láabu, sumo sacerdote Jehoiadá. Né órni goity sumo sacerdote Jehoiadá gocxiroʼ apostasía, Jehoás bireʼgan. Historia reʼ noʼ ni rasuidyni lóono: diti labúu guidzuibyno Jehová nosi portín stipnés herman né xfamilno rony né racné lóono. Par gac nadipno ló sentido espiritual, diti guidudyno lagary guioʼy galnadxiʼ né respet ni rasacno por Jehová, guisuidyno gonyno pensary ló ni rolno né gonyno oración guirá ór (bíil Jeremías 17:7, 8; Col. 2:6, 7).

19. ¿Xí rabés Jehová gonyno?

¹⁹ Jehová diti ranab ni diti labúu gonyno. Ni ranabbu gonyno nayadit ritlani ló Eclesiastés 12:13: «Gop respet Dios ni nigolú né bisob guirá ni rony mandarybu, portín ndeʼ ni non gony buñgudxlio». Pal radzuibyno Jehová, labúu guicalóno nitisi galnagan ni guieed né labúu guisagaʼdxichno xomod Abdías né Jehoiadá. Dipa sasianno Jehová.