Par guibaladx Jehová né lóono, raquiin gapno fe. Per la Biblia ná que «diti guirá buñ labúu gap fe» (2 Tes. 3:2). Órni apóstol Pablo bicaʼ diitzreʼ, goniʼbu de buñ ni cuanal láabu, «buñ mal» ni non nalaabu ladxña. Per, ni goniʼbu labúu guiabni stipnés. Por ejemplo, noʼ buñ ni diti rasaguel guicacuent prueby ni nayadit raslooy que noʼ toib Dios ni bisaʼ guirá cós (Rom. 1:20). Stipnés buñ nosi raniʼ que rony crer lóo Dios. Per ngú diti nacni fe ni ranab Jehová lóono.

Par guibaladx Dios né lóono non gapno confianz que nigolú noʼbu né radudybu xcalnasácbu buñ ni nap toib fe nadip (Heb. 11:6). Né fe nacni toibtica cualidad xtuny fruto del espíritu santo. Pal nainy guicaʼno espíritu cu, non guinabno láani Jehová ló oración (Luc. 11:9, 10, 13). Láaca nigolú raquiin golno la Biblia, Xtiitzbu ni cuá né xcalrracné espíritu xtunybu, né de ngú, gonyno pensary ló ni ma bíilno né guisobno láani. Órcu espíritu santo xtunybu sonyni dxiin loguiaʼno né sacnéni lóono gapno toib fe ni guioladx Jehová.