ARTÍCULO NI GUISUIDYNO 23
CANCIÓN 28 Cómo hacernos amigos de Jehová
Toib privilegio rodann ni biruʼ Jehová lóono
«Yoʼ lairy xtuni sioʼ né layibu; naʼ saca Dios xtunyibu» (EZEQ. 37:27).
TEMA
Artículo reʼ sacné lóono par guisac par lóono privilegio ni tzoʼno lainy yoʼ lairy xtuny Jehová né sacnéni lóono guientzaayno ximod ran Jehová lóono lainy yoʼ lairy simbólico xtunybu.
1, 2. ¿Xí oportunida radudy Jehová lóono?
PAL ÑOʼ ni nanabdiitz looy xi nac Jehová par looy, pentzi nacapylo modreʼ: «Jehová nac ximiga, Bixiosa né Dios xtuni». O sigory naquiinlo stipnés títulos. Per ¿naniʼlo que nacbu ni biruʼ looy lidxbu la?
2 Rey David buny compararbu mod radzak Jehová xpiimbu ni diti rasian láabu, né mod radzak toib buñ a buñ ni biruʼbu lidxbu. David gonabdiitz: «Jehová, ¿chú labúu tzoʼ lainy yoʼ lairy ni naplo? ¿Chú labúu cués ló dainy nayaa ni naplo?» (Sal. 15:1). Diitzreʼ, rasuidyni lóono que labúu tzoʼno lainy yoʼ lairy xtuny Jehová, ni radudy diitz, gacno ximigbu. ¡Toib oportunida nigolú sacróyen!
JEHOVÁ NAINY GUIRUʼ LÓONO
3. ¿Chú láabu ni primerdiguieʼ biruʼ Jehová, né ximod gosacyibu né saʼyibu?
3 Jehová goyoʼbu toibbu dada órni bisaʼbu Jesús. Por ngú, Xiin lagolbu, góc ni primer goyoʼ lainy yoʼ lairy simbólico xtunybu. ¡Nigolú bibaladxbu órni goyoʼ ni biruʼbu! La Biblia ná que «bibaladxbu» por Xiimbu, né que ni primerdiguieʼ biruʼbu, guirá ór bibaladx órni goyoʼ né láabu (Prov. 8:30).
4. ¿Chú más biruʼ Jehová par ñoʼ lainy yoʼ lairy xtunybu?
4 Después, Jehová bisaʼ stipnés espíritus, bisaʼbu guirá ángeles, né láaca biruʼbu ángeles reʼ par tzoʼ lainy yoʼ lairy simbólico xtunybu. La Biblia rabeʼ laayibu «xiin Dios» né náni que nigolú goyoʼ nakityibu órni goyoʼyibu né Jehová (Job 38:7; Dan. 7:10). Por xidal íz, nosi ni bibany né Jehová lainy gudxlio espiritual, ni radudy diitz lainy guibá, labúu góc ximigbu. Per después, bisaʼbu buñgudxlio né biruʼbu tipnésyibu lainy yoʼ lairy xtunybu. Lad buñ ni diti bisian láabu ni gop privilegio reʼ goyoʼ Enoc, Noé, Abrahán né Job. La Biblia ná que tigaagayibu góc ximig Dios o que «gosaabu né Dios ni nigolú» (Gén. 5:24; 6:9; Job 29:4; Is. 41:8).
5. ¿Xí rasuidy profecía xtuny Ezequiel 37:26, 27 lóono?
5 Por xidalgoluʼ íz, Jehová biruʼrabu ximigbu par ñoʼ lainy yoʼ lairy xtunybu. Guibiʼno profecía xtuny Ezequiel 37:26, 27 (bíil láani). Profecía reʼ rasuidyni lóono que Dios raniiny que xpiimbu ni diti rasian láabu, guidzaktzay láabu. Jehová bidudy xtiitz que sonybu «toib acuerdo de paz né layibu». Diitzreʼ ñac cumplirni órni guirá ni nap esperanza de tzee guibá né ni nap esperanza de guibany ló Gudxlio, ñacyibu toibsi lainy yoʼ lairy xtunybu ló sentido simbólico (Juan 10:16). Profecíacu cayac cumplirni ló naareʼ.
NOʼNO ROTÍSI NOʼNO, JEHOVÁ RAN LÓONO
6. ¿Pú ór rioʼno lainy yoʼ lairy xtuny Jehová, né púti noʼni?
6 Ló dzú ni see, toib yoʼ lairy gocni par nasaladx buñ lainyni né par nalaani buñ de nitisi cós. Né órni, toib buñ ñoʼ lainy yoʼ lairy xtuny buñ ni biruʼ láabu, labúu gondxichbu que buñcu nagobioo láabu sacró. Lóono rioʼno lainy «yoʼ lairy» xtuny Jehová órni rac dedicarno láabu (Sal. 61:4). Cú roono xiroʼ galrro espiritual né radzakno stipnés buñ ni biruʼ Jehová. Per ¿pú noʼ yoʼ lairy simbólico reʼ? Diti noʼni toibsi lagary; noʼni rotísi lagary ronoʼ xpiin Jehová ni rasob láabu. Guirá ni ma goyee stoib gudx ma gon láani, pentzi ni goyee toib samblia especial, né ma bimbuyibu stipnés buñ ni noʼ lainy yoʼ lairy xtuny Dios (Apoc. 21:3).
7. ¿Xigony labúu guinino que xpiin Jehová ni diti bisian láabu né ma goity, noʼrayibu lainy yoʼ lairy xtunybu? (Láaca bibiʼ retrat).
7 ¿Né xí noʼ de xpiin Jehová ni ma goity? ¿Noʼrayibu lainy yoʼ lairy xtunybu la? Scú. ¿Xigony ranino ngú? Portín la Biblia raslooy que par Jehová nabanysayibu. Jesús golexa: «Per ni guiás gueʼet, dada Moisés goniʼ láani órni bibiʼbu toib yac ni cayalguii, órni goniʼbu que Jehová nac Dios xtuny Abrahán, Dios xtuny Isaac né Dios xtuny Jacob. Láabu diti nacbu Dios xtuny gueʼet, xalagary ngú nacbu Dios xtuny ni nabany, portín par láabu guirá biinreʼ nabanysayibu» (Luc. 20:37, 38).
Labúu guinino que xpiin Jehová ni ma goity noʼrayibu lainy yoʼ lairy xtuny Jehová. (Bibiʼ párrafo 7).
GALNASÁC NI RACAʼNO NÉ RESPONSABILIDAD NI NAPNO
8. ¿Xí galnasác racaʼno por ni noʼno lainy yoʼ lairy xtuny Jehová?
8 Xomodca toib yoʼ lairy rapni buñ de nitisi cós né labúu rasaladx buñ lainyni, yoʼ lairy xtuny Jehová rapni lóono par diti tzoʼ ni guisaclono ló sentido espiritual né radudyni esperanza lóono. Órni rioʼno gaxca Jehová, Buñdzab diti labúu rony xitcal lóono ni diti gap remeidy (Sal. 31:23; 1 Juan 3:8). Ló Gudxlio copy, Jehová sanbu ximigbu ni diti rasian láabu par diti tzoʼ ni guisacloyibu ló sentido espiritual né láaca sanbu ximigbu de galgoity (Apoc. 21:4).
9. ¿Xí non gony buñ ni noʼ lainy yoʼ lairy xtuny Jehová?
9 ¡Toib privilegio rodann ni Jehová radudy lagary tzoʼno lainy yoʼ lairy xtunybu né guidzaktzayno láabu por tipzó! Per ¿xí non gonyno pal nárani lóono tzoʼno lainy yoʼ lairy xtunybu? Pal toib buñ raruʼ lóono lidx, ñoladxno ñanno xi nainy láabu gonyno, pentzi naniiny láabu, nabeʼno xcalguitno antes ni ñoʼno lanioʼ, né ñonyno láani né guidopy xcalnabanyno. Modcuca, guiráno ni noʼno lainy yoʼ lairy xtuny Jehová, nainy ganno xi raniiny láabu gonyno par tzoʼrano lainy yoʼ lairy xtunybu. Nigolú nadxiʼno láabu, por ngú ronyno rutirigaʼlni lóono par gonyno ni rioladxbu (Col. 1:10). Nigolú, Jehová nac ximigno, per láaca nacbu Dios xtunyno né Bixiosno, né por ngú non gapno xiroʼ respet láabu (Sal. 25:14). Por ngú, dipa non guialadxno chú láabu. Ni gapno respet Jehová sacnéni lóono par diti gonyno nitisi cós ni labúu guisioʼob xcalnabanybu né gacno «buñdxo» órni saano né Dios xtunyno (Miq. 6:8).
TOIBSI MIDID GODABIOBU ISRAELITAS LÓ YOOVICH
10, 11. ¿Xí ejemplo raslooy que Jehová toibsi midid ragobiobu guiránac xpiimbu?
10 Jehová toibsi midid ragobiobu buñ ni raruʼbu (Rom. 2:11). Guisetnaladxno mod godabiobu israelitas ló yoovich xtuny Sinaí.
11 Después ni Jehová bilaa xcudxbu ladxña Egipto, golúbu sacerdotes par ñony xchiimbu lainy tabernáculo. Láaca xcuent levitas bisiambu stipnés dxiinien ni radzak né láani. ¿Más gon Jehová ni buny dxiin lainy tabernáculo o ni bibany gaxca láani la? Yaca, Jehová toibsi midid gon guiráyibu.
12. ¿Ximod toibsi midid godabioo Jehová israelitas ló yoovich? (Éxodo 40:38; láaca bibiʼ dibuj).
12 Lainy campamento, guirá israelitas labúu ñac ximig Jehová; nac nitisi dxiin ni ñapyibu o pal nabanyibu gaxca o sit de tabernáculo. Por ejemplo, xcuent Jehová goyoʼ que guidopy gudx Israel nabiʼ xcaay né guii ni birecaa laidy tabernáculo (bíil Éxodo 40:38). Por ngú, órni xcaay Jehová bidzaʼ de lagary, guirá israelitas, dada ni goyoʼ nigolú sit de campamento, labúu bibiʼ láani, bitopyibu xcósyibu, bichílyibu yoʼ lairy xtunyibu né goyeeyibu né guidopy gudx Israel (Núm. 9:15-23). Modcuca, guirá israelitas labúu bicadiagyibu, anunys ni goyoʼ par guireʼyibu, portín goyoʼ ni bicudx trompet de plata nigolú fuers (Núm. 10:2). Riendxichni que ni nabés buñ gaxca tabernáculo diti bidudyni diitz que nac buñ ximigdxin Jehová. Xalagary ngú, guirá ni goyoʼ lainy xcudx Jehová labúu ñoʼ lainy yoʼ lairy xtunybu, né Jehová nagonés né ñap layibu. Ngúca rac ló naareʼ: nac rotísi lagary ro rabésno, Jehová nadxiʼ, ran né rap lóono.
Ni goyoʼ tabernáculo galay campamento bislooyni que Jehová toibsi midid ragobiobu buñ. (Bibiʼ párrafo 12).
JEHOVÁ RASLOOYBU QUE DITI RABÚBU BUÑ LÓ NAAREʼ
13. ¿Ximod raslooy Jehová que diti rabúbu buñ ló naareʼ?
13 Tipnés cristianos rabésyibu gaxca sede mundial ni nap testigos xtuny Jehová o de toib sucursal. Né stipnésyibu rony dxiin lagary reʼ. Ndeʼ radudy lagary layibu gacnéyibu dxiin ni rac lainyni né guidzakyibu herman ni rasanir ló xchiin Jehová. Láaca, tipnésyibu nacyibu superintendentes de circuit o nodieʼyibu cayonyibu xchiin Jehová. Per casi guirá cristianos diti napyibu galnasác reʼ. Pal naclo toibtica de layibu, bisetnaladx que Jehová nadxiʼ looy, racacuentbu looy lainy yoʼ lairy xtunybu né ranbu looy (1 Ped. 5:7). Scú láani: Dios sadudy looy, xomod radudybu a guiránac xpiimbu, galrro espiritual, sagonésbu né sapbu looy.
14. ¿Xí stoib mod raslooy Jehová que toibsi midid ragobiobu buñ ni biruʼbu?
14 Stoib mod ni raslooy Jehová que diti rabúbu buñ láani ngú, ni ronybu que guirá buñ gap toib Biblia. Santas Escrituras cuáni ló tzón diitz: hebreo, arameo né griego. ¿Nosi buñ ni labúu roʼol Xtiitz Dios ló tzón diitzreʼ más radzaktzayibu Jehová la? Yaca (Mat. 11:25).
15. Bisetlaa stoib prueby ni raslooy que Jehová toibsi midid ragobiobu buñ (láaca bibiʼ retrat).
15 Par guicacuent Jehová lóono diti fuerspa tzoʼno scuel xirop o gangoluʼno de diitz hebreo, arameo né griego. Jehová diti radudybu sabiduría xtunybu nosi buñ ni nangoluʼ, radudybu láani guiránac buñgudxlio, ná pal goyeeyibu scuel o yaca. Xtiitzbu, la Biblia, ma góc traducirni ló xidal mil diitz. Por ngú buñ de guiránac gudxrop labúu ganyibu xcalrrasuidy Jehová né guisuidyibu gacyibu ximig Dios (2 Tim. 3:16, 17).
La Biblia ma góc traducirni ló xidal mil diitz, ni raslooy que Jehová toibsi midid ragobiobu buñ. (Bibiʼ párrafo 15).
TZOʼRANO LAINY YOʼ LAIRY XTUNY JEHOVÁ
16. ¿Chú layibu racacuent Jehová lainy yoʼ lairy xtunybu? (Hechos 10:34, 35).
16 Toib privilegio rodann ni noʼno lainy yoʼ lairy xtuny Jehová. Diti noʼ ni labúu guigaʼl xcalnatzay, xcalrronladx né mod ragobioo Jehová lóono. Láabu racacuentbu lóono toibsi midid, nac rotísi lagary ro rabésno, xcudxno, costumbres ni napno, pal goyoʼno scuel o yaca, xcolorno, xízno né pal nacno buñguieeu o buñgonaʼ. Nosi ni ranabbu lóono, láani ngú gapno respet ni rony mandarybu (bíil Hechos 10:34, 35).
17. ¿Xí guisuidyno ló artículo ni sieed?
17 Ló Salmo 15:1, David buny chop galrranabdiitz reʼ: «Jehová, ¿chú labúu tzoʼ lainy yoʼ lairy ni naplo? ¿Chú labúu cués ló dainy nayaa ni naplo?». De ngú, né xcalrracné Jehová, láacabu cuapybu galrranabdiitzcu. Ló artículo ni sieed, sasuidyno tipnés cós ni non gony cumplirno par tzoʼrano lainy yoʼ lairy xtuny Jehová.
CANCIÓN 32 ¡Ponte de parte de Dios!
