¿Xigony goniʼ toib «Xoʼ» que pal ronybu galtzeʼel né Rut «ma diti sacaʼbu ni non gac xtunybu»? (Rut 4:1, 6).

Ló dzú ni see, pal toib buñguieeu ni ma buny galtzeʼel raity né diti rioʼ xiimbu, buñ gonabdiitz ndeʼ: «¿Chú guicaʼ xaliobu? ¿Ma diti sasetnaladx buñ xfamilbu la?». Guirá ndeʼ birexani ló Xiley Moisés.

Pal toib buñguieeu raity o ratoʼ guirá xalioo portín biabbu ló galsii, buchbu o toib xfamilnadxbu labúu rasiʼ guirá layoocu. Modcu layoocu diti radudyni ladxña stoib famil (Lev. 25:23-28; Núm. 27:8-11).

¿Xí góc par diti ñaladx buñ laa gueʼetcu? Buch gueʼetcu rony galtzeʼel né xcoñat par tzoʼ toib xiimbu ni tzané laa gueʼetcu né guiané guirá layoocu. Buñguieeu buny galtzeʼel né xcoñat par ñanbu gonaʼ viodcu (Deut. 25:5-7; Mat. 22:23-28). Ló xtzú Rut, bunyibu costumbre reʼ.

Gonysino pensary ló ni gosaclóo Noemí. Láabu bitzñabu né Elimélec. Per órni tzeelbu goity né goity guiropca xiingaʼnbu, ma diti goyoʼ buñguieeu ni ñan láabu (Rut 1:1-5). Órni Noemí bibiguet gudx Judá, gochbu xolichbu Rut nanabbu Boaz nasiʼ guirá xaliobu portín Boaz nac toibtica xfamilnadx Elimélec (Rut 2:1, 19, 20; 3:1-4). Per Boaz gon que noʼ stoib ni nac más xfamilnadxbu, né ngú ni gop más derech nasiʼ láani (Rut 3:9, 12, 13). La Biblia rabeʼ laabu «Xoʼ».

Primerdiguieʼ, Xoʼcu gosaguel nacaʼ layoocu (Rut 4:1-4). Ná gonbu que non naguiixbu láani, láaca gonbu que Noemí ma nac buñgol né ma diti labúu ñoʼ xiimbu ni ñané xalioo Elimélec. Ma Xoʼcu ñané guirá layoocu. Primer la, rolooyni labúu ñapbu más layoo.

Per órni Xoʼcu gon que non gonybu galtzeʼel né Rut, ma diti gosaguelbu nasiʼbu layoocu. Goniʼbu: «Diti labúu siiya láani, portín ma diti sacaʼya ni non gac xtuni» (Rut 4:5, 6). ¿Xigony ma diti gosiʼbu láani?

Pal Xoʼcu o stoib xfamilnadxbu ñony galtzeʼel né Rut né ñoʼ toib xiinyibu, mbioxcu ñané guirá xalioo Elimélec. ¿Xigony ma diti nacaʼ Xoʼcu «ni non ñac xtuny»? La Biblia diti rasetlaa láani, per guibiʼno tipnés cós ni pentzi godudy ló xpensarybu.

• Primer, pentzi bunybu pensary que xilaʼsi nasnitbu bidxiich loguiaʼni, portín ma xiin Rut nacaʼ guirá xalioo Elimélec, diti ñacni xtunybu.

• Ni rarop, ma láabu nayaʼanbu tanli Noemí né Rut.

• Ni rion, pal láabu né Rut ñoʼ más xiinyibu, nadzoo xaliobu par nacaʼ tanli xiin Rut né xiimbu ni ma napbu né stoib buñgonaʼ.

• Ni rasaʼ tap, pal diti goyoʼ stipnés xiimbu, xiimbu ni ñapbu né Rut nacaʼ xaliobu né xalioo Elimélec. Xaliobu ma ñaʼanni ladxña toib mbiox ni sané laa Elimélec, diti laabu. Pentzi por ngú diti gosaguelbu ñacnébu Noemí, siaca nasnitbu ni non ñac xtunybu. Bisiambu láani ladxña Boaz, portín láaca Boaz gop derech nasiʼ layoocu. Né Boaz gosaguel. ¿Xigony? Boaz goniʼ scareʼ: «Par diti tudy xalioo gueʼetcu ladxña stoib famil» (Rut 4:10).

Xoʼcu goyoʼ más ló galrrasaʼ diti ñaladx buñ laabu né diti nasnitbu xaliobu. ¡Nosi goyoʼbu galrrasaʼ por láabu! Per guirá ni bunybu diti noʼ pu biquiinni, portín bialadx buñ laabu. Láaca, bisnitbu toib privilegio rodann ni gop Boaz; portín lad xfamil Boaz bireʼ Mesías, Jesucristo. Nabann mod bidubylagaʼ Xoʼcu, portín nosi goyoʼbu galrrasaʼ por láabu né diti goniiny ñacnébu stipnés (Mat. 1:5; Luc. 3:23, 32).