1, 2. a) Casi guirá ór, ¿xí rac órni rionis toib buñ? b) ¿Xí guisuidyno ló artículo reʼ?

 ¿TOIBTICA buelt ma bibiʼlo tipnés buñ ni ma tzonis la? Mod racapyibu chop galrranabdiitz ni catudy discurscu, riendxichni que nanyibu xi cayonyibu. Xfamilyibu né ximigyibu nigolú rabaladx. Né órni rareʼyibu lainy nís lóoyibu rien que nigolú rabaladxyibu, guirá buñ ragap ladxña. Guirá xomal xidal mil buñ rionis, modreʼ radxinyibu racyibu testigos xtuny Jehová ni ma góc dedicar né ni ma goyonis.

² Pal cayonylo pensary tzonislo radudyni diitz que «cayopylo Jehová», né ngú rony que racaptzaʼditlo ló Gudxlio re’ ni nacaygoluʼ (Sal. 14:1, 2). Artículo reʼ goyaʼni par looy, ná naclo mbioxhlas o buñgol. Reʼ sadzelo tzón de xidal razón ni noʼ par gonylo ni ná Jehová. ¿Né lóono ni ma goyonisno ga? Artículo reʼ sacnéni lóono par guiniiny gonyno xchiin Dios xtunyno por tipzó.

3. Lóono ni nacno xpiin Jehová, ¿xigony ronladxno galnigolú né justicia? (Salmo 119:128, 163).

³ Jehová raiby ndeʼ xpiin: «Gonladxto galnigolú» (Zac. 8:19). Láaca, Jesús goleʼ loguiaʼbu que rasacgoluʼ guiyopyno justicia (Mat. 5:6). Ndeʼ radudy diitz que guiniiny gonyno xinésni, gacno buñtzay, gacno nayaa nisló Dios né guidopy xcalnabanyno. ¿Ronladxlo galnigolú né justicia la? Nando que scú. Por ngú diti rioladxlo guirá clas galrrascú né cós mal (bíil Salmo 119:128, 163). Guirá ni rascú ronybu xomodca rony Buñdzab, ni rony mandary Gudxliogoxreʼ (Juan 8:44; 12:31). Toibtica ni raniiny  Buñdzab gony láani ngú gony buidybu laa Jehová. Caniʼbu galrrascú de Dios xtunyno desde dzú biscúbu Adán né Eva, ro goniʼbu que Jehová diti rioʼ galrrasaʼ por buñ, rascú né que riaabu cós tzaay par buñgudxlio (Gén. 3:1, 4, 5). Xtol xcalrrascú Buñdzab, xidal buñ rony pensary mal de Jehová. Órni buñ diti nadxiʼyibu Jehová, Buñdzab, labúu guichiin layibu gonyibu bisaʼsi cós mal (Rom. 1:25-31).

4. ¿Ximod ma bislooy Jehová que nacbu «Dios de galnigolú»? (Láaca bibiʼ retrat).

⁴ Jehová nac «Dios ni diti rascú» né rasuidybu galnigolú né guidopy xcalnabanybu a buñ ni ronladx láabu (Sal. 31:5). Racnébu xpiimbu par diti guiscú Buñdzab layibu. Jehová láaca rasuidybu xpiimbu par diti guiscú né gony xinésni, modreʼ rapyibu respet láacayibu né rasacyibu sacró (Prov. 13:5, 6). ¿Ma bibiʼlo ximod gocnéni looy de goló casuidylo la Biblia la? Ma bisuidylo que diti noʼ stoib ni labúu conés lóono xomod Jehová (Sal. 77:13). Por ngú nainy guisoblo ni ná Jehová (Mat. 6:33). Láaca nainy gony defenderlo galnigolú né guislooylo que guirá ni goniʼ Buñdzab diti nigolúni. ¿Ximod labúu gonylo láani?

5. ¿Xí labúu gonylo par gony defenderlo galnigolú né justicia?

⁵ Mod nabanylo, saslooyni stipnés que rabeʼlo tiplad xcalrrascú Buñdzab, que rony defenderlo galnigolú, que rioladxlo gony mandary Jehová looy né que nainy guisoblo ni rony mandarybu. Par labúu gonylo láani, non gaibylo Jehová ló toib oración que raniiny gonylo xchiimbu por tipzó. De ngú non tzonislo par guislooylo nisló guirá buñ que ma góc dedicarlo láabu. Riendxichni que ni ronladxlo galnigolú né justicia nainy tzonislo.

6. Mod ná Salmo 45:4, ¿xí razón napno par gonladxno Jesucristo?

⁶ ¿Xigony ronladxlo Jesucristo? Radzelno tipnés razón ló Salmo 45:4 (bíil láani). Jesús rony defenderbu né rabeʼ loguiaʼbu galnigolú, humildad né justicia. Por ngú, pal ronladxlo galnigolú né justicia láaca ronladxlo Jesús.  Por ejemplo, buny pensary ló balory ni bislooy Jesús par buny defenderbu galnigolú né justicia (Juan 18:37). Per ¿ximod rabeʼ loguiaʼbu humildad?

7. ¿Xí más radziguiaʼlo de humildad xtuny Jesús?

⁷ Jesús rabeʼ loguiaʼbu humildad por mod raniʼbu né por mod ronybu. Por ejemplo, guirá ór ronyxiroʼbu Bixiosbu; dipa rayopybu mod gonyxiroʼ buñ láabu (Mar. 10:17, 18; Juan 5:19). ¿Xí ronylo pensary de humildad ni raslooy Jesús? ¿Diti rachiinni looy gonladxlo Xiin Dios né guisuʼlo láabu la? Scú láani. ¿Xigony nigolú raslooybu humildad? Portín Jehová raslooy humildad, né Jesús ronladx né rasuʼtzay mod nac Bixios (Sal. 18:35; Heb. 1:3). ¿Ndeʼ rachiin looy guibigaxlo Jesús nja?

8. ¿Xigony rioladxno que Jesús nac Rey xtunyno?

⁸ Rabaladxno que Jesús nac Rey xtunyno portín diti noʼ stoib xomod láabu. Jehová bisuidy láabu né golú láabu par gacbu Rey (Is. 50:4, 5). Láaca, buny pensary ló xiroʼ galrronladx ni bislooy Jesús lóono (Juan 13:1). Jesús nacbu Rey xtunyno, por ngú raquiin gonladxno láabu. Láacabu golexabu que buñ ni rasob ni rony mandarybu nac ximigbu né ronladx láabu (Juan 14:15; 15:14, 15). ¡Nacni toib privilegio rodann gacno ximig Xiin Jehová!

9. ¿Xigony mod goyonis Jesús radzakni né xcalrrionis xpiimbu?

⁹ Toibtica ni rony mandary Jesús gony xpiin láani ngú tzonisyibu (Mat. 28:19, 20). Láacabu bislooybu láani. Ná diti modca goyonisbu rionis xpiimbu, moda ngúca láani (bibiʼ cuadriyen ni laa, «Xigony diti toibsi mod nac xcalrrionis Jesús né xcalrrionis xpiimbu»). Por ejemplo, órni goyonis Jesús bidxinbu par gonybu xchiin Bixiosbu (Heb. 10:7). Moda ngúca rony xpiimbu. Órni rionisyibu, raslooyibu nisló buñ que ma góc dedicaryibu Jehová né de goló dzúcu ni más rasac par layibu ngú gonyibu xchiin Dios, diti xchiinyibu. Modcu rasuʼyibu Xomextrayibu.

10. ¿Xigony non gonladxlo Jesús, né xí guichiin galrronladxcu looy gonylo?

¹⁰ Looy ronylo crer que Jesús nac toibguielot Xiin Jehová Rey ni ma golú Dios gony mandary lóono. Nanlo que Jesús nac buñdxo né rasuʼbu modpa nac Bixiosbu. Ma bisuidylo que bidudybu ni godó xidal buñ ni calaʼn, bisialdóbu xcalnabany buñ ni ma careʼgan dada bisialbu buñguitz (Mat. 14:14-21). Looyca ma bibiʼlo que Jesús casanir nisló congregación cristiana ni noʼ ló naareʼ (Mat. 23:10). Né nanlo que nacbu Rey de Gobierno xtuny Dios né sonybu xidal cós tzaay por lóono ló dzú ni sietra. ¿Ximod labúu guislooylo que ronladxlo láabu? Guisuʼlo mod bunybu (Juan 14:21). Por ngú, toibtica cós ni raquiin gonylo láani ngú gac dedicarlo Jehová né tzonislo.

11. ¿Xí razón ni más rasac napno par tzonisno, né xigony?

¹¹ ¿Xigony non tzonis buñ? Rarexani ló mandamiento xtuny Dios ni más rasac ni goniʼ Jesús. Goniʼbu: «Gondxiʼ Jehová Dios xtunylo né guidopy xcalnabanylo, né guidopynaclo, né guidopy xpensarylo né guidopy xcalnadiplo» (Mar. 12:30). ¿Scá ronladxlo Dios la?

12. ¿Xigony ronladxlo Jehová? (Láaca bibiʼ retrat).

¹² Noʼ xidal razón par gonladxno Jehová. Por ejemplo, ma bisuidylo que ronoʼbu  «ralainy vida» né radudybu «guiráxadit galrrascad ni natzaay né guirá ni diti nap galkié» (Sal. 36:9; Sant. 1:17). Guirá cós tzaay ni naplo sieedni de Jehová, ni radudy ni nap né ni ronladxgoluʼ lóono.

13. ¿Xigony xcalgoity Jesús nacni toib galrrascad ni rasacgoluʼ?

¹³ Xcalgoity Jesús nacni toibtica xcalrrascad Jehová. ¿Xigony ranino ngú? Gonyno pensary balaati ronladxyibu saʼyibu. Jesús goniʼ: «Bixiosa ronladx na’» né «Ronladxi Bixiosa» (Juan 10:17; 14:31). Mod bidzakyibu saʼyibu dxoga dxoga góc nadipni más ló xidal millón de íz (Prov. 8:22, 23, 30). Nigoreʼ buny pensary ló galrrioʼob rodann ni gosac Jehová órni bibiʼbu Xiimbu godudy ló galrrioʼob né goity. Per Jehová ronladxgoluʼ buñgudxlio, dada looy, bunycuentbu Xiimbu xomod toib galrrascad modreʼ looy né stipnés buñ labúu guibany tipzó (Juan 3:16; Gál. 2:20). ¿Noʼ stoib razón ni más rasac par gonladxno Dios la?

14. ¿Xí láani más galán gonylo laʼga nabanylo?

¹⁴ Laʼga más rasuidylo de Jehová más ronladxlo láabu. Sigory raniiny looy guidzaklo Jehová nigoreʼ né dada por tipzó, né labúu sácni scú. Mod raniʼlo né mod ronylo labúu gonylo que guibaladx  xcalnabanybu. Jehová né galrronladx rony animar looy gonylo láani (Prov. 23:15, 16). Ni ragoʼlo guiclo gonylo né xcalnabanylo, saslooylo pal nigolúpa ronladxlo láabu (1 Juan 5:3). Pal ronylo ni rioladx Jehová ngú ni más galán gonylo.

15. ¿Ximod labúu guislooylo que ronladxlo Jehová?

¹⁵ ¿Ximod labúu guislooylo que ronladxlo Jehová? Primer, non gonylo toib oración ro gaibylo láabu que ma gac dedicarlo, portín nosi láabu nacbu Dios ni nigolú (Sal. 40:8). De ngú, tzonislo par guislooylo ló guirá buñ que ma góc dedicarlo. Mod bisetlano ro gosaló artículo reʼ, nogoluʼ galnakit órni rionis buñ, de goló dzúcu ma radza’ mod nabanylo. Ma diti nabanylo par looysi, xalagary ngú par gonylo xchiin Jehová (Rom. 14:8; 1 Ped. 4:1, 2). Ndeʼ nac toib responsabilidad rodann, pal ronylo láani radudyni oportunida looy guibanylo más sacró. Ganno xigony.

16. Mod ná Salmo 41:12, ¿xí galnasác sadudy Jehová buñ ni rony ni nábu?

¹⁶ Diti noʼ stoib ni más radudy xomod Jehová. Nac nitisi cós ni guidudylo láabu, láabu guirá ór radxiguetbu más looy (Mar. 10:29, 30). Dada ló gudxliogoxreʼ ni mápa mer guinitló, láabu sacnébu looy guibanylo sacró né goxtiguie. Xitcal ndeʼ; diti nosi ló naareʼ labúu gonylo xchiin Jehová. Labúu gonylo láani por tipzó. Galrronladx ni napto saʼto saniʼsni más, né looy labúu sabanylo tipzó xomodca Jehová (bíil Salmo 41:12).

17. ¿Xí láani diti nap Jehová né looy labúu guiscadlo láani láabu?

¹⁷ Órni rac dedicarlo né rionislo, naplo oportunida guidudylo Bixioslo toib cós ni más rasac. Guirá cós tzaay ni naplo né guirá galnakit ni gosaclo, Jehová bidudy láani looy. Né looy labúu guidudylo ni bisaʼ guibá né Gudxlio toib cós ni diti napbu: gaclo leal láabu né gonylo xchiimbu né guidopy xcalnabanylo (Job 1:8; 41:11; Prov. 27:11). Diti noʼ stoib cós  ni más galán ni labúu gonylo né xcalnabanylo. Galrronladx ni naplo Jehová sachiin looy tzonislo.

18. ¿Xí galrranabdiitz labúu gonylo looyca?

¹⁸ Nigoreʼ ni ma bisuidyno guirá ndeʼ, ¿sionislo la? Nosi looy labúu guicapylo galrranabdiitz reʼ. Ni labúu gacné looy ngú guinabdiitzlo ndeʼ: «¿Noʼya puext par goni láani la?» (Hech. 8:36). Bisetnaladx tzón razón ni napno par tzonisno. Primer, portín ronladxlo galnigolú né justicia. Gonabdiitz ndeʼ looy: «¿Nainy naʼ guibiʼya dzú guiránac buñ ma diti guiscú né gony xinésni la?». Ni rarop, por ni ronladxlo Jesucristo. Gonabdiitz ndeʼ looy: «¿Raniiny naʼ que Xiin Dios gac Rey xtuni né guisuʼya mod bunybu la?». Né, ni rion né ni más rasac, portín ronladxlo Jehová. Gonabdiitz ndeʼ looy: «¿Raniiny naʼ goni xchiin Jehová né coʼ nakita xcalnabanybu la?». Pal cuapylo que scú ló guirá galrranabdiitz reʼ, ¿xigony diti rionislo? ¿Xí racaa looy? (Hech. 16:33).

19. ¿Xigony non tzonislo? Bisetlaa toib ejemplo (Juan 4:34).

¹⁹ Pal diti nanlo pal tzonislo, buny pensary ló toib ejemplo ni bisetlaa Jesús (bíil Juan 4:34). Jesús goniʼ que órni buñ rony xchiin Bixiosbu nacni xomod toib galrro. ¿Xigony? Portín galrro racnéni buñ. Jesús gon que guirá ni ranab Jehová gonyno racnéni lóono. Jehová diti ranab gonyno ni gony mal lóono. Ni racladx Dios láani ngú tzonislo (Hech. 2:38). Por ngú labúu gaplo confianz que pal rasoblo mandary de tzonislo, labúu gacnéni looy. Pal nadudyibu looy toib galrro ni más naníx, ¿ñoolo láani nja? Por ngú goyonis.

20. ¿Xí sasuidyno ló stoib artículo?

²⁰ ¿Xí láani racaa ló tipnés ni diti rionis? Pentzi rasacyibu que diti noʼyibu puext. Ni coʼ buñ guic gac dedicar né tzonis nacni toib cós ni rasacgoluʼ. Por ngú, buny xpensaryni, goleʼ tiemp né buny rutirigaʼlni looy par tzoʼlo puext. Per pal nainy tzonislo, ¿xí labúu gacné looy par tzoʼlo puext gonylo láani? Sasuidyno láani ló stoib artículo.