1, 2. a) ¿Pu ór, púti, né xigony bicaʼ Pablo guiich ló Efesios? b) ¿Xí galrranabdiitz guicapyno?

 LAʼGA goyoʼ apóstol Pablo press lainy gudx Roma, goniiny ñony animarbu xhermanbu. Per diti labúu goyguenbu guirá biinreʼ lidx, por ngú bicaʼbu xidal guiich ló guirá biinreʼ. Toibticani de láani bixelbu láani ló cristianos xtuny gudx Éfeso ló íz 60 o 61 (Efes. 1:1; 4:1).

² Godudy chii íz de goloʼ Pablo goniʼ xtiitz Dios né bisuidybu buñ diitz sacró lainy gudx Éfeso (Hech. 19:1, 8-10; 20:20, 21). Nigolú gondxiʼbu xhermanbu por ngú goniiny ñacnébu guirá biinreʼ par dipa nasianyibu Jehová. Per, ¿xigony bicaʼbu guiich ló cristianos ungidos de galnaní né galnacay? ¿Né xí labúu guisuidyno lóono ni nacno cristianos de consej ni bidudybu guirá biinreʼ? Ló artículo reʼ sacapyno galrranabdiitz reʼ.

DE GALNACAY A GALNANÍ

3. ¿Xí ejemplos biquiin Pablo ló capítulo 5 xtuny efesios?

³ Pablo gochbu cristianos de Éfeso: «Goyoʼ toib tiemp ni gócto galnacay, per nigoreʼ ma nacto galnaní» (Efes. 5:8). Biquiimbu galnaní né galnacay xomod ejemplos par nabexabu balaati xiroʼ bidzaʼ buñ efesios. Primer, ganno xi gochbu biinreʼ «goyoʼ toib tiemp ni gócto galnacay».

4. ¿Xigony labúu guinino que buñ efesios goyoʼyibu ló xcalnacay religión falz?

 ⁴ Goyoʼyibu ló xcalnacay religión falz. Antes ni nasuidyibu galnigolú né ñacyibu cristianos, buñ efesios gopyibu xidal crenys xtuny religión falz né bisaʼsi cós bunyibu crer. Lainy gudx Éfeso goyoʼ toib templo xtuny toib dioxh gonaʼ ni góc laa Ártemis, ló dzúcu goyoʼni lad gatz cós ni radziguiaʼ buñ ló guidopynac Gudxlio. Buñ goyee lagarycu par buny adoraryibu xidal dioxh falz. Goyoʼ xidal buñ ni buny ganar xiroʼ bidxiich portín bitoʼyibu né bisaʼyibu templos xtuny Ártemis mitien (Hech. 19:23-27). Láaca guirá buñ ni golés lagarycu bimbutzaay buñ layibu portín bunyibu galchiser (Hech. 19:19).

5. ¿Xigony labúu guinino que buñ efesios goyoʼyibu ló xcalnacay galyoxh?

⁵ Goyoʼyibu ló xcalnacay galyoxh. Buñ xtuny gudx Éfeso nigolú gocyibu buñyox né diti bitoy lóoyibu por guirá cós ni bunyibu. Guirá galnakit né lanii ni goyoʼ cu gopni pór sexo (Efes. 5:3). Buñ ma diti bisioʼob xcalrrienyibu layibu (Efes. 4:17-19). Ló stoib diitz diti bunyibu pensary que non ñonycuentyibu ni cayonyibu nisló Jehová. Diti gonyibu xi láani ngú cós tzaay né xi láani ngú cós mal, Pablo goniʼ que goyoʼyibu «ló galnacay, né diti sapyibu galnabany ni radudy Dios».

6. ¿Xigony góoch Pablo a buñ efesios «nigoreʼ ma nacto galnaní»?

⁶ Tipnés efesios bireʼyibu ló galnacay né por ngú Pablo góoch layibu ndeʼ: «Nigoreʼ ma nacto galnaní toibsi né Señor» (Efes. 5:8). Gosaló bisobyibu ni ná Xtiitz Jehová, ni góc xomod galnaní ni bisanés layibu (Sal. 119:105). Bisianyibu guirá prácticas xtuny religión falz né guirá galyoxh ni bunyibu. Bisuʼyibu Dios né bunyibu rutigoygaʼlni layibu par ñonyibu ni ná Jehová (Efes. 5:1).

7. ¿Ximod toibsi midid nac mod nabanyno né mod bibany cristianos xtuny gudx Éfeso?

⁷ Scúca, antes ni nimbuno galnigolú,  goyoʼno ló xcalnacay religión falz né galyoxh. Tipnésno sigory bunyno lanii ni rony religión falz, né stipnésno sigory bunyno galyoxh. Per, órni bimbuno Jehová, bitzaʼno mod bibanyno né gosalóno bisobno ni rony mandary Jehová de xi láani ngú cós tzaay né xi láani ngú cós mal. Ngú nigolú ma gocné lóono de xidal mod (Is. 48:17). Ná scú, rioʼ ór rasac naganno tzoʼno sit de galnacay né saano xomod xiin galnaní. Ganno xi labúu gacné lóono gonyno láani.

DITI TZOʼNO LÓ GALNACAY

8. Mod ná Efesios 5:3-5, ¿xí láani diti non ñony buñ efesios?

⁸ (Bíil Efesios 5:3-5). Par labúu ñoʼyibu nigolú sit de xcalnacay galyoxh, cristianos xtuny gudx Éfeso non nabeʼyibu tiplad prácticas ni diti bioladx Jehová. Ndeʼ diti nosi godiñani galyoxh, láaca godiñani diitz yohx. Pablo góoch layibu que diti naniʼyibu guirá cós cu pal nainy layibu tzoʼyibu ló «Gobierno xtuny Cristo né xtuny Dios».

9. ¿Xigony diti non gonyno ni toib cós ni radzak né galyoxh?

⁹ Lóono láaca non gapno xiroʼ cuidad par diti gonyno «cós ni diti noʼ pu raquiin, ni nac xtuny galnacay» (Efes. 5:11). Nantzayno que órni toib buñ diti rasian de guibiʼ o guicadiag cós buidy o cós yox o raniʼ láani, ndeʼ labúu gony que tzaguiabbu ló toib galkié (Gén. 3:6; Sant. 1:14, 15). Por ejemplo, lainy toib gudx xidal Testigos goyoʼ lainy toib grupo par bixelyibu mensaj saʼyibu. Primer, xidalyibu goniʼyibu de cós espiritual. Dxoga dxoga gosaló goniʼyibu stipnés diitz, dada bidxin midid goniʼyibu pór de sexo. Diti xidzú xidalyibu goniʼyibu que guirá galyoxh ni goniʼyibu buny que biabyibu ló galyoxh.

10. ¿Xí nainy Buñdzab gonyno? (Efesios 5:6).

¹⁰ Toibtica xtramp Buñdzab láani ngú que rachelbu xpensary buñ par diti gan xi láani ngú cós tzaay né xi láani ngú cós mal (Is. 5:20; 2 Cor. 4:4). Por ngú, diti radziguiaʼno que gudxliogoxreʼ rayopy mod par gonyno crer que cós ni ná Jehová que nac buidy né nac galyoxh diti malni (2 Ped. 2:19). Xidal películas, programas ni rareʼ ló televisión, né ni rareʼ ló internet diti noʼni de acuerdo né ni rony mandary Jehová. Buñdzab raniiny gonyno pensary que guirá prácticas né galyoxh ni rony buñ ló Gudxlio reʼ natzaayni, né láaca ragoʼ nakitni buñ né diti malni (bíil Efesios 5:6).

11. Mod ma bibiʼno ló experiencia xtuny Angela, ¿xigony nigolú rasac guisobno consej ni sieed ló Efesios 5:7? (Láaca bibiʼ retrat).

¹¹ Buñdzab raniiny que guidzakno buñ ni rony que guisac naganno guisobno ni rony mandary Jehová. Por ngú, Pablo bidudy consej reʼ a buñ efesios que diti nadzakyibu buñ ni rony cós mal. Gochbu biinreʼ: «Diti gacto toibsi né layibu» (Efes. 5:7). Lóono non gapno más cuidad que buñ efesios. ¿Xigony? Portín ló naareʼ diti nosi radzakno buñ órni rabiʼno layibu, láaca labúu racni ló redes sociales. Toib hermana de gudx Asia ni laa Angela a rabexa ximod gonbu que nacni toib riesga órni buñ radzak saʼ ló redes sociales: «Dxoga dxoga labúu gony nacayni xpensary buñ, sin guidudylo cuent. Bidxin midid ma diti bidzutzi ni gopa ximiga ni diti gop respet ni ná la Biblia. Después buni pensary  que diti mal ngú goni cós ni diti rioladx Jehová». ¡Galán láani que ancianos gocné láabu né galrronladx par bitzaʼbu mod bunybu pensary! Láabu nábu: «Nigoreʼ ma diti ragoʼya ló xpensari guirá ni noʼ ló redes sociales, xalagary ngú cós espiritual».

12. ¿Xí non gonyno pal nainy guisobno ni rony mandary Jehová?

¹² Ná gudxliogoxreʼ raniʼ que cós yox diti malni, diti guidudyno lagary que guiscúni lóono; nanno que nacni galrrascú (Efes. 4:19, 20). Guinabdiitzno lóocano: «¿Roni rutirigaʼlni naʼ par diti guidzaʼga buñ ni rinéya scuel, buñ ni ronynéya dxiin o stipnés buñ ni diti nap respet ni rony mandary Jehová la? ¿Napa balory né rony defender ni ná la Biblia ná raniʼ buñ que diti racacuenta ni raniʼ stipnés la?». Mod na 2 Timoteo 2:20-22, láaca non gapno cuidad órni cuuno chú gac ximigno lainy congregación. Guisetnaladxno que diti guiráyibu sacnéyibu lóono par dipa guisianno Jehová.

DITI GUIAÑ SAANO «XOMOD XIIN GALNANÍ»

13. ¿Xí radudy diitz «saato xomod xiin galnaní»? (Efesios 5:7-9).

¹³ Después ni cuaʼ cristianos xtuny gudx Éfeso consej que ma diti nasaayibu ló galnacay, Pablo góoch layibu: «Diti guiañ saato xomod xiin galnaní» (bíil Efesios 5:7-9). ¿Xí radudy diitz ndeʼ? Ló chop tzónsi diitz, guislooyno guirá ór que nacno cristianos ni nigolú. Par labúu gonyno láani, non gonyno xidal cós. Toibtica de láani, ngú golno né guisuidyno guirá ór la Biblia né publicaciones xtunyno. Órni gonyno láani, nigolú rasac guicatzaayno cuidad ejemplo né xcalrrasuidy Jesucristo, «galnaní xtuny gudxlio» (Juan 8:12; Prov. 6:23).

14. ¿Ximod labúu gacné espíritu santo xtuny Jehová lóono?

¹⁴ Pal nainy saano «xomod xiin galnaní», láaca raquiinno xcalrracné espíritu santo xtuny Dios. ¿Xigony? Portín nagan gacno nayaa ló Gudxlio buidy  reʼ (1 Tes. 4:3-5, 7, 8). Espíritu santo labúu gacné lóono par gonyno gan mod rony pensary gudxliogoxreʼ ni diti noʼ de acuerdo mod ná Dios. Láaca labúu gacnéni lóono gonyno cós né «galrronladx» né galnigolú, né gonyno «xinésni» (Efes. 5:9).

15. ¿Xí labúu gonyno par guicaʼno espíritu santo xtuny Jehová? (Efesios 5:19, 20).

¹⁵ Jesús goniʼ que Jehová sadudy «espíritu santo guirá ni canab láani» (Luc. 11:13). Por ngú toibtica mod ni guicaʼno láani, ngú guinabno láani Jehová ló oración. Stoib mod ni guicaʼno láani, ngú gonyxiroʼno Jehová ló reunión toibsi né xhermanno (bíil Efesios 5:19, 20). Espíritu santo sacnéni lóono par guibanyno mod rioladx Dios.

16. ¿Xí sacné lóono par cutzayno xí láani gonyno? (Efesios 5:10, 17).

¹⁶ Órni cuuno xi láani gonyno, non ganno «xi ngú ni raniiny Jehová» né órcu gonyno láani (bíil Efesios 5:10, 17). Órni ronyno por guidzelno principios ni sieed ló la Biblia ni gacné lóono ló ni cadudyno, ni cayonyno láani ngú, cayopyno mod par ganno xi rony pensary Jehová de láani. Órni rasobno principios ni radzelno, labúu rabútzayno xi láani gonyno.

17. ¿Ximod labúu guiquintzayno xtiempno? (Efesios 5:15, 16; láaca bibiʼ retrat).

¹⁷ Pablo láaca bidudybu consej cristianos xtuny gudx Éfeso que non naquintzayibu xtiempyibu (bíil Efesios 5:15, 16). Buñdzab, ñacladx ñodieʼno ló cós ni noʼ ló gudxliogoxreʼ né ma diti ñapno tiemp par ñonyno xchiin Dios (1 Juan 5:19). Diti nagan coʼno guicno ló bidxiich, scuel, dxiin, xalagary guiyopyno stipnés mod ni labúu ñonyno xchiin Jehová. Pal nasaclono ngú, ñacni toib señ que mod rony pensary gudxliogoxreʼ cacáni lóono. Nigolú, guirá cós reʼ diti malni, per  dipa non tzoʼni primer lagary lainy xcalnabanyno. Par diti guiañ saano «xomod xiin galnaní», non guiquiinno xtiempno galán, ni radudy diitz, coʼno guicno ló cós ni nigolú rasac.

18. ¿Xí láani buny Donald par labúu biquiintzaybu xtiempbu?

¹⁸ Guiyopyno oportunida par gonyno más ló xchiin Jehová. Ngú ni buny Donald, ni rabés lainy gudx Sudáfrica. Láabu nábu: «Buni pensary ximod nabani né gonaba Jehová ñacné naʼ ñoni más ló xchiimbu. Gonaba láabu ñacnébu naʼ nadzela toib dxiin ni nasian más tiemp par naniya xtiitz Dios. Né xcalrracné Jehová, bidzela láani. Órcu tzeʼela né naʼ goyodieʼdo ló xchiin Jehová».

19. ¿Xí non gonyno par diti guiañ saano «xomod xiin galnaní»?

¹⁹ Nandxichno que guiich ni bicaʼ Pablo par efesios gocnéni layibu par diti nasianyibu Jehová, né láaca labúu gacnéni lóono. Xomod ma bisuidyno, racnéni lóono cutzayno xi galnakit gonyno né cutzayno ni gac ximigno. Láaca rachiinni lóono guisuidytzayno la Biblia né modcu guidudyno lagary que galnaní xtuny galnigolú guisanés lóono. Láaca, ronyni que guisetnaladxno balaati rasac espíritu santo xtuny Dios, ni racné lóono gapno cualidades sacróyen. Pal rasobno xconsej Pablo, labúu cutzayno cós ni coʼ nakit xcalnabany Jehová. Pal ronyno guirá ndeʼ, ma diti sioʼno ló xcalnacay gudxliogoxreʼ né siaʼanno ló galnaní.