1. ¿Xí galnagan racalóno guirácano?

 ¿NAPLO toib meta espiritual ni diti labúu rigaʼlo la? b Pal scú láani, diti nosi looy rasac naganlo láani. Por ejemplo, Philip goniiny ñonybu más oración né naxalbu xcalnabanybu nisló Jehová, per gosac naganbu nadzelbu ór par naninébu Jehová. Erika goloʼbu guicbu nadxiimbu tempran ló reunión par predicación. Per ná scú, casi ló guirá reunión bidxinbu godzu. Tomáš xidal buelt goloʼbu guicbu ñoʼolbu guidopynac la Biblia. Láabu nábu; «Diti bioladxi ñoola la Biblia. Tzón buelt buni láani, per pór ló Levítico biaʼanna».

2. ¿Xigony diti non guireʼganno pal napno toib meta, né yása tzagaʼlno láani?

² Pal ma goloʼlo guiclo tzagaʼlo toib meta né diti labúu ronylo láani, diti guireʼganlo. Raquiinni tiemp né xtem par labúu tzagaʼl buñ toib meta ná nacni mitien. Ni diti ma bireʼganlo raslooylo que nigolú rasac mod radzaklo Jehová né nainy looy gonylo xchiimbu galán. Jehová rabiʼ láani, né diti ranabbu looy ni diti labúu gonylo (Sal. 103:14; Miq. 6:8). Por ngú non ganlo que metas ni coʼlo guiclo gonylo labúu tzagaʼlo láani. Pal nanlo que metas ni ma goloʼlo guiclo gonylo labúu tzagaʼlo láani, ¿xí labúu gonylo? Nír guisuidyno tipnés sugerencias.

3. ¿Xigony nigolú rasac coʼno gan xcalnabanyno?

³ Par labúu tzagaʼlno metas espirituales, non coʼno gan xcalnabanyno ¿Xigony? Pal ma goloʼno guicno tzagaʼlno ni ma gonino, sonyno xtem por gonyno láani. Gan ni napno nacni xomod buu ni rachupiaʼ toib bark. Pal buu cu ralopy, barkcu sadxinni ro non guidxinni. Né pal nadip ralopyni más naguel sadxinni. Scúca, pal nigolú noʼ gan xcalnabanyno, sigory labúu tzagaʼlno metas ni nainy lóono. Toib hermano ni rabés gudx Salvador ni laa David ná: «Órni noʼ gan xcalnabanylo más ronylo xtem. Ronylo rutirigaʼlni looy par gonylo ni ma goloʼlo guiclo gonylo». ¿Xí sacné looy par tzoʼ más gan xcalnabanylo?

4. ¿Xí labúu guinabno Jehová? (Filipenses 2:13; láaca bibiʼ retrat).

⁴ Gonab lóo Jehová coʼ más gan xcalnabanylo. Né espíritu xtunybu, labúu gacnébu looy par tzagaʼlo metas ni nainy looy (bíil Filipenses 2:13). Rioʼ ór ragoʼno guicno gonyno toib cós portín nanno que ngú non gonyno, né diti malni. Per pentzi diti né guidopy xcalnabanyno nainy gonyno láani. Ngú ni gosaclóo Norina, toib hermana de Uganda. Láabu goloʼbu guicbu guisuidybu toib buñ, per diti tampa goloʼbu gan xcalnabanybu portín xpensarybu diti nacbu toib galán mextra. ¿Xí láani gocné láabu? Láabu nábu: «Guirá dzú gonaba Jehová nagoʼ gan xcalnabani par nasudi toib buñ. Néca naʼ gocnéyena láani, buni rutigoygaʼlni naʼ ñaca toib galán mextra. Chop tzón beʼo después, bidudi cuent que goyoʼ más gan xcalnabani. Íz cuca bisudi chop buñ».

5. ¿Ló xí láani gonyno pensary par tzoʼ más gan xcalnabanyno?

⁵ Buny pensary xi ma buny Jehová por looy (Sal. 143:5). Apóstol Pablo buny pensary ló galrronladx ni bislooy Jehová láabu, né ngú bichiin láabu ñonybu xchiin Jehová né guidopy xcalnabanybu (1 Cor. 15:9, 10; 1 Tim. 1:12-14). Scúca, laʼga más ronylo pensary ximod ma gocné Jehová looy, más sioʼ gan xcalnabanylo tzagaʼlo metas ni naplo (Sal. 116:12). Cuá cuidad xi gocné toib hermana ni rabés gudx Honduras par labúu ñacbu precursora regular. Láabu nábu: «Buni pensary balaati ronladx Jehová naʼ. Godabiobu naʼ lainy xcudxbu né ranbu naʼ. Ni buni pensary ló guirá ndeʼ, gocnéni naʼ ñonladxi más Jehová, né ngú bichiin naʼ par ñaca precursora».

6. ¿Xí stoib cós sacné lóono par coʼno más gan xcalnabanyno?

⁶ Bisetnaladx xi galnasác guicaʼlo pal rigaʼlo metas ni naplo. Guisetnaladxno ejemplo xtuny Erika, ni bisetlano ló párrafo 1. ¿Xí láani gocné láabu par  diti nadxiimbu ma godzu? Láabu nábu: «Bidudi cuent, que pal radxinna órni ma gosaló reunión par predicación, ma diti ñapa tiemp par ñoni tipnés cós ni rasac. Per, pal radxinna tempran, labúu naniya dioxh herman né labúu naninéya layibu. Láaca, labúu nacadiaga tipnés sugerencias par naniya xtiitz Dios más galán». Erika bunybu pensary xi galnasác nacaʼbu pal nadxinbu tempran ló reunión, por ngú labúu bunybu láani. ¿Ló xí galnasác labúu gonylo pensary? Pal meta ni ma goloʼlo guiclo gonylo láani ngú goʼolo la Biblia, buny pensary balaati sacró guidzaklo Jehová (Sal. 145:18, 19). Pal ni nainy looy ngú gaplo toib cualidad cristiana, buny pensary ximod sacnéni looy guidzaklo stipnés (Col. 3:14). ¿Xí más labúu gonylo? Bicaʼ ló guiich xi guirá razón naplo par tzagaʼlo metascu né goleʼ tiemp gonylo repas láani. Tomáš, ni bisetlano nagaa ná: «Pal radudi cuent que napa xidal razón par tzagaʼla toib meta, sigory diti tampa sareʼgana».

7. ¿Xí buny Julio né tzeʼel par labúu goygaʼlyibu metas xtunyibu?

⁷ Bidzak buñ ni gacné looy (Prov. 13:20). Julio né tzeʼel goniiny ñeʼyibu stoib lagary roʼ ñonyibu xchiin Jehová más. Láabu goniʼbu xi gocné layibu ñonyibu láani: «Biyopydo ximigdo ni gocné lóodo né gonido xi caa guicdo gonydo. Xidal de layibu ma goygaʼlyibu metas ni nainy lóodo tzagaʼldo, por ngú labúu bidudyibu consej galán lóodo. Láaca gonabdiitzyibu lóodo ximod seeni lóodo, né órni biquiindo galrracné, buny animaryibu lóodo par diti nareʼgando».

8. ¿Xí labúu nasaclono pal nosi ñonyno xtem órni noʼ gan xcalnabanyno? (Láaca bibiʼ retrat).

⁸ Guirácano rioʼ ór diti tampa noʼ gan xcalnabanyno. ¿Radudyni diitz que cueʼxiguicno metas xtunyno la? Yaca. Guisetlano de buu né bark. Ná buu cu labúu guichupiaʼni barkcu ro seeni, per diti guirá ór nadipni; né noʼ dzú nili noʼ buu. ¿Radudy ndeʼ diitz que ni sané barkcu ma diti labúu guidxinbu ro seecabu la? Diti radudyni diitz ngú. Por ejemplo, tipnés bark napni motor, né stipnés nap remos. Por ngú, ni sané barkcu labúu guiquimbu láani par guidxinbu ro non seecabu. Scúca sioʼ ór, sioʼ más gan xcalnabanyno que stipnés dzú. Né sioʼ ór nili tidxómitien sioʼ gan lóono. Por ngú, stiplóocano diti labúu sigaʼlno láani. Per, xomodca ni sané barkcu rayopybu mod par guidxinbu ro seebu, ná diti noʼ buu, lóono láaca non gonyno rutirigaʼlni lóono par tzagaʼlno metas xtunyno ná pal diti noʼ gan xcalnabanyno. Raquiin gonyno xtem, per sacaʼno galnasác. Antes de ganno xi galrracné napno  ló galnagan reʼ, guicapyno toib galrranabdiitz ni rony buñ.

9. ¿Galán láani gonyno xtem por tzagaʼlno metas ná diti noʼ gan xcalnabanyno la?

⁹ Jehová nainy láabu gonyno xchiimbu né galrrabaladx né guidopy xcalnabanyno (Sal. 100:2; 2 Cor. 9:7). Por ngú, ¿xigony raquiin gonyno xtem par tzagaʼlno metas pal diti noʼ gan xcalnabanyno? Gonyno pensary ló ejemplo xtuny apóstol Pablo. Láabu goniʼbu: «Ronynaya ladi né rony mandary láani» (1 Cor. 9:25-27, nota). Pablo bunybu xtem par ñonybu xchiin Jehová ná diti tampa goyoʼ gan xcalnabanybu. ¿Goyoʼ nakit xcalnabany Jehová né dxiin ni buñ Pablo la? Scú láani. Né Jehová bisiab galnasác ronoʼbu por dxiin nadip ni bunybu (2 Tim. 4:7, 8).

10. ¿Xí galnasác sacaʼno pal ronyno xtem por tzagaʼlno toib meta ná diti noʼ gan xcalnabanyno?

¹⁰ Jehová láaca rabaladx órni ronyno xtem por tzagaʼlno toib meta, ná pal diti noʼ gan xcalnabanyno. ¿Xigony? Portín ronladxno láabu ná diti guirá ór rioladxno gonyno dxiin ni ma goloʼno guicno. Jehová bidudy galnasác Pablo né láaca sadudybu galnasác lóono pal ronyno xtem (Sal. 126:5). Né, órni guibiʼno ximod radudy Jehová galnasác lóono, pentzi ndeʼ sagoʼ gan xcalnabanyno. Toib hermana de Polonia ni laa Lucyna ná: «Rioʼ ór diti nainy naʼ guiniya xtiitz Dios, né máspa órni cadzaga. Per galnakit ni rasaca órni ma bibigueta de predicación; nacni toib galrrascad». Ganno xí labúu gonyno órni diti noʼ gan xcalnabanyno.

11. ¿Ximod racné Jehová lóono gony mandaryno más lóocano?

¹¹ Gonab Jehová gony mandarylo looyca. Buñ ni rony mandary láacabu labúu rony mandarybu ni rasacbu né ni ronybu. Cualidad reʼ diti nosi racaani lóono par diti gonyno cós mal. Láaca rachiinni lóono gonyno cós tzaay, máspa órni rasac naganno láani o diti noʼ gan xcalnabanyno. Guisetnaladxno que ni rony mandaryno lóocano nacni fruto del espíritu. Por ngú, pal ranabno espíritu santo xtuny Jehová, láabu sacnébu lóono gapno cualidad reʼ ni rasacgoluʼ (Luc. 11:13; Gál. 5:22, 23). David, ni bisetlano ló párrafo 3, goloʼbu guicbu guisuidybu más xquiichbu. Par láabu oración nigolú gosacni. Nábu: «Gonaba Jehová ñacnébu naʼ ñoni mandary naʼca. Né láabu gocnébu naʼ. Gosaló bisudi xquiichi, né dada nigoreʼ rasudi láani».

12. ¿Ximod racné ni ná Eclesiastés 11:4 par tzagaʼlno metas espirituales xtunyno?

¹² Diti cuéslo guidxin tiemp sacró. Ló Gudxliogoxreʼ nagan par tzoʼ tiemp sacró. Pal nosi raguʼdxno ñano né rabésno láani, sigory dipa sigaʼlno meta ni ma goloʼno guicno tzagaʼlno (bíil Eclesiastés 11:4). Toib hermano ni laa Dayniel nábu: «Tiemp tzaay diti noʼni. Pal nimaca rasalólo, sacanésni». Paul toib hermano de Uganda, raniʼ stoib razón par diti guisiantaʼno metas xtunyno: «Órni ronylo láani ná cacalólo galnagan, radudylo oportunida Jehová guidudy galnasác looy» (Mal. 3:10).

13. ¿Xí galnasác racaa buñ pal rasaló dxoga dxoga?

¹³ Buny láani dxoga dxoga. Rioʼ ór labúu guisacno que diti noʼ gan xcalnabanyno portín ronyno pensary que meta xtunyno nigolú xiroʼni. Pal ngú ni casaclolo, ¿xigony diti ronylo láani dxoga dxoga? Por ejemplo, pal nainy  looy gaplo toib cualidad, ¿xigony diti raslooylo láani ló cós mitien? Pal ni nainy looy ngú goʼolo guidopynac la Biblia, bíil láani dxoga dxoga. Tomáš, ni bisetlano ro gosaló artículo reʼ, gosacnaganbu ñoʼolbu la Biblia ló tobiz xomod goloʼbu guicbu ñonybu láani. Nábu: «Bidudi cuent que nagan goola la Biblia ló tobiz. Por ngú goloʼya guica nasalóya stoib, per nigoreʼ ñoola láani dxoga dxoga. Nosi ñoola tipnés párrafos por dzú né ñoni pensary ló ni cayoola. Órcu ma bioladxi ni cayoola». Gosacbu más sacró, Tomáš goleʼbu más tiemp ñoʼolbu la Biblia né labúu bíilbu guidopyni.

14. ¿Xí galnagan labúu nacalóno?

¹⁴ Ná noʼ gan xcalnabanyno labúu guicalóno tipnés galnagan. Por ejemplo, órni rasaclono desgrasy labúu nabéni tiemp ni napno par tzagaʼlno meta ni ma goloʼno guicno gonyno (Ecl. 9:11). Láaca labúu nacalóno toib galnagan ni labúu nabeʼgan lóono (Prov. 24:10). Nacno buñ galkié, por ngú rioʼ ór ma diti labúu rigaʼlno meta ni ma goloʼno guicno gonyno (Rom. 7:23). O sigory racni scú portín ma cadzagno (Mat. 26:43). ¿Xí labúu sacné lóono diti guireʼganno ná diti noʼno sacró?

15. ¿Xigony diti rareʼganno ná cacalóno galnagan? (Salmo 145:14).

¹⁵ Bisetnaladx que pal rachélo diti radudyni diitz que ma diti labúu sonylo láani. Mod ná la Biblia, sigory sacalóno xidal galnagan. Per láaca raibyni lóono, né xcalrracné Jehová labúu sareʼno loni, né sigaʼlno meta xtunyno (bíil Salmo 145:14). Philip, ni bisetlano ló párrafo toib, nábu scareʼ: «Par naʼ diti rasac balac buelt rachélo, xalagary ngú balac buelt riáslo né diti rareʼganlo». Guisetlano ejemplo xtuny David. Láabu nábu:  «Órni racalóya galnagan né diti noʼya sacró diti rabiʼya láani xomod toib galnagan. Par naʼ nacni toib oportunida par gaabi Jehová balaati ronladxi láabu». Scú láani, órni diti rareʼganno órni cacalóno galnagan, raslooyno Jehová que nainy gonyno xchiimbu. ¿Ronylo pensary balaati rabaladx Jehová ni ronylo xtem por tzagaʼlo meta xtunylo la?

16. ¿Xí labúu guisuidyno de guirá galnagan ni racalóno?

¹⁶ Bibiʼ galnagan xomod toib oportunida par guisuidylo. Bibiʼ galnagancu né gonabdiitz looy: «¿Xí labúu goni par diti guicaa ni toib galnagan naʼ?» (Prov. 27:12). ¿Né pal diti rigaʼlno meta xtunyno ná bunyno xtem ga? Non guitzaʼno meta ni napno. Pal ngú casaclolo, buny pensary pal labúu tzagaʼlo meta xtunylo. c Jehová diti sony pensary que diti noʼ pu raquiinlo por ni diti labúu goygaʼlo toib meta ni goniiny looy (2 Cor. 8:12).

17. ¿Xigony non guisetnaladxno ni ma bunyno nircu?

¹⁷ Bisetnaladx guirá ni ma bunylo. La Biblia ná que «Dios ronybu xinésni né diti sialadxbu xchiinto» (Heb. 6:10). Por ngú diti guialadxlo láani. Buny pensary ló metas ni ma goygaʼlo, xomod ni ma naclo ximig Jehová, ni ma raniʼlo xtiitz Dios o ni ma goyonislo. Metas ni goygaʼlo ló dzú ni see raslooyni que labúu gonylo más né labúu tzagaʼlo láani nigoreʼ (Filip. 3:16).

18. ¿Xí láani non gonylo laʼga cayonylo xtem tzagaʼlo metas ni naplo? (Láaca bibiʼ retrat).

¹⁸ Né xcalrracné Jehová, labúu tzagaʼlo meta ni naplo, xomodca ni sané barkcu rioʼbu nakit portín bidxinbu ro goniiny láabu. Láaca, xidal buñ ni sané toib bark rasacyibu sacró laʼga seʼyibu. Looy láaca labúu guisaclo sacró laʼga cayonylo por tzagaʼlo meta ni naplo, pal rabiʼlo ximod rasiab Jehová xcalnasác ronoʼlo laʼga cayonylo xtem tzagaʼlo láani (2 Cor. 4:7). Pal diti rareʼganlo, sacaʼlo más galnasác (Gál. 6:9).