1. ¿Xí raiby Jehová lóono gonyno? (Láaca bibiʼ dibuj).

 ¿CHÚ láabu non guiyopyno par guisialdó xcalnabanyno né guisanés lóono? Lóono maca nanno que: non guiyopyno xcalrracné Jehová. Né dada raibybu lóono gonyno láani. Né nandxichno que nainy láabu guininéno láabu guirási ór portín raibybu lóono ndeʼ: «Guirá ór colgony oración» (1 Tes. 5:17). Labúu gaibyno láabu nitisi nainy lóono né labúu guinabno láabu conésbu lóono de guirá mod (Prov. 3:5, 6). Jehová puextca noʼ gacné lóono por ngú labúu guininéno láabu guirá ór.

2. ¿Xí guisuidyno ló artículo reʼ?

² Oración nacni toib galrrascad ni rasacgoluʼ par lóono. Ná scú, rioʼ ór nogoluʼ xchiinno, por ngú rioʼ ór rasacnaganno cueʼno tiemp guininéno Jehová. Sigory radudyno cuent que oración xtunyno non gacni más galán. Per la Biblia labúu gacné lóono. Ló artículo reʼ sasuidyno ejemplo xtuny Jesús né sasuidyno cueʼno tiemp guininéno Jehová. Láaca sasuidyno ximod gonyno oración más galán pal ragoʼno loni gáay cós ni más rasac.

3. ¿Xí láani gon Jesús?

³ Jesús gon que oración nigolú rasacni par Jehová. Xidalguixo íz antes ni ñeed Jesús ló Gudxlio,  gonbu que Bixiosbu racapy oración ni rony xpiimbu. Por ejemplo, Jesús goyoʼbu né Jehová órni cuapybu oración ni buny Ana, David, Elías né stipnés (1 Sam. 1:10, 11, 20; 1 Rey. 19:4-6; Sal. 32:5). Por ngú Jesús gochbu xpiimbu ñonyibu oración guirá ór né ñapyibu confianz (Mat. 7:7-11).

4. ¿Xí galán ejemplo bidudy Jesús lóono?

⁴ Jesús bidudy toib ejemplo galán a xpiin. Órni bunybu xchiimbu bunybu oración guirá ór. Goleʼbu tiemp par bunybu oración portín guirá ór goyoʼ xchiimbu né goyoʼbu lad buñ (Mar. 6:31, 45, 46). Biásbu tayoo par labúu ñoʼbu toibbu né modcu labúu naninébu Bixiosbu (Mar. 1:35). Toibtica buelt guidopynac gueʼel goninébu Jehová antes ni nagoʼbu guicbu xi ñonybu (Luc. 6:12, 13). Né goxin ni ma yaaca gaitybu, xidal buelt goninébu Jehová, portín gonbu que mápa mer guistubylagaʼbu xchiimbu ló Gudxlio né nacalóbu toib galnagandaʼ (Mat. 26:39, 42, 44).

5. ¿Ximod labúu guisuʼno Jesús?

⁵ Ejemplo xtuny Jesús rasuidyni lóono que ná nogoluʼ xchiinno, labúu cueʼno tiemp guininéno Jehová. Xomodca buny Jesús non cueʼno tiemp par guininéno Jehová: sigory labúu guiásno más tempran o gaisyno más goxin. Modcu saslooyno Jehová que nigolú rasac galrrascad sacróyen reʼ. Toib hermana ni laa Lynne rasetnaladxbu que nigolú bidudybu guixquix órni gonbu que labúu guininébu Jehová. Láabu nábu: «Órni bisudi que Jehová noʼbu puext guicadiagbu naʼ guirá ór, bibiʼya láabu xomod ximigdxina né goloʼya guica ñoni oración más galán». Sigory xidalno rasacno xomodca láabu. Nigoreʼ guisuidyno gáay cós ni rasac ni labúu guisetlano ló oración xtunyno.

6. Mod ná Apocalipsis 4:10, 11, ¿xí láani non guicaʼ Jehová?

⁶ Gonyxiroʼno Jehová. Ló toib visión ni radziguiaʼ buñ, apóstol Juan bibiʼbu 24 ancianos ni cayony adorar a Jehová  lainy guibá. Bunyxiroʼyibu Dios né goniʼyibu que Jehová non gonyxiroʼdo, guisanadxdo né guicaʼ galnadip (bíil Apocalipsis 4:10, 11). Ángeles láaca napyibu xidal razón par gonyxiroʼyibu né guisanadxyibu Jehová. Noʼyibu lainy guibá por ngú rimbutzayibu Jehová. Nanyibu xi cualidad nap Jehová por guirá ni goyaʼ, né lainy xcalnabanyibu ralainy gonyxiroʼyibu Jehová por guirá ni ronyibu (Job 38:4-7).

7. ¿Ximod ronyxiroʼno Jehová ló oración ni ronyno?

⁷ Lóono láaca non gonyxiroʼno Jehová órni raninéno láabu. Ronyno láani órni raibyno láabu ni rioladxno de láabu né xigony radziguiaʼno láabu. Órni golno né guisuidyno la Biblia, gonyno xtem par guidudyno cuent xi cualidad rioladxno de Jehová (Job 37:23; Rom. 11:33). Después, gaibyno láabu xi láani rasacno órni ronyno pensary ló cualidad ni napbu. Láaca labúu gonyxiroʼno Jehová órni racnébu lóono o órni racnébu guirá xhermanno. Guirá ór puextca noʼbu par gacnébu lóono né ranbu lóono (1 Sam. 1:27; 2:1, 2).

8. ¿Xí cós labúu guidudyno guixquix Jehová? (1 Tesalonicenses 5:18).

⁸ Guidudyno guixquix Jehová. Ló oración ni ronyno labúu gonyxiroʼno Jehová por xidal cós (bíil 1 Tesalonicenses 5:18). Guidudyno guixquix Jehová por guirá cós tzaay ni napno. Portín guirá cós tzaay sieedni de Jehová (Sant. 1:17). Por ejemplo, labúu gaibyno láabu balaati radudyno guixquix láabu por Gudxlio sacróyen ni napno, por guirá cós ni Bisaʼbu, xcalnabanyno, xfamilno, ximigno né esperanza ni napno. Né láaca nainy guidudyno guixquix láabu portín nacbu ximigno.

9. ¿Xigony rasacnaganno guidudyno guixquix?

⁹ ¿Xí razón napno tigaagano par guidudyno guixquix Jehová? Pentzi rasacnaganno guidudyno cuent portín nabanyno ló toib Gudxlio ro diti radudy buñ guixquix. Buñ más rony pensary xi láani guicaʼ xalagary guidudy guixquix por cós ni ma nap. Pal ñonyno modcuca, ló oración xtunyno nosi nasetlano cós ni nainy lóono guicaʼno. Par diti guisaclono modcu, gonyno xtem por guidudyno guixquix né gonyno xtem par guidudyno guixquix Jehová por guirá ni radudybu lóono (Luc. 6:45).

10. ¿Ximod gocnéni toib hermana ni bidudybu guixquix Jehová? (Láaca bibiʼ dibuj).

¹⁰ Pal radudyno guixquix labúu guicalóno nitisi galnagan. Guisuidyno ejemplo xtuny toib hermana ni laa Kyung-sook, ni bireʼ ló Guiich ni caniʼ 15 de enero íz 2015. Doctor goniʼ que guidopyca xpulmonbu ma nap cáncer. Goniʼbu: «Órni goona que ma caxoʼya  gocni toib galrrioʼob rodann. Gosaca que cuti biloxni né nigolú bidzubi». ¿Xí gocné láabu nacalóbu galnagancu? Láabu nábu que guirá goxin antes de gaisybu riaʼpybu guicyoʼ lidxbu né radudybu guixquix Jehová por gáay cós ni gosaclobu dzúcu. Ngú bisialdó xcalnabanybu né ngú bichiin láabu naniʼbu balaati nadxiʼbu Jehová. Stipláacabu gonbu ximod ran Jehová xpiin órni cacaló galnagan né bidudybu cuent que ló xcalnabanyno noʼ más galnasác que galnagan. Xomodca Kyung-sook, napno más razón par guidudyno guixquix Jehová, ná pal cacalóno toib prueby. Pal radudyno guixquix Jehová racnéni lóono gony guantaryno, rialdó xcalnabanyno né rasacno sacró.

11. ¿Xigony biquiin xpiin Jesús balory?

¹¹ Guinabno Jehová guidudy balory lóono par gony predicarno. Órni mápa mer guibiguet Jesús lainy guibá, gochbu xpiimbu que ñony predicaryibu lainy gudx «Jerusalén, né ló guidopynac Judea né Samaria, né dada lagary ni noʼ más sit ló gudxlio» (Hech. 1:8; Luc. 24:46-48). Diti xidzú después, ni gosanir ló buñ judíos gonásyibu Pedro né Juan, né goynéyibu biinreʼ nisló Sanedrín. Buny mandaryibu biinreʼ que ma diti naniʼyibu xtiitz Dios, pal diti nasobyibu ñoʼ ni ñacyibu (Hech. 4:18, 21). ¿Xí láani buny guiropca apóstoles reʼ?

12. Mod ná Hechos 4:29, 31, ¿xí láani buny xpiin Jesús?

¹² Después ni goniʼbu ndeʼ, Pedro né Juan cuapy layibu: «Pal xinésni nisló Dios guicadiagdo lóoto xalagary guicadiagdo Dios, lóocato colgony juzgar láani. Per diti siañ sanido ni ma bibiʼdo né ni ma bicadiagdo» (Hech. 4:19, 20). Órni guirá buñ ni gosanir nisló buñ judíos bislaʼ layibu, guiropca apóstoles reʼ bidop né stipnés xpiin Jesús. Guirácayibu gonabyibu xcalrracné Jehová par labúu naniʼyibu xtiitz Dios. Goniʼyibu: «Gocné xpiinlo guiniʼ xtiitzlo né balory». Né Jehová cuapy oración ni bunyibu né guidopy xcalnabanyibu (bíil Hechos 4:29, 31).

13. ¿Xí láani rasuidyno de Jin-hyuk?

¹³ Pal buñchiin raiby lóono ma diti guinino xtiitz Dios, labúu guisuʼno mod buny xpiin Jesús. Ngú ni buny Jin-hyuk, toib hermano ni goyoʼ press por ni gosagaʼ galayibu. Cu buny tenderbu stipnés buñ mal ni bieg gadzé lad. Nosi gonabdiitzbu biinreʼ xi caquiin. Né diti gopbu permís par ñony predicarbu guirá buñreʼ. Gonabbu Jehová nadudy balory láabu par labúu ñony predicarbu (Hech. 5:29). Láabu nábu: «Jehová cuapy oración ni buni, né bidudybu balory né sabiduría ni biquiinna. Labúu bisudi xidal buñ, ná gáay minut bisudi tigaagayibu ro xpuertyibu. Goxin bicaʼya tipnés guiich par labúu ñonycuenta layibu stoib dzúcu». Xomodca Jin-hyuk, labúu guinabno Jehová guidudy balory né sabiduría lóono né napno confianz que labúu sacnébu lóono gonyno xchiimbu.

14. ¿Xí sacné looy guicalólo galnagan? (Salmo 37:3, 5).

¹⁴ Guinabno xcalrracné Jehová par guicalóno galnagan. Xidal de lóono cadudyno ló galrrioʼob portín goity toib buñ ni ronladxno, racalóno  persecución, galguitz o cadudy xfamilno ló galnagan. Pandemia né guerr bunyxiroʼni más galnagan reʼ. Por ngú, góoch Jehová xi láani rasaclo. Goniné láabu xomodca raninélo ximigdxinlo. Gop confianz que Jehová sacné looy (bíil Salmo 37:3, 5).

15. ¿Ximod racné oración lóono órni racalóno galnagan? Bisetlaa toib ejemplo.

¹⁵ Pal ronyno oración guirá ór sacnéni lóono guicalóno galnagan (Rom. 12:12). Jehová nan galnagan ni cacaló xpiin né «racadiagbu órni racaʼyibu rudx» (Sal. 145:18, 19). Toib precursora de 29 íz ni laa Kristie bidudy cuent que scú nacni. Tiptisi golainyguitzbu. Né xtolni gonás depresión láabu. Después gonbu que xinaʼbu mápa mer gaity. Kristie ná: «Gonaba Jehová nadudy fuers naʼ par labúu nacalóya galnagan reʼ dzú ná dzú. Buni rutigoygaʼlni naʼ: par diti ñony falt ló reunión né nasudi xquiichi». Láabu nábu: «Oración gocnéni naʼ par diti nareʼgana órni gocxiroʼ galnagan reʼ. Jehová goyoʼ né naʼ guirá ór ngú bisialdó xcalnabani. Ná diti biala órcuca, Jehová cuapy oración ni buni, portín bunybu que nasaca sacró». Dipa guialadxno que «Jehová rabeʼ ló prueby guirá buñ ni rien láabu» (2 Ped. 2:9).

16. ¿Xigony raquiinno xcalrracné Jehová par diti tzaguiabno ló tentación?

¹⁶ Guinabno Jehová gacné lóono par diti tzaguiabno ló tentación. Nacno buñ galkié, por ngú guirá ór guinabno Jehová gacné lóono par diti tzaguiabno ló cós mal. Buñdzab ronybu rutirigaʼlni láabu par tzaguiabno ló tentación. Por ejemplo, rayopybu mod guiximbu xpensaryno né galnakit ro rarecaa cós mal. Pal rabiʼno guirá ndeʼ, ló xpensaryno sioʼ por cós buidy xtolni ma diti sac nayaano nisló Jehová né dada labúu  tzaguiabno ló toib galkié rodann (Mar. 7:21-23; Sant. 1:14, 15).

17. Después ni ma bunyno oración, ¿xí más labúu gonyno par guicalóno tentación? (Láaca bibiʼ dibuj).

¹⁷ Diti labúu guicalóno tentación toibno; raquiinno xcalrracné Jehová. Jesús bisetlaa láani ló oración órni goniʼbu ndeʼ: «Diti guidudylo lagary guiabdo ló tentación, xalagary ngú bilaa lóodo ladxña Buñdzab» (Mat. 6:13). Jehová nainy gacnébu lóono, per non guinabno láani láabu. Per diti nosi gonyno oración. Noʼ ni raquiin gonyno, né gonyno dada rutirigaʼlni lóono par cueʼno cós mal ni noʼ ló xcudxliogox Buñdzab ni labúu guixin xpensaryno (Sal. 97:10). Par diti tzoʼ cós mal ló xpensaryno né coʼno pensary tzaay loni, non golno né guisuidyno la Biblia, tzoʼno reunión né guinino xtiitz Dios. Né Jehová radudy xtiitz que diti sadudybu lagary guicalóno galnagan ni diti labúu gony guantaryno (1 Cor. 10:12, 13).

18. ¿Xí raquiin gonyno guirácano?

¹⁸ Par labúu gacno fiel ló dzú ni ma cadubylagaʼ, nigoreʼ raquiin gonyno más oración. Jehová racladx guixalno xcalnabanyno nislóbu (Sal. 62:⁠8). Por ngú, goleʼ tiemp par guininélo Jehová guirá dzú. Bunyxiroʼ Jehová né bidudy guixquix láabu por guirá ni radudybu looy. Gonab láabu guidudybu balory looy par guiniʼlo xtiitzbu né gonab láabu gacnébu looy ló galnagan ni cacalólo né diti tzaguiablo ló tentación. Diti guidudylo lagary tzoʼ ni guicaa looy guininélo Jehová. Per ¿ximod racapy Jehová oración ni ronyno? Ló artículo ni sieed sarexa galrranabdiitz reʼ.