1, 2. ¿Xí láani labúu guinabdiitzno?

 ¿MA GOYOʼ ór gonabdiitzlo looy pal racapy Jehová oración ni ronylo la? Pal scú láani, diti nosi looy ronylo pensary scú. Xidal herman ná que ma buny galrranabdiitz reʼca, máspa órni cualóyibu galnagan. Pentzi láaca diti radudyno cuent ximod racapy Jehová oración xtunyno órni cadudyno ló galrrioʼob.

² Ló artículo reʼ sasuidyno xigony nandxichno que Jehová racapy oración ni rony xpiimbu (1 Juan 5:15). Láaca sasuidyno xigony rioʼ ór rasacno que diti racapybu oración ni ronyno, né ximod racapybu oración ni ronyno.

3. ¿Xigony racladx Jehová gonyno oración?

³ La Biblia raiby lóono que Jehová ronladxgoluʼ lóono né par láabu nigolú rasacno (Ageo 2:7; 1 Juan 4:10). Por ngú, raruʼbu lóono gonyno oración né guinabno xcalrracnébu (1 Ped. 5:6, 7). Nainy gacnébu lóono par tzoʼno gax de láabu né gony guantaryno guirá galnagan ni racalóno.

4. ¿Ximod nanno que Jehová racapy oración ni rony xpiimbu? (Láaca bibiʼ retrat).

⁴ Ló la Biblia, radzelno xidal historias ro ritlaa mod cuapy Jehová oración xtuny xpiin. Sigory rasetnaladxno ejemplo xtuny David. Xidal buñ mal goniiny nagaityibu David. Guirá ór gonabbu Jehová par ñacné láabu. Toibtica buelt gochbu Jehová: «Jehová, bicadiag oración  xtuni; bicadiag órni ranaba xcalrracnélo. Cuapy naʼ portín naclo fiel né ronylo xinésni» (Sal. 143:1). Jehová cuapy oración xtunybu né bilaa láabu (1 Sam. 19:10, 18-20; 2 Sam. 5:17-25). Por ngú David goniʼ né confianz: «Jehová noʼ gax de guirá ni rayopy láabu». Né lóono labúu gapno confianzcuca (Sal. 145:18).

5. ¿Cuapy Jehová oración xtuny xpiin mod goniiny layibu la? Bisetlaa toib ejemplo. (Láaca bibiʼ retrat).

⁵ Pentzi Jehová diti racapy oración xtunyno mod raniiny lóono. Ngú ni gosaclóo apóstol Pablo. Goyoʼ toib gúch ló xpeʼelbu, ndeʼ góc toib galnagandaʼ né tzón buelt gonabbu Dios nabeʼ láani. ¿Cuapy Jehová oración xtunybu la? Scú, per diti mod nábu. Xalagary nabé Jehová galnagancu, Jehová bidudy fuers láabu par labúu ñony guantarybu láani né ñacbu fiel (2 Cor. 12:7-10).

6. ¿Xigony rioʼ ór rolooyni diti racapy Jehová oración xtunyno?

⁶ Pentzi Jehová sacapy oración xtunyno de toib mod ni diti cabésno. Per napno confianz que Jehová nan xipa caquiinno. «Nipa balakien radudy ló xpensaryno xipa mod labúu gacnébu lóono» (Efes. 3:20). Por ngú, Jehová labúu guicapy lóono ór né mod ni diti cabésno láani.

7. ¿Xigony rioʼ ór ma diti ranabno ni ma goloʼno guicno guinabno lóo Jehová? Bisetlaa toib ejemplo.

⁷ Pentzi ma diti ranabno ni goloʼno guicno órni rienno xi láani ngú ni ná Jehová. Guisuidyno ejemplo xtuny hermano Martin Poetzinger. Diti xidzú de goló bunybu galtzeʼel, bixel buñchiin láabu campo de concentración nazi. Primer gonabbu Jehová nareʼbu press par ñoʼbu né tzeelbu né nareʼbu predicación. Per chop xomal después rolooyni diti nabeʼ Jehová láabu lagarycu. Por ngú hermano Poetzinger gonabbu lóo Jehová: «Ranaba looy gocné naʼ guienna xi nainy looy goni». Órcu bunybu pensary guirá ni casaclóo tipnés herman ló campo de concentración. Xidal de layibu goyoʼ ló galrrasaʼ por tzeʼel né xiin. Por ngú hermano Poetzinger gochbu Jehová: «Raxquix looy por asignación ni ma bidudylo naʼ, gocné naʼ gony  animar xhermana». Né ngú ni bunybu ló gaʼ íz ni goyoʼbu press.

8. ¿Xí láani non guisetnaladxno órni cayonyno oración?

⁸ Guisetnaladxno que Jehová ma noʼ ni ma goloʼbu guicbu gonybu. Sadxin dzú sabeʼbu guirá ni ragoʼ lóono ló galrrioʼob, xomod desgrasy, galguitz né galgoity. Jehová saquiimbu Gobierno xtunybu par guirebuʼ ni ma goniʼbu (Dan. 2:44; Apoc. 21:3, 4). Per cadudybu lagary gony mandary Buñdzab gudxliogoxreʼ (Juan 12:31; Apoc. 12:9). b Pal nabeʼ Jehová guirá galnagan ni cacaló buñgudxlio, buñ labúu ñony pensary que Buñdzab cayony mandary galán. Por ngú, ná cuésno gony cumplir Jehová ni ma goniʼ, ndeʼ diti radudy diitz que diti racnébu lóono. Guisuidyno tipnés cós ni rony Jehová por lóono.

9. ¿Ximod racné Jehová lóono órni ragoʼno guicno xí láani gonyno? Bisetlaa toib ejemplo.

⁹ Radudybu sabiduría lóono. Jehová radudy xtiitz que sadudybu sabiduría lóono, par ganno xi láani coʼno guicno gonyno. Né máspa raquiinno sabiduría xtunybu, órni ganno xi láani gonyno né xcalnabanyno, xomod pal gonyno galtzeʼel o yaca (Sant. 1:5). Guibiʼno experiencia xtuny toib hermana ni diti buny galtzeʼel ni laa, María. c Goxtiguie cayonybu xchiin Jehová xomod precursora regular órni bimbubu toib hermano. Láabu nábu: «Dxoga dxoga bidzakdo saʼdo sacró né dada bidxin midid bioladxdo saʼdo. Goona que raquiin ñoni pensary xi láani ñoni. Por ngú, xiroʼ ór goninéya Jehová de láani. Biquiinna xcalrracné Jehová, per goona que naʼ non ñaana xi láani ñoni». María radudy cuent que Jehová cuapy oración xtunybu né bidudy sabiduría láabu. ¿Ximod? Biyopybu información ló xidal publicaciones né bidzelbu artículos ni cuapy galrranabdiitz ni gopbu. Láaca xinaʼbu ni nac Testigo bidudy xidal consej láabu par ñanbu xi láani ñonybu. Bidxin midid gontzaybu xi láani ñonybu.

10. Mod ná Filipenses 4:13, ¿ximod sacné Jehová xpiin? Bisetlaa toib ejemplo. (Láaca bibiʼ retrat).

¹⁰ Radudybu fuers lóono par gony guantaryno. Xomodca bunybu né apóstol Pablo, Jehová sadudy fuers ni caquiinno par gony guantaryno galnagan (bíil Filipenses 4:13). Ganno xi láani gosaclóo hermano Benjamin. Desde dzú gócbu mbioxhlasien golésbu né  xfamilbu lainy campos de refugiados lainy gudx África. Nábu: «Goninéya Jehová guirá ór né goodxi láabu nadudybu fuers naʼ par ñoni xinésni. Cuapybu oración ni buni, portín gosaca sacró, bidudybu balory naʼ par naniya xtiitzbu, láaca bidudybu publicaciones naʼ par ñaca nadip ló sentido espiritual». Láabu nábu: «Órni biila tipnés experiencias de stipnés Testigos né mod gocné Jehová layibu par buny guantaryibu, gocnéni naʼ par diti nareʼganna né dipa nasiana Jehová».

11, 12. ¿Ximod raquiin Jehová xhermanno ni nac xomod xfamilno par guicapybu oración xtunyno? (Láaca bibiʼ retrat).

¹¹ Raquiimbu xhermanno. Goxin ni ma gaity Jesús nigolú bunybu oración. Gonabbu Jehová que diti nagotz buñ dool láabu que caniʼbu mal de Jehová. Jehová diti goleʼ galnagancu, xalagary ngú bixelbu toib ángel ni góc buch Jesús ló sentido espiritual ni gocné láabu (Luc. 22:42, 43). Scúca Jehová labúu guichiin toib hermano ni tzáguen lóono. Guirácano labúu guiyopyno oportunida par gacnéno xhermanno (Prov. 12:25).

¹² Guisuidyno ni gosaclóo Miriam. Diti xidzú de goló goity tzeelbu, nosi láabu noʼbu lidxbu, né nigolú ma cayoʼob xcalnabanybu né ma careʼganbu. Nigolú ribdxaʼbu né goniiny láabu que ñoʼ ni naninébu. Nábu: «Diti gopa fuers nili par ñoni toib llamada por ngú goninéya Jehová né laʼga caninéya Jehová né cayibdxaʼya, gosuch teléfono. Gócbu toib anciano, toib ximigdxina». Láabu né tzeelbu bisialdóbu xcalnabany Míriam, né Míriam radudy cuent que Jehová bichiin xcalnabany hermanocu par naniné láabu.

13. Bisetlaa toib ejemplo mod raquiin Jehová buñ ni diti cayen láabu par guicapybu oración ni ronyno.

¹³ Labúu guiquimbu buñ ni diti rony adorar láabu (Prov. 21:1). Rioʼ ór Jehová raquiin buñ ni diti rien láabu par guicapybu oración ni rony xpiimbu.  Por ejemplo, bichiinbu rey Artajerjes par nadudy permís Nehemías nabiguet Jerusalén par nalísbu gudxcu (Neh. 2:3-6). Jehová dada labúu guichiin buñ ni diti nac Testigos par gacné lóono órni caquiinno láani.

14. ¿Ximod racné experiencia xtuny Soo Hing lóono? (Láaca bibiʼ retrat).

¹⁴ Toib hermana ni laa Soo Hing bidudybu cuent que Jehová biquiin doctor xtunybu par ñacné láabu. Xiimbu caxoʼ xpensary né gosaclobu toib desgrasy rodann. Órcu Soo Hing né tzeʼel bisianyibu xchiinyibu par ñanyibu xiinyibu. Por ngú godudyibu ló galsii. Galnagancu gocxiroʼni más por ngú Soo Hing goniʼ que ma diti labúu ñony guantarybu más. Por ngú gonabbu Jehová ñacné láabu. Doctor gocné láabu par labúu nacaʼbu xcalrracné gobierno, né nadzelyibu toib lagary ro naguiixyibu más barat. De ngú Soo Hing goniʼ: «Bibiʼdo ximod gocné Jehová lóodo. Napdo confianz que Jehová racapy oración xtunyno» (Sal. 65:2).

15. ¿Ximod bidudy toib hermana cuent que Jehová racapy oración ni bunybu?

¹⁵ Casi guirá ór Jehová diti rony toib galrradziguiaʼ par guicapy oración xtunyno. Per mod racapybu lóono radudyno cuent que ngúpa ni caquiinno par dipa guisianno láabu. Por ngú raquiin tzoʼno puext par guidudyno cuent ximod racapy Bixiosno Jehová ni noʼ guibá lóono. Toib hermana ni laa Yoko gosacbu que Jehová diti racapy ni ranabbu. Per bicaʼbu ló guiich guirá ni gonabbu lóo Jehová. Né después bibiʼbu guirá ni bicaʼbu ló xquiichbu né bidudybu cuent que Jehová cuapy casi guirá oración ni bunybu, né dada tipnés ni diti bisetnaladxbu. Por ngú non cueʼno tiemp par guibiʼno ximod racapy Jehová oración ni ronyno (Sal. 66:19, 20).

16. ¿Ximod racné fe lóono órni ronyno oración? (Hebreos 11:6).

¹⁶ Diti nosi raquiin gapno fe par guininéno Jehová, láaca par guicacuentno mod racapy Jehová láani, nac mod  nitisi guicapybu láani (bíil Hebreos 11:6). Guisuidyno ejemplo xtuny Mike né Chrissy, toib galtzeʼel ni goniiny ñee Betel. Mike ná: «Xidal buelt bixeldo solicitud né guirá ór gonabdo láani Jehová per diti biruʼyibu lóodo». Mike né Chrissy gopyibu confianz que Jehová nan pu lagary más caquiin Jehová layibu. Bunyibu xchiin Jehová dada rutigoygaʼlni layibu, gocyibu precursores regulares lagary ro caquiin galrracné né gocnéyibu ló construcción. Nigoreʼ noʼyibu ló galcircuit. Mike ná: «Jehová diti guirá ór racapy oración xtunyno xomod raniiny lóono, per nando que racapybu láani né ma bidudybu más que ni gonabdo».

17, 18. Mod ná Salmo 86:6, 7, ¿xí láani napno confianz?

¹⁷ (Bíil Salmo 86:6, 7). David gop confianz que Jehová bicadiag né cuapy oración ni bunybu. Looy láaca labúu gaplo confianzcuca. Ejemplos ni bisuidyno ló artículo reʼ raslooyni lóono que Jehová labúu guidudy sabiduría, fuers par labúu gony guantaryno. Láaca bisuidyno que labúu guiquimbu herman ni nac xomod xfamilno, né dada buñ ni diti rien láabu par gacné lóono.

¹⁸ Ná rioʼ ór Jehová diti racapy oración xtunyno xomod raniiny lóono, nanno que sacapybu láani. Sadudybu cós ni caquiinno xorpani. Por ngú diti guiañ gonyno oración né fe, nandxichno que Jehová san lóono nigoreʼ né ló Gudxlio copy Dios sadudy ni «raniiny xcalnabany guirá ni nabany» (Sal. 145:16).