1. ¿Xí gosac apóstol Pablo por guirá siervos ministeriales?

 GUIRÁ siervos ministeriales ronyibu dxiin ni nigolú rasac lainy congregación. Riendxichni que par apóstol Pablo nigolú gosac guirá siervos ministeriales. Por ngú, órni bixelbu guiich par guirá cristianos de Filipos, bixelbu dioxh par guirá ministeriales né par ancianos (Filip. 1:1).

2. ¿Xí ná Luis ni ma cuaʼbu dxiin xomod siervo ministerial?

² Xidal buñguieeu ni ma goyonis rioladxyibu ronyibu dxiin xomod siervos ministeriales. Labúu gacyibu mbioxhlas o buñgol. Por ejemplo, Devan napbu 18 íz órni gócbu siervo ministerial. Luis gopbu más de 50 íz. Luis raniʼbu ximod rasac tipnés siervos ministeriales órni nábu: «Par naʼ nigolú rasac goni dxiin xomod siervo ministerial, máspa órni roni pensary balaati ronladx congregación naʼ».

3. ¿Xí galrranabdiitz guicapyno ló artículo reʼ?

³ Pal naclo toib buñguieeu ni ma goyonis né yása gaclo siervo ministerial, ¿labúu nagoʼlo guiclo ñaclo láani la? ¿Xí láani nachiin looy par ñaclo siervo ministerial? Né ¿xí requisitos ranab la Biblia gonylo? Ló artículo reʼ cuéxano guirá galrranabdiitz reʼ. Per, nír guisuidyno xi dxiin rony toib siervo ministerial.

¿XÍ DXIIN RONY TOIB SIERVO MINISTERIAL?

4. ¿Xí dxiin rony toib siervo ministerial? (Láaca bibiʼ retrat).

⁴ Siervos ministeriales nacyibu buñguieeu ni ma goyonis, né rac nombraryibu por espíritu santo par gacnéyibu lainy congregación. Tipnésyibu radudyibu territorios né publicaciones par gac predicar. Stipnés ronyibu dxiin par gac nayaa né gactzay Salones del Reino. Stipnésyibu  ronyibu dxiin xomod acomodadores o ragoʼyibu video par guibiʼno ló reunión. Guirá siervos ministeriales non guidzaktzayibu Jehová. Nadxiʼyibu Jehová né nabanyibu mod nainy láabu. Láaca nigolú nadxiʼyibu xhermanyibu (Mat. 22:37-39). ¿Xí láani non gony toib buñguieeu ni ma goyonis par gac siervo ministerial?

5. ¿Ximod labúu tzagaʼlo gaclo siervo ministerial?

⁵ Ló la Biblia sieed requisitos ni non gony ni nainy gac siervo ministerial (1 Tim. 3:8-10, 12, 13). ¿Ximod labúu tzagaʼlo láani? Guisuidytzaylo guirá requisitos ni ná la Biblia né gonylo rutirigaʼlni looy por gonylo láani. Ni non gonylo primer, láani ngú guinabdiitzlo looy xigony nainy gaclo siervo ministerial.

¿XIGONY NAINY GACLO SIERVO MINISTERIAL?

6. ¿Xí láani guichiin looy gacnélo herman? (Mateo 20:28; láaca bibiʼ dibuj).

⁶ Gonyno pensary ló ejemplo galán xtuny Jesucristo. Ni bichiin láabu ngú galnadxiʼ: galnadxiʼ ni gopbu Bixiosbu né galnadxiʼ ni gopbu buñ. Galnadxiʼcu bichiinni láabu ñonybu dada rutinigaʼlni láabu par ñonybu dxiin ni más senciy par ñacnéni stipnés (bíil Mateo 20:28; Juan 13:5, 14, 15). Pal galnadxiʼ cuca rachiinni looy par gaclo siervo ministerial, Jehová sasiab xcalnasác loguiaʼlo par gonylo láani (1 Cor. 16:14; 1 Ped. 5:5).

7. ¿Xigony toib hermano diti non guisobladxbu?

⁷ Ló gudxlio reʼ buñ radziguiaʼ stipnés ni raniʼ xi dxiin nap. Per lainy xcudx Jehová diti nacni scú. Toib hermano ni nadxiʼ stipnés, xomod buny Jesús láani, diti nábu gony mandarybu stipnés o guisac xiroʼyibu ló stipnés. Pal toib herman ni rasobladx nacaʼ toib dxiin lainy congregación, sigory diti nasaguelbu nacaʼbu toib dxiin senciysi par ñanbu xilieen xtuny Jehová. Labúu ñonybu pensary que dxiinreʼ diti ronyni que guisacbu (Juan 10:12). Jehová dipa sasiab xcalnasác loguiaʼ toib buñ ni nac modreʼ (1 Cor. 10:24, 33; 13:4, 5).

8. ¿Xí góoch Jesús guirá apóstoles xtuny?

⁸ Goyoʼ ór dada ximigdxin Jesús bunyibu rutigoygaʼlni layibu par nacaʼyibu  toib dxiin. Per diti bunyibu láani por galnadxiʼ. Ngú ni buny chop xpiin Jesús: Santiago né Juan. Guiropca biinreʼ gonabyibu Jesús que nacaʼyibu toib dxiin ni rasac lainy Gobierno xtunybu. Xalagary ñony felicitar Jesús layibu portín casobladxyibu toib dxiin, Jesús góoch 12 apóstoles xtuny: «Ni racladx gac buñxirop ladto non gony tender stipnés, né ni ná sanir ladto non gacbu xomós stipnés» (Mar. 10:35-37, 43, 44). Herman ni rony dada rutirigaʼlni par guicaʼyibu toib dxiin por galnadxiʼ par gacnéyibu stipnés sacyibu toib galnasác par congregación (1 Tes. 2:8).

¿XÍ NON GONYLO PAR GUINIINY LOOY GACNÉLO STIPNÉS?

9. ¿Xí non gonylo par guiniiny looy gacnélo stipnés?

⁹ Nando que nigolú nadxiʼlo Jehová né nainy gacnélo xhermanlo. Ná scú, pentzi diti nainy looy guicaʼlo toib dxiin ni rony toib siervo ministerial. ¿Xí labúu gonylo par guiniiny looy gacnélo congregación? Labúu ñonylo pensary ló galnakit ni rap buñ órni racné xherman. Nacni xomod goniʼ Jesús: «Más rabaladxno órni radudyno que órni racaʼno» (Hech. 20:35). Láabu nigolú nakit goyoʼbu ni gocnébu stipnés portín bisobdiitzbu mod ná texto reʼ. Né ngúca labúu guisaclolo.

10. ¿Ximod bislooy Jesús que rioʼbu nakit órni racnébu stipnés? (Marcos 6:31-34).

¹⁰ Guisetnaladxno toib ejemplo ni raslooy balaati nakit goyoʼ Jesús órni gocnébu stipnés (bíil Marcos 6:31-34). Toibtica buelt, órni Jesús né xpiin nigolú cadzagyibu, bireʼyibu seeyibu stoib lagary par guisaladxyibu. Per xidalguixo buñ gosanir né goylés láabu portín goniiny layibu ganyibu ni rasuidy Jesús. Láabu labúu naniʼbu yaca. Láabu né xpiimbu «diti gopyibu tiemp par ñooyibu». Jesús láaca labúu nasuidy layibu toib o chopsi galnigolú, de ngú maca nadudybu lagary guirá buñreʼ ñee. Per, galnadxiʼ bichiinni láabu por ngú «gosalóbu bisuidybu xidal cós». Né órni bidudybu cuent, «ma godzu» (Mar. 6:35). Diti bunybu láani lafuers, xalagary ngú portín «binladxbu buñcu». Goniiny nasuidybu portín nadxiʼbu guirá buñreʼ. Ni gocnébu stipnés nigolú goloʼ nakitni Jesús.

11. ¿Ximod gocné Jesús guirá buñ ni cacadiag láabu? (Láaca bibiʼ retrat).

¹¹ Jesús diti nosi bisuidybu guirá buñreʼ. Láaca biyaʼnbu guirá buñreʼ. Jesús buny toib galrradziguiaʼ né goxeʼsi galrro ni gopyibu, né xpiimbu bitzoo láani par guirá buñ (Mar. 6:41). Modreʼ bisuidybu guirá xpiimbu xi láani radudy diitz gacné buñ stipnés. Láaca bislooybu xpiimbu que ni gacné buñ stipnés xomod rony siervos ministeriales, láaca rasacni. ¡Buny pensary balaati nakit goyoʼ guirá apóstoles! Gocnéyibu Jesús par nakiʼsyibu galrro par guirá buñreʼ, dada órni «guiráyibu godoʼyibu né bidza lainyibu» (Mar. 6:42). Diti nosi nigoreʼ ni goyoʼ Jesús galrrasaʼ por stipnés xalagary ñoʼbu galrrasaʼ por láasibu. Laʼga bibanybu ló Gudxlio reʼ gocnébu stipnés (Mat. 4:23; 8:16). Jesús nigolú bisac sacróbu órni gocnébu né bisuidybu stipnés né bidudybu ni caquiin stipnés. Looy láaca labúu gonylo scúca: looy labúu tzoʼlo nakit pal raclo toib siervo ministerial né racnélo stipnés.

12. ¿Xigony diti non gonyno pensary que diti noʼ xí labúu guidudyno congregación?

¹² ¿Né pal ronylo pensary que diti labúu ronylo ni toib cós ga? Diti guireʼganlo. Naplo cualidades ni labúu gacné  congregación. Ni labúu gacné looy la, láani ngú guinablo lóo Jehová né de ngú goʼolo 1 Corintios 12:12-30. Ló texto reʼ apóstol Pablo rabexatzaybu que looy, xomod stipnés xpiin Jehová, naplo toib dxiin ni nigolú galán ni raquiin lainy congregación. Por ngú diti guireʼganlo pal diti ma bunylo guirá requisitos ni ranabni par gaclo siervo ministerial. Goloʼ guiclo gonylo dada rutirigaʼlni looy par gonylo ni ná Jehová né gacnélo xhermanlo. Ancianos sabiʼyibu xi láani labúu ronylo antes de guidudyibu toib dxiin ni non gonylo (Rom. 12:4-8).

13. ¿Xí láani non guisetnaladxno de guirá requisitos ni ranab Dios órni guicaʼno toib dxiin lainy congregación?

¹³ Stoib cós ni labúu gacné looy par guidxinlo gaclo siervo ministerial láani ngú guisetnaladxlo que guirá cristianos non gony cumpliryibu casi guirá requisitos ni ranabni. Guirá cristianos non gonyibu por guibigaxyibu Jehová, tzoʼyibu nakit né gacnéyibu stipnés né gacyibu toib ejemplo galán por mod ni rasobyibu ni ranab Jehová ló xcalnabányibu. Per, ¿ló xí cós labúu ñony pensary toib buñguieeu ni nainy gac siervo ministerial?

RO NON GONYBU DXIIN

14. ¿Xí láani radudy diitz «coʼyibu xcalrrienyibu»? (1 Timoteo 3:8-10, 12).

¹⁴ Nigoreʼ guibiʼno tipnés requisitos ni sieed ló 1 Timoteo 3:8-10, 12 (bíil láani). Siervos ministeriales non «coʼyibu xcalrrienyibu». Diitzreʼ láaca labúu guirexani xomod «gap buñ respet layibu». Ndeʼ diti radudyni diitz que diti labúu guixiichyibu o diti labúu cueʼyibu galrraxiich (Ecl. 3:1, 4). Per diti non guicaʼyibu dxiin ni ma cuaʼyibu xomod galrraguit né gonyibu que herman gap confianz layibu. Modreʼ congregación sap respet layibu.

15. ¿Xí láani radudy diitz «diti non guiscúyibu» nili «guisobladxyibu bidxiich né xtolni cuanyibu»?

¹⁵ «Diti non guiscúyibu». Ndeʼ radudy diitz guiniʼyibu ni noʼ lainy xcalnabanyibu, guiniʼyibu ni nigolú né gap buñ confianz layibu. Non gonyibu ni raniʼyibu né diti guiscúyibu ni toib buñ (Prov. 3:32). «Diti non […] guisobladxyibu bidxiich né xtolni cuanyibu». Pal napyibu toib negosy diti non cuanyibu. Nili pal ratopyibu donación lainy congregación, láaca diti kitquelyibu herman ni radzakyibu par gonyibu gan más bidxiich.

16. a) ¿Xí láani radudy diitz «diti non […] sochyibu»? b) ¿Xí radudy diitz «gac nayaa xcalrrienyibu»?

 ¹⁶ «Diti non […] sochyibu». Ndeʼ radudy diitz diti tudy midid gueʼyibu alcohol o nistzóny nili guimbu buñ layibu xomod buñ ni reʼgolu. Láaca non «gac nayaa xcalrrienyibu», portín rabanyibu mod ná Jehová. Guiráca buñ nac buñ galkié, per ná scú labúu guidzaktzay buñ Dios né guisac sacró.

17. ¿Ximod labúu tzoʼ prueby ni labúu gony toib hermano? (1 Timoteo 3:10; láaca bibiʼ retrat).

¹⁷ Stoib requisito láani ngú «primer non tzoʼ prueby layibu». Ndeʼ radudy diitz que non guislooyibu que ma labúu gap buñ confianz layibu par gapyibu stipnés dxiin. Por ngú, órni ancianos gaiby lóoto gonyto toib dxiin la, non gonyto dada rutirigaʼlni lóoto par guicanalto mod ná xcudx Jehová non gac dxiincu. Non guimbutzaayto ximod non gac dxiincu né pu ór non gacni. Pal ronyto por guirebuʼtzay xchiinto la, guirá herman de congregación sadudytzaay cuent que caniʼsto lainy xcudx Jehová. Ancianos, colguibiʼ xi herman ni ma goyonis labúu gony capacitarto (bíil 1 Timoteo 3:10). Por ejemplo, ¿noʼ lainy congregación xtunylo tipnés buñguieeu ni ma goyonis ni nac mbioxhlas o mbioxhlasien la? ¿Rasuidytzayibu xtiitz Dios guirá dzú la? ¿Rony comentaryibu ló reunión guirá ór la, né rareʼyibu predicación guirá xomal la? Pal nacni scú la, labúu guidudyto tipnés dxiin ni labúu gonyibu de acuerdo íz ni napyibu né mod nacyibu. Modreʼ labúu guibiʼto dada púti labúu gony toib mbioxhlas dxiin. Órcu, órni ma napyibu íz par labúu gacyibu siervos ministeriales la, pentzi ma ronyibu guirá requisitos ni ranabni.

18. ¿Xí láani radudy diitz diti tzoʼ ni guiniʼ «mal de layibu»?

¹⁸ Guirá siervos ministeriales láaca diti non tzoʼ ni guiniʼ «mal de layibu». Ló stoib diitz, diti non tzoʼ razón par guigotz buñ dool layibu de toib galkié rodann. Rioʼ ór tipnés cristianos labúu guigotz buñ falz layibu. Jesús láaca gosaclóo láani né goniʼbu que ngúca nasaclóo xpiimbu (Juan 15:20). Ná scú, herman ni diti cuenunysi rony, ni rasob ni ná Jehová mod buny Jesús, herman saniʼ sacró de láabu lainy congregación (Mat. 11:19).

19. ¿Dada púti raguiña «toibsi tzeʼelyibu tzoʼ»?

 ¹⁹ Guirá ni ma noʼ tzeʼel né nainy gacyibu siervos ministeriales «toibsi tzeʼelyibu tzoʼ». Mod goniʼ Jehová ló dzú ni see, toib galtzeʼel non gacni por toibsi buñguieeu né toibsi buñgonaʼ (Mat. 19:3-9). Toib cristiano dipa non gonybu galyoxh (Heb. 13:4). Per toib cristiano ni ma noʼ tzeʼel noʼ ni raquiin gonybu. Diti non guiscúbu tzeelbu né diti más coʼbu cuent stoib buñgonaʼ (Job 31:1).

20. ¿Ximod ragonés toib buñguieeu lidx?

²⁰ Láaca guirá siervos ministeriales «conésyibu xiinyibu né xfamilyibu galán». Guirá ni rasanir lainy toib famil non gonyibu ni ranab Jehová layibu. Guisuidyibu né xfamilyibu guirá xomal. Non guireʼyibu predicación né xfamilyibu dada ruti labúuni layibu. Né gacnéyibu xiinyibu par guidzaktzay Jehová (Efes. 6:4). Toib buñguieeu ni rantzay xfamil raslooybu que labúu gapbu congregación (bitzak láani né 1 Timoteo 3:5).

21. ¿Xí labúu gonylo pal yása gaclo siervo ministerial?

²¹ Pal yása gaclo siervo ministerial, ranabdo looy goniné Jehová né bisuidytzay ni ma bisuidyno nigoreʼ. Bisuidytzay guirá requisitos ni ranabni par toib siervo ministerial né buny rutirigaʼlni looy por gonylo láani. Buny pensary balaati ronladxlo Jehová né guirá xhermanlo. Goloʼ guiclo gacnélo layibu (1 Ped. 4:8, 10). Modreʼ sienlo mod rioʼ nakit toib buñ órni racné congregación. ¡Jehová sasiab xcalnasác ronoʼlo por guirá xtem ni gonylo par gaclo siervo ministerial! (Filip. 2:13).