ARTÍCULO NI GUISUIDYNO 44
CANCIÓN 33 Echa sobre Dios tu carga
¿Xí gonyno pal diti rac xinésni?
«Diti guidudylo lagary gony gan cós mal looy, xalagary ngú buny cós tzaay né modreʼ sonylo gan cós mal» (ROM. 12:21).
TEMA
¿Xí láani gonyno órni diti rac xinésni par diti gonyxiroʼno láani?
1, 2. ¿Xí cós labúu guisaclono?
JESÚS bisetlabu ejemplo xtuny toib gonaʼ viod ni guirási ór gonab toib juez ñony xinésni né láabu. Xpiin Jesús bienyibu mod gosac buñgonaʼ reʼ portín ló xtzúyibu xidal buñ diti góc xinésni né layibu (Luc. 18:1-5). Ló naareʼ, lóono láaca rienno mod gosac viodcu portín guirácano ma goyoʼ ór diti góc xinésni né lóono.
2 Diti radziguiaʼno órni rasaclono ngú, portín guirá dzú rabiʼno buñ ni rony juzgar stipnés por mod nac, ni diti ragobioo buñ toibsi midid, né láaca noʼ ni ronynaa stipnés buñ (Ecl. 5:8). Ni radziguiaʼno ngú, órni toib xhermanno rony mal lóono. Nigolú, layibu diti nacyibu xomod buñ ni racaló galnigolú. Per láaca nacyibu buñ galkié, por ngú rioʼ ór ronyibu mal lóono. Labúu guisuidyno xiroʼ mod buny Jesús órni xi enemigbu diti buny xinésni né láabu. Pal ronyno rutirigaʼlni lóono gapno paseins xi enemigno ni buny cós mal lóono, láaca sapno paseins xhermanno. Né, ¿ximod rasac Jehová órni toib buñ diti rony xinésni, ná nacbu toib herman o stoib buñ? ¿Xí rasacbu?
3. ¿Ximod nanno que Jehová rioʼbu galrrasaʼ por mod rony buñ lóono?
3 Jehová racábu cuidad ximod rony buñ lóono. «Jehová rioladxbu gac xinésni» (Sal. 37:28). Jesús goniʼ que Dios «sioʼbu galrrasaʼ par gac xinésni» né xpiimbu órni nainy láabu (Luc. 18:7, 8). Né mápa mer guinitlóbu galrrioʼob né dipa sadudybu lagary tudyno ló cós mal más tiemp (Sal. 72:1, 2).
4. ¿Ximod racné Jehová lóono?
4 Laʼga cabésno guidxin dzú ro ma gac xinésni, Jehová rasuidy lóono ximod gonyno órni diti rac xinésni (2 Ped. 3:13). Por ejemplo, raibybu lóono xi non gonyno par diti gonyxiroʼno toib cós. Láaca bidudybu Xiimbu Jesús lóono ni labúu guisuʼno. Né ló la Biblia radudybu consej galán lóono ni labúu guiquiinno órni diti rac xinésni né lóono.
GAPNO CUIDAD MOD GUISACNO
5. ¿Xigony non gapno cuidad mod ronyno órni diti rac xinésni né lóono?
5 Órni diti rac xinésni né lóono sigory rioʼobni lóono né radopy xcalnabanyno (Ecl. 7:7). Xpiin Jehová, Job né Habacuc gosacyibu modcu (Job 6:2, 3; Hab. 1:1-3). Ná wal rasac buñ modcu non gapno cuidad mod rasacno par diti gonyno toib cós mal.
6. ¿Xí rasuidy ejemplo xtuny Absalón lóono? (Láaca bibiʼ dibuj).
6 Órni rabiʼno diti rac xinésni né toib buñ o diti rac xinésni né lóono, sigory maca nainy guidxiguetno cós malcu buñcu. Per ngú sonyxiroʼ láani. Gonyno pensary ló ni gosaclóo Absalón, ni góc toibtica xiingaʼn David. Nigolú bidzuitzgoluʼbu órni gonbu que buchbu Amnón bixinbu bisanbu ni góc laa Tamar. Ley ni cuaʼ Moisés náni que Amnón non ñaitybu por galkié ni bunybu (Lev. 20:17). Absalón gopbu razón par nadzuitzbu, per diti gopbu derech par ñony reglarbu galnagan reʼ (2 Sam. 13:20-23, 28, 29).
Órni Absalón gon xi láani buny Amnón bisanbu Tamar, bidudybu lagary que xian ñony gan láabu. (Bibiʼ párrafo 6).
7. ¿Xí primer gosac salmista órni bibiʼbu que diti cayac xinésni?
7 Órni rabiʼno que buñ ni diti rony xinésni rarebuʼ ni rony né diti noʼ xi racyibu, órcu ronyno pensary que diti noʼ xi laa ni nacno buñtzay. Gonyno pensary ló salmista, láabu bibiʼbu que buñ mal bunyibu mal buñtzay né ná scú, nakit bibanyibu. Goniʼbu: «Modcu nac buñ mal, diti rasac naganyibu ni toib cós» (Sal. 73:12). Nigolú gosac malbu por guirá cós ni bibiʼbu né ma diti gosac par láabu ñembu Jehová. Goniʼbu: «Órni biyobi mod ñenna láani, nigolú bitudyni naʼ ló galrrasaʼ...» (Sal. 73:14, 16). Né láaca goniʼbu: «Mersi ñaba, né stidxoyensi ñalsita de xinéslo». (Sal. 73:2). Ngúpa ni gosaclóo toib hermano ni laa Alberto. a
8. ¿Ximod buny toib hermano órni diti góc xinésni né láabu?
8 Tipnés herman goniʼ que Alberto golann xpidxiich congregación, ná diti nigolú bunybu láani. Por ngú, ma diti gócbu anciano né tipnés herman de congregación ni gon láani ma diti gop respet láabu. Láabu rasetnaladxbu láani: «Nigolú bidzutzi, godó xian naʼ, né ma diti bidzel xcalrriena xi ñoni». Bidudybu lagary que guirá ndeʼ ñony mal láabu né golsitbu de Jehová né gócbu inactivo por gáay íz. Experiencia reʼ raslooy lóono xi labúu tzagac né lóono pal diti rachocno ló ni rasacno por ni diti cayac xinésni.
GUISUʼNO JESÚS
9. ¿Xí guirá buny guantary Jesús? (Láaca bibiʼ Dibuj).
9 Jesús bisuidytzay lóono ximod gonyno. Xidal buñ diti buny xinésni né láabu. Por ejemplo, tipnés xfamilbu ni diti buny crer que láabu ngú Mesías goniʼyibu que ma binit xcalrriembu. Líderes religiosos goniʼyibu que ronybu dxiin né Buñdzab. Né soldad romanos buny borla láabu, bunynaa né bigaity láabu (Mar. 3:21; 22; 14:55; 15:16-20, 35-37). Ná scú, Jesús buny guantary guirá ndeʼ né dada más, né dipa bidxiguetbu cós mal buñ ni buny láani láabu. ¿Xí rasuidyno de ejemplo xtunybu?
Jesús bisiambu toib ejemplo galán ximod non gonyno. (Bibiʼ párrafos 9 né 10).
10. ¿Xí buny Jesús órni diti góc xinésni né láabu? (1 Pedro 2:21-23).
10 (Bíil 1 Pedro 2:21-23). b Jesús bisian toib galán ejemplo par ganno ximod gonyno órni diti rac xinésni né lóono. Gonbu pu ór guiniʼbu né pu ór yaca (Mat. 26:62-64). Por ejemplo, órni tipnés buñ goniʼ pór galrrascú de láabu, goyoʼ ór diti goniʼbu xitcal (Mat. 11:19). Né órni goniʼbu, diti bitzaldaʼbu né diti goniʼbu que guidxiguetbu cós mal xi enemigbu. Jesús labúu bichocbu ló ni gosac portín «bisiambu láani ladxña ni rony xinésni». Gonbu que Jehová bibiʼ guirá cós ni cadudybu ló né gopbu confianz que Jehová sony xinésni órni nainy láabu.
11. ¿Xí raguiña diti cuenunysi gonyno? (Láaca bibiʼ retrat).
11 Labúu guisuʼno Jesús órni diti cuenunysi ranino órni diti rac xinésni né lóono. Pal ni buny stipnés lóono diti tampa mal láani, labúu guitudyno láani scásiʼ. O pentzi ragoʼno guicno diti guinino xitcal par diti gonyxiroʼno láani (Ecl. 3:7; Sant. 1:19, 20). Per, pentzi non guinino órni rabiʼno que diti cayac xinésni né toib buñ o non gony defenderno galnigolú (Hech. 6:1, 2). Per, pal non guinino, non gonyno rutirigaʼlni lóono par gacni né respet né guiquiinno diitz nadaʼa (1 Ped. 3:15). c
Órni diti rac xinésni né lóono, labúu guisuʼno Jesús órni racaano cuidad pu ór né ximod guinino. (Bibiʼ párrafos 11 né 12).
12. ¿Ximod labúu guisianno láani «ladxña ni rony xinésni»?
12 Láaca labúu guisuʼno Jesús órni guisianno guiráni «ladxña ni rony xinésni». ¿Ximod? Por ejemplo, pal toib buñ rony pensary mal de lóono o ronynaa lóono, napno confianz que Jehová nan xi láani nigolú. Confianz cu racnéni lóono par gony guantaryno órni diti rac xinésni né lóono portín nanno que, Jehová sony reglar láani. Órni rasianno láani ladxña Jehová, diti radudyno lagary que xian né galnadzuitz gonyni gan lóono. Pal radzuitzno o rinéno xian labúu gonyxiroʼno láani, labúu gonyni que diti tzoʼno nakit né saxinni mod radzakno Jehová (Sal. 37:8).
13. ¿Xí labúu sacné lóono órni diti rac xinésni né lóono?
13 Nigolú, diti labúu guisuʼtzayno Jesús. Pentzi labúu guinino o gonyno toib cós ni guisioʼob lóono después (Sant. 3:2). Sigory tipnés cós ro diti rac xinésni né lóono labúu guisian malni lóono, ló sentido emocional né físico laʼga noʼno ló gudxliogoxreʼ. Pal rasaclo modcu, bisetnaladx que Jehová nan ximod cadudylo. Né Jesús, ni láaca diti buny stipnés xinésni né láabu rientzaaybu mod cadudylo (Heb. 4:15, 16). Jehová diti nosi bidudybu ejemplo xtuny Xiimbu lóono, láaca radudybu consej ni sieed ló la Biblia ni racné lóono par diti cuenunysi gonyno órni diti rac xinésni né lóono. Guisuidyno chop versículos ni sieed ló libro xtuny Romanos.
«COLGUIDUDY LAGARY XCALNADZUITZ DIOS»
14. ¿Xí radudy diitz «colguidudy lagary xcalnadzuitz Dios»? (Romanos 12:19).
14 (Bíil Romanos 12:19). Apóstol Pablo gochbu cristianos: «colguidudy lagary xcalnadzuitz Dios». Rasobno consej reʼ órni radudyno lagary que Jehová gony xinésni ór né mod ni nainy láabu. Ngú ni buny John órni stoib herman diti buny xinésni né láabu. Láabu nábu: «Buni mandary naʼca par diti ñony reglar láani mod goniiny naʼ. Romanos 12:19 gocnéni naʼ par ñapa paseins né ñapa confianz lóo Jehová».
15. ¿Xigony más galán cuésno gony reglar Jehová láani?
15 Más galán cuésno que Jehová gony reglar láani. Pal ronyno láani diti sioʼno ló galrrasaʼ né diti sadzuitzno portín cayopyno mod stiplóocano gony reglarno láani. Jehová ná gacné lóono. Nacni suusi naniʼbu: «Bisian láani ladxñaya, naʼ soni reglar láani». Jehová radudybu xtiitzbu gony reglarbu láani né sonybu láani de toib mod galán. Pal rapno confianz ló ni ma goniʼbu, diti sasac naganno guireʼno ló galnadzuitz. Ngú ni gosaclóo John, ni bisetlano ló párrafo ni godudy. Láabu nábu: «Pal rasiana láani ladxña Jehová, napa confianz que láabu más galán sony reglarbu láani que naʼ».
«BUNY CÓS TZAAY NÉ MODREʼ SONYLO GAN CÓS MAL»
16, 17. ¿Ximod racné oración lóono par gonyno cós tzaay né modcu gonyno gan cós mal? (Romanos 12:21).
16 (Bíil Romanos 12:21). Pablo goniʼ: «Buny cós tzaay né modreʼ sonylo gan cós mal». Ló discurs ni goloʼ Jesús laidy dainy goniʼbu: «Gonladxto buñ ni rianladx lóoto né guinabto lóo Dios por guirá ni racanal lóoto» (Mat. 5:44). Né ngú bunybu. Sigory ma bunyno pensary ló galrrioʼob ni godudy Jesús ló órni soldad bicaʼ láabu ló yac nadop. Láaca bunynaayibu né bitudyibu Jesús ló galnatoy. Toib galrrioʼob rodann gocni par Jesús, diti rigaʼl xpensaryno mod godudybu. ¡Diti góc xinésni né láabu!
17 Per Jesús diti bireʼgan por guirá ngú. Xalagary nanabbu Jehová ñony castigar guirá soldadcu, goniʼbu: «Bixiosa, bitudy scásiʼ xcalkiéyibu, portín diti nanyibu ni ronyibu» (Luc. 23:34). Ni guinabno lóo Jehová por buñ ni ronynaa lóono sacnéni lóono par guibiʼno láabu gadzé mod né guichocno ló galnadzuitz né xian ni napno.
18. ¿Ximod gocné oración Alberto né John?
18 Oración gocnéni chop herman ni bisetlano ló artículo reʼ par diti nareʼganyibu ni diti góc xinésni né layibu. Alberto ná: «Goninéya Jehová por herman ni diti buny xinésni né naʼ. Xidal buelt gonaba Jehová ñacnébu naʼ par ma diti nasetnaladxi guirá ni góc». ¡Sacróyen ngú ni cayony Alberto xchiin Jehová stoib! John ná: «Guirá ór gonaba Jehová por herman ni bunynaa naʼ. Oraciones cu gocnéni naʼ par diti nabiʼya mal herman cu né diti naniya mal de láabu. Láaca gocnéni naʼ par nasaca sacró né naʼca».
19. ¿Xí non gonyno laʼga noʼno ló gudxliogoxreʼ? (1 Pedro 3:8, 9).
19 Diti nanno xi cós mal guicalóno antes de guinitló gudxliogoxreʼ. Per guieed nitisi guieed, guirá ór guinabno Jehová gacné lóono. Gonyno rutirigaʼlni lóono por guisuʼno mod buny Jesús órni diti góc xinésni né láabu né guisobrano principios ni sieed ló la Biblia. Pal ronyno ngú, labúu gapno confianz que Jehová sasiab xcalnasác loguiaʼno (bíil 1 Pedro 3:8, 9).
CANCIÓN 38 Jehová te cuidará
a Tipnésyibu bidzaʼ laa.
b Ló capítulos 2 né 3 ni sieed ló 1 Pedro, apóstol reʼ goniʼ tipnés galnagan ni cualó cristianos ni goyoʼ ló siglo primero xtol xpixuanyibu o tzeʼelyibu ni diti góc cristianos (1 Ped. 2:18-20; 3:1-6, 8, 9).
c Bibiʼ ló jw.org video ni laa, Raquiin gapno galrronladx par guiguaʼno sacró.
