1. ¿Púti goleʼ fuers xpiin Dios ni bibany ló dzú ni see?

 LA BIBLIA casi guirá ór rasetlani de xpiin Dios xomod buñ nadip. Per dada ni góc buñ nadip diti guirá ór gosacyibu scú. Por ejemplo, tipnés buelt rey David gop balory né gosacbu que gocdxiichbu «xomod toib dainy», per ló stipnés buelt bidzuibybu né gosacbu que bidopy balory láabu (Sal. 30:7). Sansón gop fuers órni bidudy Jehová espíritu xtuny láabu, per bidudybu cuent que pal diti ñapbu galnadip xtuny Dios nasnitbu xfuersbu né nadopy balory láabu, né ñacbu xomod stipnés buñgudxlio (Juec. 14:5, 6; 16:17). ¿Chú bidudy fuers guirá biinreʼ? Jehová.

2. ¿Xigony goniʼ apóstol Pablo que ma diti labúuni láabu né láaca bidopy fuers láabu? (2 Corintios 12:9, 10).

² Apóstol Pablo bidudybu cuent que láaca biquiimbu galnadip ni sieed de Jehová (bíil 2 Corintios 12:9, 10). Xomodca guiráno, Pablo láaca bixoʼ (Gál. 4:13, 14). Láaca bunybu rutigoygaʼlni láabu par bunybu xinésni (Rom. 7:18, 19). Né rioʼ ór goyoʼbu galrrasaʼ né bidzuibybu ñaitybu (2 Cor. 1:8, 9). Ná scú goniʼbu: «Órni diti napa fuers, órcu napa más galnadip». ¿Xigony goniʼbu ndeʼ? Portín Jehová bidudy fuers ni biquiimbu, né modcu labúu gopbu galnadip.

3. ¿Xí galrranabdiitz guicapyno ló artículo reʼ?

³ Jehová radudy xtiitz que láaca sadudybu fuers lóono (1 Ped. 5:10). Par labúu gac ngú diti cuʼchno ñano. Gonyno pensary ló toib camión. Par labúu saani raquiinni toib motor. Per motor cu diti sonyni que saani, pal ni caxony camióncu diti raquichñe ro non guiquichñe.  Xomodca motor cu, Jehová labúu sadudy fuers ni caquiinno. Per noʼ ni raquiin gonyno. ¿Xí galrracné ma bidudy Jehová lóono par gac nadipno? ¿Né xí labúu gonyno par gacnéni lóono? Par labúu ganno láani, guisuidyno ximod buny nadip Jehová profeta Jonás, María xinaʼ Jesús né apóstol Pablo. Láaca sasuidyno que ngúca rony Jehová ló naareʼ por xpiin.

4. ¿Xí labúu gonyno par guicacuentno xfuers Jehová?

⁴ Toibtica cós ni labúu gonyno par guidudy Jehová fuers lóono láani ngú, gonyno oración. Láabu racapybu oración xtunyno órni radudybu lóono galnadip ni más nadip que xcalnadipno (2 Cor. 4:7). Láaca galán láani golno Xtiitzbu né gonyno pensary loni (Sal. 86:11). Ni raibybu lóono ló la Biblia «napni galnadip» (Heb. 4:12). Pal ronylo oración né roʼolo la Biblia, sacaʼlo fuers par gony guantarylo, né gonylo xchiimbu né galrrabaladx o gony cumplirlo né toib responsabilidad. Guisuidyno ximod buny nadip Jehová profeta Jonás.

5. ¿Xigony biquiin Jonás fuers?

⁵ Jonás biquiin fuers. Jehová bunycuent láabu toib dxiin. Per, bidzuibybu por ngú biaʼpybu lainy toib bark né seebu stoib lagary. Láabu né guirá ni see lainy barkcu mersi ñaityibu. Órni guirá buñcu bisal láabu ló nisdaʼ. Goyoʼbu toib lagary ro nacayasquin: lainy toib beel. ¿Ximod gosac Jonás? ¿Bunybu pensary que ñaitybu cu la? ¿Bunybu pensary que Jehová ma bialadx láabu la? Goyoʼ golúbu ló galrrasaʼ.

6. ¿Xí láani bidudy fuers Jonás órni goyoʼbu lainy beel? (Jonás 2:1, 2, 7).

⁶ ¿Xí láani buny Jonás par nacaʼbu fuers lainy beelcu? Desde lainy nimalcu, goninébu Jehová (bíil Jonás 2:1, 2, 7). Ná diti bisobbu, Jonás gon que Jehová nacadiag oración ni bunybu, portín góc arrepentirbu. Láaca bunybu pensary ló ni ná la Biblia. ¿Ximod nanno láani? Portín ló oración, ni ritlaa ló capítulo 2 de Jonás, bisetlabu xidal diitz ni ritlaa ló Salmos (por ejemplo, bitzak ni ná Jonás 2:2, 5 né Salmo 69:1; 86:7). Riendxichni que Jonás bimbutzaay historiacu. Né bunybu pensary loni por ngú, gopbu confianz que Jehová ñacné láabu. Después, ni bireʼbu lainy beelcu, goyoʼbu puext par ñony cumplirbu né dxiin ni bidudy Jehová láabu (Jon. 2:10–3:4).

7, 8. ¿Xí láani gocné a toib hermano par góc nadipbu órni godudybu ló galnagan?

⁷ Ejemplo xtuny Jonás labúu gacné lóono órni radudyno ló galnagan. Gonyno pensary ló toib hermano de Taiwán ni laa Zhiming. b Caxoʼ golúbu né láaca por ni cayonybu xchiin Jehová, xfamilbu racaló láabu. ¿Ximod racaʼbu fuers ni radudy Jehová láabu? Ronybu oración né rasuidybu. Láabu nábu: «Rioʼ ór, órni cacalóya galnagan nigolú rioʼya ló galrrasaʼ diti náapa gan guisudi xquiichi». Per diti rareʼganbu. Nábu: «Ni roni primer, raninéya Jehová. De ngú racaʼya audífonos né racadiaga canción del Reino. Rioʼ ór rony cantar láani nalandiguieʼ dada órni ma rasaca sacró. Né órcu rasalóya rasudi».

⁸ Ni bisuidy Zhiming bidudyni fuers láabu órni biquiimbu láani. Toibtica  buelt, órni ma cayac labúubu de toib operación ni gócbu, toib enfermera góoch láabu que diti tampa napbu glóbulos rojos né que raquiin guicaʼbu runy. Per goxin antes de gony operar doctor láabu bíilbu toib experiencia de toib hermana ni góc operar xomod láabu. Hermana reʼ más goxeʼsi glóbulos rojos gop, per láabu diti gosaguelbu nacaʼbu runy né labúu biálbu. Ni bíilbu experiencia cu bidudyni fuers Zhiming par ñacbu fiel.

9. ¿Xí labúu gonylo pal toib prueby bistoʼbyni xfuerslo? (Láaca bibiʼ retrat).

⁹ Órni cadudylo ló toib prueby, ¿rioʼ ór rioʼob xcalnabanylo né rasacnaganlo gonylo oración la? ¿O rasaclo que diti naplo fuers par guisuidylo la? Bisetnaladx que Jehová rientzaay mod cadudylo. Por ngú, dada órni ronylo oración dop, labúu gaplo confianz que Jehová sadudy ni caquiinlo (Efes. 3:20). Pal caxoʼlo pal rioʼob xcalnabanylo né rasacnaganlo goʼolo né guisuidylo, ni labúu gonylo láani ngú guicadiaglo grabación ni noʼ ló audio xtuny la Biblia o de publicaciones xtunyno. Stoib cós ni labúu gacné looy láani ngú guicadiaglo toibtica canción o guibiʼlo toib video ni noʼ ló jw.org. Órni raninélo Jehová né rayopylo xcalrracapybu ló galrrascad ni radudybu lóono, nacni suusi ñaibyno láabu, «Ranaba looy bidudy fuers naʼ».

10. ¿Ximod radudy xhermanno fuers lóono?

¹⁰ Jehová labúu guiquiin herman par guidudy fuers lóono. Layibu labúu guisialdóyibu xcalnabanyno órni cadudyno ló toib galnagandaʼ o órni cayonyno rutirigaʼlni lóono par gony cumplirno né toib responsabilidad (Col. 4:10, 11). «Ló tiemp ni noʼ galnagan» más raquiinno ximigno (Prov. 17:17). Órni rasacno que ma cadopy fuers lóono xhermanno labúu gacné lóono ló sentido físico, emocional né espiritual. Guisuidyno ximod cuaʼ xinaʼ Jesús galrracné né fuers.

11. ¿Xigony biquiin María fuers?

¹¹ María biquiin fuers par ñony cumplirbu né ni goniʼ Jehová. Sigory goyoʼbu  ló galrrasaʼ órni ángel Gabriel góoch láabu xi responsabilidad xiroʼ napbu. Ñac xiimbu ná yása gonybu galtzeʼel. Diti gopbu experiencia xomod buñ ni ma noʼ xiin, per non nasniʼsbu ni non nadxin ñac Mesías. Dipa ma gotnébu toib buñguieeu, né non ñaibybu José ni ma guicaʼ láabu que ma nac xiimbu (Luc. 1:26-33).

12. Mod ná Lucas 1:39-45, ¿ximod cuacuent María fuers ni biquiin?

¹² ¿Ximod cuaʼ María fuers par ñony cumplir né responsabilidad xiroʼ ni cuaʼbu? Biyopybu xcalrracné stipnés. Por ejemplo, gochbu Gabriel nadudy más información láabu de dxiin ni ma bidudy Jehová láabu (Luc. 1:34). Diti xidzú gosaabu xiroʼ «nís laidy dainy», de gudx Judá par goyguenbu xfamilbu, Elisabet. ¡Né ni goyeebu cu gocnéni láabu! Elisabet buny felicitarbu María, né xcalrracné espíritu xtuny Dios, goniʼbu toib profecía sacróyen de badaʼ ni ñap María (bíil Lucas 1:39-45). Órcu María cuapy, que Jehová «ma bunybu cós ni nadip né barñabu» (Luc. 1:46-51). Jehová biquiin Gabriel né Elisabet par ñony nadipbu María.

13. ¿Xí láani góc órni Dasurí gonabbu xcalrracné herman?

¹³ Xomodca María, stipnés xpiin Dios labúu gacnéyibu looy. Guisuidyno ejemplo de toib hermana de Bolivia ni laa Dasurí. Doctor góoch láabu que bixiosbu caxoné toib galguitz ni ma guigaity láabu. Goniiny ñanbu bixiosbu sacró (1 Tim. 5:4). Biquiimbu xcalrracné stipnés par labúu ñony cumplirbu né responsabilidad reʼ, nagan gocni par láabu. Láabu nábu: «Xidal buelt gosaca que ma diti labúu ñoni más». Per primer la, diti gonabbu galrracné. ¿Xigony? Dasurí ná: «Diti goniiny naʼ nadudi dxiin herman. Goodxi naʼca: Jehová ngú ni gacné naʼ. Né órcu bidudi cuent que por ni cayalsita de stipnés ma toobi cacalóya xcalnagana» (Prov. 18:1). Dasurí goloʼbu guicbu naninébu ximigbu par ñaibybu guirá biinreʼ xi ni cadudybu ló. Láabu nárabu: «Diti náapa diitz guiniya balaati gocné herman naʼ. Bitnéyibu galrro lainy hospital né buny animaryibu naʼ né textos ni sieed ló la Biblia. ¡Sacró láani que diti noʼno toibno! Napno toib famil rodann lainy xcudx Jehová, toib famil ni puextca noʼ par guidudy ni caquiinlo, ni cudxaʼ né looy né ni gacné looy».

14. ¿Xigony non guicacuentno xcalrracné ancianos?

¹⁴ Jehová láaca raquiin ancianos par guidudy fuers lóono. Nacyibu xomod galrrascad ni radudy Jehová lóono par gony nadipyibu né guisialdóyibu xcalnabanyno (Is. 32:1, 2). Por ngú, goniné layibu órni noʼ ni ragoʼ looy ló galrrasaʼ. Né pal náyibu gacnéyibu looy cuacuent xcalrracnéyibu. Jehová raquiin layibu par gony nadipyibu looy.

15. ¿Xí esperanza sacróyen napno guiráno ni nacno cristianos?

¹⁵ Esperanza ni radudy la Biblia lóono radudyni xiroʼ fuers lóono (Rom. 4:3, 18-20). Guiráno ni nacno cristianos napno esperanza sacróyen de guibanyno tipzó, ná pal gacni lainy guibá o ló Gudxlio ro gac toib lagary móz. Por esperanza cu, napno fuers par guicalóno prueby, guinino xtiitz Dios né gony cumplirno  né responsabilidad ni napno lainy congregación (1 Tes. 1:3). Ganno ximod esperanza cuca buny nadipni apóstol Pablo.

16. ¿Xigony biquiin apóstol Pablo fuers?

¹⁶ Pablo biquiin fuers. Ló guiich ni bicaʼbu par corintios goniʼbu que nadaabu xomod toib guus. Goniʼbu que cuanal né bicantaʼ buñ láabu, né diti gonbu xi ñonybu. Né dada mersi ñaitybu (2 Cor. 4:8-10). Bicaʼbu guirá ndeʼ ló ni rion buelt ni goyeebu goniʼbu xtiitz Dios. Diti gonbu que nacalóbu más galnagan. Ro seecabu, xidal buñ bunynaa láabu, gonás buñ láabu, mersi ñaitybu ló nisdaʼ né bisal buñ láabu press.

17. Mod ná 2 Corintios 4:16-18, ¿xí láani bidudy fuers apóstol Pablo par cualóbu prueby?

¹⁷ ¿Xí láani bidudy fuers Pablo par buny guantary? Goyodieʼbu ló esperanza xtunybu (bíil 2 Corintios 4:16-18). Gochbu hermanos de Corinto que, ná cuerpo xtunybu ma cadopyni, diti bireʼganbu. Goloʼbu guicbu galnabany ni ñabbu ló dzú ni sietra. Nigolú gosac esperanza par láabu ni ñeebu guibá, portín nacni toib galnasác rodann. Goyoʼbu puext nacalóbu nitisi cós consol nacaʼbu galnasác xtunybu. Pablo buny pensary ló esperanza ni nacaʼ, né por ngú gosacbu que xcalnabanybu «cayac copyni dzúna dzú».

18. ¿Ximod buny nadip esperanza a Tíjomir né xfamil?

¹⁸ Esperanza ngú ni radudy fuers a toib hermano de Bulgaria ni laa, Tíjomir. De goloʼ chop tzón íz, buchbu ni más lahuin, Zdravko, goity ló toib desgrasy de tránsito. Tíjomir bidopy xcalnabanybu. ¿Xí láani gocné láabu par labúu nacalóbu galrrioʼob reʼ? Bunybu pensary ximod gac órni guiás buñ ni ma goity. Láabu nábu: «Por ejemplo, ranido pu lagary guicacuentdo Zdravko, xi galrro gonytzaaydo par láabu, chú layibu guiruʼdo órni gonydo lanii par guicacuentdo láabu  né xi ni góc ló dzú ni ma guidubylagaʼ gaibydo láabu». Tíjomir ná que órni láabu né xfamilbu ragoʼyibu guicyibu esperanza, racnéni layibu par gony guantaryibu né cuésyibu órni guilís Jehová buchbu lad gueʼet.

19. ¿Xí labúu gonylo par gony nadiplo esperanza xtunylo? (Láaca bibiʼ retrat).

¹⁹ ¿Xí láani labúu gonylo par labúu gony nadiplo esperanza xtunylo? Pal naplo esperanza de guibanylo tipzó ló Gudxlio, bíil ni rasetlaa la Biblia de Gudxlio móz né buny pensary que ma noʼlo cu (Is. 25:8; 32:16-18). Buny pensary ximod guibany buñ ló Gudxlio copy. ¿Rabiʼlo looy cu la? ¿Chú rabiʼlo? ¿Xí láani racadiaglo? ¿Xí láani rasaclo? Dibuj ni rarecaa ló publicación xtunyno ngú labúu gacné looy par guibiʼlo ximod gacni. Láaca labúu guibiʼlo video musical, xomod La vida de verdad, Mápa mer né Contemplo ese día. Pal riaʼno ronyno pensary ximod guibany buñ ló Gudxlio copy, galnagan ni cadudyno ló labúu gacni tipratsi né diti sácni nanaa par lóono (2 Cor. 4:17). Esperanza ni radudy Jehová looy sony nadipni looy.

20. ¿Pu labúu cueʼno fuers dada órni rasacno que ma diti labúuni lóono?

²⁰ «Né xcalrracné Dios sapno fuers» dada órni rasacno que ma diti labúuni lóono (Sal. 108:13). Jehová ma bidudy guirá ni caquiinno par gac nadipno. Por ngú, órni guisac naganlo gony cumplirlo né toib responsabilidad, par gony guantarylo toib prueby né tzoʼ nakitlo gonylo xchiin Jehová, goniné Jehová né guidopy xcalnabanylo né bisuidy la Biblia par conés Jehová looy. Láaca, cuacuent xcalrracné herman né bisetnaladx esperanza ni naplo. Órcu Jehová «né xcalrracné xcalnadipbu» sony nadipbu looy né guirá xcalnadipbu par gony guantarylo né paseins né galnakit (Col. 1:11).