Ni ranabdiitz buñ ni roʼol
¿Nosi guidguiʼx né maná godoʼ israelitas ló yoovich la?
Ló 40 íz ni goyoʼ israelitas ló yoovich, xcalrropayibu gocni maná (Éx. 16:35). Láaca chop buelt, bidudy Jehová guidguiʼx layibu (Éx. 16:12, 13; Núm. 11:31). Per láaca gop israelitas stipnés galrro, ná más goxeʼsi.
Por ejemplo, goyoʼ ór Jehová góoch layibu ñeeyibu stipnés lagary «ro labúu nasaladxyibu», né cuu bidzelyibu nís né stipnés galrro (Núm. 10:33). Toibtica lagarycu góc ro bidaa nís xtuny Elim, «ro goyoʼ 12 dxilany né 70 palmeras», sigory gocni palmeras datileras (Éx. 15:27). Libro Plants of the Bible rabexa que palmera datilera, «raniʼsni xidal lagary, […] xcaa yac reʼ ngú ni más roo buñ ló yoovich; radudyni galrro, aceity né ro ralaa xidal millón de buñ».
Láaca israelitas bisaladxyibu ro goyoʼ toib dxilany ni rimbu buñ ló naareʼ xomod Farán, ni noʼ wadi xtuny Farán. a Mod ná libro Discovering the World of the Bible, wadi reʼ o láach reʼ «napni 81 millas [130 km] ni sioʼlni né nacni toibtica de wadis más sioʼol, más móz né ni más rimbu buñ ni noʼ gudx Sinaí». Libro cuca ná: «Lainy wadi, midid 28 millas [45 km] ro rareʼni, noʼ toib lagary sacróyen ro radaa nís de Farán, ronoʼgolu palmeras. Ro radaa nís reʼ sioʼlni más de [4, km] né noʼni midid [610 m] ló nisdaʼ. Nacni Edén xtuny Sinaí. Desde ló dzú ni see, xidal mil de palmeras ni napni ronyni que xidal buñ rieed lagary reʼ».
Palmeras ro radaa nís xtuny Farán
Órni israelitas bireʼyibu gudx Egipto, goynéyibu cob rin, né ro labúu ñotñayibu láani, né láaca sigory goynéyibu tidxó laach né aceity. Guirá ndeʼ naguel biráni. Láaca «goynéyibu xiʼlyibu né vac, xidalgoluʼ yós» (Éx. 12:34-39). Per por galnagan ni goyoʼ ló yoovich, sigory goityimu. Láaca, sigory israelitas godóyibu tipnés nimal reʼ né bidudyibu tipnésyimu xomod sacrificios, né dada bidudyibu láani a dioxh falz (Hech. 7:39-43). b Ná scú, israelitas bisniʼsyibu xiil né vac. Nanno láani por diitz ni góoch Jehová a israelitas órni diti bisobdiitzyibu: «Xiinto sadxin sacyibu ni ran xiil 40 íz» (Núm. 14:33). Por ngú sigory gopyibu tidxó lech né tidxó beʼel, per diti gocni xiroʼ galrro par ñoo midid tzón millón de buñ ló 40 íz. c
¿Pu goleʼyibu nís né galrro par ñoo guirá nimal? d Ló dzúcu sigory góc más guié né por ngú más nagaʼdot góc ló yoovich. Artículo «Arabia» de Libro Perspicacia para comprender las Escrituras, rabexa que de goloʼ 3.500 íz «Gudx Arabia diti tampa bidzoo nís que ló naareʼ». Né náni: «Xidal lagary ro bidaʼ nís guetdii né nabich, goyoʼ tiemp gopgoluʼni nís ndeʼ nac toib prueby que ló dzú ni see goyoʼ siil nís lagarycu». Ná gocni modreʼ, lagary reʼ gocni nabich né moda bitzuibyni buñ (Deut. 8:14-16). Pal diti ñony Jehová toib galrradziguiaʼ né layibu, tanli israelitas né xinimalyibu ñaityibu (Éx. 15:22-25; 17:1-6; Núm. 20:2, 11).
Moisés gochbu israelitas que Jehová bidudy maná layibu par ñanyibu «que buñgudxlio diti nosi de páa rabany, láaca de diitz ni rareʼ roʼ Jehová» (Deut. 8:3).
a Bibiʼ Guiich ni caniʼ 1 de may íz 1992, páginas 24 né 25.
b La Biblia rasetlani chop buelt órni israelitas bidudyibu galrrascad de nimal a Jehová ló yoovich. Primerdiguieʼ buelt ni bidudyibu láani órni goyoʼ sacerdocio, né ni rarop, gocni órni bunyibu Pascua. Guiropcani bunyibu láani ló íz 1512 antes de xtzúno, sigory gocni después ni nasaʼ israelitas tobiz de goloʼ bireʼyibu gudx Egipto (Lev. 8:14–9:24; Núm. 9:1-5).
c Ro ma cadopy íz 40 órni goyoʼ israelitas ló yoovich, cuaʼyibu ló guerr xidalguixo nimal (Núm. 31:32-34). Ná scú, godoʼrayibu maná dada órni goyoʼyibu ló Tierra Prometida (Jos. 5:10-12).
d Diti ritlani que nimal godoʼ maná, portín Jehová góoch a israelitas natopyibu midid labúu ñoʼ toib buñ (Éx. 16:15, 16).
