ARTÍCULO NI GUISUIDYNO 40
CANCIÓN 30 Mi Amigo, mi Padre, mi Dios
Jehová «rasialbu buñ ni cayoʼob xcalnabany»
«Rasialbu buñ ni cayoʼob xcalnabany né racaʼbu venda ló xiheridyibu» (SAL. 147:3).
TEMA
Jehová nigolú rioʼ galrrasaʼ por buñ ni cayoʼob xcalnabany. Artículo reʼ sasuidyni lóono ximod rasialdóbu xcalnabanyno né ximod guisialdóno xcalnabany stipnés.
1. ¿Ximod rabiʼ Jehová xpiin?
JEHOVÁ rabiʼ guirá ni rasaclono. Rimbutzaaybu órni noʼno nakit né órni noʼno nabann (Sal. 37:18). Órni rabiʼbu que ronyno rutirigaʼlni lóono por gonyno xchiimbu dada órni racalóno galnagan, rioʼ nakitbu. Per, diti ngúsi; raniiny gacnébu lóono né guisialdóbu xcalnabanyno.
2. ¿Xí láani rony Jehová por guirá ni cayoʼob xcalnabany, né xí non gonyno par labúu gacnéni lóono?
2 Órni la Biblia raniʼ de buñ ni cayoʼob xcalnabany, Salmo 147:3 ná que Jehová «racaʼbu venda ló xiheridyibu». Texto reʼ rasetlani ximod ran Jehová né galrronladx buñ ni cayoʼob xcalnabany. ¿Xí raquiin gonyno par gacnéni lóono mod ranbu lóono? Guisetlano toib ejemplo. Pal toib buñ nap toib herid labúu tzeebu ló doctor. Per par labúu guialbu, raquiin guisobbu guirá ni gaiby doctor láabu. Ló artículo reʼ, sasuidyno xi raiby Jehová a guirá buñ ni nap herid ló sentido emocional né ximod labúu guisobno guirá consej ni radudybu né galrronladx.
JEHOVÁ RAIBY LÓONO QUE NIGOLÚ RASACNO
3. ¿Xigony tipnés buñ rony pensary que diti noʼ pu raquiinyibu?
3 Nabanni, nabanyno ló toib Gudxlio ro diti nadxiʼ buñ saʼ. Xidal buñ diti ragobioyibu sacró stipnés, né ronyibu que buñ guisac que diti noʼ pu raquiin. Toib hermana ni laa Helen a ná: «Goniʼsa lainy toib famil ro buñ diti ronladx saʼ. Bixiosa góc toib buñguieeu nadox né guirá ór gochbu lóodo que diti noʼ pu raquiindo». ¿Ma godudylo ló galnagan de clas reʼ la? Pentzi goyoʼ ni diti godabioo looy sacró, o goyoʼ buñ ni guirá ór goniʼ mal de looy o bunybu que nasaclo que diti non gonladx buñ looy. Pal scú nacni, sigory rasacnaganlo gonylo crer que noʼ toib ni nigolú rioʼ galrrasaʼ por looy.
4. ¿Xí láani raiby Jehová lóono ló Salmo 34:18?
4 Ná stipnés buñ diti godabioo looy sacró, labúu gaplo confianz que par Jehová nigolú rasaclo, né que nigolú ronladxbu looy. Láabu noʼbu «gaxtiguié de buñ ni cayoʼob xcalnabany» (bíil Salmo 34:18). Pal naclo toibtica «buñ ni nogoluʼ nabann», bisetnaladx que Jehová bibiʼ cós sacróyen ni noʼ lainy xcalnabanylo né goniiny láabu que ñaclo toibtica de xpiimbu (Juan 6:44). Láabu guirá ór sioʼbu par gacnébu looy portín ronladxbu looy.
5. ¿Xí rasuidyno mod godabioo Jesús buñ ni stipnés goleʼ tiplad?
5 Ejemplo xtuny Jesús racnéni lóono par guientzaayno ximod rasac Jehová. Órni goyoʼbu ló Gudxlio, Jesús bibiʼbu buñ ni stipnés diti godabioo sacró né binladxbu guirá buñreʼ (Mat. 9:9-12). Órni toib buñgonaʼ ni caxoʼ godan xhap Jesús par ñal, bisialdóbu né buny felicitarbu buñgonaʼ reʼ por fe ni gopbu (Mar. 5:25-34). Jesús nac xomod Bixios (Juan 14:9). Por ngú, labúu gaplo confianz que par Jehová nigolú rasaclo né que rabiʼbu cualidades sacróyen ni naplo, xomod fe ni naplo né galnadxiʼ ni naplo láabu.
6. ¿Xí labúu gonyno pal rasacno que diti noʼ pu raquiinno?
6 ¿Xí labúu gonylo pal guirá ór ronylo pensary que diti noʼ pu rasaclo? Bíil textos ni sieed ló la Biblia ni ná que par Jehová rasaclo, né buny pensary loni (Sal. 94:19). b Pal diti goygaʼlo toib meta o diti labúu ronylo midid rony stipnés, diti guireʼganlo nili coʼlo guiclo ló cós ni diti labúu ronylo. Jehová nac razonable né diti rabésbu gonylo cós ni diti labúu gonylo (Sal. 103:13, 14). Pal goyoʼ ni buny cós mal looy, diti guigotzlo dool looyca por cós ni diti bunylo. Diti gocni xtolo nili bunylo cós mal par nasaclolo láani. Bisetnaladx, Jehová sony que buñ mal quiix por ni rony, diti sanabbu buñ ni godudy ló galrrioʼob quiix láani (1 Ped. 3:12). Órni Sandra góc mbiox goyoʼ ni bunynaa láabu, láabu nábu: «Guirá ór ranaba Jehová gacnébu naʼ par guibiʼya cualidades ni napa ni láabu rabiʼbu».
7. ¿Ximod labúu guiquiinno cós ni godudyno ló par gonyno xchiin Jehová?
7 Ná rioʼ ór rasacnaganlo gonylo crer láani, Jehová labúu guiquiin looy par gacnélo stipnés. Ma bidudybu toib privilegio looy de guiniʼlo xtiitzbu (1 Cor. 3:9). Sigory por mod godudylo ló, ma labúu tzoʼlo xalagary buñ né guientzaaylo mod rasacyibu. Labúu gacnélo layibu. Helen, ni bisetlano ló párrafo 3, cuábu xcalrracné Jehová né herman, por ngú nigoreʼ ma nanbu ximod gacnébu stipnés. Nábu: «Nírcu gosaca que diti noʼ pú biquiinna, per Jehová ma buny que guisaca que noʼ ni ronladx naʼ né que noʼ ro raquiinna». Helen nac precursora regular né noʼ nakitbu.
JEHOVÁ RANIINY QUE GUISETNALADXNO QUE LÁABU MA BITUDYBU SCÁSIʼ XCALKIÉNO
8. ¿Xí láani raiby Jehová lóono ló Isaías 1:18?
8 Tipnés xpiin Jehová ni biché nírcu rioʼobra xcalnabanyibu, ná pal bichéyibu antes o después ni goyonisyibu. Per guisetnaladxno, Jehová bunycuent Xiin par ñaity por lóono portín nigolú nadxiʼbu lóono. Por ngú, labúu gapno confianz que nainy láabu guicacuentno xcalrrascadbu. Jehová raiby lóono «Coltaʼ né gony reglarno láani guiropcano». c Né raibybu lóono que, órni ma bunyno láani satudybu scásiʼ xcalkiéno (bíil Isaías 1:18). Nigolú radudyno guixquix que Bixiosno ni ronladxgoluʼ lóono guialadx cós mal ni bunyno nírcu per dipa guialadxbu cós tzaay ni ma bunyno (Sal. 103:9, 12; Heb. 6:10).
9. ¿Xigony galán coʼno guicno ló cós ni cayac nigoreʼ né ni gac ló dzú ni sietra, xalagary coʼno guicno ló cós ni ma godudy?
9 ¿Xí labúu gonylo pal galkié ni bunylo nírcu casioʼobsani looy? Buny por coʼlo guiclo ló cós ni cayac nigoreʼ né ni gac ló dzú ni sietra. Buny pensary ló ejemplo xtuny apóstol Pablo. Láabu gosac maláybu por ni cuanalbu né bigaitybu xpiin Jehová, per gonbu que Jehová bitudy scásiʼ ni bunybu (1 Tim. 1:12-15). Por ngú diti bunybu pensary ló galkié ni bunybu antes xomodca diti bunybu pensary ló cós ni bunybu par ñacbu buñxirop ló judaísmo (Filip. 3:4-8, 13-15). Xalagary ngú, goniʼbu xtiitz Dios né gan né goloʼbu guicbu ló cós ni gac ló dzú ni sietra. Xomodca Pablo, diti labúu guitzaʼlo cós ni ma góc. Per labúu coʼlo guiclo gonyxiroʼlo Jehová midid labúuni looy nigoreʼ né coʼlo guiclo ló cós sacróyen ni gonybu ló dzú ni sietra.
10. ¿Xí labúu gonyno pal bunynano stipnés buñ?
10 Sigory rasaclo mal pal galkié ni bunylo antes bunyni mal stipnés buñ. ¿Xí labúu gonylo? Gonab buñcu guitudybu scásiʼ ni bunylo né biyopy mod par gony reglarlo láani (2 Cor. 7:11). Gonab Jehová gacnébu buñ ni godiña cós mal ni bunylo. Jehová labúu gacnébu tanli looy né buñcu par diti guireʼganto.
11. ¿Xí rasuidyno de ejemplo xtuny Jonás? (Láaca bibiʼ dibuj ni sieed).
11 Bisuidy de xcalrrachélo né bidudy lagary guiquiin Jehová looy. Bisetnaladx profeta Jonás. Xalagary ñeebu Nínive, mod buny mandary Dios láabu, Jonás gonás niis stoib lad. Jehová buny corregir láabu né modcu goyoʼ xcalrriembu (Jon. 1:1-4, 15-17; 2:7-10). Jehová biquiinrabu Jonás, né bidudybu oportunida par ñeebu Nínive, né Jonás bisob. Ná gosac malaybu ni bunybu, diti bidudybu lagary que ngú nacaa láabu par nacacuentbu dxiin ni bidudy Jehová láabu (Jon. 3:1-3).
Órni Jehová goleʼ Jonás lainy beel, gochbu Jonás ñee Nínive stoib par naniʼbu ni ná Jehová gony né Nínive. (Bibiʼ párrafo 11).
JEHOVÁ RASIALDÓBU LÓONO NÉ XCALRRACNÉ ESPÍRITU SANTO XTUNYBU
12. ¿Ximod radudy Jehová paz lóono órni radudyno ló toib desgrasy o órni rasaclono cós ni rasioʼob xcalnabanyno? (Filipenses 4:6, 7).
12 Órni radudyno ló desgrasy o radudyno ló cós ni rasioʼob goluʼ xcalnabanyno, Jehová raquiimbu espíritu santo xtunybu par guisialdóbu xcalnabanyno. Ngú ni gosaclóo Ron né Carol órni xiingaʼnbu bigaitybu láacabu. Layibu náyibu: «Ndeʼ diti nac primer buelt ni cualódo toib galnagandaʼ, per nigolú bisioʼobni xcalnabanydo. Diti labúu gotiasydo, por ngú bunydo oración Jehová né gosacdo paz ni ritlaa ló Filipenses 4:6, 7» (bíil láani). Pal cadudylo ló toib prueby ni nigolú nagan né cayoʼob xcalnabanylo, góoch Jehová guirá ni rasaclo. Labúu guininélo láabu xidal buelt, né midid nainy looy (Sal. 86:3; 88:1). Guirá ór gonab espíritu santo xtunybu né diti guidzaglo. Gop confianz, Jehová sacadiag looy (Luc. 11:9-13).
13. ¿Ximod racné espíritu santo lóono par gonyrano xchiin Jehová? (Efesios 3:16).
13 ¿Ma godudylo ló toib galnagandaʼ né rasaclo que ma diti naplo fuers la? Espíritu santo labúu gony nadipni looy par gonyralo xchiin Jehová (bíil Efesios 3:16). Guisuidyno ni gosaclóo toib hermana ni laa Flora. Láabu né tzeelbu gocyibu misioneros, per tzeelbu biscú láabu né bichílyibu xcaltzeelyibu. Flora ná: «Ni bunybu naʼ bistoʼbyni naʼ dzúna gueel. Por ngú gonaba Jehová nadudy espíritu santo xtunybu par diti nareʼgana. Jehová bisial herid ni gopa né gocnébu naʼ par ñoni gan láani ná buni pensary que diti labúu ñoni láani». Láabu rasacbu que Dios gocné láabu par ñapbu más confianz lóbu, né napbu confianz que Jehová sacné láabu gac nitisi gac. Né nábu: Jehová bunybu né naʼ ni ná Salmo 119:32: «Sacanaldieʼya ni rony mandarylo, portín looy raxalo xcalnabani par tzoʼ xtiitzlo lainyni».
14. ¿Xí labúu gonyno par guicaʼno espíritu xtuny Dios?
14 Después ni guinablo Jehová guidudy espíritu santo looy, ¿xí más non gonylo? Buny tipnés cós ni labúu gacné looy guicaʼlo espíritu cu, xomod ni tzeelo reunión né gony predicarlo. Bíil la Biblia guirá dzú, né modcu labúu coʼlo xpensary Jehová ló xpensarylo (Filip. 4:8, 9). Laʼga cayoʼolo láani, cuá cuidad guirá buñ ni godudy ló galnagan né buny pensary ximod gocné Jehová layibu par buny guantaryibu. Sandra, ni bisetlano ló párrafo 6, godudybu ló galnagandaʼ. Láabu nábu: «Historia xtuny José guirá ór radxinni lainy xcalnabani. Láabu diti bidudybu lagary que guirá cós mal ni godudybu ló ñonyni que ma diti nadzakbu Jehová sacró» (Gén. 39:21-23).
JEHOVÁ RAQUIIMBU XHERMANNO PAR GUISIALDÓBU XCALNABANYNO
15. ¿Chú labúu guisialdó xcalnabanyno, né ximod labúu gonybu láani? (Láaca bibiʼ retrat).
15 Órni radudyno ló galrrioʼob, xhermanno labúu guisialdóyibu xcalnabanyno (Col. 4:11). Jehová raquiimbu xhermanno par guislooybu balaati nadxiʼbu lóono. Layibu labúu guisialdóyibu xcalnabanyno, órni racadiagyibu lóono, rioʼyibu xalagaryno o nosi rony compañeryibu lóono. Pentzi gony animaryibu lóono né toib texto ni sieed ló la Biblia o guinabyibu Jehová por lóono (Rom. 15:4). d Pentzi toib hermano o toib hermana gaibybu lóono ximod rabiʼ Jehová guirá cós, né ngú labúu gacné lóono par diti tzogoluʼno ló galrrasaʼ né guisacno sacró. Herman labúu gacné lóono de stipnés mod, labúu guidudybu tidxó galrro lóono.
Ximigno ni nadip xfe né ni labúu gapno confianz, racnéyibu né rasialdóyibu xcalnabanyno. (Bibiʼ párrafo 15).
16. ¿Xí non gonyno par guicacuentno xcalrracné stipnés?
16 Par labúu tzoʼ ni gacné looy, sigory raquiin guinablo láani. Herman ronladx looy né nainy gacnéyibu looy (Prov. 17:17). Per sigory diti nanyibu ximod rasaclo o xi cós caquiinlo (Prov. 14:10). Pal cayoʼob xcalnabanylo, biyopy tipnés ximiglo ni nadip xfe né góoch layibu ni noʼ lainy xcalnabanylo. Galán láani gaibylo láabu xi labúu gonybu por looy. Né tipnés hermanas rioladxyibu gooyibu diitz né hermanas ni nadip xfe.
17. ¿Xí cós labúu guicaa lóono par guicaʼno xcalrracné herman, né ximod labúu gonyno gan láani?
17 Buny por diti galsitlo. Pal nigolú noʼ nabannlo, sigory diti rioʼ gan looy tzoʼlo né buñ. Pentzi herman diti guieen mod rasaclo o guiniʼyibu ni diti non guiniʼyibu (Sant. 3:2). Diti guidudylo lagary que guirá ngú gonyni que cueʼlo tiplad galrracné ni caquiinlo. Toib anciano ni laa Gavin, ni nap depresión, ná: «Xidal buelt, diti nainy naʼ tzoʼya né ximiga». Ná scú, ronybu rutirigaʼlni láabu par tzoʼbu né stipnés buñ, né ngú rony que guisacbu sacró. Toib hermana ni laa Amy ná: «Por guirá cós ni gosacloya, rasacnagana gapa confianz buñ. Per casudi gandxiʼya xhermana né gapa confianz lóoyibu, xomodca rony Jehová. Ngú ragoʼ nakit láabu, né ragoʼ nakitni naʼ».
GUIRÁ NI MA BIDUDY JEHOVÁ XTIITZ GONY LÓ DZÚ NI SIETRA RASIALDÓNI LÓONO
18. ¿Xí cós sacróyen gac ló dzú ni sietra, né xí labúu gonyno nigoreʼ?
18 Nigolú rabaladxno que mápa mer sasialdó Jehová lóono ló sentido físico né emocional, sanitlóbu guirá cós ni ratudy lóono ló galrrioʼob (Apoc. 21:3, 4). Ló Gudxlio copy guirá cós ni bunynaa lóono diti sadxinni lainy xcalnabanyno (Is. 65:17). Mod ma bisuidyno, Jehová ragoʼ venda ló xiheridno nigoreʼ. Né galnadxiʼ, ma bidudybu xidal cós lóono par guisialdóbu xcalnabanyno né gacnébu lóono. ¡Por ngú cuacuent xcalrracnébu! Guirá ór gop confianz: Jehová ronladxgoluʼ looy (1 Ped. 5:7).
CANCIÓN 7 Jehová es mi fuerza y mi salvación
a Bidzaʼ laayibu.
b Bibiʼ cuadriyen ni laa, « Looy nigolú rasaclo par Jehová».
c Par guidzakno Jehová stoib, raquiin guislooyno que rac arrepentirno órni ranabno guitudybu scásiʼ ni bunyno né ma diti gonyno cós mal ni bunyno. Pal ronyno toib galkié rodann, láaca non guiyopyno xcalrracné ancianos xtuny congregación (Sant. 5:14, 15).
d Por ejemplo, sadzelo toib lista de versículos ro ná «Angustia; preocupación» né «Consuelo» ló publicación Textos bíblicos para la vida cristiana.
