ARTÍCULO NI GUISUIDYNO 43
CANCIÓN 90 Animémonos unos a otros
¿Xí labúu gonyno pal napno dudas?
«Colgantzay pal nigolú guirá cós» (1 TES. 5:21).
TEMA
¿Ximod labúu cueʼno dudas ni labúu gony que ma diti labúu gonyno xchiin Jehová galán?
1, 2. a) ¿Xí dudas labúu gapno? b) ¿Xí guisuidyno ló artículo reʼ?
GUIRÁ buñ nap dudas a rioʼ ór. Por ejemplo, buny pensary ló toib mbioxhlas ni diti tampa rap confianz que Jehová rabiʼ láabu, né por ngú diti rionisbu. O buny pensary ló toib hermano ni órni góc mbioxhlas goloʼbu guicbu coʼbu Jehová primer lagary, xalagary gonybu dxiin par gapbu más bidxiich. Per nigoreʼ ma noʼ xfamilbu né rasacbu que xpidxiichbu diti rigaʼlni par guiyaʼanbu xfamilbu, por ngú sigory ranabdiitzbu pal láani ngú ni bunybu. Stoib ejemplo: toib hermana ni ma nac buñgol ma diti tampa napbu fuers né rareʼganbu portín ma diti labúu ronybu xomod bunybu antes. Pentzi ma goyoʼ ór bunylo toibtica galrranabdiitz reʼ looy: «¿Rabiʼ Jehová naʼ la? ¿Raquiin guirá sacrificios ni buni por láabu la? ¿Raquiinrabu naʼ la?».
2 Clas pensary cu labúu gonyni que guichich fe xtunyno né labúu gonyni que diti labúu gonyno xchiin Jehová. Ló artículo reʼ, sabiʼno ximod la Biblia labúu gacnéni lóono pal ronyno pensary que Jehová diti rioʼ galrrasaʼ por lóono, né que diti xinésni ngú ni bunyno antes o que ma diti raquiin Jehová lóono.
¿XIMOD LABÚU CUEʼNO DUDAS NI NAPNO?
3. ¿Xí sacné lóono par cueʼno dudas?
3 Pal napno dudas, Xtiitz Dios sacnéni lóono par ma diti gapno láani. Né xcalrracnéni, fe ni napno Jehová né mod radzagno láabu sácni más dxich, né labúu tzoʼno «dxich ló fe» (1 Cor. 16:13).
4. ¿Ximod labúu gantzayno pal nigolú guirá cós xomod ná 1 Tesalonicenses 5:21?
4 (Bíil 1 Tesalonicenses 5:21). La Biblia radudy consej reʼ lóono: «Colgantzay pal nigolú guirá cós». ¿Né ximod gonyno ngú? Guitzakno ni ronyno pensary né ni ná la Biblia. Buny pensary ló toib mbioxhlas ni diti nap confianz pal Jehová rabiʼ láabu. ¿Non guiaʼanbu né duda cu la? Yaca, ni más galán láani gantzaybu pal nigoluʼ guirá cós né xcalrracné la Biblia par guibiʼbu ximod rabiʼ Jehová láani.
5. ¿Ximod labúu «guicadiagno» galrracapy ni radudy Jehová lóono?
5 Órni rolno Xtiitz Dios nacni suusi naniné Jehová lóono. Per, par guicadiagno guirá ni raniʼbu de toib duda, non gonyno stipnés cós. Non guiyopyno textos ni sieed ló la Biblia de cós ni ragoʼ lóono ló galrrasaʼ né guiquiinno guirá herramientas ni radudy xcudx Jehová lóono par gony investigarno de toib tema (Prov. 2:3-6). Nigolú rasac guinabno Jehová conés investigación ni gonyno né gacnébu lóono guidzelno xcalrracapyni. Cueʼno tipnés principios ni sieed ló la Biblia né guiyopyno información ni gacné lóono mod cadudyno. Láaca raquiin guisuidyno tipnés historias ni sieed ló la Biblia de buñ ni godudy ló galnagan ni cacalóno.
6. ¿Ximod racné reunión lóono par cueʼno dudas ni napno?
6 Láaca «racadiagno» Jehová ló reunión. Pal rioʼno reunión guirá xomal sigory ló toib discurs o ló toib comentario sacadiagno ni merpa caquiinno par guireʼ duda ni napno (Prov. 27:17). Nigoreʼ guinino de tipnés dudas ni labúu ñapno né ximod labúu cueʼno láani.
«¿RIOʼ JEHOVÁ GALRRASAʼ POR NAʼ LA?»
7. ¿Xí labúu guinabdiitzno lóocano?
7 Pentzi ma gonabdiitzlo looy toibtica buelt pal racá Jehová cuidad ni ronylo. Pal ronylo pensary que diti tampa rasaclo, pentzi ronylo pensary que diti labúu gaclo ximig ni Bisaʼ guibá né Gudxlio. Sigory rey David láaca buny pensary modcu. Nigolú bidziguiaʼbu que Jehová nabiʼ buñgudxlio por ngú gonabdiitzbu: «Jehová, ¿chú buñgudxlio par guisetnaladxlo láabu né par ganlo láabu?» (Sal. 144:3). Guibiʼno ximod labúu guidzelno galrracapy xtuny galrranabdiitzcu.
8. Mod ná 1 Samuel 16:6, 7, 10-12, ¿xí cós rabiʼ Jehová?
8 La Biblia raslooyni lóono que Jehová rabiʼ guirá buñ ni rony pensary que diti tampa rasac. Por ejemplo, bixelbu Samuel ñee lidx Jesé ñony ungirbu toibtica xiimbu par nadxin ñac rey xtuny gudx Israel. Jesé buny que gatz xiimbu nadudy nisló Samuel, per diti goloʼbu cuent ni más lahuin, ni góc David. b Per, ¡Jehová golú láabu! (Bíil 1 Samuel 16:6, 7, 10-12). ¿Xigony? Portín bibiʼbu ni goyoʼ lainy xcalnabanybu, bibiʼbu que gócbu toib mbioxhlas ni nigolú goloʼ cuent cós espiritual.
9. ¿Xigony labúu gaplo confianz que Jehová rioʼ galrrasaʼ por looy? (Láaca bibiʼ dibuj).
9 Buny pensary ló guirá ni ma buny Jehová par guislooybu que rioʼbu galrrasaʼ por looy. Radudybu consej ni merpa caquiinlo. (Sal. 32:8). Par gonybu láani, raquiin guimbutzaaybu looy ¿ja? (Sal. 139:1). Órni guisoblo guirá consej cu né guibiʼlo ximod rarebuʼni, saplo confianz que Jehová rioʼ galrrasaʼ por looy (1 Crón. 28:9; Hech. 17:26, 27). Láabu racábu cuidad guirá ni ronylo por láabu né rabiʼbu cualidades sacróyen ni naplo (Jer. 17:10). Nainy gacbu ximiglo né raniiny láabu guicacuentlo invitación cu (1 Juan 4:19).
«Pal rayopylo láabu, sadudybu lagary looy guidzelo láabu» (1 Crón. 28:9). (Bibiʼ párrafo 9). c
«¿LÁANI NI GOLOʼYA GUICA GONI LA?»
10. Órni rabiʼno cós ni bisianno, ¿xí labúu guinabdiitzno lóocano?
10 Conforma radudy íz, pentzi toib buñ labúu nabiʼ guirá ni bisian né nanabdiitzbu láacabu pal galán ni goloʼbu guicbu gonybu. Pentzi bisiambu toib dxiin o ma diti gosalóbu toib negosy par labúu gonybu más por Jehová. Per nigoreʼ ni ma godudy íz pentzi rabiʼbu que tipnés buñ ni rimbubu ni buny dxiin par gap bidxiich ralooyni rabany sacró. Por ngú, labúu guinabdiitzbu láacabu: «¿Biquiin guirá sacrificios ni buni por Jehová la? ¿Ñeeni más galán naʼ pal nagoʼya guica ñooni stoib cós la?».
11. ¿Xigony goyoʼ galrrasaʼ buñ ni bicaʼ Salmo 73?
11 Pal ma bunylo de clas galrranabdiitz reʼ looy toibtica buelt, buny pensary ximod gosac ni bicaʼ Salmo 73. Láabu bibiʼbu que guirá ni diti buny xchiin Jehová ralooyni bibany sacró, diti bixoʼ né gop bidxiich (Sal. 73:3-5, 12). Ralooyni galán goyeeni layibu, por ngú salmista buny pensary que diti biquiin guirá ni bunybu por Jehová. Guidopy dzú goyoʼbu ló galrrasaʼ né bunybu pensary ló cós ni diti noʼ pu gocné láabu (Sal. 73:13, 14). ¿Xí láani gocné láabu?
12. Mod ná Salmo 73:16-18, ¿xí láani gocné salmista par ñonybu pensary?
12 (Bíil Salmo 73:16-18). Salmista goyee lidx Jehová. Lagarycu gosacbu sacró, né labúu bunybu pensary. Biembu que tipnés buñ ni nabany natzatz, nadxin dzú nanitló Jehová layibu. Bibiʼbu que ni goloʼbu Jehová primer lagary ngú ni más galán ni bunybu, né ngú buny que nasacbu sacró né láacabu né ñapbu fuers par ñonyrabu xchiin Jehová (Sal. 73:23-28).
13. ¿Ximod labúu guisaclo sacró né looyca? (Láaca bibiʼ retrat).
13 Xomodca salmista, looy labúu guisaclo sacró né looyca. ¿Ximod? Buny pensary ló guirá cós tzaay né ló cós ni rasac ni naplo lainy guibá. Né, ¿xí nap guirá buñ ni diti rony xchiin Jehová? Nosi ni radudy gudxliogoxreʼ layibu. Esperanza ni napyibu noʼni ló cós ni labúu gapyibu nigoreʼ, diti ló ni labúu gapyibu ló dzú ni sietra. Per Jehová radudybu xtiitzbu que sadudybu más que ni labúu gonyno pensary (Sal. 145:16). Láaca, diti nanno ximod ñac xcalnabányno pal nagoʼno guicno ñonyno stoib cós. Per noʼ toib cós ni nanno: guirá ni ragoʼ guic gony cós portín nadxiʼyibu Jehová né saʼyibu dipa sioʼ cós ni siatz layibu.
Guirá ór guisetnaladxno ni ma bidudy Jehová xtiitz gony. (Bibiʼ párrafo 13). d
«¿RAQUIINSA JEHOVÁ NAʼ LA?»
14. ¿Ló xí galnagan radudy xpiin Jehová, né xí labúu guinabdiitzyibu láacayibu?
14 Tipnés xpiin Jehová ñoladxyibu ñonyibu más por láabu, per diti labúu ronyibu láani por xisyibu, galguitz o stipnés galnagan. Ngú labúu gony que gonyibu pensary que diti tampa rasacyibu par Jehová né guinabdiitzyibu láacayibu: «¿Raquiinsabu naʼ la?».
15. ¿Xí láani gop confianz ni bicaʼ Salmo 71?
15 Ni bicaʼ Salmo 71 gosac modcuca. Gochbu Jehová: «Diti guisianlo naʼ nigoreʼ ni ma diti napa fuers» (Sal. 71:9, 18). Per gopbu confianz que pal ñonybu xchiin Jehová guirá ór, Jehová nagonés né ñacné láabu. Bisuidybu que Jehová noʼ nakit né guirá ni rony rutirigaʼlni par gonyibu xchiin Jehová ná noʼ galnagan (Sal. 37:23-25).
16. ¿Xigony ranino que herman golien nigolú raquiinyibu par Jehová? (Salmo 92:12-15).
16 Pal looy naclo toib cristiano ni ma nac buñgol, buny por guibiʼlo looy xomod rabiʼ Jehová looy. Ná rasaclo que diti labúu gonylo xiroʼ, Jehová rabiʼ guirá ni labúu radudylo ló sentido espiritual (bíil Salmo 92:12-15). Xalagary coʼlo guiclo ló cós ni diti labúu gonylo, goloʼ guiclo ló cós ni labúu gonylo. Labúu gony nadiplo stipnés né ejemplo galán xtunylo né tzoʼlo galrrasaʼ por layibu. Láaca labúu gaibylo layibu ximod ma gocné Jehová looy ló xcalnabánylo, né balaati raniiny looy guibiʼlo gac cumplir guirá ni ma bidudybu xtiitzbu gonybu. Né dipa guialadxlo que guirá oración ni ronylo napni xiroʼ galnadip (1 Ped. 3:12). Nac nitisi mod cadudyno guiráno labúu gonyno cós por Jehová né por stipnés.
17. ¿Xigony non gonyno rutirigaʼlni lóono par diti guitzakno lóono né stipnés?
17 Pal moda radzuitzlo né looyca portín diti labúu ronylo por Jehová midid naniiny looy, bisetnaladx que par láabu rasac guirá ni ronylo. ¡Gop confianz! Per sigory, rioʼ ór moda ratzaklo looy né stipnés, diti gonylo ngú. ¿Xigony? Portín Jehová dipa ratzakbu lóono né stipnés buñ (Gál. 6:4). Por ejemplo, María goloʼbu ñeʼ Jesús toib aceity ni ralanax ni nigolú rasac (Juan 12:3-5). Né toib gonaʼ viod ni góc pobre goloʼbu chop nilas ni diti tampa gosac lainy templo (Luc. 21:1-4). Par Jesús, guiropca cós cu gocni toib mod ni bislooyibu fe ni gopyibu. Par Bixioslo Jehová, nigolú rasac nitisi cós ni gonylo por galnadxiʼ, ná par looy ralooyni mitienni.
18. ¿Xí labúu gacné looy par cueʼlo dudas ni naplo? (Láaca bibiʼ cuadriyen « Xtiitz Dios sacnéni looy par cueʼlo dudas ni naplo»).
18 Guiráno rioʼ ór napno dudas. Per, xomod ma bisuidyno, Xtiitz Dios racnéni lóono par cueʼno láani. Por ngú biyopy loni galrracapy ni raquiinlo né sasaclo que rareʼ dudas ni naplo né saplo confianz. Jehová rabiʼ looy, par láabu rasac guirá sacrificios ni ronylo por láabu né radudybu xtiitzbu quiixbu looy. Dipa guialadxlo ndeʼ: Jehová ronladx né ran tigaaga xpiin ni diti rasian láabu.
CANCIÓN 111 Los motivos de nuestro gozo
a NI RAREʼ LOGUIAʼ: Ló artículo reʼ, órni ranino de dudas, diti radudyno diitz que diti napno fe lóo Jehová o ló guirá cós ni ma bidudybu xtiitzbu gonybu, xalagary ngú nacni órni toib buñ rasacnagan gony crer que rasacbu par Jehová, o ranabdiitzbu láacabu pal xinésni ngú ni bunybu.
b Ná la Biblia diti raniʼ balac íz gop David órni Jehová golú láabu, ralooyni gócbu toib mbioxhlasiensa (bibiʼ Guiich ni caniʼ 1 de septiembre íz 2011, página 29, párrafo 2).
