ARTÍCULO NI GUISUIDYNO 41
CANCIÓN 13 Cristo es nuestro modelo
¿Xí rasuidyno ni buny Jesús ló 40 govitz ni goyoʼbu ló Gudxlio después ni biásbu?
«Xpiimbu bibiʼ láabu 40 govitz, né Jesús goniʼ de Gobierno xtuny Dios» (HECH. 1:3).
TEMA
¿Ximod labúu guisuʼno ejemplo ni bisian Jesús ló 40 govitz ni goyoʼbu ló Gudxlio después ni biásbu?
1, 2. ¿Xí góc laʼga chop xpiin Jesús seeyibu Emaús?
NOʼNO 16 de nisán íz 33, né xpiin Jesús nigolú noʼ nabann né cadzuiby. Chop de layibu rareʼ de gudx Jerusalén né seeyibu niis Emaús, toib gudxyen ni riaʼan midid 11 kilómetros (7 millas). Nigolú careʼganyibu portín buñ bigaity buñguieeu ni cuanalyibu, Jesús. Gopyibu esperanza que Mesías nalaa buñ judíos, per nigoreʼ Mesías ma diti noʼ, ma goity. Per chop biinreʼ diti nan xi láani mápa mer gac.
2 Toib buñguieeu ni diti rimbuyibu rabigax né rasaa toibsi né layibu. Discípulos reʼ raibyibu buñguieeucu que nigolú noʼyibu nabann né rioʼob xcalnabanyibu por guirá ni gosaclóo Jesús. De ngú rooyibu diitz né buñguieeucu, né ndeʼ satzaʼ mod rabányibu. Buñguieeucu ni diti rimbuyibu, rasaló rabexa «desde Moisés né guirá profetas», xigony godudy Mesías ló galrrioʼob né goity. Órni guioncayibu radxinyibu Emaús, chop biinreʼ radudy cuent que buñguieeucu nac Jesús ni ma biás lad gueʼet. Nigolú bibaladxyibu órni gonyibu que Mesías nabany (Luc. 24:13-35).
3, 4. a) ¿Xí góc né xpiin Jesús? (Hechos 1:3). b) ¿Xí guisuidyno ló artículo reʼ?
3 Jesús bireʼ lóo xpiin xidal buelt ló 40 govitz ni goyoʼbu ló Gudxlio después ni biásbu (bíil Hechos 1:3). Jesús buny animar layibu, né xpiimbu ma diti goyoʼ nabann nili bidzuiby, bibaladxyibu, gopyibu confianz né balory par goniʼyibu né bisuidyibu stipnés de Gobierno xtuny Dios. a
4 Ni guisuidyno ni buny Jesús ló Gudxlio después ni biásbu labúu sacnéni lóono. Ló artículo reʼ sabiʼno que Jesús biquiintzay tiempcu par 1) buny animarbu xpiimbu, 2) gocnébu xpiimbu ñentzaay escrituras né 3) bisuidybu xpiimbu ximod nacaʼyibu más responsabilidad. Ló tigaaga ndeʼ sasuidyno ximod labúu guisuʼno Jesús.
¿XIMOD LABÚU GONY ANIMARNO STIPNÉS?
5. ¿Xigony biquiin xpiin Jesús ñoʼ ni ñony animar layibu?
5 Xpiin Jesús biquiinyibu ñoʼ ni ñony animar layibu. ¿Xigony? Portín tipnésyibu bisian lidx, xfamil, xinegosy par goyodieʼyibu ló xchiin Jehová toibsi né Jesús (Mat. 19:27). Stipnésyibu, buñ xcudxyibu bunynaa né goleʼ layibu tiplad portín ma gocyibu xpiin Jesús (Juan 9:22). Gosaguelyibu bunyibu guirá sacrificios reʼ portín bunyibu crer que Jesús nac Mesías ni non ñeed (Mat. 16:16). Per, órni buñ bigaity Jesús, goyoʼ nabanyibu portín bunyibu pensary que ni golésyibu ñac, ma diti labúu narebuʼni.
6. ¿Xí buny Jesús después ni biásbu lad gueʼet?
6 Jesús bientzaay que wal ñoʼ nabann xpiimbu por xcalgoitybu. Gonbu que goyoʼyibu nabann per diti portín biatz fe layibu. Por ngú, dzú ni biásbu lad gueʼet gosalóbu buny animarbu ximigbu. Bireʼbu lóo María Magdalena laʼga María cayibdxaʼ roʼ xpaʼbu (Juan 20:11, 16). Bireʼbu lóo chop discípulos ni bisetlano ro rasaló artículo reʼ. Né láaca bireʼbu lóo apóstol Pedro (Luc. 24:34). ¿Xí rasuidyno de ejemplo xtuny Jesús? Guisuidyno ni góc órni bireʼbu lóo María Magdalena.
7. ¿Xí láani bibiʼ Jesús cayony María, né xí bunybu por buñgonaʼ reʼ? (Juan 20:11-16; láaca bibiʼ dibuj).
7 (Bíil Juan 20:11-16). 16 de nisán, tipnés buñgonaʼ ni góc fiel, rosildiguieʼ goyeeyibu ro xpaʼ Jesús (Luc. 24:1, 10). Toibticayibu góc María Magdalena. Órni bidxinbu ro xpaʼ Jesús, bibiʼbu que Jesús diti nax lainy xpaʼ, por ngú nimaca gooygudxbu láani Pedro né Juan. Guiropca biinreʼ nimaca goyee ro xpaʼ Jesús, né María goyee né layibu. Pedro né Juan bibiʼyibu que nigolú yadi Jesús lainy baʼcu, né bibiguetyibu lidxyibu. Per María yaca. Láabu biaʼanbu cú né gorudxaʼbu. Ná diti gonbu láani, Jesús bibiʼ láabu. Órni Jesús bibiʼ que María cayibdxaʼ por láabu, goniiny láabu nasialdóbu xcalnabany María. Órcu bireʼbu lóo María né bunybu toib cós ni buny animar láabu. Goninébu buñgonaʼ reʼ, né bidudybu toib dxiin ni nigolú rasac láabu: Gaibybu xpiin Jesús que ma biásbu lad gueʼet (Juan 20:17, 18).
Guisuʼno Jesús órni guibiʼtzayno mod cadudy xhermanno né tzoʼno xalagary herman ni careʼgan. (Bibiʼ párrafo 7).
8. ¿Ximod labúu guisuʼno Jesús?
8 ¿Ximod guisuʼno Jesús? Gacnéno herman par gonyrayibu xchiin Jehová. Par gonyno láani, non guicaano cuidad xi galnagan cacalóyibu, tzoʼno xalagaryibu né guininéno layibu né galrronladx. Guibiʼno ni gosaclóo toib hermana ni laa Jocelyn, beelbu goity ló toib desgrasy. Jocelyn ná: «Por xidal beʼo guidopy dzú goyoʼya nabann». Toib galtzeʼel gon láani, né biruʼyibu hermana reʼ ñee lidxyibu, goyoʼyibu xalagarybu, bicadiagyibu mod gosacbu né gochyibu hermana reʼ que nigolú rasacbu par Jehová. Jocelyn ná: «Bidopy xcalnabani, gosaca suusi toobi ñoʼya lainy nisdaʼ ló toib guieedaʼ. Per Jehová biquiin galtzeʼel reʼ par goleʼbu né bilaabu naʼ lainy nisdaʼcu. Gocnéyibu naʼ ñapa gan goni xchiin Jehová». Pal nainy gony animarno stipnés, guidudyno lagary gaibyibu lóono ni noʼ lainy xcalnabanyibu né guicadiagtzayno layibu, modcu labúu guisialdóno xcalnabanyibu, né labúu gony nadipno layibu par gonyrayibu xchiin Jehová (Rom. 12:15).
¿XIMOD LABÚU GACNÉNO STIPNÉS PAR GUIENTZAAYIBU ESCRITURAS?
9. ¿Xí láani diti bientzaay xpiin Jesús, né ximod gocnébu xpiimbu?
9 Xpiin Jesús buny crer ló Xtiitz Dios né bunyibu rutigoygaʼlni layibu por nasobyibu láani (Juan 17:6). Per diti bientzaayibu xigony bigaity buñ Jesús suusi ñacbu toib buñ mal. Gonbu que xpiimbu gop toib galnabany tzaay, per bidudybu cuent que diti bientzaayibu ni ná Escrituras (Luc. 9:44, 45; Juan 20:9). Por ngú gocnébu xpiimbu ñentzaayibu guirá ni bíilyibu. Guibiʼno ni góc órni bireʼbu lóo chop xpiimbu ni see niis Emaús.
10. ¿Ximod gocné Jesús xpiin par nadudyibu cuent que láabu gócbu Mesías? (Lucas 24:18-27).
10 (Bíil Lucas 24:18-27). Jesús diti nimaca gochbu chop biincu chúpa láabu, xalagary ngú bunybu galrranabdiitz. ¿Xigony? Portín goniiny láabu que biincu naniʼ ni rony pensary né rasac. Né scú bunyibu láani. Goniʼyibu que golésyibu que Jesús nabeʼ gudx Israel xan xomandary buñ romanos. Órni bilox goniʼyibu ni goloʼ layibu ló galrrasaʼ, biquiimbu Escrituras par gocnébu chop biinreʼ ñentzaay que ma góc cumplir xidal profecías. b Goxincuca Jesús goyee ro goyoʼ stipnés xpiimbu né láaca golexabu xi bidudy diitz guirá profecíascu (Luc. 24:33-48). ¿Xí rasuidyno?
11, 12. a) ¿Xí rasuidyno mod biquiin Jesús Escrituras? (Láaca bibiʼ dibuj). b) ¿Xí láani buny herman ni bisuidy Nortey ni ná la Biblia?
11 ¿Ximod guisuʼno Jesús? Órni guisuidyno toib buñ ni ná la Biblia, guiyopyno galrranabdiitz ni labúu gonyno láabu, par guiniʼbu ni ronybu pensary né rasacbu (Prov. 20:5). Órni ma bienno mod rasacbu, guisuidyno láabu guidzelbu textos ni sieed ló la Biblia ni gacné láabu ló xcalnaganbu. Diti gaibyno láabu xi gonybu. Más galán láani gonyno más galrranabdiitz láabu de textos ni sieed ló la Biblia par gonybu pensary ximod guisobbu láani ló xcalnabánybu. Guibiʼno ni gosaclóo toib hermano de Ghana ni laa Nortey.
12 Órni Nortey gop 16 íz, gosaló bisuidybu ni ná la Biblia. Diti xidzú después xfamilbu cualó láabu. ¿Xí gocné láabu par diti nareʼganbu? Herman ni bisuidy láabu ni ná la Biblia biquiin capítulo 10 xtuny Mateo par golexabu que buñ nacaló xpiin Dios. Nortey ná: «Órni xfamila cualó naʼ, bidudi cuent que bidzela galnigolú». Herman ni bisuidy láabu láaca bislooy Mateo 10:16, ro ná que non tzoʼno naní né gocnébu Nortey ñony pensary ximod naslooybu cualidad reʼ órni naniʼbu ni ronybu crer né xfamilbu. Después ni goyonisbu, goniiny ñacbu precursor, per bixiosbu goniiny ñeebu toib scuel xirop. Herman ni bisuidy láabu ni ná la Biblia, diti góoch láabu xi gonybu, xalagary ngú bunybu tipnés galrranabdiitz né gocnébu Nortey ñony pensary xi láani gony né xcalrracné principios ni sieed ló la Biblia. ¿Ximod birecaani? Nortey góc precursor regular né bixiosbu bixony láabu lidxbu. Nortey rasetlaa ni ronybu pensary de guirá ni góc: «Napa confianz que xinésni ngú ni buni». Órni racnéno stipnés guientzaay Escrituras, labúu racnéno layibu par gacyibu cristianos ni nadip xfe (Efes. 3:16-19).
Guisuʼno Jesús órni gacnéno stipnés gony xpensary né xcalrracné Escrituras. (Bibiʼ párrafo 11). e
¿XIMOD GUISUIDYNO HERMAN PAR GACYIBU XOMOD TOIB GALRRASCAD?
13. ¿Xí láani buny Jesús par diti ñainy ñac predicar ló Gudxlio, después ni nabiguetbu guibá? (Efesios 4:8).
13 Laʼga Jesús goyoʼ ló Gudxlio, galán bunybu dxiin ni bunycuent Bixiosbu láabu (Juan 17:4). Per dipa bunybu pensary: «Pal nainy naʼ guireʼni galán la, más galán goni láani naʼ». Ló tzón íz gorol ni bunybu xchiin Jehová ló Gudxlio, bisuidybu stipnés. Jesús gop confianz lóo xpiin, por ngú bidudybu responsabilidad de guiniʼyibu né guisuidybu diitz sacró stipnés buñ, né ñanyibu xilieen ni rasac xtuny Jehová. Né tipnés xpiimbu yása guisaʼ 30 íz dzúcu (bíil Efesios 4:8). Guirá buñguieeu reʼ ni diti bisian Jehová, bunyibu dxiin toibsi né Jesús. Ná scú, antes ni Jesús ñee guibá, bisuidyrabu xpiimbu par ñacyibu xomod galrrascad. Guibiʼno ximod bunybu láani.
14. ¿Ximod gocné Jesús a guirá xpiin par naniʼsyibu ló sentido espiritual ló 40 govitz ni goyoʼbu ló Gudxlio? (Láaca bibiʼ dibuj).
14 Jesús bidudy consej xpiimbu ni biquiin nacadiagyibu né ni ñacné layibu, per bunybu láani né galrronladx. Por ejemplo, bibiʼbu que tipnés xpiimbu gosac naganyibu ñonyibu crer que biásbu lad gueʼet, por ngú bilitzbu xpiimbu (Luc. 24:25-27; Juan 20:27). Gochbu xpiimbu que nagoʼyibu guicyibu ñacnéyibu xpiin Dios, né diti par ñapyibu más bidxiich (Juan 21:15). Goniʼbu que diti non nacaayibu cuidad xi responsabilidad racaʼ stipnés (Juan 21:20-22). Né bibiʼbu que diti bientzaayibu Gobierno xtuny Dios, por ngú buny corregirbu né gocnébu xpiimbu par nagoʼyibu primer lagary predicación (Hech. 1:6-8). ¿Xí labúu guisuidy ancianos mod buny Jesús?
Guisuʼno Jesús órni gacnéno herman gap más responsabilidad. (Bibiʼ párrafo 14).
15, 16. a) ¿Ximod labúu guisuʼ ancianos mod buny Jesús? b) ¿Ximod gocnéni Patrick consej ni bidudy herman láabu?
15 ¿Ximod labúu guisuʼ ancianos mod buny Jesús? Guisuidyibu né gacnéyibu herman, dada mbioxhlas, par labúu guicaʼyibu más responsabilidad lainy congregación. c Ancianos diti ronyibu pensary que guirá herman reʼ diti saché. Xalagary ngú, radudyibu consej né galrronladx mbioxhlas par gapyibu experiencia né guisuidyibu gacyibu buñdxo, gonyibu que stipnés gap confianz layibu né tzoʼyibu galrrasaʼ por stipnés (1 Tim. 3:1; 2 Tim. 2:2; 1 Ped. 5:5).
16 Guibiʼno ni gosaclóo Patrick. Órni gócbu mbioxhlas, moda diti godabiobu sacró stipnés, dada herman buñgonaʼ, né nachóng goninébu stipnés. Toib anciano ni nadip xfe bidudy cuent né bidudybu toib consej ni biab Patrick, né bunybu láani né galrronladx. Patrick ná: «Radudi guixquix por ni bunybu. Bireʼgana órni bibiʼya stipnés cacaʼ responsabilidad ni goniiny naʼ nacaʼya. Ancianocu gocnébu naʼ nadudi cuent que biquiin ñaca buñdxo né naslooya galrronladx herman xtuni, xalagary nagoʼya guica nacaʼya toib responsabilidad lainy congregación». Né Patrick góc anciano dzú gopbu 23 íz (Prov. 27:9).
17. ¿Ximod bislooy Jesús que gopbu confianz lóo xpiimbu?
17 Jesús diti nosi gochbu xpiimbu gony predicar, láaca non nasuidyibu buñ (bibiʼ nota de estudio «Enséñenles», xtuny Mateo 28:20 ló Traducción del nuevo Mundo ló dixtil). Sigory xpiin Jesús bunyibu pensary que diti nigaʼlni layibu ñonyibu dxiincu. Per Jesús gop confianz que labúu ñonyibu láani, né goniiny láabu que guirá biinreʼ ñan láani. Por ngú gochbu xpiimbu ndeʼ: «Xomodca bixel Bixiosa naʼ, naʼ láaca raxela lóoto» (Juan 20:21).
18. ¿Ximod labúu guisuʼ ancianos mod buny Jesús?
18 ¿Ximod labúu guisuʼ ancianos mod buny Jesús? Ancianos ni ma nap experiencia nanyibu que non guidudyibu dxiin stipnés né guisuidyibu stipnés gan ximod gony cumplir né responsabilidad ni nap (Filip. 2:19-22). Por ejemplo, labúu guinabyibu herman mbioxhlas gacné par guiaa né gactzay Salón ro radopno. Raslooyibu que napyibu confianz lóo buñ ni bunycuentyibu dxiincu, órni rasuidyibu herman ximod gony dxiincu né rapyibu confianz que galán sonyibu láani. Toib hermano ni laʼra góc anciano ni laa Matthew radudybu guixquix portín ancianos rasuidy láabu ximod gonybu tipnés dxiin lainy congregación né rapyibu confianz que sonybu toib dxiin galán. Matthew ná: «Órni rachéya racnéyibu naʼ guisudi de galrrachécu né goni láani más galán después». d
19. ¿Xí non coʼno guicno gonyno?
19 Jesús biquiin 40 govitz ni goyoʼbu ló Gudxlio después ni biásbu lad gueʼet par buny animarbu, gocnébu xpiimbu ñentzaay Escrituras né bisuidybu xpiimbu nacaʼ más responsabilidad. Coʼno guicno guisuʼno láabu (1 Ped. 2:21). Láabu sacnébu lóono par labúu gonyno láani, portín bidudybu xtiitzbu gonybu ndeʼ: «Sioʼya né lóoto guirá dzú dada dzú ma guidubylagaʼ gudxliogoxreʼ» (Mat. 28:20).
CANCIÓN 15 Alabemos al Primogénito de Jehová
a Evangelios né stipnés libros ni sieed ló la Biblia raslooyni que Jesús bireʼ lóo xpiimbu xidal buelt después ni biásbu, bireʼbu lóo: María Magdalena (Juan 20:11-18); stipnés buñgonaʼ (Mat. 28:8-10; Luc. 24:8-11); chop discípulos (Luc. 24:13-15); Pedro (Luc. 24:34); guirá apóstoles órni diti goyoʼ Tomás né layibu (Juan 20:19-24); guirá apóstoles órni Tomás ma noʼ né layibu (Juan 20:26); gatz discípulos (Juan 21:1, 2); más de 500 discípulos (Mat. 28:16; 1 Cor. 15:6); buchbu Santiago (1 Cor. 15:7); guirá apóstoles (Hech. 1:4), apóstoles gaxca gudx Betania (Luc. 24:50-52). Sigory Jesús bireʼ lóo xpiin más buelt né diti cuáni ló la Biblia (Juan 21:25).
b Sadzelo toib lista ro caa profecías xtuny mesías ló artículo ni noʼ ló jw.org ni laa «¿Guirá profecías ni sieed ló la Biblia raslooyni que Jesús ngú Mesías la?».
c Ancianos mbioxhlas ni nap de 25 a 30 íz labúu guidxinyibu gacyibu superintendentes xtuny circuit. Per nír non gapyibu experiencia xomod ancianos.
d Sadzelo más sugerencias mod labúu gacnélo herman mbioxhlas gap más responsabilidad ló Guiich ni caniʼ beʼo agost íz 2018, páginas 11 né 12, párrafos 15 a 17, né ni bireʼ 15 de abril íz 2015, páginas 3 a 13.
e MOD RAREXA DIBUJ NÉ RETRAT: Toib hermano cayacnébu buñ ni rasuidybu ni ná la Biblia gony pensary ni ná Escrituras, né buñ ni casuidybu casapy cós ni raquiimbu ló Laninin.
