1, 2. ¿Xigony galán láani guisuidyno ni gosaclóo Sansón?

 ¿XÍ LÁANI rieed ló xpensarylo órni racadiaglo de Sansón? De xiroʼ fuers ni gopbu. Scú láani, gopbu xiroʼ fuers per láaca bichébu, né birecaabu mal. Ná scú, Jehová bibiʼ xiroʼ fe ni gop Sansón laʼga bibany, né bunybu que ejemplo xtuny Sansón nacáni ló la Biblia par nasuidyno de láabu.

² Jehová biquiin Sansón par ñony cós ni radziguiaʼ buñ por xcudxbu Israel. Más de tigayoʼ íz después ni goitybu, né xcalrracné espíritu santo Jehová buny que apóstol Pablo nasetlaa laa Sansón ló toib lista ro ritlaa xidal laa buñ ni gop fe (Heb. 11:32-34). Gonabbu xcalrracné Jehová, dada órni godudybu ló galnagandaʼ. Ló artículo reʼ sasuidyno ejemplo xtunybu ni racné né ni rasuidy xidal cós lóono.

3. ¿Xí dxiin cuacuent Sansón?

³ Órni gool Sansón, gudx Israel goyoʼni xan xomandary buñ filisteos (Juec. 13:1). Buñ filisteos nigolú buñ mal gocyibu, por ngú israelitas godudyibu ló galrrioʼob. Órcu Jehová golúbu Sansón par nalaabu «gudx Israel ladxña buñ filisteos» (Juec. 13:5). ¡Gocni toib dxiin ni nigolú nagan! Sansón non nayopybu xcalrracné Jehová.

4. ¿Ximod gocné Jehová a Sansón? (Jueces 15:14-16).

⁴ Guisuidyno toibtica buelt ro bislooy Sansón confianz lóo Jehová. Xidal soldad filisteos goyeeyibu Lehí, ni sigory biaʼan niis Judá, par nanaʼsyibu Sansón. Guirá  buñguieeu de Judá bidzuibyibu. Por ngú bunycuentyibu Sansón a xienemigyibu. Buñ xcudxbu biliptzaay láabu né chop doʼ nicopydaʼ, né goynéyibu Sansón ronoʼ buñ filisteos (Juec. 15:9-13). Per «espíritu xtuny Jehová bidudy galnadip láabu» né Sansón labúu bilaa. Después, «bidzelbu toib dxitroʼ toib bor ni niyaxex», cuaʼbu láani… ¡né bigaitybu 1.000 filisteos! (Bíil Jueces 15:14-16).

5. ¿Ximod bislooy Sansón que gopbu confianz lóo Jehová?

⁵ ¡¿Toib dxitroʼ bor la?! ¿Xigony biquiin Sansón ndeʼ? Portín gonbu que ni más rasac ngú, guinabbu xcalrracné Jehová, diti guip ni naquiimbu. Buñguieeu reʼ ni buny ni ná Jehová biquiimbu ni gopbu, par labúu bunybu xchiin Jehová. Biyopybu xcalrracné Jehová, por ngú birebuʼ ni bunybu.

6. ¿Xí labúu guisuidyno de historia xtuny Sansón?

⁶ Jehová láaca sadudy fuers ni caquiinno par labúu gony cumplirno nitisi responsabilidad ni napno lainy xcudxbu, ná par lóono naganni. Xcalrracnébu labúu guidxinni ronoʼno de toib mod ni radziguiaʼno. Pal rayopylo xcalrracné Jehová labúu gaplo confianz que labúu sacnébu looy par gonylo xchiimbu né sadudybu fuers looy xomod bunybu né Sansón (Prov. 16:3).

7. ¿Xí ejemplo raslooy que nigolú rasac guiyopyno xcalrracné Jehová?

⁷ Xidal hermanos né hermanas ni rony dxiin ló proyectos de construcción ma bislooyibu que napyibu confianz lóo Jehová. Ló dzú ni see xcudx Jehová goniʼ xipa mod guiaʼ né gactzay Salones del Reino né stipnés instalaciones. Xcudx Jehová ma caniʼsni por ngú, ma bidzaʼ mod racni. Herman ni rasanir ló dxiin reʼ biyopyibu xcalrracné Jehová né biyopyibu stipnés mod copy ni gacni. Por ejemplo, gosiʼyibu yoʼ nimaca biaʼ né buny reglaryibu láani. Robert, ni buny dxiin ló xidal proyectos ló guidopynac Gudxlio, nábu: «Primer gosac  nagando gonydo láani modreʼ. Ndeʼ ma gadzé mod nacni, diti xomod bunydo láani nírcu. Per herman gosaguel buny láani, né biendxichni que Jehová rasiab xcalnasác loguiaʼni». Ni cayonydo láani modreʼ riendxichni que Jehová casanés xcudx par labúu gony cumplirni né xchiimbu. Rioʼ ór raquiin guinabdiitzno ndeʼ: «¿Rayobi xcalrracné Jehová né roni rutirigaʼlni naʼ par guisoba láabu la?».

8. ¿Xí láani buny Sansón órni golaʼnbu nís?

⁸ Sigory rasetnaladxlo stipnés galrradziguiaʼ ni buny Sansón. Por ejemplo, cualsaʼbu né toib betz ons né bigaitybu nimal reʼ, después bigaitybu 30 buñ de gudx filistea de Asquelón (Juec. 14:5, 6, 19). Sansón gonbu que diti labúu ñonybu guiráni pal Jehová diti ñacné láabu. Biendxichni que biyopybu xcalrracné Jehová, después ni bigaitybu 1.000 filisteos golaʼnbu nís. Xalagary nayopybu nís por stipláacabu, gonabbu xcalrracné Jehová (Juec. 15:18).

9. ¿Ximod cuapy Jehová ni gonab Sansón? (Jueces 15:19).

⁹ ¿Ximod cuapy Jehová oración ni buny Sansón? Jehová buny toib galrradziguiaʼ par nadaa nís. Órni Sansón goʼ nís, «cuaʼbu fuers né bibanybu stoib» (bíil Jueces 15:19). Ralooypani ro bidaa nís goyoʼrani xidzú íz después, órni Jehová golúbu Samuel par nacaʼ libro de Jueces. Sigory órni israelitas nabiʼ ro bidaa nís reʼ ñonyni que nasetnaladxyibu que pal nayopyibu xcalrracné Jehová, Jehová ñacné layibu órni nacalóyibu galnagan.

10. ¿Xí non gonyno par gacné Jehová lóono? (Láaca bibiʼ retrat).

¹⁰ Xomodca Sansón, guiráno non guiyopyno xcalrracné Jehová. Nac nitisi dxiin ni nanno ronyno o nac nitisi responsabilidad ni napno, guiráno raquiinno xcalrracnébu. Non gacno modesto né guicacuentno que pal ranabno xcalrracné Jehová sieeni galán lóono. Sansón cuaʼbu balory stoib órni goʼbu nís ni bidudy Jehová láabu. Scúca sioʼ nadipno ló sentido espiritual pal racaʼno guirá galrracné ni radudy Jehová lóono (Mat. 11:28).

11. ¿Xí non gonyno par guicacuentno xcalrracné Jehová, né xí ejemplo bisian toib galtzeʼel par lóono?

¹¹ Ganno ejemplo xtuny Alexéi, toib hermano de Rusia ni cacaló persecución ni noʼ lainy gudxcu. ¿Xí radudy fuers láabu par gony guantarybu? Láabu né tzeelbu napbu galrro espiritual. Alexéi ná: «Napdo toib programa ro sieed actividades espirituales, ni raguiñá guisuidydo né golno la Biblia guirá dzú. Láaca guirá rosil tzeʼela né naʼ roldo texto de dzú né ronydo oración toibsi». ¿Xí rasuidyno de ndeʼ? Diti gapno confianz lóocano, xalagary ngú, gapno confianz lóo Jehová. Par gac nadip fe xtunyno raquiin golno la Biblia, gonyno oración, tzoʼno reunión né gony predicarno. Pal ronyno guirá ndeʼ Jehová sasiab xcalnasác ronoʼno né sacnébu lóono par gony adorarno láabu. Bidudybu fuers Sansón né láaca sadudybu fuers lóono.

12. ¿Xí galrraché buny Sansón, né xigony gadzé mod gocni né stipnés ni bunybu?

¹² Sansón láaca góc buñ galkié susica  lóono, por ngú goyoʼ ór diti bunybu xinésni. Toib cós ni golóbu guicbu, bunyni que narecaabu mal, portín diti goloʼbu cuent dxiin ni bunycuent Jehová láabu. Órni ma xidzúyen de goloʼ nacbu juez, «bioladxbu toib buñgonaʼ ni góc laa Dalila ni golés ló láach Sorec» (Juec. 16:4). Antes de guimbubu Dalila, goniiny ñotzñabu né toib buñgonaʼ filistea. Per la Biblia ná que galrradzak cu «sieedni de Jehová, ni cayopy oportunida par guigaity buñ filisteos». Después Sansón goyeebu gudx filistea de Gaza né cu biaʼanbu lidx toib gonaʼ yox. Órcu Jehová bidudy fuers Sansón par nacantaʼbu né ninébu xpuert gudxcu, né modcu diti tampa labúu ñony defenderyibu layibu (Juec. 14:1-4; 16:1-3). Per né Dalila gadzé mod gocni. Láabu sigory gócbu israelita, né ni bidzakbu Dalila diti gocnéni láabu par nacalóbu buñ filisteos.

13. ¿Xí buny Dalila par naché Sansón?

¹³ Buñ filisteos goniiny layibu que Dalila ñony traicionar a Sansón. Por ngú bidudyibu xiroʼ bidxiich Dalila, né gonaʼ reʼ cuacuent láani. Per ¿xí diti bidudy Sansón cuent ni noʼ ló xpensary Dalila la? ¿Nigolú gondxiʼbu buñgonaʼ reʼ que diti bidudybu cuent la? Diti nanno láani, per ni máspa la, Dalila bikíil láabu par naniʼbu pu sieed fuers ni napbu, né láabu bisetbu. Xtolni Sansón bisnit xfuers por tidxó tiemp, né ma diti cuacuent Jehová láabu (Juec. 16:16-20).

14. ¿Ximod birecaa Sansón por ni gopbu confianz ló Dalila?

¹⁴ Sansón gopbu más confianz Dalila xalagary Jehová né mal birecaabu. Buñ filisteos gonás láabu né goxyibu bisaló  Sansón. Después goloʼyibu Sansón press gudx Gaza, gudx reʼ ni goleʼbu xpuert, né lagarycu bidxinbu gócbu toib mós ni but né molin. De ngú buñ filisteos bunyibu toib lanii ro bunyibu toib sacrificio a dioxh falz ni góc laa Dagón. Portín bunyibu crer que dioxh reʼ bunycuent Sansón ladxñayibu. «Goleʼyibu Sansón lainy press par naxiichyibu», ndeʼ radudy diitz par ñonyibu borla Sansón (Juec. 16:21-25).

15. ¿Ximod bislooy Sansón que gopbu confianz lóo Jehová stoib? (Jueces 16:28-30; bibiʼ dibuj ni sieed laidy guiich reʼ).

¹⁵ Sansón biché per diti bireʼganbu. Goniiny ñony cumplirbu né dxiin ni buny cuent Jehová láabu, nacalóbu buñ filisteos (bíil Jueces 16:28-30). Por ngú gonabbu xcalrracné Jehová: «Bidudy lagary naʼ goni que filisteos quiix por ni bunyibu». Dios bicadiag oración ni bunybu né Jehová bidudy fuers láabu stoib. Por ngú labúu bigaitybu más filisteos ni diti ma goyoʼ dzú bigaitybu.

16. ¿Xí rasuidyno de Sansón?

¹⁶ Ná Sansón godudybu ló galrrioʼob xtol ni bichébu, bunybu rutigoygaʼlni láabu par bunybu ni ná Jehová. Lóono láaca diti non guireʼganno pal rachéno, né xtolni rony corregirbu lóono o rasnitno toib responsabilidad. Guisetnaladxno que Jehová diti rialadx lóono (Sal. 103:8-10). Ná rachéno labúu gonyno xchiin Jehová, xomodca buny Sansón láani.

17, 18. ¿Xigony rony animar ejemplo xtuny Michael looy? (Láaca bibiʼ retrat).

¹⁷ Guibiʼno ni gosaclóo toib hermano ni laa Michael. Gócbu siervo ministerial né precursor regular, né goyodieʼbu ló xchiin Jehová. Nabanni, bichébu né por ngú bisnitbu responsabilidad ni gopbu lainy congregación. Láabu nábu: «Dipa bitzatzñaya xchiin Jehová; nigolú naguel saʼya. Per tiptisi cuaaya xan toib balio. Goona que Jehová dipa nasian naʼ, per gonabdiidza naʼca pal labúu nadzaʼga Jehová suusi nírcu o pal labúu ñapa responsabilidad lainy congregación xomod nírcu».

¹⁸ ¡Michael diti bireʼgan! Láabu nábu: «Goloʼya guica nabigaxa más Jehová. Ni gocné naʼ ngú biaʼya goninéya Jehová  né guidopy xcalnabani, nasudi né ñony pensary ló ni ma bisudi». Bidxin midid Michael labúu gop responsabilidad lainy congregación stoib, né nigoreʼ ma nacbu anciano né precursor regular. Láabu rabexabu láani modreʼ: «Galrracné né ni buny animar herman naʼ, né máspa la ancianos, gocnéni naʼ ñenna que Jehová ronladxsa naʼ. Nigoreʼ ma diti ronynudy xcalrriena naʼ cayoni xchiin Jehová. Experiencia reʼ racnéni naʼ par guidudi cuent que Jehová ratudy scásiʼ xcalkié buñ ni rac arrepentir né guidopy xcalnabany». Xomodca Michael, labúu gapno confianz que ná pal ma bichéno labúu guiquiin Jehová lóono né sacaʼno xcalnasácbu pal ronyno rutirigaʼlni lóono guitzaʼno mod nacno né guirá ór guinabno xcalrracnébu (Sal. 86:5; Prov. 28:13).

19. ¿Ximod racné ejemplo xtuny Sansón looy?

¹⁹ Ló artículo reʼ bisuidyno tipnés cós sacróyen mod bibany Sansón. Ná gócbu buñ galkié né bichébu né Dalila, diti bireʼganbu xalagary ngú bunybu xchiin Jehová. Né Jehová diti buny pensary que diti noʼ pu raquiin Sansón, Jehová biquiinra láabu par bunybu cós ni radziguiaʼ buñ. Jehová bibiʼsa láabu xomod toib buñ ni nap fe, né por ngú cuá laabu ló lista ni ritlaa ló capítulo 11 xtuny Hebreos. Rony animarni lóono ganno que Bixiosno ni noʼ guibá ronladx né raniiny guidudy fuers lóono, né máspa órni radudyno ló galnagan né raquiinno xcalrracnébu. Por ngú, xomodca Sansón, gaibyno Jehová: «Ranaba looy bisetnaladx naʼ. Dios, ranaba looy bidudy fuers naʼ» (Juec. 16:28).