1. ¿Xí galnagan cualó Jehoás, Uzías né Josías?

 ¿RONYLO pensary nadxinlo ñaclo rey de xcudx Jehová órni naclo mbioxien o toib mbioxhlasiensa la? ¿Ximod naquiinlo galnadip né galmandarycu? La Biblia rasetlaa tipnés reyes de gudx Judá ni gorú ló trono órni gocyibu mbioxhlasiensa. Por ejemplo, Jehoás bidxin góc rey dzú napsabu 7 íz, Uzías, 16, né Josías, 8. ¡Toib dxiin xiroʼ cuaʼyibu! Ná góc naganni par layibu, guioncayibu gopyibu galrracné ni biquiinyibu par ñonyibu gan guirá galnagan ni cualóyibu né nabanyibu sacró.

2. ¿Xigony galán guisuidyno ni gosaclóo Jehoás, Uzías né Josías?

² Nigolú láani, lóono diti nacno reyes nili reinas, per guionca biinreʼ rasuidyibu tipnés lesiony lóono ni rasacgoluʼ. Labúu guisuidyno xidal cós de guirá ni goloʼyibu guicyibu gonyibu ro birecaayibu mal né ro birecaayibu galán. Historias xtunyibu raslooyni lóono que nigolú rasac ganno xi clas buñ guidzakno, guirási ór gacno buñdxo né guiyopyno xcalrracné Jehová.

3. ¿Xí láani buny Jehoás por ni bidzakbu Jehoiadá?

³ Golútzay xi láani gonylo xomod buny Jehoás láani. Dzú nacsa Jehoás mitien, goity bixiosbu né sumo sacerdote Jehoiadá bisniʼs láabu susica ñac xiimbu, né bisuidybu xidal cós de Jehová a Jehoás. Naniʼ góc xcalrrien Jehoás portín bicadiagbu consej ni bidudy Jehoiadá láabu, né por ni bidzakbu Jehoiadá goloʼbu guicbu guidzakbu Dios né ñacnébu buñ  gudx ñony scúca. Láaca buny organizarbu par ñactzay templo (2 Crón. 24:1, 2, 4, 13, 14).

4. ¿Ximod racné lóono coʼtzayno mandamientos xtuny Jehová? (Proverbios 2:1, 10-12).

⁴ Pal bixioslo né xinaʼlo o stoib buñ casuidyibu looy gandxiʼlo Jehová né guisoblo ni rony mandarybu cadudyibu looy toib galrrascad sacróyen (bíil Proverbios 2:1, 10-12). Bixios mbiox labúu guisuidyibu xiinyibu de xidal mod. Gon xi láani buny bixios toib hermana ni laa Katia par labúu ñacnébu xiindzapbu nabú xi láani ñony. Guirá dzú biquiimbu tiemp ni goysanbu xiindzapbu scuel par biiybu diitz de texto de dzúcu. Xiindzapbu rasetnaladx: «Guirá ni biiydo diitz gocnéni naʼ par nacalóya galnagan ni goyoʼ dzúcu». Bixioslo labúu coʼ tipnés reglas ni rareʼ ló la Biblia, né labúu gonylo pensary que cayaabu looy. ¿Xí labúu gacné looy par guidudylo lagary conésyibu looy? Toib hermana ni laa Anastasia rasetlabu que bixiosbu né xinábu diti nosi bidudyibu reglas láabu, láaca goleʼyibu tiemp par nabexabu xigony goloʼyibu láani. Láabu nábu: «Ngú gocné naʼ par ñenna que diti goloʼyibu guirá reglas cú par ñony mandaryibu naʼ, xalagary ngú bunyibu láani portín nadxiʼyibu naʼ né nainy gapyibu naʼ».

5. ¿Ximod raguiña ni ragoʼlo guiclo gonylo, bixioslo, xinaʼlo né Jehová? (Proverbios 22:6; 23:15, 24, 25).

⁵ Pal rasoblo guirá consej ni sieed ló la Biblia ni radudy bixioslo né xinaʼlo looy, layibu sioʼ nakityibu. Né ni máspa la, sagoʼ nakitlo xcalnabany Jehová, né labúu guidzaklo láabu por tipzó (bíil Proverbios 22:6; 23:15, 24, 25). ¿Diti ronylo pensary que guirá ndeʼ nacni tipnés razón galán par guicanalo ejemplo xtuny Jehoás la?

6. ¿Chú layibu bicadiag Jehoás, né ximod birecaabu né ni goloʼbu guicbu ñonybu? (2 Crónicas 24:17, 18).

⁶ Bisuidy ximod birecaa Jehoás por ni diti golútzaybu xi láani ñonybu. Después ni goity Jehoiadá, Jehoás diti golútzay ximig (bíil 2 Crónicas 24:17, 18). Cuanalbu guirá consej xtuny príncipes xtuny Judá ni diti nadxiʼ a Jehová. ¿Diti non nagoʼbu cuent guirá buñcu ja? (Prov. 1:10). Per mal ngú ni bunybu, bidudybu lagary que ximigbu ñaiby láabu xi láani ñonybu. Né órni xprimbu Zacarías biyopy mod ñony corregir láabu, rey buny mandary ñaitybu (2 Crón. 24:20, 21; Mat. 23:35). ¡Diti non ñonybu ngú! Jehoás góc toib buñ ngaʼal. Sacró gosalóbu per ná nabanni, gócbu toib buñ apóstata né bigaitybu buñ. Después xpiincabu bigaity láabu (2 Crón. 24:22-25). ¡Gadzé od narecaabu pal nacadiagbu  Jehová né guirá buñ ni gondxiʼ a Dios! ¿Xí rasuidylo ni gosaclóo Jehoás?

7. ¿Xí clas buñ non gac ximiglo? (Láaca bibiʼ retrat).

⁷ Labúu guisuidyno toib lesiony ni rasac de cós mal ni goló Jehoás guic ñony: non guiyopyno ni gac ximigno, ni labúu gacné lóono, buñ ni ná gony xchiin Jehová né ná coʼ nakit xcalnabanybu. Né ximigno labúu gacyibu buñ de xidal clas íz. Bisetnaladx que Jehoás más lahuinbu que Jehoiadá. Buny pensary ló guirá ximiglo né gonabdiitzca looy: «¿Racnéyibu naʼ par gapa más fe lóo Jehová la? ¿Rony animaryibu naʼ par guisoba ni ná Jehová la? ¿Rioladxyibu guiniʼyibu de Jehová né ni rasuidyibu ló la Biblia la? ¿Rasobyibu ni ná Dios la? ¿Rony corregiryibu naʼ órni rachéya la, o nosi raibyibu ni nainy naʼ guicadiaga la?» (Prov. 27:5, 6, 17). Diti guiscúlo looyca, pal ximiglo diti nadxiʼyibu Jehová, diti raquiinlo layibu. Per pal ximiglo nadxiʼyibu Jehová, gon layibu. ¡Clas amig cu sacnégoluʼni looy! (Prov. 13:20).

8. ¿Xí láani non guisetnaladxlo pal raquiinlo redes sociales?

⁸ Redes sociales nigolú raquiinni par guininéno xfamilno o ximigno. Per xidal buñ ralapy retrat o videos de cós ni rasiʼyibu o cós ni ronyibu par guidziguiaʼ buñ layibu. Pal raquiinlo redes sociales labúu guinabdiitzlo ndeʼ looy: «¿Nainy naʼ que stipnés buñ guidziguiaʼ naʼ la? ¿Xí nainy naʼ goni: gony animar stipnés la, o tzoʼ ni guisanadx naʼ? ¿Radudi lagary que stipnés buñ guichiin naʼ par goni pensary né goni cós mal la?». Toibtica buelt hermano Nathan Knorr, ni goyoʼ lad Tidxó buñ ni nap xiroʼ Galnan bidudy consej reʼ: «Diti guiyopyto mod gonyto ni rioladx buñgudxlio portín dipa labúu sonyto ni rioladx buñ. Buny ni ná Jehová né sagoʼ nakitlo guirá buñ ni nadxiʼ a Jehová».

9. ¿Xí láani buny Uzías né xcalrracné Jehová? (2 Crónicas 26:1-5).

⁹ Golútzay xi láani gonylo xomod buny Uzías láani. Dzú gócbu mbioxhlas rey Uzías góc buñdxo né bisuidybu gopbu «respet Dios ni nigolú». Bibanybu 68 íz, né casi guidopy xcalnabanybu Jehová bidudy galnasác láabu (bíil 2 Crónicas 26:1-5). Uzías buny gan xidal gudxrop ni cualó láabu né gonbu que diti ñoʼ xi ñac Jerusalén (2 Crón. 26:6-15). Uzías nigolú goyoʼbu nakit por guirá cós ni bunybu gan né xcalrracné Jehová (Ecl. 3:12, 13).

10. ¿Ximod bidubylagaʼ Uzías?

¹⁰ Bisuidy ximod birecaa Uzías por ni diti golútzaybu xi láani ñonybu. Rey Uzías biaʼbu buny mandarybu. Né sigory ngú buny que ñonybu pensary que labúu ñonybu guirá ni raniiny láabu. Toibtica dzú goyoʼbu lainy templo xtuny Jehová né bisaʼijbu incienso ló altar, ndeʼ góc toib cós ni rey diti gop permís ñony (2 Crón. 26:16-18). Sumo sacerdote Azarías buny corregir láabu, né Uzías nigolú bidzuitz. Nabanni, per Uzías bixinbu guirá cós tzaay ni bunybu laʼga bunybu xchiin Jehová, né Jehová buny castigar láabu né lepra (2 Crón. 26:19-21). ¡Nigolú gadzé mod ñac xcalnabanybu pal ñacbu buñdxo!

11. ¿Xí láani rony toib buñdxo? (Láaca bibiʼ retrat).

¹¹ Órni Uzías bidxin góc toib rey ni gop xiroʼ galnadip, bialadxbu que guirá cós ni bunybu gan gocni por xcalrracné Jehová. ¿Xí rasuidyno? Que diti non guialadxno que guirá cós tzaay ni rac lainy xcalnabanyno o dxiin ni ronyno par Jehová sieedni de láabu. Xalagary guiatzno por cós sacró ni ronyno non gonyxiroʼno Jehová (1 Cor. 4:7). b Non gacno  buñdxo né guisetnaladxno que nacno buñ galkié né raquiinno que stipnés gony corregir lóono. Toib hermano ni nap más de 60 íz goniʼ ndeʼ: «Ma bisudi que diti non tzogoluʼya galrrasaʼ por naʼ. Órni rioʼ ni rony corregir naʼ por ni bichéya né portín diti cayoni xinésni, roni rutirigaʼlni naʼ par goni xinésni». Pal guirá ór racno buñdxo né rapno respet Jehová, sieeni lóono galán (Prov. 22:4).

12. Órni Josías góc mbioxhlasien, ¿xí láani bunybu par biyopybu Jehová? (2 Crónicas 34:1-3).

¹² Golútzay xi láani gonylo xomod buny Josías. Josías gosaló biyopybu Jehová dzú gócbu mbioxhlasien. Goniiny nimbutzaaybu Dios xtunybu né ñonybu xchiin Dios. Par Josías góc nagan gacbu rey, portín ló dzúcu guirá buñ bieen dioxh falz. Por ngú biquiin ñapbu xiroʼ balory par labúu ñony defenderbu religión ni nigolú. ¡Né sacró bunybu láani! Diti ma bisaʼbu 20 íz órni gosaló goleʼbu lainy gudxcu guirá ni raguiña mod bienyibu dioxh falz (bíil 2 Crónicas 34:1-3).

13. Pal rac dedicarlo Jehová, ¿ximod sacnéni looy?

¹³ Ná nacsalo mbioxhlasien, labúu gaclo xomod Josías. ¿Ximod? Guiyopylo Jehová né guisuidylo cualidad sacró ni napbu. Ngú sacné looy par gac dedicarlo láabu. ¿Né ximod gacné dedicación looy? Luke, ni goyonis órni gop 14 íz goniʼ ndeʼ: «De goló nigoreʼ xchiin Jehová tzoʼ primer lagary ló xcalnabani né goni rutirigaʼlni naʼ par coʼ nakita láabu» (Mar. 12:30). Sacaʼlo xidal galnasác pal ragoʼlo guiclo gonylo scúca.

14. ¿Ximod rasuʼ tipnés mbioxhlas ejemplo xtuny Josías?

¹⁴ ¿Xí cós labúu guicaló mbioxhlas ni cayony xchiin Jehová? Johan, ni goyonis dzú napsabu 12 íz, nábu que xcompañerbu de yolayscuel rakíil láabu par guicaʼbu xpuu gues ni noʼ ló naareʼ. ¿Xí láani ronybu par diti gonybu ni ná xcompañerbu? Ronybu pensary ximod labúu gonyni mal láabu né mod radzakbu Jehová pal gonybu láani. Toib mbioxhlas ni goyonis órni gop 14 íz ni laa Rachel raniʼbu xi láani ronybu órni racalóbu galnagan lagary ro rasuidybu: «Guirá ór radzaʼga guirá ni rabiʼya né ni nac cós espiritual. Rioʼ ór, ni rasudi  ló scuel de historia ronyni que guisetnaladxi toib historia o toib profecía ni sieed ló la Biblia. Né stipnés ór, ni biiy diitz ronyni que guisetnaladxi toib texto ni sieed ló la Biblia ni labúu gaabi stipnés». Sigory galnagan ni cacalólo diti nacni xomod xtuny rey Josías, per labúu gac naní xcalrrienlo né dipa guisianlo Jehová xomod láabu. Pal nigoreʼ rasuidylo ximod guicalólo galnagan, sioʼlo más puext gonylo láani ló dzú ni sieed.

15. ¿Xí láani gocné rey Josías par dipa nasiambu Jehová? (2 Crónicas 34:14, 18-21).

¹⁵ Órni rey Josías gop 26 íz, bunytzaaybu templo. Ló dxiincu bidzelbu «libro de Xiley Jehová ni bunycuentbu né xcalrracné Moisés». Órni rey bicadiag ni ná libro cú, órcuca bisobbu ni ná Xiley Jehová (bíil 2 Crónicas 34:14, 18-21). ¿Ñoladxlo ñaʼlo nasuidylo la Biblia la? Pal ma cayonylo rutirigaʼlni looy par gonylo láani, ¿cayoladxlo láani la? ¿Noʼ ni labúu gonylo par diti guialadxlo versículos ni guiquiinlo la? Luke, ni bisetlano ló párrafo 13, napbu toib cuaderno ro racaʼbu cós ni rasac ni radzelbu. ¿Nálo que pal ronylo láani scú, labúu guisetnaladxlo textos o stipnés cós ni bioladxlo la? Laʼga más rimbulo la Biblia más sioladxlo láani, saplo más gan gonylo xchiin Jehová. Né sonylo xomodpa buny rey Josías: Xtiitz Dios sachiinni looy par gonylo xinésni.

16. ¿Xigony buny Josías toib galrraché rodann, né xí rasuidyni lóono?

¹⁶ Bisuidy ximod birecaa Josías por ni diti golútzaybu xi láani ñonybu. Órni rey Josías gop midid 39 íz, bichébu né goitybu. Xalagary nanabbu Jehová nagonés láabu, gopbu confianz láacabu (2 Crón. 35:20-25). ¿Xí láani rasuidyno? Nac nitisi íz ni napno o balac tiemp sanéno casuidyno la Biblia, diti guiañ guiyopyno Jehová. Né par guiyopyno Jehová, non guinabno conésbu lóono, guisuidyno Xtiitzbu né guicadiagno consej de herman ni nadip xfe. Pal ronyno modreʼ sigory diti tampa sachéno né sigory labúu sabanyno nakit (Sant. 1:25).

17. ¿Xí rasuidyno de guionca reyes xtuny Judá?

¹⁷ Mbioxhlas napyibu nislóyibu xidal oportunida sacróyen. Historias xtuny Jehoás, Uzías né Josías raslooyni que guirá mbioxien né mbioxhlasien labúu coʼyibu guicyibu gonyibu xinésni né labúu coʼ nakityibu xcalnabany Jehová. Scú láani, layibu bichéyibu né por ngú diti birecaayibu galán. Per pal looy rasuʼlo cós sacró ni bunyibu, né ronylo rutirigaʼlni looy par diti gonylo cós mal ni bunyibu, labúu tzeeni galán looy.

18. ¿Xí ejemplos raslooy que labúu tzeeni galán lóono? (Láaca bibiʼ retrat).

¹⁸ La Biblia rasetlaa de stipnés mbioxhlas ni bibigax ronoʼ Jehová, né por ngú cuacuent Jehová layibu né goyeeni galán layibu, xomod David. Dzú nacbu mbioxhlasien goloʼbu guicbu ñonybu xchiin Jehová, né bidxin midid gócbu toib rey ni diti bisian a Jehová. Scú láani, bunybu tipnés galkié per Dios bibiʼ láabu xomod toib rey ni góc fiel (1 Rey. 3:6; 9:4, 5; 14:8). Pal rasuidylo mod bibany David, ejemplo xtunybu sacnéni looy par diti guisianlo Jehová. Stoib cós ni labúu gonylo láani ngú, guisuidytzaylo ni buny Marcos o Timoteo. Guiropcayibu goloʼyibu guicyibu gonyibu ni ná Jehová dzú nacyibu mbioxhlasien né buñ gon guirá cós ni bunyibu ló xchiin Jehová. Por ni bunyibu guirá ngú, goloʼ nakityibu xcalnabany Jehová, né goyeeni galán layibu.

19. ¿Ximod nainy looy guibanylo?

¹⁹ ¿Ximod nainy looy guibanylo ló dzú ni sietra? Ni gonylo nigoreʼ, ngú guiniʼ ximod guibanylo ló dzú ni sietra. Pal naplo confianz lóo Jehová né diti mod rabiʼlo guirá cós, sacnébu looy par coʼlo guiclo gonylo xinésni (Prov. 20:24). Labúu gaplo toib galnabany sacróyen né labúu guibanylo nakit. Né diti guialadxlo que ni ronylo rasacni par Jehová. Nigolú rasac gonyno xchiin Bixiosno ni noʼ guibá, ni ronladxgoluʼ lóono. ¡Diti noʼ toib galnabany más sacró que ndeʼ!