1. ¿Xí láani buny Pedro órni gonásbu xidal beel por toib galrradziguiaʼ?

 PEDRO guidopynac goxin buny dxiin né diti gonásbu ni toib beel. Né bidziguiaʼbu órni Jesús góoch láabu: «Buny remar dada ronoʼ nís gueel né cu colcoʼ xquixtobelto par guinásto beel» (Luc. 5:4). Ná Pedro moda diti bunybu crer que labúu nanásbu beel, bunybu ni gonab Jesús láabu. Gonásyibu xidal beel, por ngú xquixtobelyibu dada birésni. Órni bidudyibu cuent que nacni toib galrradziguiaʼ, Pedro né guirá ni goyoʼ né láabu «bidziguiagoluʼyibu». Pedro goniʼ: «Bireʼ ronoʼya, Señor, portín naca toib buñ galkié» (Luc. 5:6-9). Rolooyni bunybu pensary que diti rasacbu nili par guisagaʼbu nisló Jesús.

2. ¿Ximod racnéni lóono guisuidyno ni gosaclóo Pedro?

² Pedro gop razón: gócbu «toib buñ galkié». La Biblia ná que goyoʼ ór goniʼbu né bunybu cós ni después góc arrepentirbu. ¿Rasaclo xomod Pedro la? ¿Ma sanélo xidzú tiemp nainy looy guitzaʼlo toib cós mod naclo ni diti rioladxlo o toib cós ni ronylo la? Pal scú nacni, diti guireʼganlo. Ejemplo xtuny Pedro labúu gacnéni looy. Buny pensary ló ndeʼ: Dios labúu ñony que diti nacá ló la Biblia cós ni diti sacró ni buny apóstol reʼ, per goniiny láabu que nacáni par nasuidyni lóono lesiony ni nigolú rasac (2 Tim. 3:16, 17). Órni rasuidyno historias xtuny Pedro, toib buñguieeu ni buny cós ni diti sacró né ni gosac xomod lóono, rabiʼno que Jehová diti rabésbu  que diti guichéno. Ni raniiny láabu ngú gony guantaryno, né diti guireʼganno ná rioʼ cós ni diti ronyno sacró.

3. ¿Xigony raquiin gony guantaryno?

³ ¿Xigony raquiin gony guantaryno? Portín, mod ná toib refrán, «Órni rony buñ toib cós xidal buelt radxin racbu toib mextra». Guisetlano toib ejemplo. Toib músico labúu tzanéni láabu xidal íz guiscoʼoltzaaybu toib instrumento. Ló guidopynac tiempcu labúu bi rascoʼol bu xidal notas musicales, né por ni gonybu láani xidal buelt, labúu sonybu láani más galán. Ná radxin racbu toib mextra, labúu guichébu. Per diti por ngú rareʼganbu. Rasuidyrabu láani xidal buelt. Ngúca rac né lóono. Ná ronyno pensary que ma bunyno gan toib debilidad, labúu tzaguiabno loni stoib. Per ronyrano rutirigaʼlni lóono par guitzaʼno láani. Guiráno ranino o ronyno cós ni después rasac maláyno por ni bunyno láani. Per, pal diti rareʼganno, Jehová sacné lóono par gonyrano dxiin loguiaʼni (1 Ped. 5:10). Gonyno pensary ló ejemplo xtuny Pedro ni diti bireʼgan. Galrronladx ni bislooy Jesús láabu ná bichébu labúu guichiinni lóono gonyrano xchiin Jehová.

4. ¿Ximod goniʼ Pedro que nacbu, né ximod bisialdó Jesús láabu? (Lucas 5:5-10).

⁴ La Biblia diti rasetlani xigony Pedro goniʼ que nacbu «toib buñ galkié» nili rasetlani ló xi galkié bunybu pensary (bíil Lucas 5:5-10). Pentzi bunybu tipnés galkié rodann. Jesús bidudy cuent que Pedro bidzuiby, pentzi portín biatz ñapbu confianz láacabu. Per láaca gonbu que Pedro labúu ñac fiel. Por ngú né galrronladx gochbu Pedro: «Ma diti guidzuibylo». Ni bibiʼ Pedro confianz ni gop Jesús lóbu gocnéni láabu. Después, Pedro né buchbu Andrés bisianyibu xchiinyibu ni ranásyibu beel par ñodieʼyibu ñacyibu xpiin Mesías. Por ni bunyibu ndeʼ cuaʼyibu galnasác (Mar. 1:16-18).

5. ¿Xí galnasác cuaʼ Pedro portín bunybu gan xcalrradzuibybu né cuacuentbu invitación ni buny Jesús láabu?

⁵ Xomod xpiin Cristo, Pedro bibany xidal cós sacró. Bibiʼbu Jesús bisial buñguitz, goleʼ demony laidy buñ né dada golís gueʼet (Mat. 8:14-17; Mar. 5:37, 41, 42). b Láaca bibiʼbu toib visión de gloria ni nacaʼ Jesús ló Gobierno xtuny Dios. Ngú nigolú gocné láabu (Mar. 9:1-8; 2 Ped. 1:16-18). Scú láani, Pedro bibiʼ cós ni diti godudy ló xpensarybu nabiʼbu. ¡Balaati bibaladxbu por ni diti bidudybu lagary que cós mal ni bunybu pensary de  láacabu nabeʼgan láabu! Pal nareʼganbu diti nacaʼbu guirá galnasác cu.

6. ¿Labúu bitzaʼ Pedro nimaca debilidad xtuny la?

⁶ Ná Pedro bibiʼ né bicadiag xidal cós, bunyrabu rutigoygaʼlni láabu par natzaʼbu mod gócbu. Guisuidyno tipnés ejemplos. Órni Jesús goniʼ que nadudybu ló galrrioʼob né ñaitybu par ñony cumplirbu profecías ni sieed ló la Biblia, Pedro godilné láabu (Mar. 8:31-33). Más de tibuelt, Pedro né stipnés apóstoles godíldiitzyibu de chú láabu ngú ni más rasac ladyibu (Mar. 9:33, 34). Goxin antes ni ñaity Jesús, Pedro bichoc guidiag toib buñguieeu (Juan 18:10). Né goxincuca bidzuibybu né goniʼbu tzón buelt que diti rimbubu ximigbu Jesús (Mar. 14:66-72). Né después gorudxaʼdotbu (Mat. 26:75).

7. Después ni biás Jesús lad gueʼet, ¿xí oportunida bidudybu Pedro?

⁷ Jesús diti goniʼ que Pedro ma diti raquiin, Pedro nigolú bireʼgan. Después ni biás Jesús lad gueʼet, bidudybu oportunida apóstol reʼ par naslooybu que nadxiʼbu Jesús. Biruʼbu Pedro ñac buñdxo né ñanbu xilieenbu (Juan 21:15-17). Né Pedro gosaguel né gan. Por ngú goyoʼbu lainy gudx Jerusalén ló Pentecostés né gócbu toibtica ni primerdiguieʼ góc ungir né espíritu santo.

8. ¿Xí galrraché rodann buny Pedro lainy gudx Antioquía?

⁸ Después ni góc ungir Pedro, bunyrabu rutigoygaʼlni láabu par nasiambu debilidad xtunybu. Ló íz 36, Pedro bibiʼ ximod toib gentil incircunciso ni góc laa Cornelio cuaʼ espíritu santo. Ndeʼ góc toib prueby que «Dios diti rabúbu buñ» né que buñ de stipnés gudxrop labúu tzoʼyibu lad congregación cristiana (Hech. 10:34, 44, 45). Desde dzúcu, Pedro ma labúu godó né buñ gentiles, toib cós ni dipa bunybu antes (Gál. 2:12). Per tipnés cristianos ni góc judío bunyibu pensary que mal láani que buñ judiós né buñ gentiles guá toibsi. Órni tipnés cristianos ni buny pensary modcu bidxin Antioquía, Pedro ma diti godó né xherman ni nac gentiles, sigory portín bidzuibybu que nasac mal cristianos ni nac judío. Órni apóstol Pablo bibiʼ que mal ngú ni buny Pedro, godilnébu Pedro nisló guirá buñ (Gál. 2:13, 14). Ná biché Pedro diti bireʼganbu. ¿Xí láani gocné láabu?

9. Mod ná Juan 6:68, 69, ¿ximod bislooy Pedro que diti bisiambu Jehová?

⁹ Pedro diti bisian Jehová. Diti bidudybu lagary que stipnés cós nabeʼgan láabu. Por ejemplo, bislooybu lealtad xtunybu órni Jesús góoch toib cós xpiin ni diti bienyibu (bíil Juan 6:68, 69). Xalagary nanabdiitzyibu Jesús xi láani radudy diitz ni goniʼbu o nabésyibu nabexa Jesús láani, xidalyibu bisianyibu Jesús. Per Pedro yaca. Goniʼbu nisló guirá buñ que nosi Jesús nap diitz de galnabany tipzó.

10. ¿Ximod bislooy Jesús que gopbu confianz ló Pedro? (Láaca bibiʼ dibuj).

¹⁰ Jesús dipa bisiambu Pedro. Goxin antes ni ñaitybu, Jesús maca nan que Pedro né stipnés nasian láabu. Ná scú, bislooybu que gopbu confianz que Pedro labúu ñaʼs stoib né ñac fiel (Luc. 22:31, 32). Jesús bieen que «espíritu noʼni puext, per cuerpo xtunyto nacni débil» (Mar. 14:38). Por ngú, dada órni goniʼ Pedro que diti rimbubu Jesús, Jesús diti bunybu pensary que ma diti noʼ pu raquiin Pedro. Después ni biás Jesús lad gueʼet, bireʼbu ló Pedro, ralooyni guiropsibu biiybu diitz (Mar. 16:7; Luc. 24:34; 1 Cor. 15:5). Ndeʼ nigolú gocnéni apóstol par diti nareʼgan.

11. ¿Xí láani buny Jesús par ñan Pedro que Jehová guirá ór ñan láabu?

 ¹¹ Jesús gochbu Pedro que Jehová san láabu. Después ni biás Jesús lad gueʼet, bunybu que Pedro né stipnés xpiimbu nanásyibu xidal beel stoib (Juan 21:4-6). Galrradziguiaʼ reʼ bunyni que Pedro ñan que par Jehová diti nagan nadudybu guirá ni naquiin Pedro. Pentzi órcu bisetnaladx Pedro ni bidudy Jesús xtiitz que Jehová san buñ ni rayopy primer Gobierno xtuny Dios (Mat. 6:33). Órni gon Pedro ndeʼ, goyodieʼbu más ló xchiin Dios né diti ló dxiin ni nanásbu beel. Ló Pentecostés íz 33 gopbu balory né bitudybu toib discurs ni gocné xidalguixo buñ par nacacuentyibu diitz sacró (Hech. 2:14, 37-41). Né después gocnébu xidal samaritanos né gentiles par nadxinyibu ñacyibu xpiin Cristo (Hech. 8:14-17; 10:44-48). Riendxichni que Jehová biquiimbu Pedro par naxelcaʼbu xidal clas buñ lainy congregación xtunybu.

12. ¿Ximod racné lóono ni gosaclóo Pedro pal ma sanéno xidzú tiemp cayonyno rutirigaʼlni lóono par guitzaʼno toib debilidad?

¹² Jehová láaca labúu gacné lóono par diti guireʼganno. Rioʼ ór ndeʼ labúu gacni nagan, máspa pal ma sanéno xiroʼ tiemp cayonyno rutirigaʼlni lóono par guisianno toib debilidad. Né pentzi guisacno que debilidad ni napno más xiroʼni que debilidad ni gop Pedro. Per Jehová labúu guidudy fuers lóono (Sal. 94:17-19). Gonyno pensary ló ejemplo xtuny toib hermano, antes ni nimbubu galnigolú gócbu moxh por xidal íz. Ná bisiambu de bunybu galyoxh goyoʼ ór bitzanló cós mal ló xpensarybu. ¿Xí láani gocné láabu par diti nareʼganbu ló galnagandaʼcu? Láabu nábu: «Jehová rony nadip lóono, né xcalrracné espíritu xtuny Jehová ma bisudi que labúu tzoraya ló néz de galnigolú, né Jehová radudy lagary naʼ goni xchiimbu, ná noʼ ro rachéya láabu rony nadipbu naʼ».

13. ¿Ximod labúu guisuʼno ejemplo xtuny Pedro? (Hechos 4:13, 29, 31; láaca bibiʼ dibuj).

¹³ Mod ma bisuidyno, Pedro diti nosi tibuelt bidzuibybu buñgudxlio. Per gonabbu xcalrracné Jehová né gopbu balory (bíil Hechos 4:13, 29, 31). Lóono láaca labúu gonyno gan galrradzuʼpy ni napno. Guisuidyno ni gosaclóo Horst, toib mbioxhlas Testigo ni bibany ló Alemania nazi. Más de tibuelt bidzuibybu lainy yolayscuel né goniʼbu Heil  Hitler. Xalagary nadilné bixiosbu né xinaʼbu láabu, bunyibu oración né xiimbu né gonabyibu Jehová nadudy balory láabu. Né xcalrracné bixiosbu né xinaʼbu né ni gonabbu xcalrracné Jehová, Horst gopbu fuers ni biquiimbu par nasagaʼdxichbu. Né después goniʼbu: «Jehová dipa bisian naʼ». c

14. ¿Ximod labúu gacné ancianos né galrronladx herman ni careʼgan?

¹⁴ Jehová né Jesús dipa sonybu pensary que diti labúu guitzaʼno. Órni Pedro goniʼ que diti rimbubu Cristo, non nabúbu xi láani ñonybu. ¿Nareʼganbu la? ¿O ñacrabu xpiin Cristo la? Jesús gonabbu Jehová que xfe Pedro diti nachichni. Después gochbu Pedro que bunybu oración por láabu né que gondxichbu que después Pedro labúu ñony dxich xfe xherman (Luc. 22:31, 32). ¡Balaati gocnéni Pedro ni bisetnaladxbu ni góoch Jesús láabu! Lóono láaca non cuuno xi láani gonyno ni labúu guitzaʼ mod nabanyno. Órcu, Jehová sigory saquiimbu pastores ni sadudy ánimo lóono ni caquiinno par gacno fiel (Efes. 4:8, 11). Paul, ni nac anciano ma xidzú íz, ronybu rutirigaʼlni láabu par guisialdóbu stipnés. Órni rabiʼbu que toib herman ma mer guireʼgan, rony animarbu hermancu par guisetnaladx que Jehová bixelcaʼ láabu ló galnigolú. Láaca racnébu herman par gandxich que Jehová diti sasian láabu. Anciano reʼ ma bibiʼ ximod xidal herman ni ma careʼgan ronyrabu dxiin né xcalrracné Jehová.

15. ¿Ximod raslooy ni godudy Pedro né Horst que ni ná Mateo 6:33 guirá ór rac cumplirni?

¹⁵ Ma bisuidyno ximod bidudy Jehová ni biquiin Pedro né stipnés apóstoles. Ngúca sonybu né lóono pal ragoʼno xchiin Dios primer lagary ló xcalnabanyno (Mat. 6:33).  Después ni bilox Segunda Guerra Mundial, Horst, ni bisetlano nagaa, goloʼbu guicbu gacbu precursor. Per diti gopbu bidxiich, né diti gonbu pal labúu nadudybu dzú né ñodieʼbu ló xchiin Jehová. ¿Xí goloʼbu guicbu ñonybu? Goloʼbu prueby Jehová né buny predicarbu guidopynac xomal de visit xtuny circuit. Órni bilox visit, nigolú bidziguiaʼbu órni circuit bidudy láabu toib sobre de donación ni bidudy toib buñ láabu. Né bidxiichcu labúu ñacbu precursor xidal beʼo. Horst bibiʼ galrrascadcu xomod toib mod ni bislooy Jehová que san láabu. Né desde dzúcu goloʼbu primer lagary Gobierno xtuny Dios (Mal. 3:10).

16. ¿Xigony rasac guisuidyno ejemplo né guiich ni bicaʼ Pedro?

¹⁶ ¡Balaati bibaladx Pedro órni Jesús diti buny ni gonabbu, «Bireʼ ronoʼya, Señor»! Cristo bisuidyrabu Pedro par ñacbu toib apóstol ni diti nasian láabu né toib galán ejemplo par cristianos. Guirá ni bisuidybu ritnéni xidal lesiony ni rasac par lóono. Pedro bisetlaa tipnés lesiony reʼ né stipnés cós ló chop guiich ni bicaʼbu né xcalrracné espíritu santo, ni bixelbu ló congregaciones ni goyoʼ ló siglo primero. Ló artículo ni sieed sasuidyno tipnés cós ni rareʼ loguiaʼ, né ximod labúu guisobno ni náni ló naareʼ.