1, 2. ¿Xigony lóono ni nacno xpiin Jehová rioʼno nakit? (Santiago 1:22-25).

 JEHOVÁ né Xiimbu raniiny layibu guiguaʼno nakit. Ni bicaʼ Salmo 119:2 goniʼ: «Dichós buñ ni rasob ni rony mandarybu, ni rayopy láabu né guidopy xcalnabany». Né Jesús láaca goniʼ: «¡Dichós buñ ni racadiag xtiitz Dios né rasob láani!» (Luc. 11:28).

² Lóono ni nacno xpiin Jehová rioʼno nakit. ¿Xigony? Napno xidal razón par guisacno modcu, né razón ni más rasac láani ngú, portín rolno Xtiitz Dios guirá dzú né ronyno rutirigaʼlni lóono par guisobno ni casuidyno (bíil Santiago 1:22-25).

3. ¿Xí galnasác racaʼno lóono ni nacno xpiin Dios?

³ ¿Xí galnasác racaʼno pal ronyno «ni ná xtiitz Dios»? Primer, ragoʼ nakitno Jehová, né ni nanno ngú ragoʼ nakit lóono (Ecl. 12:13). Né láaca, ni rasobno consej ni sieed ló Xtiitz Dios racnéni lóono guidzaktzayno xfamilno né gacno ximigdxin herman de congregación. Sigory ma bibiʼlo por stiplooyca que scú nacni. Láaca diti racalóno galnagan ni racaló buñ ni diti rasob ni rony mandary Jehová. Nacni xomod goniʼ rey David después ni bisetlabu ló toib canción xiley Jehová, ni rony mandarybu né mod rony juzgarbu: «ni rasob láani racaʼ xiroʼ galnasác» (Sal. 19:7-11).

4. ¿Xigony rioʼ ór rasac naganno guisobno Xtiitz Dios?

⁴ Ná scú, non guidudyno cuent que rioʼ ór nagan guisobno  ni ná Xtiitz Dios. Ná nogoluʼ xchiinno, non cueʼno tiemp par golno né guisuidyno ni ná la Biblia, né modcu guienno xi ni nainy Jehová gonyno. Por ngú, ló artículo reʼ gonyno repas tipnés cós ni labúu gacné lóono golno láani guirá dzú. Láaca sasuidyno xi sacné lóono par gonyno pensary ló ni rolno né guiyopyno mod guisobno ni rasuidyno.

GOLEʼ TIEMP PAR GOʼOLO XTIITZ DIOS

5. ¿Xí guirá responsabilidad napno?

⁵ Casi guiráno ni nacno xpiin Dios nogoluʼ xchiinno. Radudyno xiroʼ tiemp ló tipnés responsabilidad ni la Biblia ná que nigolú rasac. Por ejemplo, casi guiráno non gonyno dxiin par guidxinaʼno ni guáno né ni guá xfamilno (1 Tim. 5:8). Xidal herman ran xfamil ni caxoʼ o ni ma nac buñgol. Né guiráno non cueʼno tiemp par ganno lóocano. Láaca noʼ responsabilidad lainy congregación. Toib responsabilidad ni más rasac, láani ngú ni ranino xtiitz Dios né buñ. Né guirá dxiin ni naplo, sigory ranabdiitzlo looyca: «¿Xí labúu goni par cueʼya tiemp goola la Biblia guirá dzú, goni pensary ló ni roola né guisoba láani?».

6. ¿Xí labúu gonylo par diti guisiantaʼlo goʼolo Xtiitz Dios? (Láaca bibiʼ retrat).

⁶ Par lóono ni nacno cristianos, ni golno la Biblia nacni toibtica cós «ni más rasac», por ngú non guicaano cuidad gonyno láani (Filip. 1:10). Chop tzón versos ro rasaló libro xtuny Salmos náni que buñ ni noʼ nakit «rioladxbu xiley Jehová; dzú né gueʼel roʼolbu láani né ronybu pensary loni» (Sal. 1:1, 2). Riendxich que non cueʼno tiemp par golno la Biblia. Per, ¿pú ór más galán golno láani? Ma tigaagano guinino. Per nigolú rasac cuuno toib ór ni gacné lóono golno láani guirá dzú. Toib hermano ni laa Víctor ná: «Rioladxi goola la Biblia rosil. Diti portín rioladxi guiaʼsa tayoo, rooni láani scú, portín órcu diti  noʼ ruid. Diti noʼ más cós ló xpensari né ni roola riaʼanni guica». ¿Ronylo pensary xomod Víctor la? Gonabdiitz looy: «Par naʼ, ¿Pú ór más galán goola la Biblia?».

BUNY PENSARY LÓ NI ROʼOLO

7, 8. Golexa né toib ejemplo xi diti non gonyno órni golno la Biblia.

⁷ Órni ma nanno pú ór golno la Biblia, non gapno lóono par diti tzaguiabno ló tramp de golsino la Biblia né diti guiañ xitcal guicno. Ló xcalnabányno rolno xidal cós, né sigory ma xidal buelt bíilno toib cós, per diti rasetnaladxno xitcal. ¡Nabann nasaclono ngú órni rolno la Biblia! Pentzi napno meta de golno chop tzón capítulos guirá dzú. Galán gapno metas né gonyno rutirigaʼlni lóono par gony cumplirno láani (1 Cor. 9:26). Per, ni golno la Biblia nacni nosi primer cós ni non gonyno. Galán rasalóno modcu, per pal nainy lóono que ni golno gacnéni lóono, raquiin gonyno stoib cós.

⁸ Gonyno pensary ló ejemplo reʼ. Guirá yaguien raquiinni guié par guibanyni. Per, pal riab siil nís ló tidxósi tiemp, yoo diti labúu reʼ láani. Pal racgoluʼ guié diti racnéni yaguien. Más galán guiab guié mitien, portín modcu yoo nap tiemp par gueʼ láani, né niʼs yaguien. Modcuca, diti non golno la Biblia naguelxex portín diti siaʼan ni golno guicno, né después diti sasetnaladxno ni ma bíilno né diti sasobno láani (Sant. 1:24).

9. ¿Xí non gonyno pal ma biaʼno rolno Xtiitz Dios naguelxex?

⁹ Gonyno pensary que cayoʼolo la Biblia né radudylo cuent que nigolú naguel cayoʼolo láani. ¿Xí labúu gonylo? Buny por goʼolo láani tzagaa, de toib mod ni labúu gacné looy gonylo pensary ló ni cayoʼolo o ma bíilo. ¿Ximod labúu gonylo láani? 1) Labúu cueʼlo más tiemp par guisuidylo, né modcu saplo tiemp par gonylo pensary ló ni roʼolo o 2) goʼolo chop tzónsi versículos né gonylo pensary ló ni bíilo ló tiemp ni  riaʼan. Víctor, ni bisetlano ló párrafo 6, ná: «Roni por diti goola xidal versículos, roola midid toib capítulo. Roola láani rosildiguieʼ, por ngú napa guidopynac dzú par goni pensary ló ni biila». Ni más rasac diti láani ngú balac capítulos roʼolo, xalagary ngú, ni más rasac láani ngú goʼolo tzagaa par gacnéni looy (Sal. 119:97; bibiʼ cuadriyen ni laa « Galrranabdiitz ni gacné looy gonylo pensary ló ni roʼolo»).

10. Golexa né toib ejemplo ximod labúu guisoblo ni roʼolo ló la Biblia (1 Tesalonicenses 5:17, 18).

¹⁰ Nac nitisi ór ni goʼolo la Biblia o balac tiemp gonylo láani, buny por guiyopylo mod guisoblo ni cayoʼolo. Laʼga roʼolo chop tzón versículos ni sieed ló Xtiitz Dios, gonabdiitz looy: «¿Ximod labúu guisoba información reʼ nigoreʼ né después?». Por ejemplo, gonyno pensary que ma bíilo 1 Tesalonicenses 5:17, 18 (bíil láani). De ngú gosagadzu tiprat né buny pensary ximod nac oración xtunylo. ¿Raniʼlo ni noʼ lainy xcalnabanylo la? ¿Balac buelt ronylo oración? ¿Por xí cós radudylo guixquix? Pentzi ronylo pensary tzón cós ni guidudylo guixquix Jehová. Pal rabeʼlo tidxósi tiemp par gonylo pensary ló guirá cós reʼ, ná chop tzónsi minut, diti nosi sacadiaglo Xtiitz Dios, láaca sasoblo láani. Né pal guirá dzú ronylo ngúca né guirá ni roʼolo ló la Biblia, conforma tudy tiemp saclo toib galán xpiin Jehová. Per, ¿pal rabiʼlo que noʼ xidal cós ro raquiin gonylo dxiin ga?

GOP METAS NI LABÚU TZAGAʼLO

11. ¿Xigony labúu guireʼganlo órni roʼolo la Biblia? Bisetlaa toib ejemplo.

¹¹ Rioʼ ór labúu guireʼganlo órni roʼolo la Biblia portín radudylo cuent que noʼ xidal cós ro raquiin gonylo dxiin. Gonyno pensary ló ndeʼ. Lonyx roʼolo tipnés versículos ro ná que mal cobiono chop tzónsi buñ (Sant. 2:1-8). Radudylo cuent que labúu guitzaʼlo mod ragobiolo stipnés, por ngú ragoʼlo guiclo guitzaʼlo tipnés cós. ¡Galán gonylo ngú! Dzú marty, roʼolo toib historia ni rabeʼ loguiaʼ que nigolú rasac gony mandaryno lochno né diti cuenunysi guinino (Sant. 3:1-12). Órcu radudylo cuent que goyoʼ ór goniʼlo cós ni diti non naniʼlo, por ngú ragoʼlo guiclo guiniʼlo cós ni gacné stipnés. Dzú miérc, roʼolo que diti non gacno ximig gudxliogoxreʼ (Sant. 4:4-12). Né radudylo cuent que non guicaalo cuidad xi películas rabiʼlo né xi canción racadiaglo. Dzú juevy, pentzi  rareʼganlo portín ronylo pensary ló guirá cós ni non guitzaʼlo.

12. ¿Xigony diti non guireʼganlo pal órni roʼolo la Biblia rabiʼlo que noʼ ro raquiin gonylo dxiin? (Láaca bibiʼ ñeʼ guiich).

¹² Diti guireʼganlo pal rabiʼlo que noʼ chop tzón cós ni non guitzaʼlo, portín nga radudy diitz que órni roʼolo la Biblia naclo buñdxo né que diti rayopylo mod guiscúlo looyca. a Bisetnaladx que ni guibanyno mod rasuidy Dios, non gacni guirá ór (Col. 3:10). ¿Xí sacné looy par guisobralo Xtiitz Dios?

13. ¿Xí sugerencia labúu gacné looy? (Láaca bibiʼ retrat).

¹³ Toib cós ni sacné looy, láani ngú gaclo modesto né diti guiyopylo mod guisoblo toibsi ór guirá ni roʼolo (Prov. 11:2). Reʼ noʼ toib cós ni labúu gacné looy: buny toib lista ro guicaʼlo guirá cós ro raquiin gonylo dxiin, golú toibni o chopni, goloʼ guiclo loni né bisian stipnéscu par después. ¿Niis púti labúu salólo?

14. ¿Ló xí metas labúu coʼlo guiclo primer?

¹⁴ Primer labúu coʼlo guiclo ló toib meta ni diti tampa nagan tzagaʼlo o ro más raquiin gonylo dxiin. Órni ma nanlo púti nainy salólo, biyopy información ló publicaciones ni napno, labúu guiquiinlo Índice de las publicaciones Watch Tower o Ni gacné a testigos xtuny Jehová guisuidyibu la Biblia. Goniné Jehová né gonab láabu guidudybu fuers ni caquiinlo né gacnébu looy par guiniiny looy gonylo dxiin loguiaʼni (Filip. 2:13). Después bisob ni ma bisuidylo.  Órni guibiʼlo guirá ni ma bunylo, saplo más gan par tzagaʼlo stoib meta. Né guirá cós ni guitzaʼlo sacnéni looy gonylo dxiin ló stipnés ni caa ló lista ni bunylo.

BIDUDY LAGARY QUE XTIITZ DIOS GONYNI DXIIN LOGUIAʼLO

15. ¿Ximod diti toibsi midid nac xpiin Jehová né guirá buñ ni roʼol la Biblia? (1 Tesalonicenses 2:13).

¹⁵ Tipnés buñ ná que ma bíilyibu la Biblia xidal buelt. Per, ¿nigolúpa ronyibu crer ló la Biblia né ma bidudyibu lagary que xcalrrasuidyni guitzaʼni mod nabanyibu la? Nabanni, per casi guiráyibu diti ronyibu ngú. ¡Lóono ni nacno xpiin Jehová diti nacno xomod layibu! Xomodca cristianos ni bibany ló siglo primero, racacuentno la Biblia «xomodpa xtiitz Dios». Né por ngú, ronyno rutirigaʼlni lóono por guislooyno que ronyni dxiin lainy xcalnabányno (bíil 1 Tesalonicenses 2:13).

16. ¿Xí sacné lóono par guisobno Xtiitz Dios?

¹⁶ Rioʼ ór moda nagan goʼol buñ Xtiitz Dios né guisob láani. Pentzi diti radzelno toib ór pal golno láani. Pentzi ma biaʼno rolno láani naguelxex, né por ngú diti riaʼanni guicno. O sigory rareʼganno órni rabiʼno que noʼ xidal cós ro raquiin gonyno dxiin. Nac nitisi galnagan ni cacalólo, Jehová sacné looy par gonylo gan láani. Cuacuent xcalrracnébu, diti nosi guicadiaglo Xtiitz Dios né después guialadxlo láani. Xalagary ngú, bisob láani. Laʼga más roʼolo la Biblia né rasoblo láani, más sioʼ nakitlo (Sant. 1:25).