ARTÍCULO NI GUISUIDYNO 37
CANCIÓN 118 «Danos más fe»
Toib guiich ni labúu gacné lóono gony guantaryno dada órni guidxin fin
«Rapno confianz ni gopno primer dada órni guidxin fin» (HEB. 3:14).
TEMA
Guiich ni cuá par Hebreos napni lesiony ni sacné lóono gony guantaryno dada órni guinitló gudxliogoxreʼ.
1, 2. a) ¿Xí láani cayac lainy gudx Judea órni apóstol Pablo bicaʼ guiich ló Hebreos? b) ¿Xigony guiichcu bidxinni órni merpa biquiin cristianos láani?
DESPUÉS ni goity Jesús, cristianos hebreos godudyibu por tiemp nagan. Diti xidzú después ni goyaʼ congregación xtuny Jerusalén, buñ cuanal cristianos reʼ (Hech. 8:1). Né, midid 20 íz después xpiin Cristo xtuny gudx Judea, godudyibu ló galsii, sigory portín nírcu goyoʼ galrralán lagarycu (Hech. 11:27-30). Per, ló íz 61, cristianos moda bibany sacró portín buñ ma diti tampa cuanal né cualó layibu xomod ñacni después. Ló tiempcu, Jehová buny que Pablo naxel toib guiich lóoyibu. Guirá ni cuá ló guiichcu gocnéni layibu par ñoʼyibu puext par ni mápa mer ñac.
2 Guiich ni cuá par Hebreos bidxinni órni merpa biquiinyibu láani, portín mápa mer nacalóyibu stipnés galnagan. Pablo bidudy consej ni labúu ñacné cristianos ñony guantary galnagandaʼ ni nacalóyibu. Ni goniʼ Jesús de guinitló Jerusalén mápa mer ñacni (Luc. 21:20). Nigolú, nili Pablo nili cristianos xtuny gudx Judea gonyibu pu órpa ñacni. Per guirá cristianos cu labúu naquintzayibu xtiempyibu par ñony nadipyibu fe xtunyibu né ñony guantaryibu, né modcu ñoʼyibu puext (Heb. 10:25; 12:1, 2).
3. ¿Xigony galán láani guisuidyno Guiich ni cuá par Hebreos, ló naareʼ?
3 Lóono mápa mer tudyno ló toib tribulación más xiroʼ que ni godudy cristianos hebreos ló (Mat. 24:21; Apoc. 16:14, 16). Consej ni bidudy Jehová a guirá cristianos cu láaca labúu gacnéni lóono. Por ngú guibiʼno tipnésni.
«GUISUIDYRANO DADA GUIDXIN GACNO BUÑ NI NOʼ XCALRRIEN»
4. ¿Xí galnagan cualó cristianos ni góc judío? (Láaca bibiʼ dibuj).
4 Guirá hebreos ni Pablo bicaʼ guiich lóo, bisianyibu religión judía né gocyibu cristianos, né ndeʼ bitné xidal galnagan par layibu. Guirá judíos gocyibu gudx ni Jehová golú. Por xidal íz Jerusalén gocni toib gudx ni nigolú gosac, portín cú ro buny mandary rey ni buny representar Jehová né cú goyoʼ templo. Guirá judíos ni góc fiel, bisobyibu Ley xtuny Moisés né guirá ni bisuidy líderes religiosos layibu. Gopyibu leyes ni goniʼ xi láani ñooyibu, pal ñac circuncidaryibu, né ximod nagobioyibu buñ de stipnés gudx. Né láaca, de goló goity Jesús, Jehová ma diti cuacuent sacrificios ni bidudy buñ lainy templo. Guirá cós reʼ ni bidzaʼ, gocni nagan par judíos ni góc cristianos né ni biaʼ guisob Ley (Heb. 10:1, 4, 10). Dada cristianos ni nadip xfe, xomod apóstol Pedro, gosac naganyibu guirá ndeʼ (Hech. 10:9-14; Gál. 2:11-14). Né diti ngúsi, láaca líderes religiosos judíos gosaló cuanalyibu par guigaityibu o gonynayibu a cristianos por ni ronyibu crer.
Cristianos non nabeʼyibu tiplad xcalrrasuidy falz líderes religiosos judíos par diti ñalsityibu de galnigolú. (Bibiʼ párrafos 4 né 5).
5. ¿Xí chop grupos cualó a cristianos xtuny gudx Judea?
5 Goyoʼ chop grupos de buñ ni cualó a cristianos xtuny gudx Judea. Primer goyoʼ líderes religiosos judíos ni goniʼ que guirá cristianos reʼ gocyibu apóstatas. Né láaca goyoʼ tipnés ni ralooy góc cristianos, per goniʼ que non nasobyibu tipnés mandary ni sieed ló Ley xtuny Moisés, sigory par diti ñoʼ chú nacanal layibu (Gál. 6:12). ¿Xí láani ñacné guirá cristianos cu ñony guantary?
6. ¿Xí láani buny animar Pablo ñony hebreos? (Hebreos 5:14–6:1).
6 Ló xquiichbu, Pablo buny animarbu hebreos par nasuidyibu nanoydiguieʼ Xtiitz Dios (bíil Hebreos 5:14–6:1). Biquiimbu Escrituras Hebreas par golexabu que mod bieen Cristianos a Jehová más gosacni que mod bieen judíos láabu. a Gonbu que pal ñapyibu más conocimiento né ñentzaayibu Escrituras, ngú ñacné layibu par nadudyibu cuent xi láani galrrasuidy falz né nabeʼyibu láani tiplad, né modcu diti ñalsityibu de galnigolú.
7. ¿Xí galnagan racalóno ló naareʼ?
7 Ló naareʼ láaca noʼ buñ ni rachetz información o pensary ni diti noʼ de acuerdo né ni rony mandary Jehová né racalóyibu lóono. Xidalyibu raniʼyibu que diti napno respet ni rony crer stipnés o que nacno buñ mal portín rasobno ni rony mandary la Biblia. Mod rony pensary né mod rony gudxliogoxreʼ diti nacni xomod rony pensary Jehová (Prov. 17:15). Por ngú nigolú rasac guidudyno cuent xi láani raquiin tipnés buñ par cuegan né cuestzoo lóono de galnigolú, né cueʼno láani tiplad (Heb. 13:9).
8. ¿Ximod labúu guisuidyno dada guidxin gacno buñ ni noʼ xcalrrien?
8 Pablo gochbu cristianos cu que nasuidyibu dada nadxin ñacyibu buñ ni noʼ xcalrrien, né lóono non gonyno ngúca. ¿Ximod? Guisuidyno nanoydiguieʼ galnigolú né gonyno rutirigaʼlni lóono par gonyno pensary xomod Jehová. Né ná ma góc dedicarno né ma goyonisno non gonyrano ndeʼ. Por ngú guiráno non golno né guisuidyno Xtiitz Dios guirá dzú, ná pal ma sanéno goxeʼsi o xiroʼ tiemp ló galnigolú (Sal. 1:2). Pal rasuidytzayno xquiichno toibno, ngú sacné lóono par gony nadipno toib cualidad ni bisetlaa Pablo ló xquiich: fe (Heb. 11:1, 6).
«BUÑ NI NAP FE NÉ DITI RAITY»
9. ¿Xigony biquiin cristianos toib fe nadip?
9 Guirá cristianos cu naquiin ñapyibu toib fe nadip par labúu nalaayibu de cós ni mápa mer ñac lainy gudx Judea (Heb. 10:37-39). Jesús gochbu xpiimbu que órni nabiʼyibu que soldad ma nagoo gudx Jerusalén nimaca nareʼyibu né ñeeyibu laidy dainy. Consej reʼ gocni par guirá cristianos, tanli par ni golés lainy gudx né par ni golés fuer (Luc. 21:20-24). Ló dzúcu, órni soldad racaló stoib gudx, buñ biyopy nalaa lainy toib gudx ni nap muros, xomod Jerusalén. Por ngú ralooyni diti láani ngú nareʼyibu né ñeeyibu laidy dainy, né biquiin ñapyibu xiroʼ fe.
10. ¿Xí láani ñony cristianos ni nadip xfe? (Hebreos 13:17).
10 Cristianos cu láaca non ñapyibu confianz ló herman ni Jesús biquiin par nagonés congregación. Sigory hermanos cu bidudyibu instrucciones mod nareʼyibu né ór ni non ñonyibu láani (bíil Hebreos 13:17). Diitz griego ni biquiin ló Hebreos 13:17 par «colguisob» radudyni diitz que buñcu rasob portín napbu confianz ló buñ ni cadudy instrucción cu, né diti nosi portín non gonybu láani. Cristianos hebreos non ñony nadipyibu confianz ni gopyibu ló ancianos antes ni nadxin tribulación. Pal nasobyibu órni yadi galnagan, diti nasac naganyibu nasobyibu órni ma ñoʼ galnagan.
11. ¿Xigony raquiin gapno toib fe nadip?
11 Raquiin gapno toib fe xomod ni gop cristianos ni bicaʼ Pablo guiich lóo. Nabanyno ló toib tiemp ro casi guirá buñ diti rony crer que mápa mer guinitló gudxliogoxreʼ né dada raxiichyibu lóono portín ronyno crer láani (2 Ped. 3:3, 4). Né láaca, ná la Biblia rasetlaa tipnés cós ni gac ló gran tribulación, noʼ xidal cós ni diti nanno. Raquiin gapno fe que xfin gudxliogoxreʼ sadxinni ór ni ma golú Jehová, né gapno confianz que láabu sanbu lóono (Hab. 2:3).
12. ¿Xí sacné lóono par labúu guilaano ló gran tribulación?
12 Láaca non gony nadipno fe ni napno que Jehová caquiin «mós ni rony xinésni né naní xcalrrien» par conésbu lóono ló naareʼ (Mat. 24:45). Xomodca cristianos hebreos sigory cuaʼyibu instrucciones órni bidxin soldad xtuny Roma, lóono sigory láaca sacaʼno tipnés instrucciones ni guilaa lóono órni saló gran tribulación. Nigoreʼ ór par gony nadipno confianz ni napno ló herman ni ragonés xcudx Jehová. Pal nigoreʼ diti rasobno né diti rapno confianz layibu, sasacnaganno guisobno instrucciones ni guidudyibu lóono ló gran tribulación.
13. ¿Xigony consej ni sieed ló Hebreos 13:5 gocni ni merpa biquiin cristianos?
13 Laʼga cristianos hebreos nabésyibu señ par nareʼyibu gudx Jerusalén, non nabanyibu de toib mod senciy né diti nasobladxyibu bidxiich (bíil Hebreos 13:5). Tipnésyibu godudyibu ló galrralán né galsii (Heb. 10:32-34). Ná goyoʼ toib tiemp ro goyoʼyibu puext gony guantaryibu galnagan por diitz sacró, pentzi tipnésyibu gosaló goloʼyibu guicyibu gony ganaryibu más bidxiich par diti ñoʼ xi ñacyibu né diti nadudyibu ló galsii. Per bidxiich diti labúu nalaa layibu órni nanitló Jerusalén (Sant. 5:3). Né pal toib buñ nadxiʼ bidxiich, ñacni más nagan par láabu naxonybu né nasiambu lidxbu né xcósbu.
14. ¿Xí sagoʼno guicno gonyno pal nadip fe xtunyno?
14 Ni gapno fe que nitisi ór labúu guidxin xfin gudxliogoxreʼ sacnéni lóono par diti gandxiʼno bidxiich né gonygoluʼno dxiin. Ló gran tribulación, diti noʼ pu guisac bidxiich. La Biblia ná que buñ «sasalyibu plata xtunyibu locay» órni guidudyibu cuent que «nili plata nili or ni napyibu labúu salaani layibu ló xtzú xcalnadzuitz Jehová» (Ezeq. 7:19). Xalagary coʼno guicno gonyno gan xiroʼ bidxiich, más sacró coʼno guicno gonyno cós ni gacné lóono tzoʼno conforme né ni napno. Ndeʼ raguiña diti tzogoluʼno ló diʼin o tzoʼno galrrasaʼ ganno xcósno né ma diti gapno tiemp par stipnés cós. Láaca raquiin gapno cuidad, diti gandxiʼno xcósno (Mat. 6:19, 24). Pentzi laʼga cabigax fin, saquiin guislooyno pal napno confianz lóo Jehová o ló xcósno.
«RAQUIIN GONY GUANTARYTO»
15. ¿Xigony nigolú gosac que cristianos ñony guantary?
15 Conforma ñacxiroʼ galnagan lainy gudx Jerusalén, fe xtuny cristianos ñoʼni ló prueby (Heb. 10:36). Ná nírcu tipnésyibu buny guantaryibu persecución, xidalyibu cuacuentyibu galnigolú órni ma diti tampa goyoʼ ni cuanal cristianos. Per Pablo góoch layibu que sacalóyibu más persecución né que non ñoʼyibu puext ñacyibu fiel dada dzú ñaityibu xomod buny Jesús (Heb. 12:4). Xidal judíos nigolú bidzuitzyibu portín ma más buñ góc cristianos. Chop tzón íz antes, órni Pablo buny predicar lainy gudx Jerusalén, tipnés buñ cualó láabu. Né más de 40 judíos «bidudyibu xtiitzyibu diti guáyibu nili gueʼyibu dada órni nagaityibu Pablo» (Hech. 22:22; 23:12-14). Ná guirá cristianos cu goyoʼyibu lad buñ ni bianladx layibu, non nadopyibu, non naniʼyibu xtiitz Dios né buñ né non ñapyibu toib fe nadip.
16. ¿Ximod racné Guiich ni cuá par Hebreos lóono par guibiʼno persecución mod nainy Jehová? (Hebreos 12:7).
16 ¿Xí ñacné cristianos cu ñony guantaryibu persecución? Pablo goniiny ñacnébu cristianos par nabiʼyibu galnasác ni nacaʼyibu pal ñony guantaryibu. Por ngú golexabu biincu que Dios labúu guidudy lagary que toib buñ tudy ló galnagan par gacnébu buñcu gac toib galán cristiano (bíil Hebreos 12:7). Layibu non nabiʼyibu láani xomod toib cós ni ñacné layibu ñapyibu cualidades ni naquiinyibu. Diti tampa ñac nagan ñony guantaryibu prueby pal ñonyibu pensary balaati naniʼsyibu xomod cristianos (Heb. 12:11).
17. ¿Xí láani goniʼ Pablo que raquiin buñ par gony guantary?
17 Pablo buny anirmarbu cristianos cu ñony guantary né diti nareʼgan. Né ni goniʼbu nigolú gosacni. ¿Xigony? Portín, antes láabu láaca cuanalbu cristianos, por ngú gondxichbu xi cós cacalóbu. Né láaca, láabu ma buny guantarybu persecución, portín después ni gócbu cristiano, buñ cualó láabu de xidal mod (2 Cor. 11:23-25). Pablo gondxich xi láani raquiin buñ par gony guantary. Por ngú, gochbu cristianos que diti non ñapyibu confianz láacayibu, xalagary ngú non ñapyibu confianz lóo Jehová. Láacabu goniʼbu né balory: «Jehová racné naʼ. Diti sadzubi» (Heb. 13:6).
18. ¿Xí láani non gandxichno, né xí non gonyno desde nigoreʼ?
18 Ló naareʼ, tipnés xhermanno cayony guantaryibu persecución. Labúu guislooyno que ronladxno né racnéno layibu órni ronyno oración né órni ronyno tipnés cós ni labúu gacné layibu (Heb. 10:33). La Biblia nayadit ná: «Guirá ni raniiny guibany xomod ná Dios toibsi né Cristo Jesús láaca sioʼ ni guicanal né guigaity layibu» (2 Tim. 3:12). Ngú radudy diitz que guiráno non tzoʼno puext par órni guidxin tiemp nagan. Non gapno confianz lóo Jehová né gandxichno que láabu sacnébu lóono gony guantaryno guieed nitisi guieed. Láabu sasialdóbu xcalnabany xpiimbu xorpani (2 Tes. 1:7, 8).
19. ¿Xí cós labúu gonyno par tzoʼno puext par gran tribulación? (Láaca bibiʼ dibuj).
19 Guiich ni bicaʼ Pablo par hebreos nigolú gocnéni layibu ñoʼyibu puext par galnagan ni mápa mer nacalóyibu. Pablo buny animar layibu ñonyxiroʼyibu conocimiento né ñentzaayibu Escrituras. Modcu, ñoʼyibu puext par nadudyibu cuent xi galrrasuidy labúu ñony que nachich fe xtunyibu né nabeʼyibu láani tiplad. Láaca gochbu biincu que ñony nadipyibu fe xtunyibu par nasobdiitzyibu nimaca instrucciones ni nadudy Jesús né ni rasanir lainy congregación layibu. Né bislooybu que diti tampa ñac nagan par layibu ñony guantaryibu pal nabiʼyibu prueby xomod toib oportunida ni Bixiosyibu ni ronladx layibu cadudy layibu par gacyibu toib galán cristiano. Pal lóono láaca rasobno guirá consej reʼ, láaca sony guantaryno dada órni guidxin fin (Heb. 3:14).
Jehová bisiab xcalnasác loguiaʼ cristianos ni diti bisian láabu né buny guantary. Después ni bireʼyibu de gudx Judea, bidoprayibu. ¿Xí rasuidyno? (Bibiʼ párrafo 19).
CANCIÓN 126 Siempre fuertes, fieles y firmes
a Nosi ló primer capítulo, Pablo bisetlaa gatz buelt Escrituras Hebreas par bislooybu que mod buny adorar cristianos Jehová más gosacni que mod buñ judíos láani (Heb. 1:5-13).
