Casi guiránac buñgudxlio nan que noʼ cós tzaay né noʼ cós mal. Buñ nan que mal láani guixin buñ stoib, guigaity buñ saʼ, né guixin buñ mbiox. Per, guirá buñ rioladx órni buñ ragobioo saʼ sacró, rioʼ xalagary stoib né rony xinésni. Per ¿xí noʼ de stipnés cós xomod ndeʼ, chú gatné buñ, pal guiniʼ buñ ni nigolú o yaca, o ximod guisniʼs buñ xiin? Xidal buñ rony pensary que diti noʼ toibsi mod ni labúu gacni, ronyibu crer que casi guirá ni rony pensary buñ xinésni ngú. Por ngú, órni non guibiʼyibu xi láani gonyibu, ronyibu ni xpensaryibu nac xinésni o ni rony pensary stipnés. Per ¿guirá ór rarebuʼ ni ronyibu la?

Casi guirá ór, par ganno xi láani gonyno, radudyno lagary que xcalrrienno conés lóono: xcalrrienno raibyni lóono xi láani ngú cós tzaay né xi láani ngú cós mal (Romanos 2:14, 15). Dada mbioxien labúu radudyibu cuent pal diti rac xinésni, né rasacyibu que napyibu dool órni ronyibu cós mal. Conforma raniʼsno, xcalrrienno ragobioo guirá ni rasuidy né mod rony buñ ni nagoo lóono, xomod xfamilno, xcompañerno, xomextrano, buñ xcudxno, religión né costumbres xtunyno. Por ngú, órni ragoʼno guicno gonyno toib cós, xcalrrienno raiby lóono pal ni ma goloʼno guicno gonyno, noʼni de acuerdo né guirá ni ma bisuidyno o yaca.

Xcalrrienno rachiinni lóono tzoʼno xalagary stipnés, né guidudyno guixquix, gonyno xinésni né gonladxno buñ. Láaca racaani lóono par diti gonyno cós ni gonynaa buñ ni ronladxno o ni labúu guitudy lóono ló galnatoy né gony que guisacno que napno dool.

¿Labúu gapno confianz guirá ór ló ni ronyno pensary que nac xinésni la? Dzú Garrick góc mbioxhlas, goloʼbu guicbu nabanybu mod raniiny láabu. Per conforma godudy tiemp, bidudybu cuent que ni bidudybu lagary que xpensarybu  nagonés láabu, diti gocnéni láabu. Guirá ni bunybu goynéni láabu por toib «néz ro bidza galyoxh, drogas, galrrasoch né galrradíil».

Órni ragoʼno guicno gonyno toib cós diti nosi ragoʼno cuent xcalrrienno, xidal buelt radudyno lagary que ni gony pensary buñ de cós ni ma goloʼno guicno gonyno, guiniʼ xi láani gonyno. Ni gonyno ngú, racnéni lóono guisuidyno de experiencia né sabiduría xtuny stipnés. Órni ronyno ni xfamilno, ximigno né buñ xcudxno rony pensary que nac xinésni, rapyibu respet lóono.

¿Labúu gapno confianz guirá ór ló ni rony pensary stipnés que nac xinésni la? Órni Priscila góc mbioxhlas, bunybu xomodca buny ximigbu, gotnébu xidal buñ antes de gonybu galtzeʼel. Per bidudybu cuent que ni gonybu ni stipnés buñ rony pensary que nac xinésni, diti goloʼ nakitni láabu. Láabu nábu: «Ni buni ni rony guirá buñ, diti bunyni que nasaca sacró. Buni cós ni diti noʼ pu gocné naʼ, né goyoʼya ló riesga».

Órni ragoʼno guicno gonyno xinésni, ni ronyno pensary o ni rony pensary stipnés rasacni. Per pal nosi ragoʼno cuent ngú, diti guirá ór sarebuʼ ni gonyno. Rioʼ ór diti labúu ranno pal ni coʼno guicno gonyno, labúu guitudyni lóono o stipnés buñ ló galrrioʼob (Proverbios 14:12). Né láaca, ná napno confianz que ni ronyno pensary né ni rony pensary stipnés xinésni ngú, labúu nachéno. ¡Né chú nan pal diti sadzani después! Portín, noʼ cós ni antes mal bibiʼ buñ láani, per nigoreʼ ma yaca. Né noʼ cós ni antes diti bibiʼ buñ mal láani, per nigoreʼ ma rabiʼ buñ mal láani.

¿Noʼ ni labúu conéstzay lóono par ganno xí láani ngú xinésni, né xí láani yaca ni labúu gapno confianz la? ¿Noʼ ni labúu gacné lóono par cutzayno ni gonyno, né diti gac arrepentirno después la?

Noʼ toib ni ragonéstzay lóono, ni labúu gapno confianz né ni guirá ór rarebuʼ, nac nitisi buñ nacno né nac rotísi lagary ro rabésno. Artículo ni sieed, sacnéni lóono ganno xi labúu gacné lóono par gonyno xinésni ló xcalnabányno.