Gonyno xinésni: Ni ragonéstzay lóono
Guibiʼno tap cós ro ragonés la Biblia lóono, ni labúu gapno confianz né ni raquiin. Xidalguixo buñ ma bibiʼ ximod gocnéni layibu.
1. Galtzeʼel
Diti guirá buñ rony pensary toibsi midid de galtzeʼel, né buñ gadzéga mod rony pensary de cós ni raquiin galtzeʼel par guibany nakit
NI NÁ LA BIBLIA: «Cada toibto buñguieeu non gandxiʼto tzeelto xomodca nadxiʼto lóocato. Né scúca, buñgonaʼ non gap xiroʼ respet tzeʼel» (Efesios 5:33).
NI RADUDYNI DIITZ: Dios goloʼ galtzeʼel. Por ngú nantzaybu ni raquiin galtzeʼel par guibany nakit (Marcos 10:6-9). Buñ ni ma noʼ tzeʼel labúu guibanyibu nakit pal ronyibu pensary ló cós ni labúu guidudyibu par gony nadipyibu xcaltzeelyibu, xalagary ló cós ni guicaʼyibu. Buñguieeu ni nadxiʼ tzeʼel raslooybu xcalrronladxbu órni ranbu né ragobiobu sacró tzeelbu. Buñgonaʼ raslooy que napbu respet tzeelbu órni racnébu né rayopybu mod raninébu tzeelbu.
MOD RAGONÉS LA BIBLIA RAQUIINNI: Quang né tzeelbu Thi, de gudx Vietnam, diti biguaʼyibu goxt lainy xcaltzeelyibu, Quang nigolú gócbu buñ nachóng né buñ nadox. Láabu nábu: «Diti goyoʼya galrrasaʼ ni gosac Thi né dada bidxin midid bitudi láabu ló galnatoy xidal buelt». Thi goniiny nachílbu xcaltzeelbu. Láabu rasetnaladxbu: «Gosaca que ma diti labúu ñapa confianz lóbu nili ñapa respet láabu».
Después, Quang né Thi gosalóyibu bisuidyibu la Biblia né bisuidyibu ximod nasobyibu ni naʼ Efesios 5:33. ¿Ximod gocnéni layibu? Quang ná: «Né xcalrracné diitzreʼ ni sieed ló la Biblia bidudi cuent que non nagobioya láabu sacró né ñoni que Thi nasac que ronladxi láabu. Láaca bienna que non ñaana láabu ló sentido: material, físico né emocional. Radudi cuent que órni roni guirá ndeʼ ronladxbu né rapbu respet naʼ». Thi ná: «Roni rutirigaʼlni naʼ guirá ór par gapa más respet tzeʼela mod naʼ Efesios 5:33. Né láabu ronybu que guisaca que ronladxbu naʼ, que diti sioʼ xi saca, né que diti noʼ xi portín tzoʼya ló galrrasaʼ».
Pal nainy ganlo más consej ni radudy la Biblia a buñ ni ma noʼ tzeʼel, goyee ló jw.org né bíil revista ni laa, ¡Nanísi goyoʼ! número 2 íz 2018, ni laa, «12 cós ni gacné famil guibany goxt».
2. Mod radzakno stipnés
Xidal buelt buñ diti ragobioo sacró stipnés por xcoloryibu, xcudxyibu, mod rienyibu, buñ ni rioladxyibu o xireligionyibu.
NI NÁ LA BIBLIA: «Colgap respet guirá clas buñ» (1 Pedro 2:17).
NI RADUDYNI DIITZ: La Biblia diti racacuent buñ ni rianladx stipnés buñ ni nac de stipnés color o gudx, buñ ni rianladx buñ moxh o buñ ni rianladx bioʼos. Xalagary ngú rasuidyni lóono gapno respet guiránac buñ, nac nitisi nac xcoloryibu, xcudxyibu o pal nacyibu buñ xirop o yaca (Hechos 10:34). Ná pal diti ronyno crer ni ronybu crer o pal diti noʼno de acuerdo né mod ronybu, non cobiono layibu sacró né respet (Mateo 7:12).
MOD RAGONÉS LA BIBLIA RAQUIINNI: Daniel bisuidy que buñ de Asia ronyibu mal xcudxbu. Por ngú bianladxbu buñ de Asia, dada goninaabu buñ de guirá gudx reʼ nisló stipnés. Láabu nábu: «Buni ngú portín gondxiʼya xcudxi. Nili godudyni ló xpensari que mal ngú ni cayoni».
Después Daniel bisuidy ni rasuidy la Biblia. Nábu: «Biquiin natzaʼya mod buni pensary. Par Dios, guirá buñ toibsi midid nacyibu, nac rotísi lagary ro sieedyibu. Né non nasudi nabiʼya layibu modcuca». Órni Daniel laʼra rimbubu toib buñ, ¿ló xí láani ronybu pensary? Láabu nábu: «Par naʼ ma diti rasac pu lagary sieedbu. ¡Nili racaaya cuidad ngú! Nadxiʼya guiránac clas buñ né noʼ ximiga de guirá lagary ni noʼ ló Gudxlio».
Pal nainy ganlo más, goyee ló jw.org né bíil revista ni laa, ¡Nanísi goyoʼ! número 3 íz 2020, ni laa, «¿Tiene cura el prejuicio?».
3. Bidxiich
Par tzoʼyibu nakit né guibanyibu sacró ló dzú ni sietra, xidal buñ rony rutirigaʼlni layibu par gacyibu buñ ric.
NI NÁ LA BIBLIA: «Buñ ni noʼ xcalrrien rapni láabu xomodca bidxiich rapni buñ, per galnan más rasac: portín buñ ni noʼ xcalrrien ralaani láabu» (Eclesiastés 7:12).
NI RADUDYNI DIITZ: Ná bidxiich raquiinni, diti labúu gapno confianz que láani coʼ nakitni lóono né gonyni que guibanyno sacró ló dzú ni sietra (Proverbios 18:11; 23:4, 5). Par guibanyno nakit né sacró ló dzú ni sietra, non guisobno consej ni Dios radudy lóono ló la Biblia (1 Timoteo 6:17-19).
MOD RAGONÉS LA BIBLIA RAQUIINNI: Toib buñguieeu de Indonesia ni laa Cardo goloʼbu guicbu gacbu buñ ric, né labúu bunybu láani. Láacabu nábu: «Labúu goyaʼya xidal lagary, gosiiya cós ni rasac, camión, yoʼ... Naʼ gopa guirá ni raniiny buñ gap». Per guirá ni gopbu, tiptisi binitni. Láabu rasetnaladxbu: «Goyoʼ ni biscú naʼ né golann guirá xpidxiichi, tiptisi bisnita guirá ni buni gan né xiroʼ dxiin por xidal íz. Godudy dzúya par ñaca buñ ric, per diti noʼ pu biquiin guiráni, bioʼob xcalnabani né gosaca que diti noʼ pu raquiinna».
Cardo goloʼ guic guicanal consej ni radudy la Biblia de bidxiich, né nigoreʼ xalagary tudy dzúbu par gapbu xiroʼgolu bidxiich, más rioladxbu tzoʼbu conforme né ni napbu. Láabu nábu: «Goona que ni más rasac láani ngú cós espiritual. Nigoreʼ ma diti noʼ chú rabeʼ xcaʼala, né noʼya nakit».
Pal nainy ganlo más ni rasetlaa la Biblia de bidxiich, goyee ló jw.org né bíil artículo ni laa «¿Scuel xirop né bidxiich labúu sacnéni looy guibanylo sacró la?» ni bireʼ ló revista ni laa, Guiich ni Caniʼ número 3 íz 2021.
4. Sexo
Noʼ xidal buñ ni rony pensary que diti mal gony buñ galyoxh.
NI NÁ LA BIBLIA: «Diti gonyto galyoxh. Cada toibto non gony mandary laidy par gac nayaani né guicacuent Dios láani. Diti gonyto xomod rony buñ pagan ni diti rimbu Dios ni rasobladx né ni digaldi guisian gony galyoxh» (1 Tesalonicenses 4:3-5).
NI RADUDYNI DIITZ: La Biblia raniʼ chú labúu gatné buñ. Diitz «galyoxh» raguiñani gatné buñ stoib ni diti nac tzeelbu, gatné buñ xidal buñ, gatné buñ saʼ antes de gony galtzeʼel, gatné buñ sabuñguieeuca o sabuñgonaʼca né gatné buñ nimal (1 Corintios 6:9, 10). Ni gatné buñ saʼ nacni toib galrrascad xtuny Dios, né nosi buñguieeu né buñgonaʼ ni ma bitzña, labúu gatnéyibu saʼyibu (Proverbios 5:18, 19).
MOD RAGONÉS LA BIBLIA RAQUIINNI: Kylie, ni rabés gudx Australia ná: «Órni góca mbioxhlas, buni pensary que pal ñatnéya buñ, nasaca que noʼ ni ronladx naʼ. Per diti scú gocni. Diti bibani sacró né bioʼob xcalnabani».
Después, Kylie gosaló bisuidy la Biblia né goloʼbu guicbu guisobbu ni rony mandary la Biblia de sexo. Láabu nábu: «Rabiʼya que guirá ni rony mandary Dios, racnéni lóono par diti tudyno ló galrrioʼob. Cayoni guirá cós mod raniiny Jehová, por ngú rasaca sacró, nigoreʼ naana que noʼ ni nadxiʼ naʼ. Por mod ragonés la Biblia buñ, bilaaya de cós ni labúu nasioʼob xcalnabani».
Pal nainy ganlo más, goyee ló jw.org né bíil artículo ni laa «¿Xí ná la Biblia órni buñ rabesné saʼ né diti rony galtzeʼel?».
Ni Bisaʼ lóono, racné lóono par ganno xi láani ngú cós tzaay né xi láani ngú cós mal. Né ná rioʼ ór nagan guisob buñ ni rony mandarybu, láani guirá ór racnéni lóono. Labúu gapno confianz que sabanyno nakit, diti tipratsi, xalagary ngú sabanyno nakit por tipzó.
