Dios radudy galnasác a buñ ni rasob láabu
Moisés goniʼ que Dios sadudy galnasác lóono pal rasobno ni rony mandarybu (Deuteronomio 10:13; 11:27). Diti nosi rasobno Dios por ni radzuibyno guitudybu lóono ló castig. Nacbu toib Dios natzaay por ngú ronladxno láabu. Galrronladxcu rachiinni lóono guisobno láabu né diti nainy lóono gonyno xitcal par tzoʼ nabambu. «Scareʼ non gandxiʼno Dios: guisobno ni rony mandarybu lóono, né diti nagan ni rony mandarybu» (1 Juan 5:3).
Per ¿xí galnasác guicaʼno pal rasobno Dios? Guisetlano chop.
1. ÓRNI RASOBNO DIOS RIEENI LÓONO GALÁN
«Naʼ, Jehová, naca Dios xtunylo, ni rasuidy looy par tzeeni looy galán, ni ragonés looy ló néz ro non saalo» (ISAÍAS 48:17).
Jehová Dios, ni Bisaʼ lóono rimbu né ragonés lóono. Pal nainy lóono que xilitzbu gacné lóono gonyno xinésni, non guisuidyno la Biblia par ganno xi raniiny Dios gonyno né guisobno ni náni.
2. ÓRNI RASOBNO DIOS RABALADXNO
«¡Dichós ngú buñ ni racadiag xtiitz Dios né rasob láani!» (LUCAS 11:28).
Ló naareʼ xidal millón de buñ ni rasob Xtiitz Dios nabany goxtiguie. Guisetlano toib ejemplo. Toib buñguieeu de España ni naguel bidzuitz né goninaa stipnés né dada goninaabu tzeelbu. Toibtica dzú bíilbu ni bicaʼ Moisés ló Génesis ro ritlaa que José, xiin Jacob, góc toib buñtzayxat. Buñ bitoʼ a José par ñac toib mós né goyeebu press ná diti gopbu dool. Per José diti bitzaʼbu mod gócbu, gocrabu buñtzay né binladxbu buñ (Génesis, capítulos 37 a 45). Buñguieeu de España goniʼ ndeʼ: «Órni buni pensary ló ejemplo xtuny José, bichiinni naʼ góca buñtzay, binladxi stipnés né diti nimaca bidzutzi. Ngú gocné naʼ, nigoreʼ ma nabani goxt né xfamila».
Ló la Biblia radzelno ximod cobiono stipnés. Guienno ndeʼ ló artículo ni sieed.
