De goló noʼ buñ ló Gudxlio, Dios biquiin profetas né ángeles par goninébu buñgudxlio. Láaca, biquiimbu tipnés buñ par guicaʼ ló guiich ni nábu gonybu. Dios ma goniʼ que ló dzú ni sietra sabanyno goxtiguie, per sigory ranabdiitzno ndeʼ: «¿Pu labúu guidzelno láani?».

Ni ná Dios gony sieedni ló la Biblia (2 Timoteo 3:16). ¿Ximod biquiin Dios a profetas xtuny par nacaʼ xtiitzbu? Dios goloʼ ló xpensaryibu ni goniiny láabu nacaʼ guirá biinreʼ (2 Pedro 1:21). Guislooyno láani xomod órni toib buñxirop ranab secretary xtuny guicaʼ toib guiich. ¿Chú xpensary caa ló guiichcu? Xtuny buñxiropcu. Scúca, la Biblia napni xpensary Dios, diti xpensary buñgudxlio. Dios golonés layibu par nacaʼyibu la Biblia.

Nigolú rasac ni sieed ló la Biblia, por ngú raniiny láabu que guiráxadit buñ goʼol né guieen láani. Ló naareʼ «guirá gudxrop, famil, diitz né gudx» labúu racadiag «notísy sacró ni diti radudy xtzú» (Apocalipsis 14:6). Né xcalrracné Jehová la Biblia ma góc traducirni guidopycani o tigalaʼni ló más de tzón mil diitz, más que stipnés libros.