Dios gochbu a Abrahán: «Por xiinlo, buñ de guirá clas gudx ni noʼ ló guidopynac gudxlio sacaʼyibu galnasác» (Génesis 22:18). ¿Chú góc xiin Abrahán?

De goló chop mil íz, Dios bidudy galnadip Jesús par ñony galrradziguiaʼ. Guirá galrradziguiaʼcu bislooyni que góc cumplir ni góoch Dios a Abrahán, que sadudybu galnasác a guirá gudxrop por Jesucristo ni góc xiin Abrahán (Gálatas 3:14).

Galrradziguiaʼ ni buny Jesús gocnéni buñ nadudy cuent que láabu ngú ni Dios golú par nadudy galnasác a buñgudxlio. Láaca bislooyni ximod naquiin Dios a Jesús ló dzú ni sietra par guidudybu galnasác lóono por tipzó. Guisuidyno ximod guirá galrradziguiaʼcu rabeʼ loguiaʼni tipnés cualidades sacróyen xtuny Jesús.

Godabiobu buñ né bisialbu buñguitz.

Toibtica buelt toib buñ ni caxoné lepra gonabbu Jesús nasial láabu. Jesús godan láabu né goniʼ: «Nainy naʼ». Órcuca bialbu (Marcos 1:40-42).

Gocnébu buñ né biyaʼanbu buñ ni calaʼn.

Jesús diti goniiny que buñ nadudy ló galrralán. Xidal buelt bunybu galrradziguiaʼ par biyaʼanbu xidal mil buñ ro biquiimbu chop tzón páa né chop tzón beel (Mateo 14:17-21; 15:32-38). Guirá buñ ni biyaʼanbu bidza lainy, né láaca biaʼan sobra más galrro.

Binladxbu buñ né golísbu gueʼet.

Órni bibiʼbu que toibguielot xiin toib gonaʼ viod ma goity né que diti sioʼ chú gan láabu, nigolú bioʼob xcalnabanybu né golísbu mbioxhlascu (Lucas 7:12-15).