Ni ranabdiitz buñ ni roʼol

¿Xí láani bidudy Pablo diitz ló 2 Corintios 6:14 órni biquiimbu diitzreʼ «buñ ni diti raluladx»?

Ló 2 Corintios 6:14 náni scareʼ: «Diti gacto toibsi ló toib yac yoog né buñ ni diti raluladx». Ló versículos ni sieed antes Pablo goniʼ de buñ ni diti noʼ lad congregación cristiana. Stipnés versículos ni sieed ló la Biblia ni biquiin apóstol Pablo de diitz «buñ ni diti raluladx» láaca raslooy que nacni scú.

Por ejemplo, Pablo raninébu cristianos xigony rinéyibu xhermanyibu nisló tribunales ndeʼ radudy diitz «buñ ni diti raluladx» (1 Corintios 6:6). Ndeʼ radudy diitz jueces ni goyoʼ nisló tribunal gudx Corinto. Ló ni rarop carta ni bicaʼ Pablo goniʼbu que Buñdzab «ma bicaabu xpensary buñ ni diti raluladx» né por ngú diti rienyibu diitz sacró. Buñreʼ diti ma bislooy que nainy layibu gonyibu xchiin Jehová, por ngú apóstol Pablo bisetlabu ndeʼ: «Órni noʼ ni rabiguet ronoʼ Jehová, rareʼ velocu» (2 Corintios 3:16; 4:4).

Tipnés buñ ni diti raluladx láaca rienyibu dioxh (2 Corintios 6:15, 16). Per diti guiráyibu rianladxyibu xpiin Jehová. Noʼ ni rioladx gan galnigolú. Xidal buñ noʼ tzeʼel ni nac cristianos per ma goloʼyibu guicyibu cuesnéyibu saʼyibu (1 Corintios 7:12-14; 10:27; 14:22-25; 1 Pedro 3:1, 2). Per apóstol Pablo raquiimbu diitzreʼ, buñ ni diti raluladx par guislooybu que buñreʼ diti nac de congregación cristiana, toib congregación ni «rony crer lóo Señor» (Hechos 2:41; 5:14; 8:12, 13).

Ni rasetlaa 2 Corintios 6:14 nacni toib consej ni rasac par guirá cristianos, né consej reʼ raquiinni guirá ór par guirá buñ ni ná gony galtzeʼel (Mateo 19:4-6). Toib cristiano ni ma góc dedicar né ma goyonis sagoʼbu xcalrriembu né diti sayopybu toib buñ ni gac tzeelbu ni diti raluladx lóo Dios, portín mod nacyibu né ni ragoʼyibu guicyibu né ni ronyibu crer gadzé láani mod rony pensary toib cristiano ni rony xinésni.

Per ¿xí labúu guinino de guirá buñ ni ma casuidy la Biblia né ma rieeyibu reunión? ¿Né guirá publicadores ni diti ma goyonis ga? ¿Labúu guinino que nacyibu buñ ni diti raluladx lóo Dios la? Yaca. Buñ ni ma cuacuent diitz sacró né ma caniʼsyibu lainy xcudx Jehová né ma náyibu tzonisyibu, diti labúu gaibyno layibu buñ ni diti raluladx (Romanos 10:10; 2 Corintios 4:13). Antes ni ñonis Cornelio buñ bimbu láabu xomod toib «buñguieeu ni buny xinésni né gop respet Dios» (Hechos 10:2).

Per ¿xinésni ngú que toib cristiano ni ma góc dedicar ñoʼ xinobybu né ñonybu galtzeʼel né toib publicador ni diti ma goyonis ná diti rac aplicar ni ná 2 Corintios 6:14 láabu la? Yaca. ¿Xigony? Nacni scú, portín nga nac consej ni bidudy apóstol Pablo a cristianas ni nac gonaʼ viod. Láabu bicaʼbu: «Labúu gonybu galtzeʼel né nitisi buñ ni nainy láabu, per nosi né buñ ni rasob Señor» (1 Corintios 7:39). Xomod rasetlaa consej reʼ, guirá cristianos ni ma góc dedicar non gonyibu galtzeʼel «nosi né buñ ni rasob Señor».

¿Xí radudy diitz «nosi né buñ ni rasob Señor», né diitz ni ná «lóo Cristo»? Ló Romanos 16:8-10 né Colosenses 4:7, Pablo rasetlaa buñ ni noʼ «lóo Cristo» né «ni rasob Señor». Órni rolno versículos reʼ, radudyno cuent que ndeʼ raslooy, «ni rony dxiin», «ni Dios racacuent», «herman ni ronladxno», «ni diti rasian Dios» né «ni riodieʼ ló dxiin».

¿Pu ór toib buñ «riodieʼ ló xchiin Señor»? Órni ronybu dxiin né guidopy xcalnabanybu né diti rioʼbu galrrasaʼ por láasibu. Jesús rabexa: «Pal noʼ ni naʼ gac xpiina la, diti coʼbu cuent láacabu, né non guicaʼbu yac nadop xtunybu né guicanalbu naʼ guirá ór» (Mateo 16:24). Toib buñ rasob né rony ni ná Cristo órni rac dedicarbu Dios. De ngú rionisbu, né Jehová Dios racacuent láabu. * Por ngú órni buñ rony galtzeʼel né buñ ni rasob Señor, ndeʼ radudy diitz que gonybu galtzeʼel né toib buñ ni ma bislooy que nigolú rony crer lóo Dios né rony crer lóo Señor Jesucristo (Santiago 1:1).

Toib buñ ni casuidy né testigos xtuny Jehová né ma caniʼsyibu lainy xcudx Jehová raquiin gacnéno layibu. Per raquiin ganno que diti ma góc dedicarbu Jehová, né diti ma bidudybu xtiitzbu tzodieʼbu gonybu xchiin Jehová. Diti ma bisiambu guirá mod nacbu né raquiin guisiambu stipnés cós, né rasac gonybu láani par labúu gacbu toib cristiano dedicado né labúu tzonisbu, antes de gonybu galtzeʼel non guisiambu mod nacbu.

¿Galán láani que toib cristiano tzoʼ xinobybu ni ralooypani ma casuidy la Biblia né dada labúu cuésbu dada órni buñreʼ ma goyonis né ma órcu gonybu galtzeʼel la? Yaca. Toib cristiano ni ma ná gony galtzeʼel né toib buñ ni casuidy la Biblia diti sadudybu cuent que pal buñreʼ ná tzonis portín ronladx Jehová.

Estudiante reʼ nac toib publicador ni diti ma goyonis, né goxeʼsi tiemp sanébu ni casuidybu dada órni raniʼs fe xtunybu par tzonisbu. Por ngú, consej ni ná, gonyno galtzeʼel né buñ ni rasob Señor diti naganni. ¿Né xí rac né toib buñ ni ma labúu gony galtzeʼel, né xfamilbu nac Testigo, nodieʼbu lainy congregación por xidal íz né nacbu publicador ni diti ma goyonis ga? Pal nacni scú, ¿xí láani racaa lóbu par diti gac dedicarbu? ¿Xigony diti ronybu láani? ¿Diti napbu confianz lóo Jehová la? Ná diti nacbu buñ ni diti raluladx, diti labúu guinino que ronybu crer «lóo Señor».

Consej ni bidudy Pablo par galtzeʼel racnéni lóono (Isaías 48:17). Órni chop buñ ni ná gony galtzeʼel ma góc dedicaryibu Jehová, Jehová sacné layibu ló compromis ni ma bunyibu, né labúu sabanyibu goxtiguie portín ronyibu pensary toibsi mod. Láaca órni ronyno galtzeʼel né «buñ ni rasob Señor», raslooyno que noʼno né Jehová, né modreʼ sacaʼno xidal galnasác por tipzó né sac cumplir texto ni ná: «Looy diti sasianlo buñ ni diti rasian looy» (Salmo 18:25).

[Ñeʼ guiich]

[Dibuj]

Looy diti sasianlo buñ ni diti rasian looy