XIDAL buñ diti nap confianz pal noʼ pu racné oración buñ. Per diti ngú ná la Biblia (Lucas 22:40; Santiago 5:13). Oración diti nosi racnéni lóono en sentido espiritual, láaca racnéni lóono emocional né físico. ¿Ximod labúu racni scú?

Guisetlano toib ejemplo: órni mbioxien racaʼ toib galrrascad, ¿xí raiby bixiosbu o xinaʼbu láabu gonybu? Diti nosi guibaladxyibu por ni cacaʼyibu: non guidudyibu guixquix por galrrascad ni ma cuaʼyibu. Órni radudyno guixquix riendxichni que rareʼni lainy xcalnabanyno. Né scúca rac órni radudyno guixquix Dios. Nigoreʼ guienno tipnés clas oración.

Órni radudyno guixquix Dios. Órni radudyno guixquix Dios, ragoʼno guicno guirá galnasác ni ma cuaʼno. Por ngú, radudyno guixquix guirá ór, rioʼ nakitno né diti rareʼganno (Filipenses 4:6).

Ejemplo: Oración ni buny Jesús ro bidudybu guixquix Bixiosbu por ni bicadiag láabu (Juan 11:41).

Oración ro ranabno perdón. Órni ranabno Dios gony perdonar lóono rasialdóni xcalnabanyno. Racnéni xcalrrienno portín racnéni lóono guidudyno cuent que bunyno toib galkié rodann.

Ejemplo: Oración ni buny David órni góc arrepentir (Salmo 51).

Oración par guinabno sabiduría né par conés Dios lóono. Ronyni que gacno buñdxo, racnéni lóono guidudyno cuent que por stiplóocano diti labúu gonyno láani, láaca racnéni lóono gapno confianz lóo Bixiosno ni noʼ guibá (Proverbios 3:​5, 6).

Ejemplo: Oración ro Salomón gonab lóo Dios par nadudy sabiduría né nagonés láabu par labúu ñony mandarybu gudx Israel (1 Reyes 3:​5-12).

Oración órni noʼno ló galrrasaʼ. Órni noʼno ló galrrasaʼ né raibyno láani Dios rialdó xcalnabanyno. Radudyno cuent que guirási ór raquiinno xcalrracné Jehová (Salmo 62:8).

Ejemplo: Oración ni buny rey Asá órni cualóbu toib enemig ni gop xiroʼ galnadip (2 Crónicas 14:11).

Oración par buñ ni caquiin galrracné. Racnéni lóono diti tzoʼno galrrasaʼ por lóosino gapno galrronladx né tzoʼno galrrasaʼ por stipnés.

Ejemplo: Oración ni buny Jesús par ñacné Dios xpiimbu (Juan 17:​9-17).

Oración par gonyxiroʼno Dios. Respet né galnadxiʼ ni napno Jehová raniʼsni órni ronyxiroʼno guirá cualidades né guirá cós sacróyen ni bisaʼbu. Guirá oración reʼ láaca racnéni lóono guibigaxno Dios xtunyno né Bixiosno ni noʼ guibá.

Ejemplo: Oración ro bunyxiroʼ David guirá ni bisaʼ Dios (Salmo 8).

Per diti nosi guirá ni ma bisetlano: órni ronyno oración láaca racnéni lóono gapno «paz xtuny Dios ni digaldi guieen buñgudxlio» (Filipenses 4:7). Paz xtuny Dios racnéni lóono tzoʼno sacró ló gudxliogoxreʼ, né ndeʼ nigolú rasac. ¡Dada racnéni lóono gacno buñ nasac! (Proverbios 14:30). Per ¿ximod labúu gapno paz reʼ? ¿Labúu gapno láani stiplóocano la, o noʼ stipnés cós ni raquiinno la?