NAGAN par guidzel buñ toib religión ni diti rony oración. Guirá buñ rony oración lainy xquidaʼ, lainy templo, santuarios o sinagogas. Tipnés religión raquiin rosary, devocionarios né cilindros de oración. Ronyibu láani toibyibu o noʼ ni rony compañer layibu, per guiráyibu ronyibu oración.

Nosi buñ rony oración, nimal yaca. Xomodca nimal raquiinno galrro, nís né buu. Láaca rálno, raniʼsno né raityno (Eclesiastés 3:19). Per nosi buñ rony oración. ¿Xigony?

Portín raquiinno láani. Buñ raquiin oración par guibigax ronoʼ espíritus; par labúu tzoʼyibu né ni nac sagrado né eterno. Mod ná la Biblia, ma wal golnéno tzoʼno galrrasaʼ por cós espiritual (Eclesiastés 3:11). Jesús goniʼ láani scareʼ: «Dichós guirá buñ ni nan que non guiyopy Dios» (Mateo 5:3).

Ni noʼ xidal templos né stipnés cós, guirási ór cayonyibu oración portín rioʼyibu galrrasaʼ por cós espiritual. Tipnés buñ rayopy cós espiritual nislainyca o rayopyibu xcalrracné buñ. Per radudylo cuent la, ná ronyibu rutirigaʼlni layibu diti labúu rony satisfaceryibu necesidad espiritual xtunyibu. Buñgudxlio tiptisi raity né diti rien ximod nacni. Nosi ni diti raity, ni naní xcalrrien né ni nap galnadip labúu gacné lóono. Per ¿xí láani ngú guirá cós espiritual ni rachiin lóono gonyno oración?

Por ejemplo, ¿ma cualólo tipnés galnagan né diti bidzel xcalrrienlo xí ñonylo la? Órni goity xfamilo ni más ronladxlo, órni goloʼlo guiclo xi láani gonylo, órni bunylo toib galkié rodann, ¿gosaclo que diti noʼ chú labúu guisialdó xcalnabanylo la, que diti noʼ chú labúu guisanés looy né que diti noʼ ni labúu guitudy scásiʼ ni ma bunylo la?

Nosi la Biblia ni rasetlaa de tema reʼ labúu gapno confianz láani. Rasetlani que oración labúu gacné lóono. Nosi la Biblia rasetlaa de oración de buñguieeu né de buñgonaʼ ni gonab nasialdó Dios xcalnanyibu, nagonés né natudy Dios scásiʼ xcalkiéyibu, láaca racapyni tipnés galrranabdiitz ni más rony buñ (Salmo 23:3; 71:21; Daniel 9:​4, 5, 19; Habacuc 1:3).

Guirá oración reʼ casi toibsi midid gocni. Guirá ni buny oración gonyibu chú laa non guiquiinyibu par labúu tzoʼ ni guicadiag layibu.