• ÍZ NI GOLBU: 1941

• GUDX: BENÍN

• TIPNÉS CÓS NI BUNYBU: BUÑGUIEEU NI GOLESNÉ XIDAL BUÑGONAʼ NÉ LÁACA GÓCBU XI ENEMIG TESTIGOS XTUNY JEHOVÁ

NI BUNI LÓ DZÚ NI SEE:

Goola lainy gudx Cotonou, toib gudx xiroʼ ni noʼ Benín. Bisuidyibu naʼ par tzaʼya guidaʼ, per casi diti goyaʼya mix. Xidal buñ católicos gopyibu xidal buñgonaʼ, portín lagarycu goyoʼ permís que toib buñguieeu ñap xidal buñgonaʼ. Naʼ la, gopa tap buñgonaʼ ni góc tzeʼela.

Íz 1970 cualóyibu gobiernos lainy gudx Benín. Buni pensary que galán ngú ni cayoni par gacnéya xcudxi, goyodieʼya loni né goyoʼya ló política. Revolucionarios bianladxyibu testigos xtuny Jehová portín gosagaʼ galayibu, né dada naʼ bianladxi layibu. Dzú ni bilaʼkyibu misioneros lainy gudxcu íz 1976 buni pensary que ma dipa nabiguetyibu.

¿XIMOD BITZAʼ LA BIBLIA MOD BIBANYIBU?:

Revolución biloxni íz 1990, né bidziguiaʼya que misioneros ni nac Testigos bibiguetyibu. Buni pensary que Dios noʼ né layibu. Par ló dzúcu ma diti cayoni dxiin ro buni dxiin. Toibtica xcompañera nac Testigo, né gochbu naʼ ni ronybu crer. Bíilbu tipnés versículos de la Biblia ro ritlaa que Dios rony xinésni né nap galrronladx (Deuteronomio 32:4; 1 Juan 4:8). Bioladxi guirá cualidades ni nap Jehová, né goniiny naʼ ñaana más, por ngú gosalóya bisudi.

Nimaca goyaʼya reunión ni rony testigos xtuny Jehová né bidziguiaʼya galnadxiʼ ni raslooyibu saʼyibu: ragobioyibu guiránac buñ. Órni más bidzak layibu bidudi cuent que nacyibu xpiin Jesús ni rony xinésni (Juan 13:35).

Bienna pal nainy naʼ goni xchiin Jehová, non nasiana Iglesia Católica. Gosac nagana ñoni láani, portín goyoʼya ló galrrasaʼ xi naniʼ stipnés buñ. Ná gocla buni láani, né xcalrracné Jehová gopa balory né bisiana Iglesia.

Per láaca goyoʼ stoib cós ni non nasiana. Ló la Biblia bisudi que Dios diti racacuent buñ ni nap xidal tzeʼel (Génesis 2:​18-​24; Mateo 19:​4-6). Par Jehová nosi gosac primer galtzeʼel ni buni, por ngú buny registrar láani. Né stipnés gonaʼ ni góc tzeʼela ma diti golesnéya layibu, per xcuenta goyoʼ par nadudyibu dzú. Después chopyibu góc testigos xtuny Jehová.

¿XÍ GALNASÁC MA CUAʼYA?:

Ná tzeʼela nacsabu católica, rony respetarbu naʼ ni cayoni xchiin Jehová, né guiropcado radudydo cuent que naʼ ma bitzaʼya mod góca.

Ló dzú ni see buni xpensari que política labúu ñacnéni buñ, per diti gocni scú. Nigoreʼ naana que Gobierno xtuny Dios nosi láani labúu cueʼni galnagan ni noʼ ló Gudxlio (Mateo 6:9, 10). Radudi guixquix Jehová portín ma bisuidybu naʼ mod guibani goxtiguie.

• ÍZ NI GOLBU: 1977

• GUDX: BRASIL

• TIPNÉS CÓS NI BUNYBU: PASTOR PENTECOSTAL

NI BUNI LÓ DZÚ NI SEE:

Goniʼsa lainy gudx Itu, ni noʼ São Paulo, lagarycu nogoluʼ buñ mal.

Nigolú buñyox góca né biyobi galrradíil, láaca bitoʼya drogas. Per bidudi cuent que guirá ni cayoni nadxin dzú ñaʼya press o lainy baʼ, por ngú bisiana guiráni. Né gosalóya goyaʼya Iglesia Pentecostal, de ngú bidxina góca pastor.

Buni pensary que por ni ma naca de Iglesiacu ma labúu ñacnéya buñ de lagarycu, né gosalóya bitudi toib programa de religión xtuni por radio modreʼ xidal buñ bimbu naʼ. Per dxoga dxoga bidudi cuent que Iglesiacu diti rioʼ galrrasaʼ por xpiin, nili par gony ni ná Dios. Nosi goyoʼyibu galrrasaʼ par guitopyibu bidxiich. Por ngú bisiana láani.

¿XIMOD BITZAʼ LA BIBLIA MOD BIBANYIBU?:

Órni gosaloya bisudi né testigos xtuny Jehová, bidudi cuent que gadzé mod nacyibu que stipnés religión. Bidziguiaʼya chop cós ni ronyibu. Primer la, diti nosi raniʼyibu que ronladxyibu Dios né buñ, xalagary ngú raslooyibu láani, ni rarop, diti rioʼyibu lad partid nili rieeyibu guerr (Isaías 2:4). Guiropca cós reʼ buny convencer naʼ que ma bidzela religión ni rony xinésni: néz nabé ni riné buñ ro guibany (Mateo 7:​13, 14).

Bidudi cuent que par labúu ñoni xchiin Jehová non nasiana guirá mod naca. Por ejemplo, gaca buñdxo né cueʼya más tiemp par tzoʼya né xfamila. Gosac nagana natzaʼya mod naca, per labúu buni láani né xcalrracné Jehová. Tzeʼela ni primerdiguieʼ gosaló bisuidy la Biblia que naʼ nigolú bidziguiaʼbu né góc animarbu par bitzaʼbu mod gócbu. Diti xidzú guiropcado gonido gacdo testigos xtuny Jehová. Né toibsi dzú goyonisdo.

¿XÍ GALNASÁC MA CUAʼYA?:

Tzeʼela né naʼ rabaladxdo ni cayacnédo guionca xiindo par guidzakyibu Jehová sacró. Nacdo toib famil ni noʼ nakit. Radudi guixquix Dios por ni noʼya lainy xcudxbu. La Biblia ratzaʼ mod nabany buñ, né naʼ naca toibtica de layibu.

• ÍZ NI GOLBU: 1957

• GUDX: AUSTRALIA

• TIPNÉS CÓS NI BUNYBU: NAGAN MOD GONIʼSA DZÚ GÓCA MBIOX

NI BUNI LÓ DZÚ NI SEE:

Naʼ lagol de ló gatz xiin bixiosa né xinaʼ né goniʼsa lainy gudx Newcastle (Nueva Gales del Sur). Bixiosa góc toib buñguieeu mal né gosochbu. Xinaʼya láaca buñ mal góc, né nigolú bunynaabu naʼ né xtiitzbu né láaca godimbu naʼ. Guirá dzú gochbu naʼ que naca buñ mal né sadxin dzú nadubylagaʼya ló infierno. Guirá ni gochbu naʼ bunyni que nigolú bidzubi.

Guirá ór xinaʼya nigolú bisioʼobbu xcalnabani né ngú bicaa naʼ par ñaʼya scuel. Dzú gopa 11 íz, buñchiin goleʼyibu naʼ ronoʼ bixiosa né xinaʼya, ma xcuentyibu goyoʼya. De ngú goysanyibu naʼ lainy toib convento, né órni gopa 14 íz bireʼya de lagarycu. Diti goniiny naʼ nabiguetta lidxi, por ngú cay ni laa Kings Cross (toib barrio de Sydney) gocni suusi lidxi.

Laʼga bibani ló cay, biaba ladxña drogas, alcohol, bibiʼya pornografía né góca buñyox. Toibtica buelt nigolú bidzubi. Noʼya lainy toib yoʼ né toibtica goxin chop buñguieeu goyguen xpixuan yoʼ reʼ. Xoʼ reʼ bixel naʼ par tzagasi, per bicadiaga guirá ni goniʼyibu. Goniʼbu que natoʼbu ná né chop buñguieeucu, né chop buñguieeu reʼ goniʼ que nacachlanyibu naʼ lainy toib bark né de ngú ninéyibu naʼ gudx Japón par ñoni dxiin lainy toib bar. Nigolú bidzubi, por ngú bireʼya niis ro bentan né biyobi chú ñacné naʼ.

Bidzagloya toib buñguieeu ni laʼra bidxin lainy gudxcu, né goodxi láabu guirá ni casacloya, par naʼ la, modreʼ nadudybu bidxiich naʼ. Xalagary ngú, goynébu naʼ ro riaʼanbu par ñaasa né ñooya. Golesnéya láabu, né tobiz después bunydo galtzeʼel.

¿XIMOD BITZAʼ LA BIBLIA MOD BIBANYIBU?:

Órni casudi la Biblia né testigos xtuny Jehová, xidal mod gosaca. Nigolú bidzutzi órni goona que Buñdzab nap dool de guirá cós mal ni cayac; guirá ór noʼ ni góoch naʼ que Dios rony que tudyno ló galrrioʼob. Per láaca bialdó xcalnabani órni bisudi que Dios diti rony castigar buñ ló infierno, toib galrrasuidy ni bitzuiby naʼ dzú góca mbioxien.

Nigolú bidziguiaʼya órni bibiʼya que Testigos radudy lagary que la Biblia gacné layibu par ganyibu xi láani gonyibu, ronyibu crer ni rasuidyibu. Cuensósi goniya né buni, per ná scú, godabioyibu né gopyibu respet naʼ.

Ni más gosac nagana ngú nasiana mod buni xpensari. Buni pensary que diti noʼ pu raquiinna né nigolú bianladxi naʼca. Guirá pensary reʼ nigolú bisioʼobni xcalnabani dada después ni ma goyonisa xomod toib testigo xtuny Jehová. Bidudi cuent que nadxiʼya Dios per gondxichi que láabu dipa labúu ñonladxbu toib buñ suusi naʼ.

Quins íz después ni goyonisa bitzaʼ mod buni xpensari. Ló toib discurs ni godudy lainy Salón del Reino de Testigos xtuny Jehová, hermano reʼ bisetlabu ni ná Santiago 1:​23 né 24. Versículos reʼ rony compararni Xtiitz Dios né toib spej ro labúu guibiʼno lóocano xomod rabiʼ Jehová lóono. Gonabdiidza naʼca pal mod rabiʼya naʼ Jehová rabiʼ naʼ de stoib mod. Primer la, diti buni crer ni ná texto reʼ. Walsa buni xpensari que diti noʼ razón gonladx Dios naʼ.

Chop tzón govitz después biila toib texto ni bitzaʼ mod góc xpensari. Láani ngú Isaías 1:​18, Jehová goniʼ diitzreʼ: «Coltaʼ né gony reglarno láani guiropcano [...]. Ná xcalkiéto gacni xomod escarlata ni xinabuu, sian quiichbeeni xomod yel». Gosaca suusi Jehová naniné naʼ né ñaiby naʼ: «Godaʼ, Vicky, gony reglarno láani. Rimbuya, rimbuya xcalkiélo, rimbuya xcalnabanylo, né ná scú ronladxi looy».

Goxincu ma diti labúu gotiasi. Ná diti buni crer que Dios nadxiʼ naʼ, per gosalóya buni pensary ló xcalgoity Jesús. Órcu bidudi cuent que Jehová gopbu xiroʼ paseins naʼ por xidal tiemp, né bienna que bislooybu xcalnadxiʼbu naʼ de xidal mod. Né guirá ndeʼ gocni suusi ñaabi láabu: «Xcalnadxiʼlo diti sigaʼlni naʼ. Xcalgoity Xiinlo diti rigaʼlni par guitudyni scásiʼ xcalkiéya». Bibixladxi xcalgoity Jesús. Per nigoreʼ, ni roni pensary ló xcalrrascad Jehová modreʼ bidudi cuent que ronladxbu naʼ.

¿XÍ GALNASÁC MA CUAʼYA?:

Rasaca que noʼya nayaa, né noʼya goxtiguie. Ma sacró rabesnéya tzeʼela né rabaladxi ni ma labúu gacnéya stipnés. Guirá dzú rasaca que noʼya más gaxtiguié de Jehová.

• ÍZ NI GOLBU: 1974

• GUDX: RUSIA

• TIPNÉS CÓS NI BUNYBU: BIOLADXGOLUʼBU HEAVY METAL

NI BUNI LÓ DZÚ NI SEE:

Goola lainy toib famil pobre lainy gudx Vótkinsk, lagaryca ro gool toib compositor ni laa, Piotr Ilič Chaikovski. Bixiosa gócbu buñtzay, per láaca gosochbu, por ngú guirá ór goyoʼ galrradíil ronoʼdo.

Naʼ diti góca toib buen estudiante, né chop tzón íz después gosaca que diti noʼ pu raquiinna. Góca buñdzuu né nigolú bidzutzi né guirá buñ, né gosac nagana ñaya scuel. Por ejemplo, órni bidxin ór guiniya nisló xcompañera de yolayscuel gosac nagana ñoni láani, goyoʼ dzú labúu buni láani. Dzú goyoʼya ló secundaria, órni bilox tobiz bicaʼyibu diitzreʼ ló xcuaderniya: «Raniseʼbu; diti labúu raniʼbu ni ronybu pensary». Guirá diitzcu nigolú bisioʼobni xcalnabani né buni pensary que diti noʼ pu raquiinna. Órcu gonabdiidza naʼca: ¿Xigony guibani?

Dzú góca mbioxhlasien gosalóya gooya alcohol. Primer la, buni que gosaca sacró per órni godudy midid gooya bisioʼobni xcalrriena. Nac nacsi bibani. Nigolú nabann goyoʼya né por xidal dzú diti bireʼya de riolidxi, né dada buni pensary nagati naʼca.

Órni bisaʼya 20 íz, nigolú bioladxi música heavy metal. Música de clas reʼ goloʼ nakitni naʼ, por ngú bidzaga tipnés buñ ni buny scúca, bidudi lagary que nagaʼ guitzguica, bidxiʼda guʼur guicadiaga, né godoca lairy xomod roc buñ ni roʼol música ni bicadiaga. Dxoga dxoga góca buñ ni diti bidzuiby né góca buñ nadox, ndeʼ buny que ñoʼ galrradíil lainy xfamila.

Ma góca stoib clas buñ. Buni pensary que pal nacadiaga música reʼ ñonyni que ñoʼya nakit, per diti scú birecaani. Né órni goona xi clas buñ nac artistas ni bidziguiaʼya bireʼgana.

Né buni pensary nagati naʼ stoib, per ndeʼra ma ñoni láani nigolú. Diti buni láani portín buni pensary ló xinaʼya ni ronladx naʼ né ni buny cós tzaay por naʼ. Nagan gocni par naʼ: diti goniiny naʼ nabani per láaca diti labúu nagati naʼca.

Par labúu ñoʼya sacró gosaló biila tipnés libros ruso. Né ló toibtica de láani bisetlani de toib ministro religioso. Né órcu goniiny naʼ ñoni alga por Dios né por stipnés buñ. Bixala xcalnabani nisló Dios, ni dipa goyoʼ dzú buni, gonaba lóbu nasuidybu naʼ par labúu ñoʼya nakit. Órni cayoni oración bialdó xcalnabani. Per ni más bidziguiaʼya láani ngú que chop ór después ni buni oración: toib testigo xtuny Jehová godapbu xitz puert né gochbu naʼ pal nainy naʼ guisudi la Biblia. Modreʼ cuapy Dios oración xtunyni. De golú dzúcu bioní xcalrriena né goyoʼya nakit.

¿XIMOD BITZAʼ LA BIBLIA MOD BIBANYIBU?:

Ná gosac nagana, bisabi guirá cós ni radzak né heavy metal. Ná scú guirá música reʼ diti labúu bialadxi láani nimaca. Guirá ór órni godudi ro bidopdo, bisetnaladxi cós ni bisioʼob naʼ. Diti goniiny naʼ nagotza cós tzaay ni cagoʼya ló xpensari né ni noʼ lainy xcalnabani, por ngú ma diti godudi guirá lagarycu. Láaca órni bitzanló ló xpensari guisetnaladxi guirá ni buni, órcuca buni oración. Modcu labúu gopa «paz xtuny Dios ni digaldi guieen buñgudxlio» (Filipenses 4:7).

Ló ro casudi la Biblia que xpiin Dios non guiniʼyibu de fe xtunyibu né buñ (Mateo 28:​19, 20). Xpensari diti labúu ñoni láani, per órcuca bidudi cuent que guirá ni casudi bunyni que ñoʼya nakit né goxt. Goona que stipnés buñ láaca raquiin guisuidy ni ná la Biblia. Por ngú ná bidzubi, goodxi stipnés buñ ni casudi. Né ndeʼ gocné naʼ par nasaca sacró né guirá xcalrrasuidy la Biblia bidxinni lainy xcalnabani.

¿XÍ GALNASÁC MA CUAʼYA?:

Nigoreʼ goxtiguie rabesnéya tzeʼela. Ma gocnéya xidal buñ guisuidy la Biblia, toibtica de layibu ngú bisana né xinaʼya. Ni cayoni xchiin Dios né ni cayacnéya stipnés buñ guimbu láabu racnéni naʼ par guidudi cuent que diti nac nacsi nabani.