Desde dzú góca mbiox nigolú gosac guirá cós ni noʼ ló Gudxlio par naʼ. Guirá ór xfamila né naʼ goyoʼdo pasiary ronoʼ guixdaʼ né lagon ni nagoo gudx ni rabésa, Jyväskylä, ni riaʼan galay Finlandia. Láaca ronladxi guirá nimal. ¡Dzú góca mbiox nigolú goniiny naʼ naguʼdxi guirá buʼk né míich ni bidzela! Órni goniʼsa diti bioladxi que buñ ñonynaa nimalien, por ngú goyoʼya lad toib organización ro rony defenderyibu nimal. Cú bimbuya stipnés buñ ni rony pensary xomod naʼ.

Bunydo campañas par diti ñoʼ xi ñac nimal. Bikiʼsdo guiich, bisiegdo ló néz né cualódo tiend ni bitoʼ guidlaidy nimal né láaca laboratorios. Bidxin midid bunydo toib organización par gando nimal. Goyodieʼdo loni né guirá ór cualódo buñchiin. Xidal buelt gonásyibu naʼ né goyaʼya nisló juez.

Láaca goyoʼya galrrasaʼ por stipnés galnagan, por ngú goyoʼya ló stipnés organización xomod Amnistía Internacional né Greenpeace, nigolú goyodieʼya loni. Láaca goyoʼya galrrasaʼ por buñ pobre né buñ ni diti nap ni guá.

Per después bidudi cuent que diti labúu guitzaʼya mod nac Gudxlio. Rioʼ ór bunydo gan tidxó, per ni más xiroʼ racni más xiroʼ. Bidudi cuent que bidza cós mal ló Gudxlio né diti noʼ chú rioʼ galrrasaʼ por láani. Bidopy xcalnabani portín diti goygaʼlni naʼ ñony reglar láani.

Nigolú bisioʼobni naʼ ni diti labúu buny reglar galnagan ni noʼ ló Gudxlio, por ngú gosaló buny pensary lóo Dios né ló la Biblia. Ná nírcu bisudi né testigos xtuny Jehová né goona que nacyibu buñtzay né rioʼyibu galrrasaʼ por buñ, dzúcu diti goniiny naʼ natzaʼya mod bibani. Per nigoreʼ ma gosaguela.

Biyobi Biblia xtuni né gosaló biila láani. Bisialdóni xcalnabani. Biila xidal textos ni rasetlaa ximod ganno nimalien. Por ejemplo, Proverbios 12:10 ná: «Buñ ni rony xinésni ran nimal ni nap». Láaca goona que diti xtol Dios radudyno ló galrrioʼob. Xalagary ngú cayac xiroʼ galnagan portín casi guirá buñ diti rasob ni ná Jehová. Nigolú bidxin lainy xcalnabani órni goona ximod ronladx né ximod rap Jehová paseins lóono (Salmo 103:​8-14).

Ló dzúcu bidzela toib libro ro gonaba guisuidyibu naʼ ni ná la Biblia né bixela láani por correo. Diti xidzú bieed testigos xtuny Jehová ronoʼya né biruʼyibu naʼ guisudi la Biblia. Nimaca gosaguela. Láaca gosaló goyaʼya reunión lainy Salón del Reino. Dxoga dxoga guirá ni bisudi goniʼsni lainy xcalnabani.

La Biblia nigolú gocnéni naʼ par labúu bitzaʼya mod góca. Bisiana gues né galrrasoch; goctzaya más sacró né bitzaʼya mod goniya, bitzaʼya mod bibiʼya buñchiin (Romanos 13:1). Láaca ló dzú ni see góca buñyox per bitzaʼya mod góca.

Ni más gosac nagana ngú nareʼya lad organización ro goyoʼya. Diti nimaca bisiana láani. Primer gosaca que pal nareʼya ladyibu, ñacni suusi nabeʼya layibu tiplad. Per bidudi cuent que nosi Gobierno xtuny Dios ngú ni labúu gony reglar láani, por ngú goyodieʼya buni xchiin Dios né bisudi buñ (Mateo 6:33).

Órni goyoʼya lad organización xtuni par naʼ nosi goyoʼ buñtzay né buñ mal, né cualóya buñ mal. Nigoreʼ ma goleʼya galrrianladx lainy xcalnabani, roni rutirigaʼlni naʼ par cobioya guirá buñ (Mateo 5:44). Galrronladx reʼ raslooya láani de xidal mod. Por ejemplo, rasudi buñ ni ná Gobierno xtuny Dios. Rasaca sacró portín dxiinreʼ racnéni buñ guiguaʼ goxt né sacró, né radudyni buñ toib esperanza.

Bisiana galnagan reʼ ladxña Jehová, ngú gocné naʼ nabani goxt. Napa confianz que Jehová sony reglarbu guirá galnagan ni racaló buñgudxlio né nimal. Láaca diti sadudybu lagary que Gudxlio guinitlóni. Saquiimbu Gobierno xtunybu par gony reglarbu guirá galnagan ni noʼ xtol buñgudxlio (Isaías 11:1-9). Nabani goxt portín ma naana ni ná la Biblia né láaca portín rasudi ni náni a stipnés buñ. Ma diti caa guica guitzaʼya mod nac gudxliogoxreʼ.