Toibtica dzú órni Jesús goyoʼ Jerusalén, goniʼbu de Bixiosbu, Jehová, né bisetlabu que guirá líderes religiosos diti ronyibu xinésni (Juan 8:12-30). Ni goniʼ Jesús raslooyni lóono ximod guisuidyno ni rony crer tipnés buñ de Dios. Láabu goniʼbu: «Pal rasobto ni raabi, nacto xpiina, simbuto ni nigolú né sacto libres» (Juan 8:31, 32).

«Pal rasobto ni raabi», né diitzreʼ Jesús bislooy ximod toib buñ labúu gan pal toib galrrasuidy nacni xinésni o yaca. Órni tzoʼ ni gaiby looy de Dios, gonabdiitz looyca: «¿Radzak ndeʼ né ni goniʼ Jesús, mod bisuidybu né mod ná la Biblia la?». Buny scúca mod buny tipnés buñ ni bicadiag apóstol Pablo: bisuidytzay ni ná la Biblia par ganlo pal xinésni ni cayaibyibu looy (Hechos 17:11).

Ngú ni buny Marco, Rosa né Raimunda, ni ma bisetlano, bisuidyibu la Biblia né testigos de Jehová. ¿Xí bienyibu?

Marco: «Testigo ni bisuidy lóodo cuapybu guirá galrranabdiitz ni gopdo né xcalrracné la Biblia. Dxoga dxoga gondxiʼdo Jehová né xcaltzeeldo góc nadipni».

Rosa: «Buni pensary que la Biblia nosi nac toib libro de filosofía ni rayopy mod cuéxa chú ngú Dios. Bidxin midid la Biblia golexa galrranabdiitz ni gopa. Nigoreʼ la, naana que Jehová nigolú noʼbu, né labúu gapa confianz láabu.

Raimunda: «Gonaba lóo Dios gacné naʼ guimbuya láabu. Después, tzeʼela né naʼ gosalódo bisuidydo la Biblia. ¡Bidxin midid bisuidydo galnigolú de Jehová! Nigolú bibaladxdo portín biendo xi clas Dios nacbu».

La Biblia ni sieed de Dios, diti nosi raniʼ galnigolú de láabu, láaca raniʼni xi cualidades nap Dios. Né racnéni lóono guimbuno «cós ni ma bidudy Dios lóono por xcalnadxiʼbu» (1 Corintios 2:12). ¿Xigony diti rasuidylo ni ná la Biblia de Dios, né ni gonybu ló dzú ni sietra? Labúu ganlo más de guirá ndeʼ ló www.pr418.com/zpa ro ná «Ni rasuidy la Biblia > Mod rabexa la Biblia tipnés galrranabdiitz». Lagary reʼ láaca labúu guinablo toib curso bíblico né toib testigo xtuny Jehová tzáguen looy. Pal ronylo láani, sadudylo cuent que labúu gandxiʼlo Dios.