Goola lainy Székesfehérvár, toib gudx ni noʼ gudx Hungría ni nap más de tipmil íz né ni napgoluʼ historia. Rasetnaladxi guirá ni góc ló Segunda Guerra Mundial lainy gudxcu.

Bixiogola né soiscola bisniʼsyibu naʼ. Rasetnaladxi layibu, per máspa la soiscola, Elisabeth. Bisuidybu naʼ ñoni crer lóo Dios. Dzú gopa tzón íz guirá goxin bunybu que naniya Padrenuestro né láabu. Per ma órni gopa casi 30 íz ma órcu bienna xi radudy diitz oración cu.

Bixiogola né soiscola gonyibu naʼ dzú góca mbioxien, portín bixiosa né xinaʼya bunyibu dxiin dzúna gueʼel par labúu natoployibu bidxiich par nasiʼyibu toib yoʼ sacró. Per cada chop xomal, dzú sábda guirá xfamila bidop par ñoodo toibsi. Guirá ndeʼ nigolú rasetnaladxi láani.

Íz 1958 labúu birebuʼ ni goniiny bixiosa né xinaʼya: gosiʼyibu toib yoʼ. ¡Ndeʼra ma labúu goyoʼya né layibu! Nakit goyoʼya, per galnakit reʼ diti goclani; xhoop beʼo después, goity bixiosa de cáncer.

Bioʼob xcalnabani. Rasetnaladxi goodxi Dios: «Gonaba looy nalaalo bixiosa. ¡Raquiinna láabu! ¿Xigony diti bicadiaglo naʼ?». Bidopy xcalnabani portín goniiny naʼ ñaana pu noʼ bixiosa. Gonabdiidza naʼca: «¿Seebu guibá la, o ma seebu por tipzó?». Gopa galenvidy guirá mbioxien ni nabany bixios né xinaʼ.

Por xidal íz casi guirá dzú goyaʼya roʼ baʼ. Bixixiba nisló xpaʼ bixiosa né buni oración: «Ranaba looy Dios, nainy naʼ gaana pu noʼ bixiosa». Láaca gonaba láabu ñacnébu naʼ ñaana xigony bisaʼbu lóono.

Dzú gopa 13 íz goloʼya guica nasudi diitz alemán, xpensari modreʼ labúu nadzela galrracapy ló guirá libros xtuny Alemania. Íz 1967 goyaʼya bisudi gudx Jena, ni goyoʼ lagary ro goyoʼ Alemania oriental. Biila guirá libros xtuny filósofos alemanes, ni máspa la, ro ritlaa xigony noʼ buñ ló Gudxlio. Per ná bidzela tipnés cós sacróyen, ni toibni diti golexani galrranabdiitz ni gopa. Gonabraya láani lóo Dios.

Íz 1970, bibigueta gudx Hungría né cú bimbuya Rose, ni nac tzeʼela. Par ló dzúcu, gudx Hungría goyoʼni ladxña comunismo, por ngú diti xidzú después ni bunydo galtzeʼel bixonydo de gudx Hungría né soodo gudx Austria. Goloʼdo guicdo tzoʼdo Sydney, ni noʼ Australia, ro rabés toib bixoya.

Diti xidzú después bidzela dxiin lainy gudx Austria. Toibtica dzú, toib xcompañera ni goynéya dxiin gochbu naʼ que la Biblia labúu guicapy guirá galrranabdiitz ni napa né bunycuentbu chop libros naʼ ro ritlaa de láani. Bidopyca libroscu biila, per goniiny naʼ ñaana más, por ngú bicaʼya guiich ló ni goleʼ libroscu, testigos xtuny Jehová, né gonaba stipnés libros né guiich layibu.

Mer dzú casaado tobiz de goló bunydo galtzeʼel toib testigo xtuny Jehová goyguen lóodo. Bitnébu libros né guiich ni gonaba né gochbu naʼ guisuidybu naʼ ni ná la Biblia. Órcuca gosaguela. Goniiny naʼ guisudi, por ngú chop buelt lainy xomal bisudi, ¡né tap ór bisuidydo!

Nigolú bioladxi guirá ni casuidy testigos xtuny Jehová naʼ né la Biblia. Órni bislooybu naʼ laa Dios ló Biblia xtuni ló diitz húngaro, nigolú bidziguiaʼya. Por 27 íz goyaʼya mix, nili tibuelt diti bicadiaga laa Dios: Jehová. Nigolú bidziguiaʼya ximod nayadit golexa la Biblia guirá galrranabdiitz ni gopa. Toibtica cós ni bisudi láani ngú que gueʼet diti nan xitcal, nacni suusi natiasynixyibu (Eclesiastés 9:​5, 10; Juan 11:​11-15). Láaca bisudi que sioʼ toib Gudxlio copy ro «ma diti sioʼ galgoity» (Apocalipsis 21:​3, 4). Nigoreʼ napa confianz que «siás gueʼet» ló Gudxlio copycu, né que labúu guibiʼya bixiosa stoib (Hechos 24:15).

Rose gocné naʼ né guidopy xcalnabany. Naguel goniʼsdo ló sentido espiritual né ló chop beʼosi bisloxdo bisuidydo librocu. Goyoʼdo guirá reunión ni rony testigos xtuny Jehová; nigolú bidziguiaʼdo ximod ronladxyibu buñ, mod ragobioyibu buñ né mod raguaʼyibu toibsi (Juan 13:​34, 35).

Íz 1976 ma labúu goyoʼdo gudx Australia. Órni bidxindo cú, nimaca biyopydo testigos xtuny Jehová né godabioyibu lóodo suusi ñacdo xfamilyibu. Íz 1978 gócdo testigos xtuny Jehová.

Ndeʼra ma naana ximod rarexa guirá galrranabdiitz ni goloʼ naʼ ló galrrasaʼ por xidal íz. Láaca bidzela bixiosno: Jehová (Santiago 4:8). Né diti nosi ndeʼ, nigoreʼ napa esperanza que labúu guibiʼya bixiosa ló Gudxlio móz ni ma goniʼ Dios guidudy lóono (Juan 5:​28, 29).

Íz 1989 goloʼdo guicdo nabiguetdo gudx Hungría par ñaibydo xfamildo, ximigdo né stipnés buñ ni ronydo crer. Gopdo privilegio bisuidydo xidal buñ. Más de setent de layibu ma nac Testigos, ladyibu noʼ xinaʼya.

Por 17 íz buni oración né gonaba Dios nabexabu galrranabdiitz xtuni, né ma godudy 39 íz de goló birexa galrranabdiitz ni gopa. Dada nigoreʼ roni oración, per ni raniya láani ngú: «Guixquixi looy Bixiosa ni noʼ lainy guibá, por ni cuapylo oración xtuni ni buni dzú góca mbioxhlas».