La Biblia diti toibsi midid nacni né stipnés textos ni nap stipnés religión. Guirá ni rony buñ crer nacni portín noʼ toib libro ni laa la Biblia. Per láaca diti noʼ stoib libro xomod la Biblia ni rasuidy buñ nanoy né ni raniʼ buñ mal.

Por ejemplo, tipnés buñnan ná que guirá copias ni nap la Biblia diti labúu gony buñ crer láani. Toib buñnan goniʼ: «Diti napdo confianz mod bitzaʼdo texto original, né diti nantzaydo pal cuáni xomodpa non guicaani». Né láaca goniʼbu: «Nosi napdo tipnés copias ni nap xidal galrraché né casi guiráni napni xidalguixo íz de goló cuáni, né ralooypani diti radzakni né guiichgool ni goyoʼ nírcu».

Láaca noʼ stipnés buñ ni diti rony crer ni ná la Biblia portín napyibu stipnés costumbres. Por ejemplo Faizal, goniʼsbu lainy toib famil ni diti rony crer lóo Jesús. Bisuidybu que la Biblia nacni toib libro sagrado, per guirá diitz ni napni bitzaʼ buñ láani. Láabu nábu: «Guirá ndeʼ bunyni que diti ñapa confianz buñ ni raniʼ de la Biblia, portín diti napyibu toib Biblia original né textos ni napni ma bidzani».

Per ¿rasac ganno pal la Biblia ma bidza la? Buny pensary ló ndeʼ: la Biblia rasetlaa xidal cós sacróyen ni guicaʼno ló dzú ni sietra. Pal diti ñaplo confianz que guirá promesas reʼ sieedni ló guiichgool, ¿ñaplo confianz loni la? (Romanos 15:4). Pal Biblia ni noʼ ló naareʼ ñapni copias ni nap galrraché, ¿naquiinlo consej ni napni par nasanésni looy xí dxiin nayopylo, ximod gacnélo xfamilo o ximod gony adorarlo Dios la?

Ná ma binitló guiichgool ro cuá la Biblia labúu guibiʼno tipnés copias ro sieed miles de manuscritos. ¿Ximod guirá materiales ro cuáni diti ma binitlóni, ná goniiny buñ nanitló láani né ná biyopyibu mod natzaʼyibu textos ni napni? ¿Xigony ni ganlo guirá ndeʼ labúu gaplo confianz ló Biblia ni noʼ ló naareʼ? Bibiʼ ximod rarexa guirá galrranabdiitz reʼ ló artículo ni sieed.