Goniʼsa lainy gudx Puerto Limón, ni riaʼan lad este de Costa Rica. Bixiosa né xinaʼya goyoʼ xhoon xiinyibu, né naʼ naca ni ma rasaʼ gatz xiinyibu. Bixiosa goity dzú napa xhoon íz, por ngú ma toib xinaʼya bisniʼs lóodo.

Nigolú bioladxi béisbol, portín desde dzú góca mbioxien bioladxi láani. Órni góca mbioxhlas, godxita ne toib equipo. Órni godxita né layibu né ma napa midid gaal íz, toib buñ ni rayopy chú láabu raguit sacró bibiʼbu naʼ né biruʼbu naʼ naguita né stipnés ni más nan raguit lainy gudx Nicaragua. Per par dzúcu xinaʼya nigolú caxoʼ, né naʼ raana láabu, por ngú diti gosaguela ñaʼya gudx Nicaragua. Después, stoib buñ ni rayopy chú láabu raguit galán bibiʼbu naʼ né biruʼbu naʼ par ñoʼya ló toib equipo ni raguit béisbol ni raguit lainy gudx Costa Rica, ná equipo reʼ diti nac profesional, per naʼ gosaguela. Goyoʼya ló equipo reʼ desde íz 1949 dada íz 1952 né goyoʼdo goydxitto lainy gudx Cuba, México né Nicaragua. Né nigolú goona godxita. Ló 17 buelt ni godxita nili tibuelt diti bichéya. Ni más bioladxi ngú órni bicadiaga que guiráxadit buñcu toibsi tiemp goni’yibu laaya.

Per después góca buñyox. Ná ma noʼ xinobi, guirá ór gosanéya stipnés buñgonaʼ. Láaca nigolú gosochi. Toibtica dzú, nigolú gosochgoluʼya né órni bireʼ bacaʼal lóoya stoib dzúcu, diti bidudi cuent ximod bidxina lidxi. Láaca godxita dominó ro raguit buñ por bidxiich né láaca gosiiya biyet de loteria.

Ló tiempcu xinaʼya bidxin góc testigo xtuny Jehová. Láabu biyopybu mod ñoladxi ni ronybu crer, per primer la, diti birebuʼni portín naʼ nigolú goyodieʼya ló galrraguit. Pal cayoni entrenar ló camp, diti golaʼna ná ma xor galrro láani. Xpensari goyoʼni ló galrraguit. Portín nigolú bioladxi béisbol.

Dzú ma napa 29 íz, gocnaaya órni goniiny naʼ nanaʼsa toib pelot. Biala, per ma dipa godxita né layibu. Ná scú, diti bisiana béisbol né bisudi stipnés buñ naguit béisbol gaxca lidxi.

Ló íz 1957, goyaʼya toib samblia de testigos xtuny Jehová ni góc ló toib estadio ro godxita béisbol. Bidziguiaʼya mod guirá testigos xtuny Jehová napyibu respet saʼyibu né diti nacyibu xomod buñ ni goyoʼ ló partido de béisbol ni godxita. Ni bibiʼya ló sambliacu bichiinni naʼ nasudi ni ná la Biblia né Testigos né ñaya xireuniónyibu.

Nigolú bidziguiaʼya guirá ni bisudi ló la Biblia. Por ejemplo, Jesús goniʼ que ló dzú ni ma guidubylagaʼ xpiimbu naniʼ diitz sacró de Gobierno xtuny Dios ló guidopynac Gudxlio (Mateo 24:14). Láaca bisudi que cristianos ni rony xinésni diti riaxyibu órni raniʼyibu xtiitz Dios. Jesús goniʼ: «Cuaʼto scásiʼ, colguiduidy scásiʼ» (Mateo 10:8).

Laʼga casudi la Biblia, bibiʼya pal ronyibu ni rasuidyibu. Bidziguiaʼya xtem ni ronyibu órni raniʼyibu diitz sacró de Gobierno xtuny Dios ló guidopynac Gudxlio. Bidudi cuent que layibu rasobyibu guirá ni bisuidy Jesús xpiin. Por ngú órni biila ni ná Marcos 10:21 ro sieed invitación ni buny Jesús: «Godaʼ, cuanal naʼ», goniiny naʼ ñaca testigo xtuny Jehová.

Per gosac nagana ñoni tipnés cós. Por ejemplo, por xidal íz buny apostar guirá xomal «número de suert ni gopa» ló loteria nacional. Per ló la Biblia bisudi que Dios diti racacuent ni rony adorar «dioxh xtuny Suert» nili buñ ni rasobladx (Isaías 65:11; Colosenses 3:5). Por ngú, bisiana godxita. Primer doming ni ma diti gosiiya biyet de loteria ¡número xtuni buny gan! Buñ bixiich naʼ portín xomalcu diti godxita né bikíilyibu naʼ par naguita stoib, per diti gosaguela. Ma dipa godxita por bidxiich.

Órni bitzaʼya mod bibani fe xtuni goyoʼni ló prueby stoib, merpa dzú ni goyonisa ló toib samblia de testigos xtuny Jehová (Efesios 4:24). Órni goyogueʼel, né bibigueta ro rabésa, bidzela ni góc xinobi cabés naʼ ro puert. Láabu gochbu naʼ: «Reʼ noʼya Sami, tzoʼ nakitno tiprat». Órcuca cuabi láabu: «¡Yaca!». Goodxi láabu que naʼ ma casoba ni rony mandary Dios ló la Biblia (1 Corintios 6:18). Láabu cuapybu: «¡¿Xí láani caniʼlo?!». Diti gosac par láabu ni ná la Biblia ro ritlani de galyoxh, gochbu naʼ órcu que nasanédo saʼdo stoib. Per naʼ la, ni buni ngú goyoʼya lainy xcuarta né bisiega puert né liay. Nigoreʼ, noʼya nakit, portín desde dzú góca testigo xtuny Jehová ló íz 1958, dipa ma bichéya nisló Jehová.

Pal naniiny naʼ ñaabi lóoto guirá galnasác ni ma cuaʼya por ni casoba ni ná la Biblia, nadopy toib libro nacaʼya láani lóo. Nigoreʼ noʼ ximigdxina, ma diti nac nacsi nabani né noʼya goxtiguie.

Rioladxsaya kita béisbol, per ma diti noʼni primer lagary. Né galrraguit bisanadx buñ naʼ né buny gan bidxiich, per guirá ndeʼ radudy xtzúni. Ni diti radudy xtzú ngú mod radzaʼga Dios né mod radzaʼga xhermana. La Biblia ná: «Láaca, gudxliogoxreʼ né guirá ni raniiny gonyni cadudy xtzúni, per ni rony ni ná Dios sabany tipzó» (1 Juan 2:17). Nigoreʼ noʼ stoib cós ni nigolú rioladxi: goni xchiin Jehová né gaca de xcudxbu. Ndeʼ ni más rasac ló galnabany xtuni.