Órni Organización Mundial de la Salud goniʼ ló beʼo marz que noʼ toib pandemia ni laa COVID-19, nili godudy ló xpensary buñ que galguitz reʼ ñaclani xidzú né natudyni buñ ló xiroʼ galrrioʼob. Xtol galguitz reʼ, xidal millón buñ, ladni testigos xtuny Jehová, cadudy ló xiroʼ galnagan. ¿Ximod cayacné Testigos xherman ni noʼ ló guidopynac Gudxlio?

 Comité de Coordinadores xtuny Tidxó buñ ni nap xiroʼ Galnan ni rasanir nisló testigos xtuny Jehová, goloʼ más de 950 Comités de Socorro ló guidopynac Gudxlio ni ñacné herman ni cadudy ló galsii xtol COVID-19. Tipnés lagary nosi comités gocné herman ni cadudy ló galsii, né ló stipnés lagary Testigos cuacuentyibu xcalrracné buñchiin. Láaca, Comités de Socorro bitopyibu xiroʼ galrro par gocnéyibu xidalguixo buñ.

 Guibiʼno ni góc gudx Paraguay. Toib periódico ná que xtol galguitz reʼ xidal buñ de lagarycu diti nap ni guá. Per Comité de Socorro ni noʼ Paraguay bitop né bikiʼs galrro par ñooyibu chop xomal. Lainy tigaaga paquet ni rasac midid 30 dólares, goyoʼ galrro né cós ni naquiin tap buñ lainy toib famil.

 Guirá herman ni racné ló dxiinreʼ, ¿ximod rapyibu layibu né xi ronyibu par diti coʼyibu stipnés buñ ló riesga? Raquiinyibu mascarillas, cubrebocas né sit rasagaʼyibu de saʼyibu. Láaca racaayibu cuidad que buñ ni ratoʼ cós ni siʼyibu gac buñ nayaa. Racaayibu cuidad que nitisi buñ ni guinás guirá paquetcu nap mascarilla, ma bisiá né ma buny desinfectar guirá xcamión, né cacuatzay láani ro nayaa. Láaca buñ ni gonycuent láani herman sitca rasagaʼyibu.

 Par ló beʼo enero íz 2021, Comité de Coordinadores bidudy permís gac gaxt más de 25 millón de dólares par gacnéno ni cadudy ló galsii xtol COVID-19. Sucursales né Comités de Socorro racaayibu cuidad ximod guiquiinyibu donación né ronyibu rutirigaʼlni layibu siʼyibu láani más barat. Por ejemplo, gudx Chile, guirá herman ni rasanir ló dxiinreʼ goniiny nasiʼyibu 750 kíl de lentej. Per par ló beʼocu nigolú biaʼpy loni. Ná scú, gosaguelyibu nasiʼyibu láani. Per, chop ór después, buñ ni catoʼ láani goniʼ que stoib buñ bidxiguet lentej ni gosiʼ. Por ngú xalagary natoʼbu láani car, xoʼcu bitoʼ láani xomod gosacni nírcu.

 Órni goycaʼyibu láani, xoʼcu ma diti gosaguel ñonycuent galrrocu. Goniʼbu que herman cuenunysi ratzoo láani lad buñ, xomod rony stipnés organización. Toib herman bunyxes toib oración lainy xcalnabany de ngú gochbu xoʼcu que nír gonabdiitzyibu chú famil nigolú caquiin láani. Láaca goniʼbu que órni rasaʼyibu tigaaga paquet, ronyibu pensary xipa caquiin famil ni guicaʼ láani. Né, por último, goniʼbu que guirá bidxiich né galrracné ni raxel testigos xtuny Jehová ronyibu láani né guidopy xcalnabanyibu. Xoʼcu nigolú bidziguiaʼ. Por ngú, diti nosi bunycuentbu ni gosiʼ herman, láaca biscadbu 400 kíl de lentej órni goyeeyibu gosiʼyibu stoib.

 Lusu nac toib herman golien ni ma biaʼan viod ni rabés Liberia né sagáay buñ. Toibtica rosil, laʼga cayosiʼlyibu né cayoʼolyibu texto ni rolno guirá dzú, xiacbu ni nap gatz íz bidudy cuent que ma biraa galrro. Órcu gonabdiitzbu soiscólbu: «¿Xí guáno?». Soiscólbu góoch láabu que diti tzoʼbu galrrasaʼ portín ma gonabbu xcalrracné Jehová, né napbu confianz que Jehová sadudy ni caquiinyibu. Godzucuca, ancianos de congregación xtunyibu goninéyibu hermana reʼ por teléfono par nicaʼbu galrro. Láabu nábu: «Nigoreʼ xiaguienna ma nan que Jehová racadiag lóono portín cuapybu oración ni buni».

 Toib sois de República Democrática del Congo rabés cueʼ lidx toib famil ni nac Testigos. Órni bibiʼbu que stipnés caxel galrro ronoʼ herman, goniʼbu: «Órni tudy galguitz reʼ, sacdo testigos xtuny Jehová, portín layibu rioʼyibu galrrasaʼ por xhermanyibu ló tiemp nagan reʼ». Tzeelbu gonabdiitz láabu: «¿Saclo testigo xtuny Jehová nosi por ti box rros la?». Láabu cuapybu: «Yaca, diti scú láani. Per boxca la, raslooyni que nigolúpa ronladxyibu saʼyibu».

 Testigos xtuny Jehová nimaca racnéyibu herman ni cadudy ló galsii. Raxquixpado lóoto por guirá donación ni raxelto de xidal mod ló donate.pr418.com.