Ló enero íz 2021, Tidxó buñ ni nap Xiroʼ Galnan goni’yibu que sareʼ toib libro copy par guisuidy buñ ni ná la Biblia né laani ¡Bibany goxtiguie por tipzó! a ¿Ximod gosaclo órni bicadiaglo anunys reʼ? Matthew, de Canadá, raiby lóono ximod gosac: «¡Diti buni crer láani! Né órni bicadiaga discurs né bibiʼya ro golexani xigony góc libro reʼ né ximod biquiinyibu láani bisuidyibu buñ, bibaladxgoluʼya más órcu. ¡Ma más goniiny naʼ nabiʼya né naquiinna láani!».

 Libro copyreʼ napni toib mod copy par guisuidyno buñ ni ná la Biblia, gadzé mod nacni né stipnés libros ni biquiinno nírcu. Pal ma cualó toibni, sigory ma bidudylo cuent que gadzé mod nacni. ¿Nainy looy ganlo xigony gadzé mod nacni la? Guibiʼno ximod goyaʼ libro reʼ ni laa ¡Bibany goxtiguie por tipzó!

 Nanaʼl xquiichni. Par labúu goyaʼ libro ni laa ¡Bibany goxtiguie por tipzó! biquiinni guiich ni más nanaʼl. ¿Xigony? Libro reʼ napni más de 800 dibuj sacróyen, 10 buelt más que libro ¿Xí rasuidy la Biblia lóono? Láaca napni más lagary nayaa ni diti nap letras nili ilustración. Per guiropca ndeʼ ragoʼni toib galnagan, órni guiichcu nalasienni, labúu rabiʼ buñ dibuj ni sieed ló stoib páginacu, ná goxeʼsi. Par diti ñacni scú, herman de departamento internacional de impresión ni noʼ Wallkill (Nueva York) bunyibu prueby tap clas guiich ni ma raquiindo lainy imprentas. Comité de Redacción ni noʼ lad Tidxó Buñ ni nap Xiroʼ Galnan bibiʼyibu ximod nac guirá guiich reʼ, né golúyibu ni diti tampa radudy binii. Scú láani, guiich reʼ más rasacni 16% que guiich nimaca raquiindo. Ná scú, buñ ni rasuidy libro ni laa, ¡Bibany goxtiguie por tipzó! rasuidybu láani sacró portín dibuj ni sieed ló stoib páginacu ma diti rachelni xpensarybu.

 Guiich laidyni. Guiich laidy libro ni laa, ¡Bibany goxtiguie por tipzó! diti nacni xomod guiich laidy stipnés libros portín napni toib ni rap guiichlaidyni. Laʼga guiich laidy stipnés libros racaptzaditni, modreʼ más rareʼ loguiaʼ dibuj ni sitnéni. Láaca mod nacni, racnéni libro reʼ par diti guioʼxni naguel. Labúu guisacni gáay buelt más que ni racaptzadit cu. Por ngú, xidal sucursal bunyibu dxiin toibsi par labúu nadzelyibu toib laminado mate ni diti tampa nasac.

 Né pal más rasacni, ¿xigony biquiinyibu láani? Toib herman ni rony dxiin lainy Departamento Internacional de Impresión raiby lóono: «Libro reʼ saquiingoluʼ buñ láani, por ngú goyaʼni de toib mod par diti guioʼxni naguel». Eduardo, ni rony dxiin lainy Oficina de Imprenta de sucursal ni noʼ gudx Brasil, ná: «Rabaladxgoluʼdo ni caquiin xcudx Jehová guiich ni rasac, modreʼ saquiinno toib libro sacróyen né ni gony guantary, modreʼ caquintzaydo donaciones».

 Gosalódo goleʼdo libro reʼ ni laa, Bibany goxtiguie por tipzó ló guiich, ló beʼo marz íz 2021, ló pandemia de COVID-19, por ngú cualódo tipnés galnagan. Xtol guirá ndeʼ Betel ma diti cuacuent herman par ñony dxiin chop tzón govitzsi lainy imprenta, nili cuacuentyibu ni nadxin ñac betelitas. Por ngú goyoʼ ór diti goyoʼ xidal ni ñacné, né goyoʼ ór imprenta ma diti bunyni dxiin portín buñchiin scú goni’ gacni.

 ¿Ximod cualóyibu guirá galnagan reʼ? Órni ma labúu goleʼyibu láani ló guiich, gonabyibu xcalrracné stipnés betelitas ni rony dxiin lainy stipnés departamentos, par ñacné por chop tzón govitz par nareʼ libro reʼ ló guiich. Joel, ni rony dxiin lainy Departamento Internacional de Impresión, ná: «Mod bunyibu dxiin né guidopy xcalnabanyibu né ni goniiny nasuidyibu ximod ñonyibu dxiincu labúu birebuʼ bunydo guirá dxiin ni gopdo».

 Ná cualódo guirá galnagan reʼ, ma goleʼdo ló guiich xidalguixo libro reʼ ni laa, ¡Bibany goxtiguie por tipzó!, ro biquiindo xidal cós, xomod planch de impresión, laminado, guiich, tint né ni raguit. Ló gáay beʼo ni goleʼdo láani ló guiich, ma bunydo gaxt más de 2,3 millones de dólares nosi loguiaʼ guirá cós ni biquiindo. Par diti naguitdo bidxiich, cayonydo rutirigaʼlni lóodo cueʼdo nosi libros ni caquiin congregación.

 ¿Ximod rasacno né ximod rasac buñ ni casuidy né libro copyreʼ? Toib herman de gudx Australia ni laa Paul ná: «Rioladxgoluʼya guiquiina libro reʼ né rioladxgoluʼya guisudi buñ ni ná la Biblia né láani. Sacró nacni portín racnéni buñ ni casuidy guiniʼ, nayadit nacni né napni galrranabdiitz ni rony que buñ ni casuidy, gony pensary loni, videos, dibuj, tablas né xi labúu gony buñ ni casuidy. Né xcalrracné libro reʼ nainy naʼ gaca toib galán mextra».

 Toib buñ ni casuidy la Biblia ni noʼ Estados Unidos ná: «Rioladxi libro copyreʼ, dibuj ni sitnéni racnéni ná guienna né videos ni sitnéni radxinni lainy xcalnabani né rachiinni naʼ guisoba ni casudi». Buñreʼ ma riee guirá reunión ni rac lainy congregación né rasuidybu chop buelt lainy xomal.

 Raquiinra cueʼdo ló guiich xidalguixo libro reʼ ló xidal diitz. Tidxó buñ ni nap Xiroʼ Galnan ma bidudy permís que 710 diitz labúu cueʼ láani ló guiich, 340 más que libro ni laa, ¿Xí rasuidy la Biblia lóono?

 ¿Pu rareʼ bidxiich par guiax guirá ndeʼ? De guirá donación ni rac par obra mundial. Xidal de donaciones reʼ racni né donate.pr418.com. Nigolú rasac par lóodo guirá ni radudyto né guidopy xcalnabanyto. Por láani labúu cueʼdo libros ni bireʼ ló la Biblia par buñ ni guiniiny guimbu Jehová né guioladx guibany por tipzó (Salmo 22:26).