Guirá íz rionis xidalguixo buñ. Por ngú raquiin tzaʼ más yoʼ ro labúu guieen buñ Jehová. Guirá Departamento local de Diseño né Construcción ni noʼ ló guidopynac Gudxlio goleʼyibu xcuentni nasaʼyibu né ñony copyibu más de 2.700 yoʼ ló íz de servicio 2020. a

 Xtol pandemia xtuny COVID-19 ma más nagan gocni par labúu narebuʼ guirá dxiinreʼ. Par diti nadudy galguitz reʼ herman né par labúu nasobno ni ná buñchiin, Comité de Publicación xtuny Tidxó buñ ni nap xiroʼ Galnan, bichoc ló casi guirá dxiinreʼ. Per ló íz de servicio 2020 labúu goctzay né goyaʼ más de 1.700 yoʼ ro rony adorarno Dios, merpa órni yása saló pandemia. Láaca, labúu bilox más de 100 proyectos ni goyoʼ lainy sucursales. Guibiʼno chop dxiin de clas reʼ né ximod ma gocnéni xhermanno.

 Sucursal ni noʼ Camerún. Sucursal golien ni goyoʼ lainy gudx Duala, mitien gocni né biquiin ñactzayni. Comité de Publicación buny pensary ñony copy sucursal reʼ, per más naguityibu bidxiich loguiaʼni. Láaca goniʼyibu que labúu nasaʼyibu yoʼ stipnés lagary o nasiʼyibu né ñony copyibu toib yoʼ. Per diti labúu birebuʼ ni toibni.

 Xhermanno gon que buñchiin ni noʼ lagarycu nasaʼ toib carreter niis lad norte de Duala, gaxca ronoʼ Salón xtuny Samblia. Carreter copycu labúu ñacnéni par nadxin buñ ronoʼ sucursal né labúu naschinyibu cós ni caquiinyibu. Merpa ngú ni caquiin sucursal ór cú. Por ngú, Tidxó buñ ni nap xiroʼ Galnan bidudy permís ñaʼ toib sucursal copy cueʼ Salón xtuny Samblia.

 Par labúu ñac dxiinreʼ, xhermanno godix toib empresa de construcción, né modreʼ diti tampa bunyibu gaxt bidxiich né tiemp. Láaca dxiinreʼ, bireʼni más barat: labúu biaʼan sobra más de chop millón de dólares. Guirá betelitas goylés lagarycu antes de nasaló pandemia reʼ.

 Nigoreʼ betelitas ni noʼ Camerún rabésyibu né ronyibu dxiin ló toib lagary más sacróyen, rabiʼyibu sucursal copycu xomod toib galrrascad xtuny Jehová. Toib galtzeʼel ná: «Nigoreʼ nainy gonydo dxiin más, portín ma napdo toib lagary sacróyen».

 Oficina Remota xtuny Traducción ro raniʼ buñ tojolabal (México). Por xidal íz equipo de traducción ni raniʼ tojolabal buny dxiin lainy sucursal de Centroamérica, ni riaʼan niis México. Per diitz tojolabal raniʼ buñ láani niis Altamirano né Las Margaritas, ni riaʼan casi 1.000 kilómetros de sucursal. Por ngú, traductores nagan gosacyibu ñanyibu ximod raniʼ buñ diitzreʼ guirá dzú. Né nagan góc par sucursal nadzel herman ni nabés gaxca ni labúu ñony traducir né ñony grabar.

 Por ngú, Comité de Redacción xtuny Tidxó buñ ni nap xiroʼ Galnan goniʼ que equipo reʼ ñee nilés lagary ro raniʼ buñ diitzreʼ. Sucursal gosiʼ toib yoʼ né buny copy láani. Ndeʼ bireʼ más barat que nasiʼyibu o naguiixyibu toib yoʼ.

 Toib traductor raiby lóono ximod rasac: «Ló chii íz ni buni dxiin lainy sucursal, diti bidzela buñ ni raniʼ xtiidza. Nigoreʼ ronydo dxiin lagary ro raniʼ buñ xtiitzdo. Guirá dzú radzela buñ ni raniʼ tojolabal. Ndeʼ ma gocné naʼ par guiniʼtzaya láani né goni más sacró xchiina».

 Pal labúuni ló íz de servicio 2021, tzaʼ 75 oficinas xtuny traducción né stipnés lagary ro tzoʼ scuel ro guisuidy buñ nanoydiguieʼ la Biblia. Sac xhoon dxiin lainy xidal sucursales, ladni noʼ dxiin ni gac Rámapo (Nueva York) né guidzaʼ xalagary sucursal de Argentina né Italia. Láaca raquiin tzaʼ más de 1.000 Salones del Reino. Né noʼ más de 6.000 lagary ni raquiin gactzay, né sa 4.000 Salón ni raquiin gac copy.

 ¿Ximod riax guirá dxiinreʼ? Xhermanno Lázaro González, ni noʼ lad Comité xtuny Sucursal de Centroamérica, rabexa ximod rac guirá dxiinreʼ. Goniʼbu ximod goyaʼ Oficina de Traducción xtuny tojolabal: «Herman ni noʼ ló territorio xtuny sucursal reʼ diti tan napyibu bidxiich. Pal diti ñacné herman ni noʼ ló guidopynac Gudxlio, diti labúu nasaʼdo oficinas xtuny traducción par herman ni raniʼ stipnés diitz. Por ni raxelto bidxiich, labúu raxeldo traductores gaxca lagary ro raniʼ buñ diitz ni cayony traduciryibu. Raxquixdo xhermanno por ni radudyibu ni napyibu». ¿Bidudyto cuent la? Guirá dxiinreʼ labúu racni por bidxiich ni radudyto par obra mundial. Xidal donación de clas reʼ radxinni ló donate.pr418.com.