Jesús góoch xpiin: «Sacto testigos xtuni [...] dada lagary ni noʼ más sit ló gudxlio» (Hechos 1:8). Testigos xtuny Jehová goxtiguie rasobyibu ni buny mandary Jesús. Ná scú, diti ma bidxinno tipnés lagary ni riaʼan más sit ló Gudxlio, por ejemplo, diti ma bilox gonino xtiitz Dios lainy tipnés gudxrop ronoʼgolu buñ. Láaca, noʼ lagary ro diti noʼ xidal Testigos (Mateo 9:37, 38). ¿Xí cayonyno par guidxinno ronoʼ guirá buñcu?

 Par labúu guisobno ni buny mandary Jesús, Comité de Servicio xtuny Tidxó buñ ni nap xiroʼ Galnan raxel misioneros ro más caquiin buñ galrracné. Ló naareʼ noʼ 3.090 misioneros ni caniʼ xtiitz Dios ló guidopynac Gudxlio. a Casi guiráyibu ma goyeeyibu scuel ro bisuidyibu nanoydiguieʼ la Biblia, xomod Scuel par Evangelizadores del Reino. Guiráyibu bisianyibu lidxyibu né seeyibu stoib gudxrop. Nacyibu buñ ni nadip xfe, ma cuaʼyibu capacitación por ngú raniʼyibu xtiitz Dios né gan né nigolú racnéyibu publicadores gony scúca.

 Lainy tigaaga sucursal, noʼ toib Sección de Ministros en el Campo ni noʼ lainy Departamento de Servicio, layibu ronyibu dxiin né Comité de Sucursal né rabiʼyibu ni caquiin misioneros. Departamento reʼ radudy yoʼ ro cuésyibu, remeidy ni caquiinyibu né dada tiplaʼ bidxiich par siʼyibu cosien ni caquiinyibu. Ló íz de servicio 2020, testigos xtuny Jehová buny gaxt midid 27 millón de dólares loguiaʼ misioneros. Por ngú, misioneros nosi rioʼyibu galrrasaʼ guiniʼyibu xtiitz Dios né gacnéyibu congregación gac nadip.

 ¿Ximod racné guirá misioneros reʼ? Frank Madsen, ni noʼ lad Comité de Sucursal lainy gudx Malaui, ná: «Napyibu balory né nanyibu raniʼyibu xtiitz Dios, por ngú ma gocnéyibu congregación saló guiniʼ xtiitz Dios lagary ro más nagan, xomod lagary ro diti tampa labúu rioʼ buñ o ro raniʼyibu stoib diitz. Láaca, ronyibu xiroʼ xtem guisuidyibu mod nac buñ né mod nac xtiitzyibu, modcu rasianyibu toib galán ejemplo par stipnés publicadores. Per diti ngúsi, nigolú rony animaryibu mbioxhlas tzodieʼ ló xchiin Jehová. Raxquixdo Jehová por guirá misioneros reʼ».

 Toibtica herman ni noʼ lad Comité xtuny Sucursal lainy stoib gudxrop ná: «Misioneros raslooy que xhermanno nac de guirá lad né dxeeno toibsi. Dada buñ ni diti nac Testigos radudy cuent que ná nacno de stoib gudx ragobiono saʼno. Ni rasuidyno ló la Biblia racné lóono cobiono saʼno xomod herman».

 ¿Né ximod racné misioneros guirá publicadores? Paulo, de Timor Oriental, nigolú radudybu guixquix dxiin ni rony misioneros ni noʼ lainy congregación xtunybu. Láabu nábu: «Rabésdo toib lagary ro nalaʼgolu. Ná guirá herman reʼ sieedyibu toib lagary ro nachichgoluʼ, nili galnalaʼ racaa layibu. Dipa rony faltyibu ló predicación, né xidal buelt ronyibu revisit dada galaʼ dzú, órni mer cayac nalaʼ. Ralox raniʼyibu xtiitz Dios dada órni ma cayogueʼel. Ma gocnéyibu xidal buñ guimbu ni ná Jehová, ladyibu noʼya naʼ. Ronyibu xchiin Jehová né gan, né ngú rachiin guirá herman gony scúca».

 Ketti, toib precursora regular de Malaui, raniʼbu ximod toib galtzeʼel de misioneros gocné xfamilbu: «Órni bidxinyibu lainy congregación, naʼsi naca Testigo lainy xfamila. Gocnéyibu naʼ né sacró bidzakyibu guirá xfamila. Ximbioxa bisuidy que órni ronyno xchiin Jehová ngú ragoʼ nakit xcalnabanyno. Por mod bunyibu, guionca xiindzapa nacyibu precursoras regulares né tzeʼela ma riee reunión».

 ¿Pu rareʼ bidxiich ni rac gaxt loguiaʼ misioneros ni caniʼ xtiitz Dios? Rareʼni ló donación ni radxin par obra mundial. Xidal donación de clas reʼ radxinni ló donate.pr418.com. Raxquixpado lóoto por donación ni radudyto.