Testigos xtuny Jehová raniʼyibu xtiitz Dios né racnéyibu buñ ló más de 200 gudxrop. Per nosi ló 35 gudxrop radudy herman más bidxiich par guiquiinyibu láani ló territorio xtunyibu. ¿Né xi rac né stipnés lagary ro diti tampa napyibu bidxiich?

 Tidxó buñ ni nap xiroʼ Galnan rabiʼ ximod cayony testigos xtuny Jehová dxiin ló guidopynac Gudxlio, nigolú racáyibu cuidad ximod guiquiinyibu bidxiich ni radop. Pal toib sucursal racacuent más bidxiich raxelyibu ni riaʼan sobra par guiquiin stipnés sucursal láani. Modreʼ ronyibu xomod buny herman ni bibany ló siglo primero. Layibu biquiinyibu ni biaʼan sobra par gocnéyibu stipnés herman ni diti gop xiroʼ bidxiich, né modreʼ toibsi midid gopyibu bidxiich (2 Corintios 8:14).

 ¿Ximod rasac xhermanno ni racacuent bidxiich ni cayaʼan sobra lainy tipnés sucursales? Por ejemplo, lainy gudx Tanzania, buñ nosi radudy dzú né 2 dólares. Donación ni bidxin lagarycu biquiinyibu láani par nasaʼyibu Salón del Reino ni noʼ Mafinga. Herman ni noʼ lainy congregación reʼ goniʼ: «Desde dzú bunytzaayibu Salón ma más xidal buñ radop né lóodo. Nigolú raxquixdo xcudx Jehová né guirá xhermanno ni noʼ ló guidopynac Gudxlio portín radudyibu ni napyibu. Nigoreʼ ma napdo toib lagary sacróyen ro labúu guiendo Jehová»

 Xtol COVID-19, tipnés xhermanno de Sri Lanka ma diti tampa napyibu galrro. Ladcu noʼ hermana Imara Fernando né xiimbu Enosh. Labúu gopyibu ni caquiinyibu portín herman de stipnés gudxrop bidudy donación. Después layibu bicaʼyibu ló toib guiich: «Raxquixpado lóoto xhermana portín nigolú binladxto lóodo órni godudydo ló galsii. Nigolú rabaladxno portín nacno toib famil né ranabdo Jehová gan guirácato ló dzureʼ ni ma guidubylagaʼ».

 Nac rotísi nac lagary ro rabés xhermanno, nigolú rioladxyibu gacnéyibu stipnés. Enosh, buny toib cajien par labúu natopbu bidxiich né ñacnébu herman ni cadudy ló galnagan. Guadalupe Álvarez láaca radudy ni nap. Labúu rabésbu lainy toib gudx ni noʼ México ronoʼ galsii né goxeʼsi buñ nap dxiin ro riax tidxóyensi. Ná scú ronybu dada rutirigaʼlni láabu par labúu guidudybu ni napbu. Guadalupe ná: «Raxquixi Jehová portín natzaaybu. Naana que bidxiichen ni radudi né ni radudy stipnés herman sacnéni herman ni cadudy ló galsii».

 Nigolú nakit noʼ sucursales ni raxel bidxiich. Anthony Carvalho, ni nac Comité xtuny Sucursal ni noʼ Brasil, ná: «Por xidal íz, xidal sucursales gocné lóodo né bidxiich. Modreʼ labúu goniʼs xchiin Jehová ló territorio reʼ. Nigoreʼ ma napiendo bidxiich né ma labúu racnédo stipnés. Herman nan que buñ non gan xtiitz Dios ló guidopynac Gudxlio né por ngú ronyibu dxiinreʼ».

 ¿Ximod labúu gacné testigos xtuny Jehová xherman ni cadudy ló galsii? Más sacró guixelyibu bidxiich ló obra mundial né diti guixelyibu láani ló sucursal ni noʼ ló stoib gudxrop. Labúu coʼyibu bidxiich lainy cajien ni noʼ lainy Salón ro ná, «Obra mundial» né láaca labúu gonyibu laani ló donate.pr418.com. Guirá bidxiich ni radudyto nigolú rasacni.