«Nírcu diti ñonyno crer pal ñoʼ ni ñaiby lóono ñapno galrro espiritual ló formato digital». ¿Scúca bunylo pensary la? Scá goniʼ hermano Geoffrey Jackson ló Informe 6 xtuny Tidxó buñ ni nap xiroʼ Galnan ni godudy íz 2020. Né láaca goniʼbu ndeʼ: «Per nigoreʼ nanabdiitzno xi labúu ñonyno ló pandemia reʼ pal diti ñapno JW Library. Dada nírcu, Jehová cayacné lóono par tzoʼno puext guicalóno nitisi galnagan».

 ¿Ximod cayacné Jehová lóono tzoʼno puext? ¿Xí dxiin góc par ñaʼ aplicación JW Library? ¿Né xí dxiin rac loguiaʼni par gac copyni?

 Ló beʼo may íz 2013, Tidxó buñ ni nap xiroʼ Galnan gonabbu Departamento xtuny Programación de MEPS, ni noʼ central mundial, nasaʼ toib aplicación ni ñap Traducción del Nuevo Mundo. Paul Willies, ni rony dxiin ló departamento reʼ, goniʼ: «Diti ma bisaʼdo ni toib aplicación ni labúu nalit nitisi buñ. Par labúu nasaʼdo láani, bisiantaʼdo stipnés dxiin, golúdo tipnés herman ni labúu ñony láani né bunydo dxiin né stipnés departamentos ni noʼ Betel. Nigolú gonabdo xcalrracné Jehová né bibiʼdo ximod gocnébu lóodo, portín nosi ló gáay beʼo ma labúu bireʼni ló reunión anual».

 Per láaca cualódo stoib galnagan, ñonydo que JW Library ñacni toib biblioteca, ni ñap más publicaciones ló xidal diitz. Ló beʼo enero íz 2015, aplicación reʼ ma gopni casi guirá publicaciones ni goyoʼ ló diitz inglés né xhoop beʼo después ma labúu bilit buñ publicaciones ló xidalgayoʼ diitz.

 Herman cayonytzaay aplicación reʼ de xidal mod. Por ejemplo, noʼ toib lagary ro labúu guidzelno videos né stoib lagary ro labúu guidzelno guirá ni raquiinno ló reunión. Né ro cayolno toib texto ma labúu raxalno referencias ni sieed ló Guía de estudio.

 Guirá beʼo más de 15 millón de dispositivos raxal JW Library. 8 millón rony láani guirá dzú. ¿Xí dxiin rac loguiaʼni par labúu guixal buñ láani ló xidal dispositivos? Paul Willies rabexa láani: «Dxiinreʼ dipa raloxni. Guirá ór cagoʼdo cós copy loni né rayopydo mod par diti guisac nagan buñ guiquiin láani. Teléfonos, tabletas o computadoras guirá ór rac copyni, por ngú láaca guirá ór rony copydo aplicación JW Library par labúu gonyni dxiin né guirá dispositivos reʼ. Guirási ór riaʼpy más grabaciones né publicaciones ló JW Library, por ngú rony copydo né ronytzaaydo software ni ronynéni dxiin». Ló naareʼ ló JW Library noʼ más de 200.000 publicaciones né más de 600.000 grabaciones de audio né video ló xidal diitz.

 Par gac copy aplicación reʼ, diti nosi raquiinni buñ ni nan rasaʼ láani. Láaca non siʼyibu xidal licencias xtuny software. Né toibsi licencia reʼ rasacni 1.500 dólares ló toib íz. Láaca, Departamento xtuny Programación de MEPS rony gaxt midid 10.000 dólares guirá íz, portín rasiʼyibu dispositivos de xidal marcas par ganyibu pal aplicación reʼ rony dxiin né nitisi computadoras, tabletas né teléfonos ni más nicopy.

 Por ni ma napno JW Library, ma diti tampa ronyno gaxt bidxiich par gony imprimirno, encuadernarno né guixelno publicaciones. Por ejemplo, guibiʼno xi góc né follet Examinando las Escrituras diariamente. Ló íz 2013 góc imprimir 12 millón de follet reʼ. Per ló íz 2020, nosi góc imprimir 5 millón, ná par ló dzúcu ma biaʼpy 700.000 publicadores ló guidopynac Gudxlio. ¿Xí góc? Nigoreʼ xidal herman roʼol láani ló JW Library. a

 JW Library labúu gacnéni looy de xidal mod. Por ejemplo, Geneviève, ni nabany gudx Canadá, nábu que aplicación reʼ ma gocnéni láabu par guisuidybu más. Láabu nábu: «Pal nabeʼya timontón libros guirá rosil par nasudi, diti ñoni láani. Per né aplicación reʼ nosi racaʼya guii tableta xtuni, né cú napa guiráca ni caquiinna. Ni rasudi guirá ór, ma gocnéni naʼ gapa toib fe nadip né tzoʼya más gax de Jehová».

 Aplicación reʼ nigolú cayacnéni lóono, máspa ló pandemia xtuny COVID-19. Por ejemplo, Charlyn, ni nabany Estados Unidos, ná: «COVID-19 noʼni ló guidopynac Gudxlio, ma más de tobiz yása guibiʼya publicaciones ni bireʼ ló guiich. Per ló JW Library radzelno guirá ni caquiinno par gac nadip fe xtunyno. Nigolú radudi guixquix Jehová por galrrascad sacróyen reʼ».

 Xidal buñ raniʼ xomod Faye, ni nabany gudx Filipinas. Láabu nábu: «Aplicación reʼ nigolú sacróyen nacni portín sitnéni guirá ni caquiinno par guibigaxno Jehová. Raquiinna láani par goola tempran, par guicadiaga ni gacné naʼ laʼga cayoni dxiin, par guisudi ni guibiʼno ló reunión né par guisudi la Biblia. Órni noʼya nalat, raquiinna láani par guibiʼya videos. Né órni cabésa par siiya o quiixi toib cós, raquiinna láani par goola la Biblia né stipnés publicaciones. ¡Aplicación reʼ nigolú rasacni!».

 Láaca nigolú racnéni lóono ló predicación. Por ejemplo, toib hermana de gudx Camerún nigolú bioladxbu toib texto ni biquiin xcompañerbu ló predicación. Chop tzón xomal goniiny naquiimbu texto reʼ per diti bisetnaladxbu láani. Láabu nábu: «Buenti bisetnaladxi tipnés diitz ni sieed ló textocu. Por ngú bixala aplicación reʼ, goyaʼya ló la Biblia né biyobi diitzcu ro sieed toib lupa. Aplicación reʼ racnéni guidzela textos ni rialadxi».

 Labúu rasaʼdo, rony copydo né ragoʼdo más cós ló aplicación JW Library portín raxelto donación ló donate.pr418.com de xidal mod. Modreʼ herman ni nabany ló guidopynac Gudxlio labúu raquiin láani. Nigolú raxquixdo lóoto por guirá donación ni radudyto né guidopy xcalnabanyto.

1. Octubre íz 2013: Bireʼ aplicación reʼ né gopni Traducción del Nuevo Mundo ni góc revisar ló diitz inglés íz 2013.

2. Enero íz 2015: Goyoʼ más publicaciones ni noʼ ló diitz inglés né después ló stipnés diitz.

3. Noviembre íz 2015: Ma labúu buny subrayarno ló publicación.

4. May íz 2016: Goyoʼ toib lagary ro ná «Reunión».

5. May íz 2017: Ma labúu bicaʼno notas.

6. Diciembre íz 2017: Goyoʼ Biblia de estudio ló diitz inglés.

7. Marz íz 2019: Ma labúu bilitno audios, bibiʼno videos sin nalitno láani né ma labúu goyoʼno ló referencias ni sieed ló Guía de estudio.

8. Enero íz 2021: Goyoʼ tipnés herramientas ni racné lóono guisuidyno buñ ló publicación ni laa, ¡Bibany goxtiguie!