Videos xtuny samblia de tzón govitz radxinni lainy xcalnabanyno né racnéni lóono guientzaayno ni ná la Biblia. Ló samblia de tzón govitz íz 2020 «¡Colguibaladx guirá ór!» noʼ 114 videos, né 43 de lainy nacni discurs xtuny Tidxó buñ ni nap xiroʼ Galnan né ni racné layibu. ¿Toibtica buelt ma gonabdiitzlo looy balaati dxiin né bidxiich rac gaxt loguiaʼ guirá videos reʼ la?

 Midid 900 herman ni noʼ ló guidopynac Gudxlio biquiinyibu xtiempyibu né xcalnanyibu par bunyibu programa xtuny samblia reʼ. Ló chop íz ni gocla dxiinreʼ, bunyibu dxiin casi 100.000 ór. Biquiinyibu, 70.000 ór par labúu nareʼ drama ni laa Nehemías: Galrrabaladx ni sieed de Jehová rony nadip lóono, drama reʼ goclani 76 minut.

 Xomod ma nanto, par labúu ñando guirá herman ni buny dxiinreʼ, nadzeldo lagary né guirá ni naquiinyibu par labúu ñac dxiinreʼ, nigolú góc gaxt xiroʼ bidxiich.

 Jared Gossman, ni rony dxiin ló Servicios de Audio né Video, ná: «Comité de Enseñanza xtuny tidxó buñ ni nap xiroʼ galnan raniiny layibu que ló guirá videos guireʼ buñ de xidal gudx né lagary. Modreʼ rienni que ló guidopynac Gudxlio noʼ xhermanno. Par labúu ñacni scú, 24 equipos ni noʼ ló 11 gudxrop bunyibu dxiin loguiaʼni, né par ñac guirá ndeʼ biquiinyibu xiroʼ bixiich, goyoʼyibu xpueltni né bunyibu dxiin toibsi».

 Par labúu nareʼ tipnés videos biquiinyibu equipos copy ni careʼ ló naareʼ né bisaʼyibu stipnés cós ni bireʼ ló videos reʼ. Guisetlano toibni, par labúu nareʼ drama ni laa, Nehemías: Galrrabaladx ni sieed de Jehová rony nadip lóono, bisaʼyibu tipnés cós lainy estudio xtuny Mount Ebo, ni noʼ gax Patterson (Nueva York). Par labúu naquiindo sacró guirá donación né nareʼni xomodpa góc ló dzú ni see, xhermanno bisaʼyibu yoʼyen né muros xomodpa góc lainy gudx Jerusalén ló dzú ni see. Tigaaga muro góc nasoʼ 6 metros, bisaʼyibu láani de tabla, bisiegyibu laidyni par ñenni xomod guiee. Muros reʼ labúu bidzaʼ xalagaryni par labúu naquiinni xidal buelt, né modreʼ diti bisaʼyibu xidal cós ni naquiinyibu ló dramacu. Ná scú, par labúu ñonytzaayibu guirá ni naquiinyibu, góc gaxt casi 100.000 dólares. a

 Órni ranno guirá dxiin ni góc loguiaʼ samblia de íz reʼ, más rasacni par lóono. Nandxichno que guirá xtem ni rac loguiaʼ dxiinreʼ raliskiaʼni laa Jehová ló guidopynac Gudxlio. Raxquixpado lóoto por donación ni radudyto par obra mundial, ni raxelto ló donate.pr418.com né ni raxelto de stipnés mod.