Ni líderes mundiales nili organizaciones internacionales diti labúu ronyibu que tzoʼ paz. Nabanyno ló toib dzú ronoʼgolu galrradíil desde ló Segunda Guerra Mundial. Midid 2.000 millones buñ, ndeʼ radudy diitz que, ti cuart buñ ni noʼ ló guidopynac Gudxlio nabanyibu lagary ronoʼgolu galrradíil.

 ¿Xigony buñgudxlio diti labúu ronyibu que tzoʼ paz? ¿Xí ná la Biblia?

1.  1. La Biblia ná que ló dzú ni nabanyno «buñ nosi sioʼyibu galrrasaʼ por láasiyibu, sasobladxyibu bidxiich, sacyibu buñ nabeʼt, buñ ni riatz, […] ni rasian sa’, [...] diti radxin toib acuerdo, [...] diti labúu rony mandary láacabu, buñ nadox, [...] sacyibu buñ nayaʼ, buñ farmay». Guirá ndeʼ ronyni que nili ronyibu rutirigaʼlni layibu par tzoʼ paz (2 Timoteo 3:2-4).

2.  2. Buñgudxlio, diti labúu rony reglaryibu galnagan, pal ni Bisaʼ layibu, Jehová a diti racné layibu. La Biblia rasuidy que «buñ diti labúu ragonésbu láacabu. Buñ ni casaa nili labúu ragonésbu mod rasaabu» (Jeremías 10:23).

3.  3. Gudxliogoxreʼ noʼni xan xomandary toib ni nigolú mal né ni nap galnadip «ni cascú ló guidopynac gudxlio». Nacbu Buñdzab. Láaca guidopynac Gudxlio «noʼni ladxña Buñdzab», sioʼra galrradíil né guerr (Apocalipsis 12:9; 1 Juan 5:19).

 La Biblia ná Dios que Dios ngú ni guitné paz, né diti buñgudxlio.

•   «Portín naʼ nantzaya pensary ni napa par lóoto, —ná Jehová—. Nainyna guiguaʼto goxt, diti guisacloto cós mal. Nainyna tzoʼ ni guicaʼto ló dzú ni sietra né gapto esperanza» (Jeremías 29:11).

 ¿Ximod sony cumplir Dios ni ma goniʼ? La Biblia ná: «Dios ni radudy paz sadudy galmandary lóoto par guixatñeʼto Buñdzab» (Romanos 16:20). Dios saquiin toib gobierno ni noʼ lainy guibá par guitné paz ló Gudxlio. La Biblia rabeʼ láani «Gobierno xtuny Dios», né Rey xtunyni nacbu Jesucristo (Lucas 4:43). Órni Jesús gony mandary Gudxlio, buñ sasuidy guibany goxt (Isaías 9:6, 7).

•   Pal nainy looy ganlo más, bíil artículo ni laa «¿Qué cosas logrará el Reino de Dios?».