Beʼo 19 de may íz 2022, Consejo de Seguridad de las Naciones Unidas bisetlaa ni goniʼ 75 buñxirop que ló guidopynac Gudxlio «cayacxiroʼ galsii xtol guerr ni cayac gudx Ucrania ná maca noʼni xtol pandemia né ni cayac nalaʼgolu, nachichgoluʼ o por ni cayacgoluʼ guiee». Después guiich ni laa The Economist bisetlaa que guerr cayonyni que tzoʼ galsii né xtolni xidalguixo buñ sadudy ló galrralán. La Biblia rasetlaa que guirá ndeʼ sac ló xtzúno, per láaca loni sieed ximod guicalóno galsii.

•    Jesús goniʼ: «Gudxrop sadíil, né gobierno láaca sacaló saʼ gobierno, sioʼ galrralán» (Mateo 24:7).

•    Ló libro xtuny Apocalipsis rasetlaa tap buñ ni dxiʼp mainy. Toibticani rony representar guerr. Né láaca noʼ stoib ni rony representar galrralán, ndeʼ sony que buñ sasac nagan siʼ ni guá portín buñ satoʼ láani más car. La Biblia ná: «Né órcu bibiʼya toib mainy yaʼas. Ni dxiʼp láamu caʼ toib balanz. Bicadiaga ni ralooypani nac toib rudx, ni goniʼ: Toib litro de trigo por toib denario né tzón litros de cebada por toib denario; diti kitlo aceity de oliva nili vino» (Apocalipsis 6:5, 6).

 Profecías reʼ ni rasetlaa de galrralán cayac cumplirni nigoreʼ né la Biblia ná que ndeʼ gac «ló dzú ni ma guidubylagaʼ» (2 Timoteo 3:1). Par ganlo más de «ló dzú ni ma guidubylagaʼ» né xi rony representar tap mainy ni rasetlaa libros xtuny Apocalipsis, bibiʼ video ni laa, Íz 1914 gudxliogoxreʼ bidzaʼ mod nacni né bíil artículo ni laa, «¿Qué representan los jinetes del Apocalipsis?».

•    Ló la Biblia sieed consej ni labúu gacné lóono par labúu guicalóno galnagandaʼ, xomod órni riaʼpy ló cós o láaca órni noʼ galsii. Bibiʼ tipnés ejemplos ni sieed ló artículo ni laa, «Cómo vivir con menos».

•    La Biblia láaca radudyni esperanza lóono que sadxin dzú guirá ndeʼ sac reglarni. Rasetlani que sadxin dzú «sioʼgolu ni guá buñ ló gudxlio» né guirá buñ sap ni guá (Salmo 72:16). Par ganlo más xi esperanza radudy la Biblia ni gac ló dzú ni sietra né xigony labúu gaplo confianz loni, bíil artículo ni laa, «La esperanza real de un mañana mejor».