Ló guerr rac gaxt xiroʼ bidxiich.

•   «Laʼga cayac xidal guerr ló guidopynac gudxlio rac gaxt 2,2 billones de dólares ni riax soldad» (The Washington Post, 13 de febrero íz 2024).

 Per diti nosi bidxiich ranit órni rac guerr. Por ejemplo, buny pensary ló guerr ni cayac Ucrania.

•   Soldad. Ma goity o bireʼ herid midid 500.000 soldad ló chop íz ni cayacla guerr reʼ.

•   Buñ ni diti nac soldad. Las Naciones Unidas ná, que más de 28.000 buñ ni diti nac soldad ma goity o bireʼ herid. Toib buñ ni nap dxiin ló ONU goniʼ: «Diti labúu gantzayno balacpa buñ ni diti nac soldad ma goity ló guerr reʼ». a

 Xiroʼgolu galrrioʼob cadudy buñ gudxlio ló, xtol guerr né stipnés galrradíil ni rac.

•   114 millones. Midid reʼ de buñ ma bisian lidx né see stoib lagary xtol guerr né stipnés galrradíil desde septiembre íz 2023.

•   783 millones. Midid reʼ buñ cadudy ló xiroʼ galrralán. «Xtol guirá galrradíil ni cayac, xidalguixo buñ calaʼn, portín midid 70% de buñ ni cadudy ló galrralán rabésyibu ro cayac guerr» (Programa Mundial de Alimentos).

 ¿Sadxin toib dzú ni ma diti sioʼ guerr la? Ni cabésno tzoʼ paz, ¿nacni toib bacaʼal la? ¿Guiránac bidxiich ni noʼ ló guidopy nac gudxlio labúu sabeʼni galrralán né galsii ló gudxlio reʼ la? ¿Xí ná la Biblia?

 Ló Biblia ritlaa toib mainy né toib buñ ni dxiʼp láamu, ndeʼ radudy diitz guerr né stipnés galrradíil ni ñoʼ ló guidopy gudxlio.

•   «Bireʼ stoib mainy, ni nac color nixináa. Né ni dxiʼp láamu cuaʼ toib espad xiroʼ né cuaʼbu permís par cueʼbu paz ló gudxlio né buñgudxlio nagaity saʼ» (Apocalipsis 6:4).

 Después bireʼ schop buñ ni láaca dxiʼp mainy, ndeʼ radudy diitz guirá cós ni cayac ló gudxlio ló naareʼ: galrralán né galguitz ni ragaity xidal buñ né stipnés cós (Apocalipsis 6:5-8). Par ganlo más de profecía reʼ né xigony napno confianz que cayac cumplirni ló naareʼ, bíil artículo «¿Qué representan los jinetes del Apocalipsis?».

 Mápa mer, bidxiich ni noʼ ló gudxlio ma diti saquiinni par guerr, per diti sony buñgudxlio láani. La Biblia ná:

•   Dios «ranitlóbu guerr ló guidopynac gudxlio» (Salmo 46:9).

•   Dios sony copy guirá cós ni canitló xtol guerr. «Saspiichbu nís ni rareʼ bisalóyibu, né ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob. Cós ni góc nírcu ma diti noʼni» (Apocalipsis 21:4).

•   Dios sony que guiráno sabanyno goxt. «Xcudxi saguaʼ goxtiguie, sabésyibu lainy yoʼ ro diti sioʼ ni guisacloyibu né lagary ro guisaladxtzayibu» (Isaías 32:18).

 Mod ná profecías ni sieed ló la Biblia, guirá guerr né stipnés cós ni cayac ló naareʼ radudyni diitz que mápa mer tzoʼ paz ló gudxlio reʼ.

 ¿Xí láani gony Dios par tzoʼ paz? Saquiimbu Gobierno xtunybu, Gobierno reʼ noʼni guibá (Mateo 6:10). Par ganlo xi láani ngú Gobierno reʼ né ni gonybu por looy, bibiʼ video dop reʼ: ¿Xí ngú Gobierno xtuny Dios?