Doming 20 de noviembre íz 2022 bilox toib Conferencia ni goloʼ Naciones Unidas ro goniʼyibu ximod caxingoluʼ ló Gudxlio (COP27). Delegados ni bidxin lagarycu, bitopyibu bidxiich par labúu ñacnéyibu stipnés gudxrop ni más caxin. Ná ndeʼ nac primerdiguieʼ buelt ni bidxinyibu toib acuerdo, xidal buñ rony crer que diti sony reglarni galnagancu.

•   «Noʼya de acuerdo ni bitopdo bidxiich par gac reglar galnagancu […]. Per diti ndeʼsi non gac […]. Gudxlio reʼ cayaity cabanyni» (António Guterres, secretario general xtuny Naciones Unidas; 19 de noviembre íz 2022).

•   «Gudxlio reʼ mápa mer guinitlóni» (Mary Robinson, ni góc presidenta gudx Irlanda né ni góc comisionada xtuny ONU ló Derechos Humanos; 20 de noviembre íz 2022).

 Máspa mbioxhlas rioʼyibu ló galrrasaʼ por Gudxlio reʼ. ¿Gudxrop labúu gonyibu dxiin toibsi par gonytzaayibu ló Gudxlio la? ¿Xí ná la Biblia?

 Ná noʼ ni rony dxiin nadip par diti guixin ló Gudxlio né ronyibu láani né guidopy xcalnabanyibu, la Biblia ná que goxeʼsi cós labúu gonyibu. Guibiʼno chop razón:

•   «Diti labúu condop buñ ni napant» (Eclesiastés 1:15).

   Ni radudyni diitz. Gobiernos diti rarebuʼ xchiinyibu portín diti goyaʼyibu par gony mandaryibu láacayibu (Jeremías 10:23). Ná gudxrop ñacyibu toibsi, diti labúu sabeʼyibu galnagan ni noʼ ló Gudxlio.

•   «Nosi sioʼyibu galrrasaʼ por láasiyibu, sasobladxyibu bidxiich […], diti radxinyibu toib acuerdo» (2 Timoteo 3:2, 3).

   Ni radudyni diitz. La Biblia ná que buñ ni noʼ ló naareʼ diti sioʼyibu galrrasaʼ por stipnés né diti sioʼyibu de acuerdo par gonyibu dxiin toibsi né gacnéyibu stipnés. ¿Scú nac buñ ló naareʼ ja?

 Diti gobierno ni noʼ ló naareʼ guitné galnasác ló dzú ni sietra. Dios ma golú toib ni labúu gony mandary Gudxlio: láabu ngú Jesucristo. Ndeʼ ni ná la Biblia de láabu:

•   «Gobierno sioʼni ladxñabu. Gac laabu Maravilloso Consejero, Dios Poderoso, Padre Eterno, Príncipe de Paz» (Isaías 9:6).

 Jesús sony mandary ló gobierno xtuny Dios, toib gobierno ni noʼ lainy guibá (Mateo 6:10). Láabu napbu galnadip, sabiduría né raniiny ganbu Gudxlio né ganbu guirá buñ ni guibany loni (Salmo 72:12, 16). Órni gony mandarybu sanitlóbu buñ «ni caxin ló gudxlio» né sonytzaaybu láani (Apocalipsis 11:18; Isaías 35:1, 7).

 Pal naniiny looy ganlo más chú labúu gony reglar ló Gudxlio, bíil artículo ni laa, «¿Qué dice la Biblia sobre el cambio climático y nuestro futuro?».