«Guirácano raniiny guibanyno xomod nírcu» (Ángela Merkel, canciller alemana).

 Sigory ronyno pensary modreʼca portín rabiʼno ximod pandemia xtuny COVID-19 huaserani né ronyni que buñ tudy ló galnagan. Per ¿xí láani ngú ni radudy diitz guibanyno xomod nírcu? ¿Xí láani ngú ni raniiny buñ gony stoib?

•   Guibanyibu xomod antes de nasaló pandemia. Tipnés buñ rasetnaladxyibu ximod bidzakyibu buñ, ro labúu goduʼuchyibu saʼyibu, gonásyibu ña saʼyibu né labúu goyeeyibu tipnés lagary. Stipnés raniʼ xomod goniʼ doctor Anthony Fauci, a «guibanyno xomod nírcu radudyni diitz que labúu tzoʼno restaurantes, teatros né stipnés lagary»

•   Guibanyibu más sacró. Noʼ ni rony pensary que nacni toib oportunida par guibanyibu más sacró. Buñ ná guitzaʼ mod nabany, portín diti ragobioo buñ saʼ, noʼ galguitz né láaca portín dxiin ni noʼ nanoyni. Xomod naʼ Klaus Schwab, fundador xtuny Foro Económico Mundial, «pandemia reʼ nacni toib oportunida né por ngú gonyno pensary xipa cayonyno».

 Tipnés buñ cualó xiroʼ galnagan né por ngú ronyibu pensary que diti labúu satzaʼ mod nabanyibu. Xidalyibu bisnit xchiin, lidx, xhomilyibu né dada caxoʼyibu.

 Ni toib de lóono labúu guiniʼ ximod sac órni guilox pandemia reʼ (Eclesiastés 9:11). Per la Biblia racné lóono par labúu guicalóno guirá galnagan ni sietra. Láaca rasetlani tipnés cós ni labúu gaplo confianz, cós ni dipa ma godudy ló xpensarylo.

 Ma xidzú tiemp de goloʼ bisetlaa la Biblia que ló dzú ni ma guidubylagaʼ gudxliogoxreʼ sioʼgolu galguitz ni sagaity xidalguixo buñ (Lucas 21:11; Mateo 24:3). Órni rolno la Biblia né rabiʼno ximod pandemia xtuny COVID-19 huaserani radudyno cuent que cayac cumplir profecía ni goniʼ la Biblia gac, xomod galrralán, guerr né xo rodann.

 ¿Ximod racnéni lóono ganno láani? Ná pal guidxin dzú guiabloo ló pandemia reʼ, la Biblia raiby lóono que ma nabanyno «ló dzú ni ma guidubylagaʼ sieed tiemp nagan, né nagan par gony guantary buñ láani» (2 Timoteo 3:1). Órni ranno láani radudyno cuent que sacalóno xiroʼ galnagan ló dzú ni sietra.

 La Biblia rabexatzay ximod sácni: raibyni lóono que gudxliogoxreʼ mápa mer sadzaʼni. ¿Per ximod sadzaʼni?

 La Biblia diti nosi raniʼ de guirá galnagan ni racalóno, láaca raibyni lóono que sioʼ dzú sadzaʼ mod nabanyno. Raniʼni ximod ló dzú ni sietra sabanyno sacróyen, ni guirá gobiernos raniiny gony per diti rarebuʼni. Portín nosi Dios ngú ni labúu gony láani. Láabu «saspiichbu nís ni rareʼ bisalóyibu, né ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob. Cós ni góc nírcu ma diti noʼni» (Apocalipsis 21:4).

 Jehová b Dios ná: «¡Colguibiʼ! Cayony cobi guirá cós» (Apocalipsis 21:5). Láabu sony reglarbu guirá galnagan ni noʼ ló Gudxlio né láaca galnagan ni noʼ xtol pandemia reʼ. Dios ma bidudy xtiitz gony guirá ndeʼ:

•   Sacno buñ nasac tanli ló sentido físico né mental. Ma diti saxoʼno nili saityno (Isaias 25:8; 33:24).

•   Sonyno dxiin ni sioladxno. Diti sioʼ dxiin ni nigolú nanoy, nanaa nili dxiin ni guistoʼby lóono (Isaias 65:22, 23).

•   Guirácano sapno ni guáno. Ma diti sioʼ galsii nili galrralán (Salmo 72:12, 13; 145:16).

•   Ma diti sioʼob xcalnabanyno por guirá ni gosaclono né sarebuʼ esperanza ni napno que buñ ni ronladxno sabany stoib (Isaías 65:17; Hechos 24:15).

 ¿Ximod racnéni lóono ganno láani? La Biblia ná: «Esperanza reʼ ranásdxichni lóono xomod toib ancla ranásdxichni toib bark» (Hebreos 6:19). Esperanza ni napno que sadxin dzú sadzaʼ mod nabanyno racnéni lóono. Racnéni lóono par guicalóno galnagan ni napno nigoreʼ, par diti tampa tzoʼno ló galrrasaʼ, par diti guidzuibyno né guibanyno nakit.

 ¿Per labúu gonyno crer ló ni ná la Biblia la? Bíil artículo ni laa, «Ni rasuidy la Biblia nigolúni».

•   Guisac vida par looy

   La Biblia ná: «Buñ ni noʼ xcalrrien rapni láabu» (Eclesiastés 7:12).

   ¿Ximod guisobno consej reʼ? Goloʼ xcalrrienlo órni coʼlo guiclo xigonylo né modreʼ diti tampa saxoʼlo. Gon ximod naʼ buñchiin ganno lóono, pal noʼ riesga guica galguitz reʼ lóono, né balac buñ ma góc vacunar. Guirá ndeʼ sacné looy par ganlo pal noʼ riesga guicaʼ galguitz reʼ looy lagary ro rabéslo.

•   Goloʼ xcalrrienlo

   La Biblia ná: «Buñ ni noʼ xcalrrien ralsit de cós mal, per buñ ni diti noʼ xcalrrien radudy midid rapbu confianz láacabu» (Proverbios 14:16).

   ¿Ximod guisobno consej reʼ? Buny dada rutirigaʼlni looy par gaplo looyca. Buñnan ná que coronavirus labúu gaclani stidxo.

•   Biyopy información ni nigolú

   La Biblia ná: «Buñ ngaʼal rony crer guirá ni racadiag, per buñ ni noʼ xcalrrien racaa cuidad ni rony» (Proverbios 14:15).

   ¿Ximod guisobno consej reʼ? Buny pensary ló xi información gonylo crer. Nigolú rasac guiyopylo información ni nigolú, portín pal yaca la, labúu sonylo crer información ni diti nigolú, né ngú labúu coʼ riesga xcalnabanylo.

•   Buny pensary sacró

   La Biblia ná: «Diti guiniʼlo: ¿Xigony dzú ni see gocni más sacró que nigoreʼ? Portín diti naní guiclo pal ranabdiitzlo ngú» (Eclesiastés 7:10).

   ¿Ximod guisobno consej reʼ? Biyopy mod guibanylo sacró nigoreʼ. Diti gonylo pensary ximod bibanylo antes de nasaló pandemia reʼ nili gonylo pensary que xtol pandemia reʼ ma diti labúu ronylo stipnés cós ni bunylo nírcu.

•   Gop respet stipnés

   La Biblia ná: «Gop respet guirá clas buñ» (1 Pedro 2:17).

   ¿Ximod guisobno consej reʼ? Tigaaga buñ gadzé mod cualóyibu pandemia reʼ. Por ngú gop respet ni rony pensary stipnés buñ, né buny ni ma goloʼlo guiclo gonylo. Gop respet né góc buñtzay né buñ ni diti ma góc vacunar, buñgol o buñ ni caxoʼsii.

•   Gop paseins

   La Biblia ná: «Galnadxiʼ nacni paseins né natzayni» (1 Corintios 13:4).

   ¿Ximod guisobno consej reʼ? Gop paseins buñ ni radzuiby gony cós ni bunybu antes de nasaló pandemia. Laʼga buñchiin guidudy más permís, pal rasacnaganlo gonylo dxiin ni bunylo nírcu bidudy tiemp né gop paseins looyca.

 Guirá diitz sacró ni sieed ló la Biblia nigolú racnéni testigos xtuny Jehová. Racnéni layibu par guicalóyibu pandemia reʼ. Láaca rasobdiitzyibu mandary ni sieed ló la Biblia de guidopyibu toibsi par guienyibu Dios, modreʼ racnéyibu saʼyibu. (Hebreos 10:24, 25). Guirá nac buñ labúu guidop ló xireunión testigos xtuny Jehová, nigoreʼ por pandemia reʼ cayacni por videoconferencia.

 Tipnés buñ ná que órni rieeyibu reunión xtuny testigos xtuny Jehová racnéni layibu guicalóyibu guirá galnagan reʼ. Por ejemplo, toib sois ni gop COVID-19 cuacuentbu toib invitación par guidopbu ló reunión ni nap testigos xtuny Jehová por videoconferencia. Na galrrioʼob ni bisian galguitz reʼ diti bireʼni, reunióncu gocnéni láabu nasacbu sacró. Después láabu goniʼbu, rasaca que ma naʼca de famil reʼ. Ni roola la Biblia racnéni naʼ guisaca sacró, né roni pensary ló cós ni guicaʼya ló dzú ni sietra modreʼ diti roni pensary ló galnagan ni cacalóya nigoreʼ. Nigolú radudi guixquix por ni bidzela mod labúu guibigaxa roʼno Dios, ni diti bidzela por xidal íz.